ФӘСИЛ 10
Аллаһын Падшаһлығы һөкмранлыг едир
1, 2. Инсан һөкумәтләринин тутарсызлығы нәдән ҝөрүнүр?
ОЛА БИЛСИН, белә бир һадисә сизин дә башыныза ҝәлиб: һансыса бир ҹиһазы алыб, сонрадан онун ишләмәдијини ашкар едирсиниз. Тутаг ки, уста чағырырсыныз. Лакин о, “тә’мир етдикдән” тез сонра ҹиһаз јенидән хараб олур. Неҹә дә хошаҝәлмәз һалдыр!
2 Бу нүмунә инсан һөкумәтләрини хатырладыр. Бәшәријјәт һәмишә сүлһ вә хошбәхтлији зәманәт верәҹәк һөкумәти арзу етмишдир. Лакин ҹәмијјәтин чатышмазлыгларыны арадан галдырмаг ҹәһдләри боша чыхмышдыр. Чохлу сүлһ мүгавиләләри бағланмыш, сонра исә позулмушдур. Бундан әлавә, јохсуллуғу, әдаләтсизлији, ҹинајәти, хәстәликләри вә еколожи проблемләри арадан галдырмаг һансы һөкумәтә мүјәссәр олуб? Буна инсан һөкумәтләринин ҝүҹү чатмыр. Һәтта Исраилин мүдрик падшаһы Сүлејман сорушмушдур: “Инсан өз јолуну неҹә анлаја биләр?” (Сүлејманын мәсәлләри 20:24).
3. а) Иса нә һагда тәблиғ едирди? б) Бә’зи инсанлар Аллаһын Падшаһлығыны неҹә тәсәввүр едирләр?
3 Үмидинизи үзмәјин! Е’тибарлы дүнја һөкумәти садәҹә хәјал дејил. Бу һөкумәт һаггында Иса тәблиғ едирди. Иса ону “Аллаһын Падшаһлығы” (И–93) адландырмыш вә давамчыларына бу барәдә дуа етмәји өјрәтмишдир (Лука 11:2; 21:31). Әлбәттә, Аллаһын Падшаһлығы һәрдән дини даирәләрдә хатырланыр. Һәтта милјонларла инсанлар һәр ҝүн Рәббин дуасыны (һәмчинин нүмунәви дуа адланыр) тәкрар едәрәк һәмин Падшаһлыг һаггында дуа едирләр. Лакин инсанлардан сорушанда ки: “Аллаһын Падшаһлығы нәдир?” ҹаваблар мүхтәлиф олур. Бә’зиләри дејирләр ки, “О, үрәкдәдир”. Башгалары ҝөјләри Падшаһлыг адландырырлар. Анҹаг ҝөрәҹәјимиз кими, Мүгәддәс Китаб бу суала ајдын ҹаваб верир.
МҮӘЈЈӘН МӘГСӘД ҮЧҮН ОЛАН ПАДШАҺЛЫГ
4, 5. Јеһова Өз һөкмранлығыны нәјә ҝөрә башга ҹүр тәзаһүр етдирмәк гәрарына ҝәлди вә бунун нәтиҹәси нә олаҹаг?
4 Јеһова Аллаһ һәмишә Падшаһ, јахуд Каинатын Али Һөкмдары олуб. О, һәр шејин Јараданы кими, һаглы олараг бу бөјүк мөвгејә саһибдир (1 Тарихләр 29:11; Мәзмур 103:19; Һәвариләрин ишләри 4:24). Лакин Исанын тәблиғ етдији Падшаһлыг Аллаһын али һөкмранлығында көмәкчи вә јахуд икинҹи дәрәҹәли рол ојнајыр. Бу Хиласкар Падшаһлығын хүсуси мәгсәди вар. Һансы мәгсәди?
