Фәсил 10
‘Һеч вахт дағылмајаҹаг’ Падшаһлыг
1. Бәшәр тарихи боју баш вермиш һадисәләр нәји сүбута јетирир?
ДҮНЈАДА баш верән һадисәләр һәр ҝүн сүбут едир ки, Јеһованын һөкмранлығыны рәдд едиб өзләри өзләринә рәһбәрлик етмәјә чалышан инсанлар хошбәхтлијә наил олмамышлар. Инсанларын гурдуғу һакимијјәт формаларындан һеч бири бәшәријјәтә фајда ҝәтирә билмәмишдир. Һәрчәнд инсанлар елмдә мисилсиз наилијјәтләр газанмышлар, амма хәстәликләр һәмишәлик арадан галдырылмамыш, бир адамын белә өлүмүнүн гаршысыны алмаг мүмкүн олмамышдыр. Инсан һакимијјәти мүһарибәләрә, зоракылыға, ҹинајәтә, рүшвәтхорлуға вә јохсуллуға сон гоја билмәмишдир. Бир чох өлкәләрдә һакимијјәт һәлә дә зүлмкар гүввәләрин әлиндәдир (Ваиз 8:9). Габагҹыл технолоҝијалар аҹҝөзлүјүн вә ҹаһиллијин гуллуғунда дурдуғундан јер, су, һава зәһәрләнир. Вәзифә адамларынын өзбашыналығы игтисади бөһранлара ҝәтириб чыхарыр вә бунун уҹбатындан чохларынын ән зәрури шејләри алмаға белә имканы чатмыр. Инсан һакимијјәтинин бир нечә миниллик тарихи сүбут едир ки, «инсанын өмрү өз әлиндә дејил. Аддымларыны дүзәлтмәк ҝедән адамын иши дејил» (Јеремја 10:23).
2. Бәшәријјәтин проблемләриндән јеҝанә чыхыш јолу нәдир?
2 Бу проблемләри һәлл етмәјә гадир бир һөкумәт вармы? Бәли, Аллаһын Падшаһлығы. Иса өз шаҝирдләринә бу Падшаһлыг һаггында дуа етмәји өјрәдирди: «Сәлтәнәтин ҝәлсин. Ҝөјдә олдуғу кими, јердә дә Сәнин ирадән олсун» (Матта 6:9, 10). Аллаһын сәмави Падшаһлығы 2 Петер 3:13 ајәсиндә ‘јени јери’, јәни салеһ инсан ҹәмијјәтини идарә едәҹәк «јени ҝөјләр» кими тәсвир едилир. Иса тәблиғиндә әсас јери Аллаһын Падшаһлығы мөвзусуна ајырмагла онун зәрурилијини вурғулајырды (Матта 4:17). Иса «әввәлҹә Аллаһын Сәлтәнәтини вә Онун салеһлијини ахтарын» сөзләри илә ҝөстәрди ки, бу Падшаһлыг һәјатымызда ваҹиб јер тутмалыдыр (Матта 6:33).
3. Артыг индидән Аллаһын Падшаһлығы һаггында өјрәнмәк нә үчүн сон дәрәҹә ваҹибдир?
3 Артыг индидән Аллаһын Падшаһлығы һаггында өјрәнмәк сон дәрәҹә ваҹибдир, чүнки бу Падшаһлыг тезликлә јер үзүндәки һакимијјәт системини һәмишәлик дәјишәҹәк. Даниел 2:44 ајәсиндә јазылыб: «О падшаһларын [индики һакимијјәтләрин] дөврүндә ҝөјләрин Аллаһы [ҝөјдә] һеч вахт дағылмајан бир падшаһлыг гураҹаг вә бу падшаһлыг башга халгын әлинә кечмәјәҹәк [инсанлар бир даһа јер үзүнү идарә етмәјәҹәкләр]. О бүтүн... [индики] падшаһлыглары әзиб-дағыдаҹаг, өзү исә әбәди галаҹаг». Падшаһлыг бүтүн бу пис системи мәһв етмәклә ахыр ҝүнләрә јекун вураҹаг. Јалныз сәмави Падшаһлығын јер үзүнү идарә етмәјә һүгугу олдуғуну һеч кәс шүбһә алтына алмајаҹаг. Биз чох шадыг ки, бу Падшаһлыг тезликлә бизә раһатлыг ҝәтирәҹәк!
