Дәрс 5

Аллаһын Јер күрәсинә даир нијјәти нәдир?

Јеһова Јер күрәсини нәјә ҝөрә јаратмышдыр? (1, 2)

Нәјә ҝөрә јер һал-һазырда ҹәннәт дејил? (3)

Пис инсанларла нә баш верәҹәк? (4)

Ҝәләҹәкдә Иса хәстәләр, гоҹалар вә өлүләр үчүн нә едәҹәк? (5, 6)

Ҝәләҹәк хејир-дуалары әлдә етмәк үчүн нә етмәк лазымдыр? (7)

1. Јеһова Јер күрәсини она ҝөрә јаратды ки, инсанлар орада әбәди јашајыб, хошбәхт олсунлар. О истәјирди ки, һәмишә јер үзү әдаләтли вә бәхтијар инсанларла сакин олсун (Мәзмур 115:16; Ишаја 45:18). Јер һеч заман мәһв едилмәјәҹәк; о әбәдијјән мөвҹуд олаҹагдыр (Мәзмур 104:5; Ваиз 1:4).

2. Инсаны јаратмаздан әввәл, Аллаһ јер үзүнүн кичик бир һиссәсини ајырыб, ҝөзәл ҹәннәтә чевирди. Һәмин јери Еден бағы адландырды. Ораја илк киши вә гадыны — Адәмлә Һәвваны јерләшдирди. Аллаһ истәјирди ки, онларын ушаглары олсун вә бүтүн јер үзүндә сакин олсунлар. Онлар тәдриҹән бүтүн јер үзүнү ҹәннәтә чевирмәли идиләр (Тәквин 1:28; 2:8, 15).

3. Адәм вә Һәвва биләрәкдән ҝүнаһ ишләдәрәк Аллаһын ганунларыны поздулар. Буна ҝөрә дә Јеһова онлары Еден бағындан говду. Ҹәннәт итирилди (Тәквин 3:1-6, 23). Амма Јеһова Јерә даир нијјәтини унутмајыб. О, вә’д едир ки, јер үзүнү, инсанларын әбәдијјән јашајаҹаглары ҹәннәтә чевирәҹәк. О буну неҹә едәҹәк? (Мәзмур 37:29).

4. Јер ҹәннәтә чеврилмәздән әввәл, пис инсанлар ондан кәнар едилмәлидирләр (Мәзмур 37:38). Бу, Һар-Меҝидонда — Аллаһын пислији мәһв едәҹәји мүһарибәдә баш верәҹәкдир. Сонра Шејтан 1 000 ил мүддәтинә зәнҹирләнәҹәк. Бу о демәкдир ки, јери бәрбад едән инсанлар олмајаҹаг. Јалныз Аллаһын халгы сағ галаҹаг (Вәһј 16:14, 16; 20:1-3).

5. Бундан сонра Иса Мәсиһ јер үзәриндә 1 000 ил Падшаһ кими һөкмранлыг едәҹәк (Вәһј 20:6). О, тәдриҹән бизим јаддашымыздан вә бәдәнимиздән ҝүнаһы тәмизләјәҹәкдир. Инсанлар, Адәм вә Һәвванын ҝүнаһ ишләтмәздән әввәл олдуглары кими, камил олаҹаглар. О заман нә хәстәлик, нә гоҹалыг, нә дә өлүм олаҹагдыр. Хәстә адамлар хәстәликләриндән азад олаҹаг, гоҹалар јенидән ҝәнҹләшәҹәкләр (Ејуб 33:25; Ишаја 33:24; Вәһј 21:3, 4).

6. Аллаһа садиг олан инсанлар Исанын Миниллик һөкмранлығы әрзиндә јер үзүнү ҹәннәтә чевирәҹәкләр (Лука 23:43). Бундан әлавә, Аллаһ милјонларла өлүләри јер үзүндә јашамаг үчүн дирилдәҹәкдир (Һәвариләрин ишләри 24:15). Әҝәр онлар Аллаһын тәләбләрини јеринә јетирәрләрсә, о заман јер үзүндә әбәдијјән јашајаҹаглар. Әкс тәгдирдә, һәмишәлик мәһв едиләҹәкләр (Јәһја 5:28, 29; Вәһј 20:11-15).

7. Аллаһын Јер күрәсинә даир илк нијјәти мүвәффәгијјәтлә јеринә јетәҹәк. Ҝәләҹәкдә олаҹаг бу хејир-дуалары әлдә етмәк истәјәрдинизми? Бунун үчүн сиз Јеһова һаггында өјрәнмәји давам етмәли вә Онун тәләбләринә табе олмалысыныз. Јеһованын Шаһидләринин јахынлыгдакы Падшаһлыг Залында кечирилән јығынҹагларында иштирак етмәк бу ишдә сизә көмәк едәҹәк (Ишаја 11:9; Ибраниләрә 10:24, 25).

[10-ҹу сәһифәдә олан шәкил]

Итирилмиш ҹәннәт.

[11-ҹи сәһифәдә олан шәкилләр]

Һар-Меҝидондан сонра јер үзү ҹәннәтә чевриләҹәк.