Бөлмә 7
Аллаһын нијјәти тезликлә јеринә јетәҹәк
1, 2. Аллаһын пислик вә изтираблара сон гојаҹағына биз нә үчүн әмин ола биләрик?
Инсан нөгтеји-нәзәриндән, Аллаһын гејри-камиллијә вә изтираблара јол вердији мүддәт чох узун олса да, О, бу пис шәраитләрин сонсуз олараг давам етмәсинә изин вермәјәҹәк. Мүгәддәс Китаб билдирир ки, Аллаһ бу шејләрин олмасы үчүн мүәјјән вахт ајырмышдыр.
2 “Һәр шејин... вахты вар” (Ваиз 3:1). Аллаһын пислик вә изтираблар үчүн ајырдығы вахт сона чатдыгда, О, инсанларын ишләринә мүдахилә едәҹәкдир. Аллаһ, пислик вә изтираблара сон гојуб, өзүнүн илк нијјәтини јеринә јетирәҹәк; јер үзүнү Ҹәннәт шәраитиндә, там сүлһ вә игтисади тәһлүкәсизлик ичиндә јашајаҹаг камил вә хошбәхт инсан аиләси илә долдураҹаг.
Аллаһын һөкмләри
3, 4. “Сүлејманын мәсәлләри” китабы, Аллаһын мүдахиләсинин нәтиҹәләрини неҹә тәсвир едир?
3 Аллаһын мүдахиләсинин, јә’ни һөкмләринин нәтиҹәсинин јахын ҝәләҹәкдә бәшәр аиләси үчүн нә мә’на кәсб едәҹәјини хәбәр верән Мүгәддәс Китаб пејғәмбәрликләринин бә’зиләринә диггәт јетирәк:
4 “Мәмләкәтдә [јер үзүндә] доғру адамлар јашајаҹаглар вә камилләр орада галаҹаглар. Фәгәт пис адамлар мәмләкәтдән атылаҹаглар вә хаинләр ондан јох едиләҹәкләр” (Сүлејманын мәсәлләри 2:21, 22).
5, 6. Мәзмурун 37-ҹи фәсли Аллаһын мүдахилә етдији заман олаҹаг ишләри неҹә ҝөстәрир?
5 “Шәрирләр [писләр] кәсилиб атылаҹаг; фәгәт Рәбби ҝөзләјәнләр дүнјаны мирас алаҹаглар. Бир аз ҝөзлә вә пис јох олаҹагдыр... Фәгәт һәлимләр дүнјаны мирас алаҹаглар вә сүлһ боллуғунда ләззәт тапаҹаглар” (Мәзмур 37:9-11).
6 “Рәбби ҝөзлә вә онун јолуну тут, јери мирас алмаг үчүн сәни јүксәлдәҹәкдир; писләрин кәсилиб атылаҹағы заман буну ҝөрәҹәксән. Камил инсана ҝөз гој вә доғру адама бах; чүнки агибәт сүлһ әһлининдир. Фәгәт ганунсузлар бирликдә јох олаҹаглар; писләрин сону кәсиләҹәкдир” (Мәзмур 37:34, 37, 38).
7. Аллаһын Кәламы бизә һансы мүдрик мәсләһәти верир?
7 Буна ҝөрә дә, Гадир Јараданын бизә һөкмранлыг етмәјә һаггы олдуғуну гәбул едәнләри белә ҝөзәл ҝәләҹәк ҝөзләдијини нәзәрә алараг, дә’вәт олунуруг: “Үрәјин әмрләрими тутсун; чүнки онлар сәнә өмүр узунлуғуну вә јашама илләрини вә әмин-аманлығы артырар”. Һәгигәтән дә, Аллаһын ирадәсини јеринә јетирмәји сечән инсанлара әбәди һәјат артырылаҹагдыр! Буна ҝөрә дә, Аллаһын Кәламы бизә мәсләһәт верир: “Бүтүн үрәјинлә Рәббә ҝүвән вә өз анлајышына архаланма; бүтүн јолларында Ону таны, О да сәнин јолларыны доғрулдар” (Сүлејманын мәсәлләри 3:1, 2, 5, 6).
Аллаһын ҝөјдән рәһбәрлији
8, 9. Аллаһ јер үзүнү нәјин васитәсилә тәмизләјәҹәк?
8 Аллаһ, јер үзүнүн тәмизләнмәсини, бәшәријјәтин малик ола биләҹәји ән јахшы һакимијјәтин васитәси илә һәјата кечирәҹәк. Бу һакимијјәт сәмави мүдриклији тәмсил едир, чүнки бу һакимијјәт Аллаһын нәзарәти алтында ҝөјдән идарә едир. Вә бу сәмави Падшаһлыг, инсан һакимијјәтинин бүтүн формаларыны јер үзүндән јох едәҹәк. Инсанларын Аллаһдан асылы олмадан һөкмранлыг етмәләринә бир даһа јол верилмәјәҹәк.