4. 1914-ҹү илдә ҝөјдә Падшаһлыгла бағлы нә баш верди вә бунун бизим үчүн һансы бөјүк әһәмијјәти вар?
4 Иса Мәсиһ 1914-ҹү илдә Падшаһ тәјин едилди вә ‘дүшмәнләри арасында’ падшаһлыг етмәк һүгугу алды (Мәзмур 110:1, 2, ЈД). Елә һәмин ил бу пис системин ахыр ҝүнләри башланды (2 Тимотејә 3:1-5, 13). Даниел пејғәмбәрин ҝөрүнтүдә ҝөрдүјү һадисәләр дә мәһз о вахт ҝөјдә баш верди. «Әзәлдән Вар Олан» Јеһова Аллаһ, бәшәр оғлу Иса Мәсиһә ‘һакимијјәт, иззәт вә падшаһлыг верди ки, бүтүн халглара, милләтләрә вә дилләрә мәнсуб адамлар она хидмәт етсин’. Даниел јазмышды: «Онун һакимијјәти сона јетмәјәҹәк, әбәди һакимијјәтдир. Онун падшаһлығы әсла јох олмајаҹаг» (Даниел 7:13, 14). Мәһз Иса Мәсиһин башчылығы алтындакы сәмави Падшаһлығын васитәсилә Аллаһ Еден бағында илк валидејнләримиз үчүн һазырладығы сајсыз-һесабсыз немәтләрдән бүтүн салеһлији севәнләрин дадмасына имкан јарадаҹаг.
5. Падшаһлыг һаггында нәләри билмәк бизим үчүн мараглыдыр вә нәјә ҝөрә?
5 Сән бу Падшаһлығын садиг тәбәәси олмаг истәјирсәнми? Беләдирсә, бу сәмави һөкумәтин гурулушу вә фәалијјәти һаггында өјрәнмәк сәнин үчүн чох мараглы олаҹаг. Јәгин бу һөкумәтин инди нә илә мәшғул олдуғуну, ҝәләҹәкдә нәләр едәҹәјини вә өз нөвбәсиндә сәндән нә тәләб олундуғуну өјрәнмәк истәјирсән. Бу Падшаһлыг һаггында даһа әтрафлы өјрәндикҹә, она ҝөрә миннәтдарлығын артаҹаг. Аллаһын Падшаһлығынын һакимијјәтинә табе олсан, бу Падшаһлығын итаәткар инсанлар үчүн ҝөрәҹәји бүтүн еҹазкар ишләр һаггында башгаларына данышмаг үчүн там һазыр олаҹагсан (Мәзмур 48:12, 13, КМ).
Аллаһын Падшаһлығынын һөкмдарлары
6. а) Хиласкар Падшаһлыг кимин һөкмранлығынын ифадәсидир вә Мүгәддәс Јазылар буну неҹә ачыглајыр? б) Падшаһлыг барәсиндә өјрәндикләримиз бизә неҹә тәсир ҝөстәрмәлидир?
6 Биринҹи нөвбәдә ону өјрәнирик ки, Хиласкар Падшаһлыг Аллаһын али һөкмранлығынын ифадәсидир. ‘Һакимијјәт, иззәт вә падшаһлығы’ Оғлуна мәһз Јеһова вермишдир. Аллаһын Оғлу Падшаһ тәјин олунандан сонра ҝөјдә сәда јајылды: «Дүнја сәлтәнәти Рәббимизин [Јеһова Аллаһын] вә Онун Мәсиһинин сәлтәнәти олду; Вә О [Јеһова], әбәди олараг сәлтәнәт сүрәҹәкдир» (Вәһј 11:15). Беләликлә бу Падшаһлыг вә онун наилијјәтләри барәдә өјрәнмәклә Јеһова Аллаһа даһа да јахынлашаҹағыг. Бу билик биздә Аллаһын һөкмранлығына әбәди табе олмаг арзусу ојатмалыдыр.
