Аллаһын Падшаһлығы - јерин јени һөкумәти
“Бу падшаһлыгларын һамысыны о [Падшаһлыг] дағыдаҹаг вә мәһв едәҹәк, өзү исә әбәдијјән дураҹаг” (ДАНИЕЛ 2:44).
1. Мүгәддәс Китаба нәјә ҝөрә ҝүвәнә биләрик?
МҮГӘДДӘС КИТАБ - Аллаһын инсанлара вердији вәһјдир. Һәвари Павел јазырды: “Аллаһын биздән ешитдијиниз кәламыны гәбул етдикдә, ону бәшәри сөз олараг дејил, әслиндә олдуғу кими, Аллаһын кәламы олараг гәбул етдиниз” (1 Салониклиләрә 2:13). Мүгәддәс Китабда, Аллаһ һаггында билмәмиз ҝәрәк олан мә’луматлар вардыр. Мүгәддәс Китаб Онун шәхсијјәти, нијјәтләри вә тәләбләри һаггында сөһбәт ачыр. Онда аилә һәјаты вә ҝүндәлик давранышлар барәсиндә ән ҝөзәл нәсиһәтләр вар. Бу китабда кечмишдә вә инди јеринә јетән, һәмчинин ҝәләҹәкдә јеринә јетәҹәк әтрафлы пејғәмбәрликләр гејд олунур. Бәли, “һәр Мүгәддәс Јазы Аллаһдан илһам алмыш вә тә’лим, тәкзиб, ислаһ, салеһлик тәрбијәси үчүн фајдалыдыр ки, Аллаһ бәндәси камил олуб, һәр ҹүр хејирли иш үчүн тәҹһиз едилсин” (2 Тимотејә 3:16, 17).
2. Иса, Мүгәддәс Китабын башлыҹа мөвзусуну неҹә гејд етди?
2 Мүгәддәс Китабын ән ваҹиб мөвзусу - Аллаһын һөкмранлығынын (һакимијјәт һүгугунун), сәмави Падшаһлыг васитәсилә бәраәт газанмасы һаггындакы мөвзудур. Иса өз хидмәтиндә бу мөвзуја башлыҹа јер верирди. “Иса тәблиғ едиб: “Төвбә един, чүнки Ҝөјләрин Падшаһлығы јахындыр”,- демәјә о вахтдан башлады” (Матта 4:17, И—93). О, Падшаһлығын һәјатымызда тутаҹағы јери ҝөстәрәрәк, тәшвиг едирди: “Фәгәт әввәлҹә Онун Падшаһлығыны вә Онун салеһлијини ахтарын; вә бүтүн бу шејләр сизә артырылаҹагдыр” (Матта 6:33, И—93). Һәмчинин шаҝирдләринә, “Падшаһлығын ҝәлсин; ҝөјдә олдуғу кими, јердә дә Сәнин ирадән олсун” - дејә, Аллаһа дуа етмәји өјрәдәрәк дә бунун ваҹиблијини ҝөстәрди (Матта 6:10, И—93).
Јерин јени һөкумәти
3. Нәјә ҝөрә Аллаһын Падшаһлығы бизим үчүн бөјүк мә’на дашыјыр?
3 Нәјә ҝөрә Аллаһын Падшаһлығы инсанлар үчүн белә бөјүк мә’на дашыјыр? Она ҝөрә ки, бу Падшаһлыг тезликлә јер үзүнүн идарә системини һәмишәлик дәјишәҹәк бир иш ҝөрәҹәкдир. Даниел 2:44-ҹү ајәсиндәки пејғәмбәрликдә дејилир: “О падшаһларын [бу ҝүн јер үзүндә идарә едән] ҝүнләриндә ҝөјләрин Аллаһы әбәдијјән дағылмајаҹаг бир падшаһлыг [ҝөјдә һөкумәт] гураҹаг вә онун һакимијјәти башга бир халга верилмәјәҹәк; анҹаг бу падшаһлыгларын [јердәки һөкумәтләрин] һамысыны о парчалајаҹаг вә мәһв едәҹәк, өзү исә әбәдијјән дураҹаг”. Аллаһын сәмави Падшаһлығы һакимијјәти бүтүнлүклә әлә алдыгдан сонра, бир даһа јер үзүнә инсанлар һөкмранлыг етмәјәҹәкләр. Әдавәт јарадан вә гәнаәтбәхш олмајан инсан һакимијјәтләри һәмишәлик кечиб ҝедәҹәк.