9 Бу һагда Даниел 2:44 ајәсиндәки пејғәмбәрликдә дејилир: “О падшаһларын [буҝүнкү һакимијјәтләрин] ҝүнләриндә ҝөјләрин Аллаһы [ҝөјдә] әбәдијјән дағылмајаҹаг бир падшаһлыг гураҹаг вә онун һакимијјәти башга бир халга верилмәјәҹәк [инсанларын Аллаһдан асылы олмадан һөкмранлыг етмәләринә бир даһа јол верилмәјәҹәк]; анҹаг бу падшаһлыгларын [инди мөвҹуд олан] һамысыны о парчалајаҹаг вә мәһв едәҹәк, өзү исә әбәдијјән дураҹаг”. (Һәмчинин Вәһј 19:11-21; 20:4-6 ајәләринә дә бахын.)
10. Биз нә үчүн әмин ола биләрик ки, Аллаһын сәмави Падшаһлығы һөкмранлыг етдији дөвр әдаләтли олаҹаг?
10 Беләликлә, бәшәријјәти бир даһа әдаләтсиз һакимијјәтләр идарә етмәјәҹәк: Аллаһ бу системә сон гојаҹаг вә Аллаһдан асылы олмајан инсан һакимијјәтләри артыг мөвҹуд олмајаҹаг. Ҝөјдән рәһбәрлик едән Падшаһлыг исә әдаләтли олаҹаг, чүнки онун Баниси вә Горујуҹусу Аллаһдыр. Әксинә, бу Падшаһлыг өз вәтәндашларынын хејринә фәалијјәт ҝөстәрәҹәк. Ҝөјдә олдуғу кими, бүтүн јер үзүндә дә Аллаһын ирадәси јеринә јетириләҹәкдир. Елә буна ҝөрә дә, Иса өз шаҝирдләринә Аллаһа белә дуа етмәји өјрәдирди: “Падшаһлығын ҝәлсин. Ҝөјдә олдуғу кими, јердә дә Сәнин ирадән олсун” (Матта 6:10, И–93).
Һәмин вахта нә гәдәр јахыныг?
11. Бу системин сонунун нә гәдәр јахын олдуғуну мүәјјән етмәкдә бизә көмәк едән пејғәмбәрликләр Мүгәддәс Китабын һансы һиссәләриндә јерләшир?
11 Бәс бу гејри-мүкәммәл дүнја системинин сону вә Аллаһын јени дүнјасынын башланғыҹы нә гәдәр јахындыр? Мүгәддәс Китабын пејғәмбәрликләри ачыг ҹаваб верир. Мәсәлән, шәхсән Иса өзү габагҹадан хәбәр вермишди ки, Мүгәддәс Китабын “дөврүн сону” адландырдығы вахта нә гәдәр јахын олдуғумузу мүәјјән етмәк үчүн һансы әламәти ҝөзләмәк лазымдыр. Бу барәдә Матта 24 вә 25, Марк 13 вә Лука 21-ҹи фәсилләрдә мә’лумат верилир. Һәмчинин, Тимотејә олан икинҹи мәктубун үчүнҹү фәслиндә олдуғу кими, һәвари Павел габагҹадан демишдир ки, заман ахыны ичиндә олдуғумуз вәзијјәти тәсдиг едән мүхтәлиф һадисәләрин баш верәҹәји “ахыр ҝүнләр” адланан бир зәманә ҝәләҹәкдир.
12, 13. Иса вә Павел ахыр ҝүнләр һаггында нә демишдиләр?
12 Иса хәбәр вермишди ки, һәмин зәманә нөвбәти һадисәләрлә башланаҹаг: “Милләт милләтә, падшаһлыг падшаһлыға гаршы галхаҹаг; бә’зи јерләрдә гытлыглар вә зәлзәләләр олаҹагдыр” (Матта 24:7, И–93). Лука 21:11 ајәси ҝөстәрир ки, Иса “бә’зи јерләрдә... гырғынлар”ын олаҹағыны да гејд етмишдир. О, ‘ганунсузлуғун’ артаҹағы барәдә дә хәбәрдарлыг етмишдир (Матта 24:12).
