Дүнјанын сону һаггында дөрд суала ҹаваб

ИСА ПЕЈҒӘМБӘР сонун ҝәләҹәјини пејғәмбәрлик етмишди. Һәмин ҝүн һаггында о, белә сөзләр демишди: «О вахт елә бир бөјүк мүсибәт олаҹаг ки, беләси дүнја јаранандан бәри олмамышдыр вә бир даһа олмајаҹаг» (Матта 24:14, 21).

Пејғәмбәрин сон һагда дедији сөзләр вә Аллаһын Кәламында буна даир јазыланлар инсанда бир нечә ваҹиб суал доғурур. Ҝәлин бу суалларын ҹавабыны Мүгәддәс Китабда ахтараг.

1 Нәјин сону ҝәләҹәк?

Мүгәддәс Китаб јер үзүнүн һәрфи мәнада мәһв олаҹағыны өјрәтмир. Мәсәлән, мәзмурчу Аллаһа мүраҹиәт едәрәк дејир: «[Ја Рәбб] јер үзүнүн тәмәлләрини елә гурдун ки, әсла сарсылмасын» (Мәзмур 104:5). Һәмчинин орада бәшәријјәтин глобал мүһарибә нәтиҹәсиндә мәһв олаҹағы барәдә дә дејилмир (Јешаја 45:18). Иса пејғәмбәр өзү демишди ки, һәмин ҝүн хилас оланлар олаҹаг (Матта 24:21, 22). Јахшы, бәс онда Мүгәддәс Китаба әсасән, нәјин сону ҝәләҹәк?

Уғурсузлуға дүчар олан инсан һөкумәтләринә сон гојулаҹаг. Аллаһдан илһам алараг Даниел пејғәмбәр јазмышдыр: «О падшаһларын дөврүндә ҝөјләрин Аллаһы һеч вахт дағылмајан бир падшаһлыг гураҹаг вә бу падшаһлыг башга халгын әлинә кечмәјәҹәк. О бүтүн әввәлки падшаһлыглары әзиб-дағыдаҹаг, өзү исә әбәди галаҹаг» (Даниел 2:44).

Мүһарибәләрә вә әтраф мүһитин чиркләнмәсинә сон гојулаҹаг. Мәзмур 46:9 ајәсиндә Аллаһын һансы тәдбирләрә әл атаҹағы дејилир: «О, јерин уҹгарларынадәк дөјүшләри дајандырар, каманлары гырар, низәләри сындырар, дөјүш арабаларыны ода атар». Һәмчинин Мүгәддәс Китаб өјрәдир ки, Аллаһ «јери тәләф едәнләри» тәләф едәҹәк (Вәһј 11:18).

Ҹинајәткарлыға вә әдаләтсизлијә сон гојулаҹаг. Аллаһын Кәламы вәд едир: «Әмәлисалеһләр јер үзүндә сакин олаҹаг, камилләр бурада галаҹаг. Пис адамлар бу торпагдан атылаҹаг, хаинләрин көкү бурадан гопарылаҹаг»a (Сүлејманын мәсәлләри 2:21, 22).

2 Сон нә вахт ҝәләҹәк?

Јеһова Аллаһ писликләрә сон гојмаг вә Өз Падшаһлыг һакимијјәтини бәргәрар етмәк үчүн мүәјјән вахт тәјин етмишдир (Марк 13:33). Лакин Мүгәддәс Китабда ајдын ҝөстәрилир ки, биз бу ҝүнүн нә вахт ҝәләҹәјини дәгиг һесаблаја билмәрик. Чүнки Иса демишди ки, «о ҝүнү вә сааты һеч кәс билмир: нә ҝөјдәки мәләкләр, нә дә Оғул. Буну јалныз Ата билир» (Матта 24:36). Лакин Иса вә онун шаҝирдләри Аллаһын тәјин етдији бу сон ҝүндән габаг јер үзүндә вәзијјәтин неҹә олаҹағыны пејғәмбәрлик етмишләр. Бир шеји гејд етмәк лазымдыр ки, ашағыда садаланан бүтүн һадисәләр ејни вахтда вә дүнја мигјасында баш верәндә сон ҝәләҹәк.

