Фәсил 122
Пилатдан Һирода, сонра да ҝеријә
ИСА МӘСИҺ падшаһ олдуғуну Пилатдан ҝизләтмир, бунунла белә, падшаһлығынын Рома империјасы үчүн һеч бир тәһлүкә јаратмадығыны изаһ едир. О дејир: «Мәним падшаһлығым бу дүнјадан дејил. Падшаһлығым бу дүнјадан олсајды, тәбәәләрим мүбаризә апарыб гојмаздылар ки, мән јәһудиләрин әлинә верилим. Хејр, мәним падшаһлығым бурадан дејил». Беләҹә, Иса падшаһлығынын олдуғуну үч дәфә тәсдиг едир, амма ҝөстәрир ки, падшаһлығы бу дүнјадан дејил.
Пилат јенидән она тәзјиг ҝөстәрир: «Демәли, сән падшаһсан?» О, Исанын падшаһ олуб-олмадығыны (падшаһлыг бу дүнјадан олмаса да) дәгигләшдирмәк истәјир.
Иса Пилатын дүзҝүн нәтиҹәјә ҝәлдијини ҝөстәрәрәк она дејир: «Буну [мәним падшаһ олдуғуму] сән өзүн дејирсән. Мән һәгигәтә шәһадәт етмәк үчүн доғулуб дүнјаја ҝәлмишәм. Һәгигәт тәрәфиндә олан һәр бир адам сәсимә гулаг асыр».
Бәли, јер үзүнә ҝәлмәкдә Исанын әсас мәгсәди «һәгигәт»ә, хүсусилә дә Падшаһлыгла бағлы һәгигәтә шәһадәтлик етмәкдир. О, бунун үчүн һәјатыны белә вермәјә һазырдыр. Пилат: «Һәгигәт нәдир?!» — дејәрәк Исадан артыг изаһат ҝөзләмир. Ешитдији шејләр һөкм чыхармаг үчүн кифајәтдир.
Бундан сонра Пилат бајырда дуран ҹамаатын гаршысына чыхыр. Ҝөрүнүр, Иса да онунладыр. Пилат бөјүк каһинләрә вә онларын јанында дуранлара хитабән дејир: «Мән бу адамда бир тәгсир ҝөрмүрәм».
Бу гәрар ҹамаатын һиддәтинә сәбәб олур вә онлар тәкид едирләр: «Бу адам бүтүн Јәһудејада, Галилејадан тутмуш та бураја кими тәлимләри илә халгы гызышдырыр».
Јәһудиләрин ағылсызлығы, јәгин, Пилаты тәәҹҹүбләндирир. Бөјүк каһинләр вә ағсаггаллар гышгыраркән Пилат үзүнү Исаја тутуб дејир: «Ешидирсән, сәнә гаршы нәләр дејирләр?» Иса исә һеч бир ҹаваб вермир. Бу шиддәтли иттиһамлар гаршысында Исанын сакит галмасы Пилаты һејрәтләндирир.
Сонра Пилат Исанын Галилејадан олдуғуну өјрәнир вә буна мәсулијјәтдән јахасыны гуртармаг үчүн бир фүрсәт кими бахыр. Бу вахт Галилеја һакими Һирод Антипа (Бөјүк Һиродун оғлу) Пасха бајрамы илә әлагәдар Јерусәлимдәдир. Бу сәбәбдән Пилат Исаны онун јанына ҝөндәрир. Бундан әввәл Һирод Антипа Вәфтизчи Јәһјанын бојнуну вурдурмушду. Сонралар Исанын мөҹүзәләри барәдә ешидәндә онун дирилмиш Јәһја олдуғуну саныб бәрк горхуја дүшмүшдү.
Инди исә Һирод Исаны ҝөрәҹәји үчүн чох севинир. Амма Һироду нә Исанын рифаһы, нә дә она гаршы едилән иттиһамларын доғру олуб-олмадығы марагландырыр. Һирод садәҹә үмид едир ки, бәлкә Иса бир нечә мөҹүзә ҝөстәрди.
Анҹаг Иса Һиродун арзусуну үрәјиндә гојур. О һәтта Һиродун бир дәнә дә олсун, суалына ҹаваб вермир. Пәрт олмуш Һирод вә онун мүһафизәчиләри Исаны лаға гојмаға башлајырлар. Онун әјнинә ҝөзәл бир либас ҝејиндириб әлә салырлар. Сонра Пилатын јанына ҝөндәрирләр. Бунун нәтиҹәсиндә чохдан бир-биринә дүшмән олан Һиродла Пилат дост олурлар.
Исаны Пилатын јанына ҝәтирирләр. Пилат бөјүк каһинләри, јәһуди рәһбәрләрини вә халгы бир јерә јығыб дејир: «Сиз бу адамы јаныма ҝәтириб дединиз ки, о, ҹамааты үсјана галдырыр. Мән ону сизин гаршынызда диндирдим, анҹаг онда бир ҝүнаһ тапмадым. Сизин иттиһамларыныз әсассыздыр. Һирод да онда бир тәгсир тапмадығындан ону ҝери гајтарды. Бу адам өлүмә лајиг бир иш ҝөрмәјиб. Буна ҝөрә дә ону ҹәзаландырыб бурахаҹағам».
Беләликлә, Пилат Исаны дүз ики дәфә ҝүнаһсыз елан едир. Пилат баша дүшүр ки, каһинләр Исаны пахыллыгдан әлә верибләр. Бу сәбәбдән ону азад етмәјә чалышыр. Бу вахт баш верән бир һадисә онун бу истәјини даһа да ҝүҹләндирир. Пилат һаким күрсүсүндә отурдуғу заман арвады хәбәр ҝөндәриб дејир: «Бу салеһ адамла ишин олмасын, онун уҹбатындан бу ҝеҹә јухуда [ҝөрүнүр, Аллаһдан алдығы јухуда] јаман әзијјәт чәкмишәм».
Пилат билир ки, бу ҝүнаһсыз адамы бурахмалыдыр, амма неҹә? Јәһја 18:36—38; Лука 23:4—16; Матта 27:12—14, 18, 19; 14:1, 2; Марк 15:2—5.
▪ Иса Падшаһлыгла бағлы суала неҹә ҹаваб верир?
▪ Јер үзүндә јашајаркән Исанын бәјан етдији «һәгигәт» нәдир?
▪ Пилат һансы һөкмү чыхарыр вә халг буна неҹә јанашыр? Пилат сонра нә едир?
▪ Һирод Антипа кимдир? О, нәјә ҝөрә Исаны ҝөрәҹәјинә чох севинир вә она нә едир?
▪ Пилат Исаны нә үчүн азад етмәјә чалышыр?