5 Бу китабын 6-ҹы фәслиндә изаһ едилдији кими, илк инсан ҹүтү Аллаһын рәһбәрлијинә гаршы үсјан галдырды. Мүбаһисәли суаллар үзүндән Јеһова Өз һөкмранлығыны башга јолла тәзаһүр етдирмәк гәрарына ҝәлди. Аллаһ Иланын, јә’ни Шејтанын башыны әзәҹәк вә инсанларын мирас алдығы ҝүнаһын нәтиҹәләрини арадан галдыраҹаг бир “зүрријјәт” ҝөндәрмәк нијјәтиндә олдуғуну бәјан етди. Баш “зүрријјәт” — Иса Мәсиһ олду, “Аллаһын Падшаһлығы” исә, Исанын Шејтаны там мәһв едәҹәји әсас аләтдир. Бу Падшаһлығын васитәсилә Иса Мәсиһ јер үзүндә Јеһованын рәһбәрлијини бәрпа едәҹәк вә Аллаһын әдаләтли һөкмранлығына әбәди олараг бәраәт газандыраҹаг (Тәквин 3:15; Мәзмур 2:2-9).
6, 7. а) Падшаһлыг һарада јерләшир, онун Падшаһы вә һакимијјәт шәрикләри кимләрдир? б) Падшаһлығын вәтәндашлары кимләрдир?
6 Исанын пис фәрисејләрин үнванына дедији сөзләр “Инҹил” китабында белә сәсләнир: “Аллаһын Падшаһлығы сизин ичиниздәдир” (Лука 17:21, И–93). Иса Падшаһлығын һәмин пис вә сатгын инсанларын үрәјиндә олдуғунуму нәзәрдә тутурду? Хејр. Јунан дилиндән даһа дәгиг тәрҹүмә белә сәсләнир: “Аллаһын Падшаһлығы сизин араныздадыр” (ЈД). Иса онларын арасында иди вә буна ҝөрә дә ҝәләҹәк Падшаһ кими өзүнә ишарә едирди. Аллаһын Падшаһлығы инсанын үрәјиндә олан мүвәггәти бир шеј јох, рәһбәри вә вәтәндашлары олан реал, фәалијјәт ҝөстәрән бир һөкумәтдир. Бу, сәмави һөкумәтдир, чүнки “Ҝөјләрин Падшаһлығы” вә “Аллаһын Падшаһлығы” адланыр (Матта 13:11, И–93; Лука 8:10, И–93). Пејғәмбәр Даниел рө’јасында бу Падшаһлығын “инсан оғлуна бәнзәр” Һөкмдарыны ҝөрүр; бу Һөкмдар Гадир Аллаһын јанына ҝәтирилди вә “бүтүн халглар, милләтләр вә дилләр она гуллуг етсинләр дејә, она һөкмранлыг вә иззәт вә падшаһлыг верилди” (Даниел 7:13, 14). Бу Падшаһ кимдир? “Инсан Оғлу” олараг Мүгәддәс Китаб Иса Мәсиһи адландырыр (Матта 12:40; Лука 17:26). Бәли, Јеһова Оғлу Иса Мәсиһә Падшаһ олмаг сәлаһијјәтини вермишдир.
7 Иса тәк идарә етмир. Онунла бирликдә падшаһ вә каһинләр олмаг үчүн “јер үзүндән сатын алынмыш” 144 000 адам вар (Вәһј 5:9, 10; 14:1, 3, И–93; Лука 22:28-30). Аллаһын Падшаһлығынын вәтәндашлары, Мәсиһин рәһбәрлијинә табе олан инсанлардан ибарәт үмумдүнја аилә олаҹаг (Мәзмур 72:7, 8). Бәс нәјә ҝөрә биз әмин ола биләрик ки, Падшаһлыг Аллаһын һөкмранлығына бәраәт газандыраҹаг вә јер үзүндә Ҹәннәт шәраитини бәрпа едәҹәкдир?
АЛЛАҺЫН ПАДШАҺЛЫҒЫНЫН РЕАЛЛЫҒЫ
8, 9. а) Аллаһын Падшаһлыг һаггындакы вә’дләринин е’тибарлылығыны нә илә мүгајисә етмәк олар? б) Нәјә ҝөрә Аллаһын Падшаһлығынын реаллығына әмин ола биләрик?