13 Һәвари Павел габагҹадан хәбәр вермишдир: “Буну бил ки, ахыр ҝүнләрдә чәтин анлар ҝәләҹәкдир. Чүнки инсанлар худбин, пулпәрәст, ловға, тәкәббүрлү, күфр данышан, валидејнләринә итаәт етмәјән, нанкор, гүдсијјәтдән мәһрум, шәфгәтсиз, барышмаз, бөһтанчы, нәфсини сахламајан, азғын, рәһмсиз, јахшылығын дүшмәни, хаин, еһтијатсыз, мәғрур олаҹаг, зөвгү Аллаһдан чох севәҹәк. Аллаһ јолунда имиш кими ҝөрүнәҹәк, амма о јолун гүдрәтини инкар едәҹәкләр... Пис адамлар вә сахтакарлар исә, алдадыб алданараг, писликдә инкишаф едәҹәкләр” (2 Тимотејә 3:1-5, 13).
14, 15. Ијирминҹи әсрин һадисәләри, һәгигәтән дә ахыр ҝүнләрдә јашадығымызы неҹә тәсдиг едир?
14 Исанын вә Павелин габагҹадан хәбәр вердикләри бу һадисәләр бизим зәманәдәми баш верир? Әлбәттә. Биринҹи Дүнја мүһарибәси, өзүндән әввәлки мүһарибәләрдән даһа фаҹиәли олду. О илк дүнја мүһарибәси вә мүасир тарихин дөнүш нөгтәси олду. Бу мүһарибә илә бирликдә әрзаг гытлығы, епидемијалар вә башга фәлакәтләр јаранды. 1914-ҹү илдән бәри башланмыш бу һадисәләр, Исанын дедији кими, “ағрыларын башланғыҹыдыр” (Матта 24:8). Онлар “ахыр ҝүнләр” адланан дөврүн башланмасына ишарә едир вә бу мүддәт әрзиндә Аллаһ пислијә вә зүлмә јол верәҹәк.
15 Јәгин ки, ХХ әсрин һадисәләри сизә мә’лумдур. Јаранан гарма-гарышыглыг барәдә дә билирсиниз. Тәхминән 100 милјон адам мүһарибәләрдә һәлак олду. Диҝәр јүз милјонларла инсанлар аҹлыг вә хәстәликләрдән өлдүләр. Зәлзәләләр сајсыз-һесабсыз һәјатын мәһвинә сәбәб олду. Ҝетдикҹә һәјата вә башгасынын мүлкијјәтинә даһа аз гијмәт верилир. Ҹинајәт гаршысында горху һиссләри ҝүндәлик һәјатын бир һиссәси олмушдур. Әхлаг нормалары тапдаланыр. Әһалинин артымы, һәлледилмәз проблемләрә сәбәб олур. Әтраф мүһитин чиркләнмәси һәјаты нәинки зәһәрләјир, һәтта тәһлүкә алтына салыр. Доғрудан да биз, 1914-ҹү илдән бәри ахыр ҝүнләрдә јашајырыг вә зәманәмизә аид Мүгәддәс Китабын пејғәмбәрликләринин сон нөгтәсинә јахынлашырыг.
16. Ахыр ҝүнләрин сонуна нә гәдәр галыб?
16 Бу ахыр ҝүнләр нә гәдәр давам едәҹәк? 1914-ҹү илдән бәри “ағрыларын башланғыҹы”на мә’руз галан бу әламәтдар дөвр һаггында Иса демишдир: “Бүтүн бу шејләр баш веринҹәјә гәдәр, бу нәсил кечиб ҝетмәјәҹәкдир” (Матта 24:8, 34-36). Беләликлә, ахыр ҝүнләрин бүтүн әламәтләри гыса вахт әрзиндә һәјата кечмәлидир. Вәһј 12:12 ајәсиндә дејилир ки, Шејтан јер үзүнә атылдыгдан сонра, чох аз вахта саһибдир.
17, 18. Һансы пејғәмбәрлик, бу дүнјанын сонуна чох јахын олдуғумузу ҝөстәрир?
17 Бу системин ахырынын јахынлашдығыны ҝөстәрән диҝәр пејғәмбәрликләри һәвари Павел вермишди: “Чүнки сиз өзүнүз дәгиг билирсиниз ки, Рәббин Ҝүнү оғру ҝеҹә ҝәлән кими ҝәләҹәк. Инсанлар: “Сүлһ вә тәһлүкәсизлик”, — дејәндә, гәфләтән... онлар да һәлака уғрајаҹаг вә гәтијјән хилас олмајаҹаглар” (1 Салониклиләрә 5:2, 3; һәмчинин Лука 21:34, 35 ајәләринә бахын).