Мисли ҝөрүнмәмиш сијаси вә иҹтимаи чахнашмалар вә тәбии фәлакәтләр. Сон ҝүнләр һагда верилән суала ҹаваб олараг Мәсиһ Иса демишди: «Милләт милләтә гаршы, дөвләт дөвләтә гаршы галхаҹаг. Бир чох јерләрдә зәлзәләләр вә гытлыг олаҹаг. Бунлар бәлаларын башланғыҹыдыр» (Марк 13:8). Аллаһын I әсрдә јашамыш хидмәтчиси Павел јазырды: «Буну бил ки, ахыр ҝүнләрдә сон дәрәҹә ағыр бир зәманә ҝәләҹәк. Чүнки инсанлар худбин, пулпәрәст, өзүнү өјән, өзүндән разы, күфр данышан, валидејнләринә итаәт етмәјән, нанкор, вәфасыз, доғмаларыны севмәјән, тәрс, бөһтанчы, тәмкинсиз, залым, јахшылығын дүшмәни, хаин, өз билдијини едән, ловға олаҹаглар, Аллаһдан чох ејш-ишрәти севәҹәкләр» (2 Тимотејә 3:1—5).

Мүхтәлиф дилләрдә кечирилән үмумдүнја тәблиғ кампанијасы. Иса пејғәмбәрлик етмишди: «Падшаһлыг һаггындакы бу хош хәбәр милләтләрин һамысына шәһадәт олсун дејә, бүтүн јер үзүндә тәблиғ едиләҹәк вә сон о вахт ҝәләҹәк» (Матта 24:14).

3 Сонра нә баш верәҹәк?

Мүгәддәс Китабда дејилмир ки, бүтүн јахшы инсанлар ҝөјдә ҹәннәт һәјатына говушаҹаг. Анҹаг Иса Мәсиһин өјрәтдији кими, Аллаһын бәшәријјәт үчүн башланғыҹда олан нијјәти һәјата кечәҹәк. О демишди: «Һәлимләр нә хошбәхтдирләр, чүнки Јер онларын олаҹаг» (Матта 5:5; 6:9, 10). Сон ҝәлмәздән әввәл өлән инсанлар исә, Мүгәддәс Китабда дејилдији кими, дирилдиләрәк јенидән һәјата гајтарылаҹаглар (Әјјуб 14:14, 15; Јәһја 5:28, 29). Бәс ондан сонра нә баш верәҹәк?

Аллаһын тәјин етдији Падшаһ Иса Мәсиһ ҝөјләрдән јер үзүнү идарә едәҹәк. Даниел пејғәмбәр Аллаһдан алдығы ҝөрүнтүнү белә тәсвир едир: «Ҝеҹә ҝәлән ҝөрүнтүләрдә ҝөрдүм ки, будур, бәшәр оғлуна бәнзәр Бири [дирилдилмиш Иса Мәсиһ] ҝөјүн булудлары илә ҝәлир. О, Әзәлдән Вар Олана [Јеһова Аллаһа] јахынлашды вә Онун һүзуруна ҝәтирилди. Она [Иса Мәсиһә] һакимијјәт, иззәт вә падшаһлыг верилмишди ки, бүтүн халглара, милләтләрә вә дилләрә мәнсуб адамлар она хидмәт етсин. Онун һакимијјәти сона јетмәјән әбәди һакимијјәтдир. Онун падшаһлығы әсла јох олмајаҹаг» (Даниел 7:13, 14; Лука 1:31, 32; Јәһја 3:13—16).