7. Иса Мәсиһин Јеһованын Баш Нүмајәндәси олмасы бизә нә үчүн хүсусилә мараглыдыр?
7 Ону да јадда сахламалыјыг ки, Иса Мәсиһи Баш Нүмајәндә вәзифәсинә Јеһова Өзү тәјин едиб. Јер үзүнү вә инсанлары јаратмаг үчүн Аллаһла «мемар» кими чијин-чијинә чалышан Иса бизим нәјә еһтијаҹ дујдуғумузу өзүмүздән дә јахшы билир. Бундан әлавә, о, инсанлары севдијини бәшәр тарихинин лап башланғыҹындан нүмајиш етдирмишди (Сүлејманын мәсәлләри 8:30, 31; Колослулара 1:15-17). Иса бәшәријјәти елә ҝүҹлү мәһәббәтлә севир ки, өзү шәхсән јер үзүнә ҝәлиб уғрумузда һәјатыны гурбан верди (Јәһја 3:16). Бунунла бизә ҝүнаһ вә өлүмдән азад олмаға вә әбәди јашамаға јол ачды (Матта 20:28).
8. а) Инсан һакимијјәтләриндән фәргли олараг, Аллаһын һөкумәти нәјә ҝөрә әбәдидир? б) «Садиг вә ағыллы гул»ун сәмави һакимијјәтлә һансы әлагәси вар?
8 Аллаһын Падшаһлығы сарсылмаз вә әбәди һакимијјәтдир. Јеһованын өлмәзлији бу Падшаһлығын әбәдилијинә зәманәт верир (Мәзмур 146:3-5, 10). Инсан падшаһларындан фәргли олараг, Аллаһдан падшаһлыг сәлаһијјәтини алмыш Иса Мәсиһ дә өлмәздир (Ромалылара 6:9; Вәһј 1:18). Мәсиһлә бирликдә ҝөјдәки тахтларда Аллаһын «һәр гәбиләдән, дилдән, халгдан вә милләтдән» олан 144 000 садиг хидмәтчиси әјләшәҹәк. Онлара да өлмәзлик бәхш олунур (Вәһј 5:9, 10; 14:1-4; 1 Коринфлиләрә 15:42-44, 53). Бу адамларын бөјүк әксәријјәти артыг ҝөјдәдир, јердәки кичик сајлы галыг исә Падшаһлығын јер үзү марагларына сәдагәтлә хидмәт едән мүасир «садиг вә ағыллы гул»дур (Матта 24:45-47).
9, 10. а) Аллаһын Падшаһлығы һансы парчалајыҹы вә позуҹу тәсирләри кәнар едәҹәк? б) Аллаһын Падшаһлығынын дүшмәни олмаг истәмириксә нәләрдән узаг дурмалыјыг?
9 Јеһова чох тезликлә, тәјин етдији вахтда јер үзүнү тәмизләмәк үчүн сәмави ордуларыны ҝөндәрәҹәк. Бу ордулар Аллаһын һакимијјәтини гәсдән рәдд едәнләри вә Онун Иса Мәсиһ васитәсилә мәһәббәтлә ҝөрдүјү тәдбирләрә мәһәл гојмајанлары һәмишәлик мәһв едәҹәк (2 Салониклиләрә 1:6-9). Бүтүн бунлар Јеһованын ҝүнүндә баш верәҹәк вә О, нәһајәт Каинатын Һөкмдары кими бәраәт газанаҹаг. «Будур Рәббин амансыз, гәзәбли вә гејзлә долу ҝүнү јахынлашыр ки... [јердәки] ҝүнаһкарлары мәһв етсин» (Јешаја 13:9). «О ҝүн гәзәб ҝүнүдүр: Һәр тәрәфи әзијјәт вә мәшәггәтин, виран вә таланын, гаранлыг вә зүлмәтин, гара булудларын бүрүдүјү ҝүндүр!» (Сефанја 1:15).
