Бөлмә 5
Һәјатын бөјүк мә’насы вар
1, 2. Биз нәјин әсасында дејә биләрик ки, Аллаһ бизим гајғымыза галыр вә һәјати ваҹиб олан суаллара ҹаваб вермәк үчүн һара мүраҹиәт етмәлијик?
Јер күрәси вә орада јашајан һәр бир ҹанлы варлыг, Јараданын мәһәббәт Аллаһы, әсл гајғыкеш бир Аллаһ олдуғуну ҝөстәрир. Онун Кәламы олан Мүгәддәс Китаб да, Онун гајғыкеш Аллаһ олдуғуну мә’лум едир; бу китаб, “Биз нә үчүн јер үзүндә јашајырыг?” вә “Бизим ҝәләҹәјимиз неҹә олаҹаг?” суалларына ән јахшы ҹаваблар тәгдим едир.
2 Биз бу суаллара ҹаваб тапмаг үчүн Мүгәддәс Китабы тәдгиг етмәлијик. Аллаһын Кәламында дејилир: “Сиз ону ахтарсаныз, өзүнү сизә тапдырар; фәгәт сиз ону тәрк етсәниз, сизи тәрк едәр” (2 Тарихләр 15:2). Аллаһын Кәламыны тәдгиг етмәк, Онун бизә аид олан нијјәти барәдә нәји ашкар едир?
Аллаһ инсанлары нә үчүн јарадыб?
3. Аллаһ Јери нә үчүн јарадыб?
3 Мүгәддәс Китаб ҝөстәрир ки, Аллаһ јер үзүнү хүсусилә инсанлар үчүн һазырламышдыр. Ишаја 45:18 ајәсиндә Јер һаггында дејилир ки, Аллаһ “ону бошуна” јаратмајыб “үзәриндә отурулсун дејә она шәкил” вериб. Аллаһ, инсанларын садәҹә олараг јашамалары үчүн дејил, һәм дә һәјатдан там зөвг ала билмәләри үчүн, јер үзүнү лазым олан һәр бир шејлә тә’мин едиб (Јарадылыш 1-ҹи вә 2-ҹи фәсилләр, МКШ).
4. Аллаһ илк инсанлары нә үчүн јарадыб?
4 Аллаһ өз Кәламында, илк инсанларын, Адәм вә Һәвванын јарадылмасы барәдә мә’лумат верир вә инсан аиләси үчүн өз нијјәтини ашкар едир. О дејир: “Өз сурәтимизә вә бәнзәримизә ҝөрә инсаны јарадаг. Гој о, дәниздәки һејванлара, ҝөјдәки гушлара, јердәки һејванлара, бүтүн јер үзүнә вә јердә сүрүнән ҹанлыларын һамысына һөкмранлыг етсин” (Јарадылыш 1:26, МКШ). Инсанлара, “бүтүн јер үзүнә” вә һејванлара нәзарәт етмәк тапшырылмышды.
5. Илк инсанлар һарада јерләшдирилмишди?
5 Аллаһ, Јахын Шәргдә, Еден адланан әразидә парка бәнзәр бөјүк бир бағ салды. Сонра, “Рәбб Аллаһ инсаны ҝөтүрүб Еден бағына гојду ки, ону беҹәрсин вә сахласын”. Һәмин јер, илк инсанлара јемәк үчүн лазым олан һәр ҹүр гиданын олдуғу бир ҹәннәт иди. Орада һәм “ҝөзәл ҝөрүнүшлү вә јемәк үчүн ширин мејвәли ҹүрбәҹүр ағаҹлар”, һәм дә башга биткиләр вә бир чох мараглы һејван нөвләри варды (Јарадылыш 2:7-9, 15, МКШ).
6. Инсанлар һансы әгли вә физики габилијјәтләрлә јарадылмышдылар?
6 Илк инсанлар камил бәдәнлә јарадылмышды, буна ҝөрә дә онлар хәстәләнмәли, гоҹалмалы вә өлмәли дејилдиләр. Онлара һәмчинин, сечмәк азадлығы кими башга габилијјәтләр дә верилмишди. Онларын неҹә јарадылдыглары Јарадылыш 1:27 (МКШ) ајәсиндә изаһ едилир: “Аллаһ инсаны Өз сурәтиндә јаратды, Аллаһын сурәтиндә јаратды; онлары киши вә гадын олараг јаратды”. Аллаһын сурәтиндә јарадылдығымыз үчүн, биз јалныз физики вә әгли габилијјәтә дејил, әхлаги вә руһани кејфијјәтләрә дә маликик вә јалныз онлары тә’мин етдикдә һәгиги мә’нада хошбәхт ола биләрик. Аллаһ гидаја, суја вә һаваја олан тәләбатлары тә’мин етдији кими, бу саһәдә олан тәләбатларын да гајғысына галмышдыр. Иса Мәсиһин дедији кими, “инсан јалныз чөрәклә јашамаз, лакин Аллаһын ағзындан чыхан һәр бир сөзлә јашар” (Матта 4:4).
7. Илк инсан ҹүтүнә һансы тапшырыг верилмишди?