8 Тәсәввүр един ки, евиниз јаныб. Лазыми вәсаитләри олан достунуз сөз верир ки, евинизи јенидән тикмәјә көмәк едәҹәк вә аиләнизи гида илә тә’мин едәҹәкдир. Әҝәр достунуз һәмишә дүзүнү данышыбса, мәҝәр она бу дәфә дә инанмајаҹагсынызмы? Фәрз едәк ки, ертәси ҝүн ишдән гајыданда артыг ишчиләрин јанғындан учмуш јерләри тәмизләдијини вә киминсә аиләниз үчүн әрзаг ҝәтирдијини ҝөрүрсүнүз. Әлбәттә ки, бу, сизин һәр шејин вахты илә нәинки бәрпа олунаҹағына, һәтта әввәлкиндән дә јахшы олаҹағына әминлијинизи мөһкәмләндирәҹәкдир.
9 Буна бәнзәр тәрздә, Јеһова да бизи Падшаһлығын реал олдуғуна әмин едир. Мүгәддәс Јазыларын “Ибраниләрә” адлы китабында ҝөстәрилдији кими, Ганунун бир чох саһәләри Падшаһлығын гурулушунун көлҝәси иди (Ибраниләрә 10:1). Јер үзүндә мөвҹуд олан Исраил падшаһлығы да Аллаһын Падшаһлығыны тәмсил едирди. Бу ади һөкумәт дејилди, чүнки онун рәһбәрләри “Рәббин тахты” үзәриндә отурурдулар (1 Тарихләр 29:23). Бундан савајы, әввәлҹәдән дејилмишди ки: “Шилоa ҝәлинҹәјә гәдәр, Падшаһлыг әсасы Јәһудадан, һөкмдарлыг әсасы да ајагларынын арасындан ҝетмәјәҹәкдир; вә милләтләрин итаәти она олаҹагдыр” (Тәквин 49:10). Бәли, Аллаһын һакимијјәтинин дәјишмәз Падшаһы олан Иса Јәһуданын нәслиндән ҝәлмәли иди (Лука 1:32, 33).
10. а) Аллаһын Хиласкар Падшаһлығынын тәмәли нә заман гојулмушдур? б) Исанын ҝәләҹәк һакимијјәт шәрикләри бүтүн јер үзәриндә һансы иши апармалыдырлар?
10 Аллаһын Хиласкар Падшаһлығынын тәмәли Исанын һәвариләринин сечилмәси илә гојулмушдур (Ефеслиләрә 2:19, 20; Вәһј 21:14). Онлар ҝөјдә Иса илә бәрабәр идарә едәҹәк 144 000 һакимијјәт шәрикләри арасында илк сечиләнләр олмушлар. Исанын ҝәләҹәк һакимијјәт шәрикләри һәләлик јердә јашадыглары мүддәтдә онун: “Ҝедин, бүтүн халглары шаҝирдим един, онлары Ата, Оғул вә Мүгәддәс Руһ наминә вәфтиз един” әмринә риајәт едәрәк ҝениш шаһидлик компанијасы кечирирләр (Матта 28:19).
11. Һал-һазырда Падшаһлыг һаггындакы тәблиғ иши неҹә кечирилир вә бунун сајәсиндә нәјә наил олунуб?
11 Бу ҝүн бүтүн халглары Исанын шаҝирди етмәк әмри ҝөрүнмәмиш мигјасда јеринә јетир. Исанын пејғәмбәрлик сөзләринә мүвафиг олараг Јеһованын Шаһидләри Падшаһлыг һаггындакы хош хәбәри бүтүн јер үзүндә јајырлар: “Падшаһлыг һаггында олан бу Мүждә милләтләрин һамысына шәһадәт олараг бүтүн дүнјада тәблиғ олунаҹагдыр; вә сон о заман ҝәләҹәкдир” (Матта 24:14, И–93). Падшаһлыг һаггындакы тәблиғ ишинин бир саһәси — ҝениш маарифләндирмә програмыдыр. Аллаһын Падшаһлығынын ганун вә принсипләринә табе олан инсанлар һеч бир инсан һакимијјәтинин наил ола билмәдији сүлһ вә бирлијә артыг индидән саһибдирләр. Бүтүн бунлар Аллаһын Падшаһлығынын реал олдуғундан хәбәр верир!
12. а) Падшаһлығын тәблиғчиләрини Јеһованын Шаһидләри адландырмаг нәјә ҝөрә мүнасибдир? б) Аллаһын Падшаһлығы инсан һөкумәтләриндән нә илә фәргләнир?