18 Сојуг мүһарибә баша чатды вә санки дөвләтләр арасындакы бу тәһлүкә артыг ҝөрүнмүр. Буна ҝөрә дә, мүхтәлиф өлкәләрин халглары, ола билсин ки, јени бир дүнја идарә үсулу јолунда дурдугларыны дүшүнүрләр. Лакин онлар ҝөстәрдикләри ҹәһдләрин мүвәффәгијјәтли олдуғуну дүшүндүкләри заман, бу, онларын фикирләринин там әксини ҝөстәрәҹәк; бу, индики системин Аллаһ тәрәфиндән мәһв едиләҹәјинин јахынлашдығыны ҝөстәрән сон әламәт олаҹагдыр. Јаддан чыхармајаг ки, сијаси данышыглар вә разылашмалар инсанларда ваҹиб дәјишикликләр етмир. Бунлар, инсанларын бир-бирләрини севмәсинә көмәк етмир. Сијаси рәһбәрләр нә ҹинајәткарлыға сон гојмағы баҹарыр, нә хәстәлији, нә дә өлүмү арадан галдыра билирләр. Буна ҝөрә дә, инсанларын сүлһ вә тәһлүкәсизлик һаггында тәшкил етдији һәр һансы бир програма үмид бағламајын вә бу дүнјанын, проблемләри һәллетмә јолунда олдуғуну дүшүнмәјин (Мәзмур 146:3). Әслиндә, бу барәдә едилән е’лан, бу дүнјанын чох јахында сона чатаҹағы мә’насыны верәҹәкдир.
Хош хәбәрин тәблиғ едилмәси
19, 20. Ахыр ҝүнләрдә тәблиғлә бағлы олан һансы пејғәмбәрлијин јеринә јетдијини ҝөрүрүк?
19 Исанын сөјләдији башга бир пејғәмбәрлик дә 1914-ҹү илдән бәри ахыр ҝүнләрдә јашадығымызы ҝөстәрир: “Әввәлҹә бүтүн халглара Мүждә тәблиғ едилмәлидир” (Марк 13:10). Јахуд, Матта 24:14 (И–93) ајәсиндә: “Падшаһлыг һаггында олан бу Мүждә милләтләрин һамысына шәһадәт олараг бүтүн дүнјада тәблиғ олунаҹагдыр; вә сон о заман ҝәләҹәкдир”.
20 Бу ҝүн, бу дүнјанын сону вә Аллаһын Падшаһлығы алтында јени Ҹәннәт дүнјасынын ҝәлмәси барәдә олан хош хәбәр, тарихдә ҝөрүнмәмиш мигјасда дүнјанын һәр јериндә тәблиғ олунур. Кимләр тәрәфиндән? Јеһованын милјонларла Шаһидләри тәрәфиндән. Онлар дүнјанын бүтүн өлкәләриндә тәблиғ едирләр.
21, 22. Јеһованын Шаһидләрини һәгиги мәсиһчиләр кими хүсусилә фәргләндирән нәдир?
21 Јеһованын Шаһидләри, Аллаһын Падшаһлығы һаггында тәблиғ етмәкдән әлавә, өз давранышлары илә Мәсиһин һәгиги давамчылары кими танынырлар: “Әҝәр бир-биринизә гаршы мәһәббәтиниз олса, бундан һәр кәс Мәним шаҝирдләрим олдуғунузу биләҹәк”. Јеһованын Шаһидләри, гырылмаз мәһәббәт телләри илә үмумдүнја гардашлығында бирләшибләр. (Јәһја 13:35; һәмчинин Ишаја 2:2-4; Колослулара 3:14; Јәһја 15:12-14; 1 Јәһја 3:10-12; 4:20, 21; Вәһј 7:9, 10 ајәләринә дә бахын.)
22 Јеһованын Шаһидләри, Мүгәддәс Китабда дејилән бу сөзләрә инанырлар: “Аллаһ инсанларын кимлијинә бахмаз, амма һәр халгдан олуб, Ондан горхан вә һагг иш ҝөрән Она мәгбулдур” (Һәвариләрин ишләри 10:34, 35). Онлар, иргинә вә дәрисинин рәнҝинә бахмајараг, бүтүн өлкәләрдә олан Шаһидләри өзләринин руһани гардаш вә баҹылары һесаб едирләр (Матта 23:8). Бу ҝүн дүнјада белә үмумдүнја гардашлығын мөвҹуд олмасы, Аллаһын нијјәтинин тезликлә јеринә јетәҹәјинә даһа бир сүбутдур.
[26-ҹы сәһифәдә олан шәкил]
Аллаһын мүкәммәл сәмави Падшаһлығы, јени дүнјада бәшәријјәтин јеҝанә һакимијјәти олаҹаг.