4, 5. а) Падшаһлығын Падшаһы олмаг үчүн нәјә ҝөрә ән јахшы намизәд Исадыр? б) Јахын ҝәләҹәкдә Иса һансы тапшырығы алаҹагдыр?
4 Јегованын билаваситә рәһбәрлији алтында фәалијјәт ҝөстәрән, сәмави Падшаһлығын Баш Һөкмдары - Мәсиһ Иса бу вәзифә үчүн ән лајигли намизәддир. О, Аллаһын јаратдыгларынын илки олдуғу үчүн, јер үзүнә ҝәлмәздән әввәл, Аллаһын “маһир көмәкчиси” кими ҝөјдә јашајырды (Сүлејманын мәсәлләри 8:22—31, ЈД). “Ҝөрүнмәјән Аллаһын сурәти вә бүтүн хилгәтдән габаг доғулан, Одур. Чүнки... ҝөјләрдә вә јердә олан һәр шеј Онун васитәсилә јаранды” (Колослулара 1:15, 16, И—93). Аллаһ тәрәфиндән јер үзүнә ҝөндәрилән заман, Иса, һәмишә Аллаһын ирадәсини јеринә јетирирди. О, ән ағыр сынаглара таб ҝәтирди вә Атасына садиг галараг өлдү (Јәһја 4:34; 15:10).
5 Иса, өлүм ајағында да Аллаһа садиг галдығы үчүн, мүкафатландырылды. Аллаһ ону ҝөјләр һәјаты үчүн дирилтди вә она сәмави Падшаһлығын Падшаһы олмаг һүгугуну верди (Һәвариләрин ишләри 2:32—36). Падшаһлығын Падшаһы олан Мәсиһ Иса, тезликлә Аллаһдан еһтирамлы горху һисси ојадан бир тапшырыг алараг, јер үзүндәки инсан һакимијјәтләринә сон гојмаг вә планетимизи писликләрдән тәмизләмәк үчүн он минләрҹә ҝүҹлү руһани варлыглара рәһбәрлик едәҹәкдир (Сүлејманын мәсәлләри 2:21, 22; 2 Салониклиләрә 1:6—9; Вәһј 19:11—21; 20:1—3). Сонра, Аллаһын Мәсиһә табе етдирдији сәмави Падшаһлыг - бүтүн јер үзүнүн јени һакимијјәти, јә’ни јеҝанә һөкумәти олаҹаг (Вәһј 11:15).
6. Падшаһлыға башчылыг едән Падшаһдан һансы рәһбәрлији ҝөзләмәк олар?
6 Аллаһын Кәламы, јер үзүнүн јени Һөкмдары һаггында дејир: “Бүтүн халглар, милләтләр вә дилләр она гуллуг етсинләр дејә, она һөкмранлыг вә иззәт вә падшаһлыг верилди” (Даниел 7:14). Иса Аллаһын мәһәббәтини тәглид едәҹәји үчүн, онун рәһбәрлији алтында бөјүк мигјасда сүлһ вә хошбәхтлик олаҹагдыр (Матта 5:5; Јәһја 3:16; 1 Јәһја 4:7—10). “[Һөкумәтини] һагла вә доғрулугла мөһкәмләтмәк... үчүн, рәислијинин вә сүлһүн артмасына сон олмајаҹаг” (Ишаја 9:7). Мәһәббәтлә, әдаләтлә вә доғрулугла рәһбәрлик едән Һөкмдара малик олмаг неҹә дә бөјүк хејир-дуадыр! Буна ҝөрә дә, 2 Петер 3:13-ҹү ајәсиндә габагҹадан дејилмишдир: “Амма биз Онун вә’динә ҝөрә јени ҝөјләр [Аллаһын сәмави Падшаһлығыны] вә јени јер [јер үзүндә јени ҹәмијјәт] ҝөзләјирик ки, онларда салеһлик өмүр сүрүр”.
7. Матта 24:14-ҹү ајәси бу ҝүн неҹә јеринә јетир?