12 Јеһова исраиллиләрә деди: “Сиз шаһидләрим вә сечдијим гулумсунуз” (Ишаја 43:10-12). “Садиг Шаһид” олан Иса Падшаһлыг һаггындакы хош хәбәри сә’јлә бәјан едирди (Вәһј 1:5; Матта 4:17). Буна ҝөрә дә, Падшаһлығын мүасир тәблиғчиләринин Аллаһ тәрәфиндән верилән Јеһованын Шаһидләри адыны дашымалары мүнасибдир. Бәс нәјә ҝөрә Шаһидләр башгаларына Аллаһын Падшаһлығы һаггында данышмаг үчүн бу гәдәр вахт вә гүввә сәрф едирләр? Онлар буну она ҝөрә едирләр ки, Падшаһлыг — бәшәријјәтин јеҝанә үмид јеридир. Инсан һакимијјәтләри ҝеҹ-тез дағылыр, амма Аллаһын Падшаһлығы һеч заман дағылмајаҹагдыр. Ишаја 9:6, 7 ајәләриндә бу Падшаһлығын рәһбәри олан Иса “Сүлһ Рәиси” адланыр вә сонра әлавә олунур: “Рәислијинин вә сүлһүн артмасына сон олмајаҹаг”. Аллаһын Падшаһлығы, бу ҝүн вар олуб, сабаһ исә јох олан инсан һөкумәтләри кими дејил. Даниел 2:44 ајәсиндә дејилир: “Ҝөјләрин Аллаһы әбәдијјән дағылмајаҹаг бир падшаһлыг гураҹаг вә онун һакимијјәти башга бир халга верилмәјәҹәк... өзү исә әбәдијјән дураҹаг” (Даниел 2:44).
13. а) Аллаһын Падшаһлығы һансы проблемләри мүвәффәгијјәтлә һәлл едәҹәк? б) Биз нәјә ҝөрә әмин ола биләрик ки, Аллаһын вә’дләри јеринә јетәҹәкдир?
13 Һансы инсан падшаһы мүһарибәләри дајандыра, ҹинајәтә, хәстәликләрә, аҹлыға сон гоја вә евсизлик проблемини һәлл едә биләр? Бундан башга, јер үзүндә јашајан һансы рәһбәр өлүләри дирилдә биләр? Бүтүн бунлары Аллаһын Падшаһлығы вә онун Падшаһы едә биләҹәкдир. Бу Падшаһлыг даима тә’мирә еһтијаҹы олан хараб ҹиһаз кими мүвәггәти олмајаҹагдыр. Әксинә, Јеһованын вә’д етдији кими, Аллаһын Падшаһлығы мүвәффәгијјәтли олаҹаг: “Ағзымдан чыхан сөзүм дә елә олаҹагдыр; мәнә бош дөнмәјәҹәкдир, фәгәт мурад етдијим шеји едәҹәк вә етсин дејә ону ҝөндәрдијим иши баҹараҹаг” (Ишаја 55:11). Аллаһын нијјәти мүтләг јеринә јетәҹәкдир; бәс Падшаһлыг нә заман һөкмранлыг етмәјә башлајаҹаг?
ПАДШАҺЛЫГ НӘ ЗАМАН ҺӨКМРАНЛЫГ ЕТМӘЈӘ БАШЛАЈАҸАГ?
14. Исанын шаҝирдләри Падшаһлыға даир нәји баша дүшмүрдүләр вә Иса өз һөкмранлығы барәдә нәји билирди?
14 “Ја Рәбб! Исраилә падшаһлығы бу дөврдәми гајтараҹагсан?” Исанын шаҝирдләринин бу суалы ону ҝөстәрир ки, онлар о вахт Аллаһын Падшаһлығынын мәгсәдиндән вә нә заман һөкмранлыг етмәјә башлајаҹағындан бихәбәр идиләр. Иса онлары бу саһәдә фәрзијјәләрдән сагындырараг деди: “Атанын Өз һакимијјәти алтына гојдуғу заман вә мүддәтләри билмәк сизин ишиниз дејил”. Иса, јер үзүндә һөкмранлығынын ҝәләҹәкдә, дирилдикдән вә ҝөјә галхдыгдан чох илләр сонра башлајаҹағыны билирди (Һәвариләрин ишләри 1:6-11, И–93; Лука 19:11, 12, 15). Мүгәддәс Китабда әввәлҹәдән белә дејилмишдир. Бәс бу һагда орада нә дејилир?