Аллаһын Падшаһлығынын тәбәәләри камил, сағлам, тәһлүкәсиз вә әбәди һәјатдан зөвг алаҹаглар. «Онлар евләр тикиб орада мәскунлашаҹаг, үзүм бағлары салаҹаг, бәһрәләриндән јејәҹәк, — дејә пејғәмбәр Јешаја јазыр. — Тикдикләри евдә өзҝәләр јашамајаҹаг, әкдикләри бағын мејвәләрини башгалары јемәјәҹәк. Чүнки халгым ағаҹлар тәк узун өмүр сүрәҹәк, сечилмишләрим әлләринин ишләриндән зөвг алаҹаг. Онлар бош јерә әлләшмәјәҹәк, өвладлары бәлаларла үзләшмәјәҹәк. Чүнки өзләри дә, өвладлары да, Рәббин хејир-дуалы нәсли олаҹаг» (Јешаја 65:21—23). Аллаһ тәрәфиндән вәһј алмыш һәвари Јәһја исә бу һагда јазырды: «Бу вахт тахтдан ҝәлән ҝур бир сәс ешитдим. Сәс дејирди: “Аллаһын чадыры инсанларладыр вә О, инсанларла јашајаҹаг, онлар да Аллаһын халгы олаҹаглар. Аллаһ Өзү онларла олаҹаг. Аллаһ инсанларын ҝөзләриндән бүтүн јашлары силәҹәк. Артыг нә өлүм, нә дәрд, нә фәрјад, нә дә ағры олаҹаг, чүнки әввәлки шејләр кечиб ҝетди”» (Вәһј 21:3, 4).

4 Сон ҝәләндә хилас олмаг үчүн инсан нә етмәлидир?

Аллаһын диҝәр хидмәтчиси Петер билирди ки, ахыр зәманәдә бәзиләри Аллаһын инсанларын ишинә гарышыб пислијә вә әзаб-әзијјәтә сон гојаҹағы фикрини ҹәфәнҝијат һесаб едәҹәкләр (2 Петер 3:3, 4). Бунунла јанашы һәвари Петер сон ҝүнләрдә јашајанлары ашағыда дејилдији кими давранмаға тәшвиг едир.

Кечмиш һадисәләрдән ибрәт ҝөтүрүн. «[Аллаһ] аллаһсызларла долу гәдим дүнјаја рәһм етмәјиб ону дашгында мәһв едәркән салеһлик тәблиғчиси олан Нуһу вә онунла бәрабәр једди нәфәри хилас етди», — дејә Петер јазыр (2 Петер 2:5). Ахырын ҝәләҹәјини ҹәфәнҝијат һесаб едәнләр барәдә исә о дејир: «Онлар бу һәгигәтә билә-билә ҝөз бағлајырлар ки, гәдим заманларда ҝөј вә сујун ортасында олуб Аллаһын сөзү илә судан бәрк күтлә шәклиндә чыхмыш јер вар иди. Бунларын васитәсилә о вахт мөвҹуд олан бәшәр дә дашгын сулары алтында галыб мәһв олмушду. Индики ҝөјләр вә јер дә һәмин сөз васитәсилә аллаһсызларын мәһв едиләҹәји Һөкм ҝүнүнүн алову үчүн сахланылыр» (2 Петер 3:5—7)b.

Аллаһын тәләбләринә ујғун һәјат тәрзи сүрүн. Әҝәр кимсә сон ҝүндә хилас олмаг истәјирсә, о, ҝәрәк, «мүгәддәс давранышы» вә Аллаһа сәдагәтли һәјат тәрзи илә диҝәрләриндән сечилсин (2 Петер 3:11). Фикир верин, бу ајәдә «мүгәддәс давраныш» ифадәси вурғуланыр, јәни биз Аллаһа сәдагәтимизи әмәлләримиздә ҝөстәрмәлијик. Ҝөрдүјүмүз кими, садәҹә олараг Аллаһа инанмаг вә ја сон анда төвбә етмәк кифајәт дејил.

Бәс Аллаһ һансы әмәл вә давранышы мәгбул һесаб едир? Өз билијинизи Мүгәддәс Китабын дедикләри илә мүгајисә един. Јеһованын Шаһидләри сиздән өз көмәкләрини әсирҝәмәјәҹәкләр. Онлар дедикләрини Мүгәддәс Китаба әсасландырырлар. Сиз өзүнүз буна әмин ола биләрсиниз. Сон ҝүнләрин бир чохларыны горху ичиндә сахламасына бахмајараг, белә етмәклә сиз ҝәләҹәјә ҹәсарәтлә вә әминликлә бахаҹагсыныз.

[Һашијәләр]

[7-ҹи сәһифәдәки јазы]

Јер јох, ону тәләф едәнләр тәләф олаҹаг