7 Бундан әлавә, илк инсан ҹүтү Еден бағында оларкән, Аллаһ онлара ҝөзәл бир тапшырыг верди: “Төрәјиб чохалын вә јер үзүнү долдурун” (Јарадылыш 1:28, МКШ). Бунунла да, онларын чохалмалары вә дүнјаја камил ушаг ҝәтирмәләри мүмкүн иди. Онлар, инсанларын сајы артдыгҹа, парка бәнзәр Еден бағынын әразисини ҝенишләндирәрәк севинҹвериҹи ишлә мәшғул олаҹагдылар. Нәтиҹәдә, бүтүн јер үзү әбәди јашамаг имканына малик олан камил хошбәхт инсанларын мәскунлашдығы ҹәннәт олаҹагды. Мүгәддәс Китабын вердији мә’лумата ҝөрә, бүтүн бунлара башланғыҹ вердикдән сонра, “Аллаһ ҝөрдү ки, јаратдығы һәр шеј чох ҝөзәлдир” (Јарадылыш 1:31, МКШ; һәмчинин Мәзмур 118:17 ајәсинә дә бахын).
8. Инсанлар Јерә неҹә гајғы ҝөстәрмәли идиләр?
8 Бурадан ајдын олур ки, инсанлар Јери өз хејирләри үчүн истифадә етмәли идиләр. Анҹаг буну мәс’улијјәт һисси илә етмәли идиләр. Инсанлар Јерин мәһведиҹиси дејил, горујуҹусу олмалы идиләр. Шаһиди олдуғумуз кими, бу ҝүн Јерин мәһв едилмәси Аллаһын ирадәсинә зиддир вә буну едәнләр јер үзүндәки һәјатын мә’насына гаршы зидд давранырлар. Һәмин инсанлар буна ҝөрә ҹаваб вермәли олаҹаглар, чүнки Мүгәддәс Китаб хәбәр верир ки, Аллаһ “јери тәләф едәнләри тәләф” едәҹәкдир (Вәһј 11:18).
Аллаһын нијјәти дәјишмәјиб
9. Биз нәјә ҝөрә әминик ки, Аллаһын нијјәти јеринә јетәҹәкдир?
9 Беләликлә, камил инсан аиләсинин јер үзү ҹәннәтдә әбәдијјән јашамасы, ән башланғыҹдан Аллаһын нијјәти иди. Онун нијјәти дәјишмәјиб! Бу нијјәт мүтләг јеринә јетәҹәкдир. Мүгәддәс Китабда дејилир: “Ордуларын Рәбби анд вериб деди: Ҝерчәк, неҹә дүшүндүмсә елә олаҹаг; вә неҹә гәрарлашдырдымса елә дә дураҹаг”. “Мән сөјләдим вә јеринә јетирәҹәјәм; мән гәрарлашдырдым вә ону едәҹәјәм” (Ишаја 14:24; 46:11).
10, 11. Иса, Петер вә мәзмурчу Давуд, Ҹәннәт һаггында нә демишләр?
10 Иса Мәсиһ, ҝәләҹәјә үмид әлдә етмәк истәјән бир адамла сөһбәтиндә, Аллаһын јер үзүндә ҹәннәти бәрпа етмәк нијјәти барәдә белә деди: “Мәнимлә бәрабәр ҹәннәтдә олаҹагсан” (Лука 23:43). Һәвари Петер дә јени дүнја барәдә габагҹадан бунлары демишдир: “Биз, Онун вә’динә ҝөрә јени ҝөјләр [ҝөјләрдән идарә едәҹәк јени һакимијјәт] вә јени јер [јени инсан ҹәмијјәти] ҝөзләјирик ки, онларда салеһлик өмүр сүрүр” (2 Петер 3:13).
11 Гаршыдакы јени дүнја вә онун нә гәдәр сүрәҹәји барәдә Мәзмурчу Давуд да јазмышдыр. О, габагҹадан демишдир: “Салеһләр јери мирас алар вә онда әбәдијјән јашајарлар” (Мәзмур 37:29). Бу сәбәбдән Иса вә’д етмишдир: “Һәлимләр нә бәхтијардырлар! Чүнки јери мирас алаҹаглар” (Матта 5:5).
12, 13. Гысаҹа олараг Аллаһын бәшәријјәт үчүн олан бөјүк нијјәти һаггында данышын.
12 Һәр нөв пислик, ҹинајәт, хәстәлик, кәдәр вә ағры олмадан, јер үзү ҹәннәтдә әбәди јашамаг неҹә дә бөјүк үмиддир! Аллаһын пејғәмбәрлик Кәламы өзүнүн сонунҹу китабында, бу бөјүк үмиди белә сөзләрлә јекунлашдырыр: “Аллаһ онларын ҝөзләриндән бүтүн јашлары силәҹәкдир. Артыг өлүм мөвҹуд олмајаҹаг; артыг нә кәдәр, нә фәрјад, нә дә ағры олаҹагдыр, чүнки әввәлки шејләр кечиб ҝетди”. Сонра әлавә едир: “Тахтда отуран деди: Будур, Мән һәр шеји јениләшдирирәм”. О, һәмчинин бунлары да дејир: “Јаз, чүнки бу сөзләр һәгиги вә е’тимада лајигдир” (Вәһј 21:4, 5).
13 Бәли, Аллаһын бөјүк нијјәти вар. Бу, өз вә’дләрини јеринә јетирмәк игтидарында олан вә јетирәҹәк Шәхсијјәт тәрәфиндән әввәлҹәдән дејилән јени салеһлик дүнјасы вә әбәди ҹәннәт олаҹагдыр, чүнки Онун сөзләри “һәгиги вә е’тимада лајигдир”.
[21-ҹи сәһифәдә олан шәкил]
Аллаһын инсанлар үчүн олан нијјәти, јер үзү ҹәннәтдә әбәди һәјатдыр. Онун нијјәти дәјишмәјиб.
[22-ҹи сәһифәдә олан шәкил]
Ев саһибинин, евини бәрбад едән сакинләри мәс’улијјәтә ҹәлб етмәјә һүгугу вар.