7 Шүбһәсиз ки, Аллаһын Падшаһлығы һаггындакы хош хәбәр, диҝәр хәбәрләрдән фәргли олараг, һәгигәти севән һәр бир кәсә үмид верир. Буна ҝөрә, бу әшјалар системинин “сон ҝүнләрини” јашадығымыза шәһадәтлик едән әламәтин бир һиссәсини тәсвир едәрәк, Иса габагҹадан деди: “Падшаһлыг һаггында олан бу Мүждә милләтләрин һамысына шәһадәт олараг бүтүн дүнјада тәблиғ олунаҹагдыр; вә сон о заман ҝләҹәкдир” (2 Тимотејә 3:1—5; Матта 24:14, И—93). Бу пејғәмбәрлик бу ҝүн јеринә јетмәкдәдир, чүнки Јегованын алты милјондан артыг Шаһиди, башга инсанлара Аллаһын Падшаһлығы һаггында данышмаг үчүн, дүнјанын 235 өлкәсиндә милјарддан артыг саат сәрф едир. Бүтүн дүнјада 91 487 јығынҹағын ибадәт үчүн топлашдығы јерләр һаглы олараг Падшаһлыг Заллары адланыр. Инсанлар бу Заллара, ҝәләҹәк јени һөкумәт һаггында өјрәнмәк үчүн топлашырлар.
Мәсиһин һакимијјәт шәрикләри
8, 9. а) Мәсиһин һакимијјәт шәрикләри кимләрдән сечилир? б) Падшаһын вә онун һакимијјәт шәрикләринин һөкмранлығы барәсиндә нәјә әмин ола биләрик?
8 Аллаһын сәмави Падшаһлығында, Мәсиһ Исанын һакимијјәт шәрикләри олаҹагдыр. Вәһј 14:1—4 ајәләриндә, 144 000 адамын “инсанлар арасындан сатын” алынаҹаглары вә сәмави һәјата дирилдиләҹәкләри габагҹадан дејилмишди. Бу саја дахил олан инсанлар, башгаларынын онлара хидмәт етмәсини ҝөзләмәмишләр, өзләри тәвазөкарлыгла Аллаһа вә гоншуларына хидмәт етмишләр. “Онлар Аллаһын вә Мәсиһин каһинләри олаҹаг вә Онунла бәрабәр мин ил падшаһлыг едәҹәкләр” (Вәһј 20:6, И—93). Онларын сајы, бу әшјалар системиндән сағ чыхаҹаг “һәр милләтдән, бүтүн гәбиләләрдән, халглардан вә дилләрдән олан, кимсәнин сајмаға гадир олмадығы бөјүк бир издиһам”ын сајындан олдугҹа аздыр. Бу инсанлар да “ҝеҹә-ҝүндүз Она [Аллаһа] хидмәт едирләр”, лакин онлар ҝөјләрә дә’вәт алмамышлар (Вәһј 7:9, 15). Аллаһын Падшаһлығынын вәтәндашлары олараг, онлар јени јерин әсасыны тәшкил едирләр (Мәзмур 37:29; Јәһја 10:16).
9 Јегова, ҝөјдә Мәсиһлә һөкмранлыг едәҹәк инсанларын тимсалында, һәјатын бүтүн ағырлыгларыны үзәрләриндә сынамыш садиг инсанлары сечирди. Бу падшаһ-каһинләр инсанларын гаршылашдыглары бүтүн чәтинликләри шәхси тәҹрүбәләриндә дадмышлар. Јер үзүндә јашамалары сајәсиндә, онлар инсанлары даһа јахшы идарә едә биләҹәкләр. Һәтта Иса өзү, “чәкдији изтирабларла итаәтли олмағы өјрәнди” (Ибраниләрә 5:8). Һәвари Павел онун һаггында бу сөзләри деди: “Биз елә бир баш каһинә малик дејилик ки, зәифликләримиздә бизә аҹыја билмәсин; әксинә, бизим кими имтаһан едилмиш, ҝүнаһдан хариҹ, һәр шејдә бизә бәнзәјән бир Баш Каһинә маликик” (Ибраниләрә 4:15). Аллаһын әдаләтли јени дүнјасында инсанлар үзәриндә севән, аҹыјан падшаһларын вә каһинләрин һөкмранлыг едәҹәкләрини билмәк һәгигәтән дә тәсәлливериҹидир!
Падшаһлыг Аллаһын нијјәтинә дахил идими?
10. Нәјә ҝөрә сәмави Падшаһлыг Аллаһын илк нијјәтинә дахил дејилди?