10 Бу дүнјанын ҝөзәҝөрүнмәз пис һөкмдары Шејтанын әлалтылары — бүтөвлүкдә јалан дин, бүтүн инсан һакимијјәтләри вә онларын ордулары һәмишәлик мәһв едиләҹәк. Бу дүнјанын досту олуб егоист, шәрәфсиз вә әхлагсыз һәјат сүрәнләри дә белә агибәт ҝөзләјир. Шејтан вә онун ҹинләри мин ил мүддәтинә дибсиз дәринлијә атылаҹаг вә јер үзүнүн сакинләринә һеч бир тәзјиг ҝөстәрә билмәјәҹәкләр. Јер үзүндә бүтүн ишләрә јалныз Аллаһын Падшаһлығы нәзарәт едәҹәк. Салеһлији севәнләрә бу әсл раһатлыг ҝәтирәҹәк! (Вәһј 18:21, 24; 19:11-16, 19-21; 20:1, 2).
Падшаһлыг өз гаршысындакы мәгсәдләрә неҹә чатаҹаг
11. а) Хиласкар Падшаһлыг Аллаһын јер үзүнә аид нијјәтләрини неҹә һәјата кечирәҹәк? б) Падшаһлыг һакимијјәти јер үзүнүн сакинләринә нә ҝәтирәҹәк?
11 Хиласкар Падшаһлыг Аллаһын јер үзүнә аид нијјәтләринин һамысыны һәјата кечирәҹәк (Јарадылыш 1:28; 2:8, 9, 15). Бәшәријјәт индијәдәк буну баҹармамышдыр. Лакин ҝәләҹәкдә бүтүн јер үзү инсан Оғлу Иса Мәсиһә табе олаҹаг. Јеһова бу көһнә систем үзәриндә һөкмүнү иҹра едәндән сонра сағ галанлар Падшаһ Мәсиһин башчылығы алтында әл-әлә вериб севинҹлә чалышаҹаглар. О заман бүтүн јер үзү Ҹәннәтә чевриләҹәк (Ибраниләрә 2:5-9). Бәшәријјәт өз әмәјинин бәһрәсини ҝөрәҹәк вә јердә јетишәҹәк бүтүн мәһсуллардан боллуҹа фајдаланаҹаг (Мәзмур 72:1, 7, 8, 16-19; Јешаја 65:21, 22).
12. Падшаһлығын тәбәәләри әглән вә бәдәнҹә камиллијә неҹә јетишәҹәкләр?
12 Адәм вә Һәвва камил јарадылмышдылар вә Аллаһ истәјирди ки, онларын әглән вә бәдәнҹә камил нәсли бүтүн јер үзүнү бүрүсүн. Бу нијјәт Падшаһлығын һакимијјәти алтында фүсүнкар тәрздә һәјата кечәҹәк. Ҝүнаһын бүтүн нәтиҹәләрини арадан галдырмаг үчүн, Јеһова Аллаһ Мәсиһи Падшаһ олмагла јанашы, һәм дә Баш Каһин тәјин етмишдир. О өз инсан һәјатынын фидијә дәјәриндән итаәткар тәбәәләринин фајдаланмасына сәбирлә көмәк едәҹәк.
13. Падшаһлығын һакимијјәти алтында адамлар физики ҹәһәтдән неҹә сағалаҹаглар?