15. Мәзмур 110:1 ајәсиндә Исанын нә заман һөкмранлыг етмәјә башлајаҹағы һагда нә дејилир?
15 Давуд, Иса һаггында пејғәмбәрлик едәрәк вә ону “Рәбб” адландырараг демишдир: “Рәбб Рәббимә деди: Мән дүшмәнләрини сәнин ајагларын алтына кәтил олараг гојунҹаја гәдәр, сағымда отур” (Мәзмур 110:1; Һәвариләрин ишләри 2:34-36 ајәләри илә мүгајисә един). Бу пејғәмбәрлик ону ҝөстәрир ки, Иса ҝөјә галхан кими һөкмранлыг етмәјә башламајыб. О, Аллаһын сағ тәрәфиндә отуруб ҝөзләмәли иди (Ибраниләрә 10:12, 13). Бәс Иса нә гәдәр ҝөзләмәли олду? О, нә заман һөкмранлыг етмәјә башлајыб? Мүгәддәс Китаб бу суалларын ҹавабыны тапмаға көмәк едир.
16. Б. е. ә. 607-ҹи илдә нә баш верди вә бунун Аллаһын Падшаһлығы илә нә әлагәси варды?
16 Јерусәлим Јеһованын јер үзүндә Өз адыны вердији јеҝанә шәһәр иди (1 Краллар 11:36). Бу шәһәр ејни заманда Аллаһын сәмави Падшаһлығыны јер үзүндә тәмсил едән пајтахт иди. Буна ҝөрә дә б. е. ә. 607-ҹи илдә Јерусәлимин бабиллиләр тәрәфиндән мәһв едилмәси олдугҹа мүһүм бир һадисә олду. Бу һадисәдән сонра Аллаһын јер үзүндәки халгына билаваситә рәһбәрлик етмәдији узунсүрән дөвр башланды. Тәхминән алты јүз илдән сонра Иса Аллаһын идарә етмәји дајандырдығы дөврүн һәлә дә давам етдијини деди: “Диҝәр халгларын вахты тамам олунҹаја гәдәр, Јерусәлим халглар тәрәфиндән тапдаланаҹагдыр” (Лука 21:24).
17. а) “Диҝәр халгларын вахты” нәдир вә о нә гәдәр давам етди? б) “Диҝәр халгларын вахты” нә вахт башлады вә нә вахт гуртарды?
17 “Диҝәр халгларын вахты”нда бу дүнјанын һөкумәтләринә јол верилди ки, Аллаһын илтифаты олан идарә үсулуна сон гојсунлар. Бу дөвр б. е. ә. 607-ҹи илдә Јерусәлимин мәһв едилдији вахтдан башлајыб вә Даниелин дедијинә ҝөрә “једди вахт” давам етмәли иди (Даниел 4:23-25). Бу “једди вахт” нә гәдәр сүрмәли иди? Мүгәддәс Китабда дејилир ки, үч јарым “вахт” 1 260 ҝүнә бәрабәрдир (Вәһј 12:6, 14). Ики бу гәдәр “дөвр”, јә’ни једди вахт 2 520 ҝүнә бәрабәрдир. Амма белә бир гыса мүддәтдә хүсуси бир шеј баш вермәди. Лакин Даниелин пејғәмбәрлијинә ‘һәр ҝүнә бир ил’ принсипини тәтбиг едиб, б. е. ә. 607-ҹи илдән 2 520 ил чыхсаг, б. е. 1914-ҹү илинә ҝәлиб чыхырыг (Сајлар 14:34; Һезекиел 4:6).
18. Иса падшаһлыг сәлаһијјәтини алан кими һансы тәдбири ҝөрдү вә бу јер үзүндә неҹә әкс олунду?