13 Падшаһлығын һакимијјәти алтында јер үзүнүн сакинләри физики ҹәһәтдән мөҹүзәви шәкилдә сағалаҹаглар. «О вахт корларын ҝөзләри, карларын гулаглары ачылаҹаг, ахсаглар ҹејран кими һоппанаҹаг, лалларын дили севинҹлә нәғмә дејәҹәк» (Јешаја 35:5, 6). Хәстәлик вә гоҹалыг уҹбатындан гәдди бүкүлмүш бәдәнләр ушаг бәдәниндән дә ҝүмраһ олаҹаг, хроники хәстәликләри мөһкәм ҹансағлығы әвәз едәҹәк. «Онда бәдәни ушаг бәдәни кими тәзә олар, јенијетмәлик дөврүнә гајыдар» (Әјјуб 33:25). Ҝүн ҝәләҹәк, артыг һеч ким «хәстәјәм» демәјәҹәк. Нә үчүн? Чүнки Аллаһдан горхан бүтүн адамлар ҝүнаһын бојундуруғундан вә онун ағыр нәтиҹәләриндән гуртулаҹаглар (Јешаја 33:24; Лука 13:11-13). Бәли, Аллаһ «онларын ҝөзләриндән бүтүн јашлары силәҹәкдир. Артыг өлүм мөвҹуд олмајаҹаг; артыг нә кәдәр, нә фәрјад, нә дә ағры олаҹагдыр, чүнки әввәлки шејләр кечиб ҝетди» (Вәһј 21:4).
14. Камил олмаг нә демәкдир?
14 Амма камил олмаг, јалныз бәдәнҹә вә әглән сағлам олмаг демәк дејил. Аллаһын ‘сурәтинә вә бәнзәринә ҝөрә’ јарадылдығымыз үчүн Онун кејфијјәтләрини лазымынҹа әкс етдирмәлијик (Јарадылыш 1:26). Буна наил олмаг үчүн чох чалышмаг лазым ҝәләҹәк. Јени дүнјада ‘салеһлик өмүр сүрәҹәк’. Јешајанын дедији кими, јени ‘дүнјанын сакинләри доғрулуғу [салеһлији] өјрәнәҹәкләр’ (2 Петер 3:13; Јешаја 26:9). Салеһлик бүтүн иргләрин нүмајәндәләри арасында, јолдашлар арасында, аиләдә вә әләлхүсус да Аллаһла бизим арамызда сүлһ јарадыр (Мәзмур 85:10-13; Јешаја 32:17). Салеһлији өјрәнәнләр Аллаһын нијјәтиндә онлара ајрылмыш рол һаггында ҝет-ҝедә даһа чох биләҹәкләр. Аллаһа мәһәббәт үрәкләриндә дәрин көк салдыгҹа онлар һәјатларынын бүтүн саһәләриндә Онун јолларыны изләјәҹәкләр. Иса кими онлар да «мән даим... [Атанын] хошуна ҝәлән ишләри ҝөрүрәм» дејәҹәкләр (Јәһја 8:29). Бүтүн бәшәријјәт камиллијә јетишәндә һәјат неҹә дә ҝөзәл олаҹаг!
Падшаһлығын наилијјәтләри
15. Бу абзасдакы суаллар васитәсилә Падшаһлығын наилијјәтләри һаггында вә артыг индидән бизә нә етмәк лазым ҝәлдији барәдә даныш.
15 Аллаһын Падшаһлығынын вә онун тәбәәләринин һејрәтамиз наилијјәтләри ҝөз габағындадыр. Ашағыдакы суаллар вә ајәләр бу наилијјәтләрдән бир нечәсини, һәм дә Падшаһлығын тәбәәләринин инди нә етмәли олдуғуну сәнә хатырладаҹаг.
Падшаһлыг биринҹи нөвбәдә кимә гаршы чыхды вә нәтиҹәси неҹә олду? (Вәһј 12:7-10, 12).
Мәсиһ тахта чыхандан сонра диггәт һансы групун галан үзвләринин јығылмасына јөнәлдилди? (Вәһј 14:1-3).
Матта 25:31-33 ајәләриндәки пејғәмбәрлијә әсасән бөјүк мәшәггәт башлајандан сонра Иса һансы ишлә мәшғул олаҹаг?
Бу ҝүнләрдә һансы мүһүм иш ҝөрүлүр? Бу ишдә кимләр иштирак едир? (Мәзмур 110:3; Матта 24:14; Вәһј 14:6, 7).
Нә үчүн сијаси вә дини әлејһдарлар тәблиғ ишини дајандыра билмирләр? (Зәкәријјә 4:6; Һәвариләрин ишләри 5:38, 39).