18 Иса һәмин или ҝөјдә һөкмранлыг етмәјә башладымы? Нөвбәти мәгаләдә буну тәсдиг едән Мүгәддәс Китаба әсасланан сүбутлар мүзакирә олунаҹагдыр. Анҹаг тамамилә ајдындыр ки, Исанын һөкмранлыг етмәјә башламасы јер үзүндә дәрһал сүлһүн олмасы демәк дејилди. Вәһј 12:7-12 ајәләри ҝөстәрир ки, Иса падшаһлыг сәлаһијјәтини алан кими, ҝөјдән Шејтаны вә онун ҹинләрини говаҹагды. Бу, јер үзүндә јашајанлара бәдбәхтликләр ҝәтирәҹәкди, лакин Иблисин ‘вахтына аз’ галдығыны билмәк тәсәлли верир. Бир аздан бизим, јалныз Аллаһын Падшаһлығынын һөкмранлыг етдијинә ҝөрә дејил, һәм дә онун јер үзүнә вә итаәткар бәшәријјәтә ҝөрүнмәмиш хејир-дуалар ҝәтирәҹәјинә ҝөрә севинмәјә сәбәбимиз олаҹаг (Мәзмур 72:7, 8). Бунун тезликлә баш верәҹәјини һарадан билирик?
[Һашијә]
a Шило ады “Она саһиб олан Кәс; Онун аид олдуғу Кәс” демәкдир. Вахтилә ајдын олду ки, “Шило” “Јәһуда гәбиләсиндән олан Аслан” — Иса Мәсиһдир (Вәһј 5:5). Бә’зи арами тәрҹүмәләриндә “Шило” сөзү садәҹә “Мәсиһ” вә ја “Хиласкар Падшаһ” ифадәси илә әвәз едилмишдир.
БИЛИЈИНИЗИ ЈОХЛАЈЫН
• Аллаһын Падшаһлығы нәдир вә һарадан идарә едир?
• Падшаһлыгда ким һөкмранлыг едир вә онун вәтәндашлары кимләрдир?
• Јеһова бизи неҹә әмин едир ки, Онун Падшаһлығы реалдыр?
• “Диҝәр халгларын вахты” нә заман башлады вә нә заман сона јетди?
[94-ҹү сәһифәдәки чәрчивә]
АЛЛАҺЫН ПАДШАҺЛЫҒЫНА АИД ОЛАН БӘ’ЗИ МҮҺҮМ ҺАДИСӘЛӘР
• Јеһова, Илан адланан Шејтан Иблисин башыны әзәҹәк “зүрријјәт” верәҹәји илә әлагәдар нијјәтини е’лан едир (Тәквин 3:15).
• Б. е. ә. 1943-ҹү илдә Јеһова “зүрријјәтин” Ибраһимин нәслиндән ҝәләҹәјини хәбәр верир (Тәквин 12:1-3, 7; 22:18).
• Б. е. ә. 1513-ҹү илдә Исраил илә бағланан Ганун Әһди ‘ҝәләҹәк не’мәтләрин көлҝәси’ олур (Чыхыш 24:6-8; Ибраниләрә 10:1).
• Исраилин јер үзүндәки падшаһлығы б. е. ә. 1117-ҹи илдә јаранмыш вә сонралар ону Давудун сүлаләсиндән олан падшаһлар идарә етмишләр (1 Самуел 11:15; 2 Самуел 7:8, 16).
• Б. е. ә. 607-ҹи илдә Јерусәлимин мәһв едилмәсиндән сонра “диҝәр халгларын вахты” башланыр (2 Краллар 25:8-10, 25, 26; Лука 21:24).
• Б. е. 29-ҹу илиндә Иса Падшаһлыг үчүн мәсһ едилир вә јер үзүндәки хидмәтинә башлајыр (Матта 3:16, 17; 4:17; 21:9-11).
• Б. е. 33-ҹү илиндә Иса ҝөјә галхыр вә Аллаһын сағ тәрәфиндә отуруб, һөкмранлыг етмәјә башлајаҹағы дөврү ҝөзләјир (Һәвариләрин ишләри 5:30, 31; Ибраниләрә 10:12, 13).
• Б. е. 1914-ҹү илиндә “диҝәр халгларын вахты”нын сонуна јахын Иса сәмави Падшаһлыгда тахта кечир (Вәһј 11:15).
• Шејтан вә онун ҹинләри јер үзүнә атылыр вә инсанларын ҝет-ҝедә артан әзабларынын ҝүнаһкары олурлар (Вәһј 12:9-12).
• Иса, Аллаһын Падшаһлығы һаггындакы хош хәбәрин бүтүн дүнјада ҝедән тәблиғ ишинә рәһбәрлик едир (Матта 24:14; 28:19, 20).