Падшаһлығын һакимијјәтинә табе оланларын һәјатында һансы дәјишикликләр баш верир? (Јешаја 2:4; 1 Коринфлиләрә 6:9-11).
Миниллик Падшаһлыг
16. а) Мәсиһин һакимијјәти нә гәдәр давам едәҹәк? б) Бу мүддәт әрзиндә вә ондан сонра һансы еҹазкар ишләр ҝөрүләҹәк?
16 Шејтан вә онун ҹинләри дибсиз дәринлијә атыландан сонра Иса Мәсиһ вә онун 144 000 һәмвариси мин ил әрзиндә падшаһлыг вә каһинлик едәҹәкләр (Вәһј 20:6). Бу мүддәт әрзиндә инсанлар камилләшәҹәк, Адәмин мирас гојдуғу ҝүнаһ вә өлүм артыг олмајаҹаг. Миниллик Һакимијјәтин сонунда Иса Хиласкар Падшаһ-Каһин тапшырығыны јеринә јетириб падшаһлығы Атасына тәслим едәҹәк ки, «Аллаһ һәр шејдә һәр шеј олсун» (1 Коринфлиләрә 15:24-28). О заман хилас олмуш бәшәријјәтин Каинатын Һөкмдары Јеһоваја сәдагәтини јохламаг үчүн, Шејтан гыса мүддәтә азадлыға бурахылаҹаг. Бу сон сынаг битдикдә Јеһова Шејтаны вә она гошулмуш гијамчылары мәһв едәҹәк (Вәһј 20:7-10). Јеһованын һөкмранлығынын тәрәфдарлары сәдагәтләрини там сүбута јетирәҹәкләр. О заман Јеһова илә онларын арасында дүзҝүн мүнасибәт гурулаҹаг, Аллаһ бу адамлары оғуллары вә гызлары кими гәбул едиб әбәди һәјата лајиг биләҹәк (Ромалылара 8:21).
17. а) Миниллијин сонунда Падшаһлыгла нә баш верәҹәк? б) Нә үчүн демәк олар ки, Падшаһлыг ‘һеч вахт дағылмајаҹаг’?
17 Бу сәбәбдән Иса вә 144 000 нәфәрин јерлә бағлы фәалијјәти дәјишәҹәк. Бәс онлар нә иш ҝөрәҹәкләр? Мүгәддәс Китабда бу һагда һеч нә дејилмир. Әҝәр Јеһованын һөкмранлығыны сәдагәтлә дәстәкләсәк, Миниллик Һакимијјәтин сонунда сағ галыб Јеһованын онлар вә бүтүн каинат үчүн нәләр һазырладығыны ҝөрәрик. Бунунла белә, Мәсиһин миниллик һакимијјәти «әбәди» олаҹаг вә онун падшаһлығы «әсла јох олмајаҹаг» (Даниел 7:14). Һансы мәнада? Биринҹиси, Јеһова Өзү Һөкмдар олдуғундан һакимијјәт башга мәгсәд ҝүдәнләрин әлинә кечмәјәҹәк. Һәмчинин Падшаһлығын наилијјәтләри әбәди олдуғуна ҝөрә о ‘һеч вахт дағылмајаҹаг’ (Даниел 2:44). Хиласкар Падшаһ-Каһин вә онун шәрикләри Јеһоваја сәдагәтлә хидмәт етдикләри үчүн шәрәф саһиби олаҹаглар.
Тәкрар үчүн суаллар
• Нәјә ҝөрә јалныз Аллаһын Падшаһлығы бәшәр проблемләринин јеҝанә һәллидир? Аллаһын Падшаһлығынын Падшаһы тахта нә вахт чыхды?
• Аллаһын Падшаһлығы вә онун ҝөрәҹәји ишләрлә әлагәдар нәләр хүсусилә хошуна ҝәлир?
• Падшаһлыг артыг һансы наилијјәтләри газаныб вә бизим бу ишдә һансы пајымыз вар?
[92, 93-ҹү сәһифәләрдәки шәкил]
Аллаһын Падшаһлығынын һакимијјәти алтында бүтүн инсанлар салеһлији өјрәнәҹәкләр