10 Аллаһ Адәмлә Һәвваны јарадаркән, сәмави Падшаһлыг Онун илк нијјәтинә дахил идими? Тәквин китабында јарадылыш барәсиндәки һекајәдә, бәшәр аиләси үзәриндә рәһбәрлик едәҹәк Падшаһлыг һаггында һеч нә дејилмир. Јегова өзү инсанларын Һөкмдары иди вә нә гәдәр ки, инсанлар Она табе олурдулар башга рәһбәрлијә еһтијаҹ јох иди. Тәквин китабынын 1-ҹи фәслиндән ҝөрүндүјү кими, Јегова - еһтимал ки, илкин сәмави Оғлунун васитәсилә - Адәм вә Һәвва илә мүнасибәт јарадырды. Мүгәддәс Китабда белә бир ифадә истифадә олунур: “Аллаһ онлара деди” (Тәквин 1:28, 29; Јәһја 1:1).
11. Инсанлара һансы камил башланғыҹ верилмишди?
11 Мүгәддәс Китабда дејилир: “Аллаһ јаратдығы һәр шеји ҝөрдү вә будур, чох јахшы иди” (Тәквин 1:31). Әдән бағындакы һәр бир шеј там мүкәммәл иди. Адәм вә Һәвва ҹәннәтдә јашајырдылар. Онларын ағыллары вә бәдәнләри камил иди. Онлар Јараданлары илә, О исә онларла үнсијјәтдә олурду. Сәдагәтләрини горујуб сахласајдылар, камил ушаглара саһиб олардылар. Јени сәмави һөкумәтә дә еһтијаҹ олмазды.
12, 13. Камил инсанлар артмаға давам етсәјдиләр белә, нәјә ҝөрә Аллаһ онларла үнсијјәтдә ола биләрди?
12 Бәс инсанлар чохалдыгҹа, Аллаһ онларын һамысы илә неҹә үнсијјәт јарадаҹагды? Улдузлара диггәт јетирәк. Онлар, галактикалар адланан топалара груплашыблар. Бә’зи галактикаларда улдузларын сајы милјарда, диҝәрләриндә исә триллиона чатыр. Алимләрин рә’јинә ҝөрә, мүшаһидә едилмәси мүмкүн олан Каинатда 100 милјарда јахын галактика мөвҹуддур! Вә буна бахмајараг Јарадан дејир: “Ҝөзләринизи јухары галдырын вә ҝөрүн, бунлары ким јаратды; о ки, бунларын ордусуну сајы илә чыхарыр; онларын һамысыны адлары илә чағырыр; гүдрәтинин бөјүклүјүнә ҝөрә вә гүввәтинин зору илә онлардан һеч бири әксилмәз” (Ишаја 40:26).
13 Әҝәр Аллаһ бүтүн бу сәмави ҹисимләри јадында сахлајырса, онда, әлбәт ки, сајҹа улдузлардан чох аз олан инсанлара да диггәт јетирә биләр. Һәтта бу ҝүнләрдә белә, јер үзүндә јашајан милјонларла хидмәтчиси Она һәр ҝүн дуа едир. Онларын дуалары Аллаһа бир анда чатыр. Буна ҝөрә дә, бүтүн камил инсанларла үнсијјәтдә олмаг Аллаһ үчүн һеч бир чәтинлик јаратмајаҹагды. Инсанлара гајғы ҝөстәрмәк үчүн, Онун сәмави Падшаһлыға еһтијаҹы олмајаҹагды. Јегова кими Һөкмдара малик олмаг, Она билаваситә мүраҹиәт етмәк вә јер үзү ҹәннәтдә әбәдијјән јашајараг һеч заман өлмәмәк неҹә дә валеһедиҹи оларды!
“Өз әлиндә дејилдир”
14. Нәјә ҝөрә инсанлар Јегованын һакимијјәтинә һәмишә еһтијаҹ дујаҹаглар?
14 Лакин инсанларын - һәтта камил олсалар белә - Јегованын рәһбәрлијинә һәмишә еһтијаҹлары олаҹагдыр. Нәјә ҝөрә? Она ҝөрә ки, Јегова инсанлары, Онун рәһбәрлији олмадан мүвәффәгијјәтли олаҹаг тәрздә јаратмамышдыр. Бу, бүтүн бәшәријјәт үчүн бир ганундур вә пејғәмбәр Јеремја буну е’тираф едирди: “Ја РӘБ, билирәм ки, инсанын јолу өз әлиндә дејилдир; аддымларыны доғрултмаг јеријән инсанын әлиндә дејилдир. Ја РӘБ, мәни... мәзәммәт ет” (Јеремја 10:23, 24). Јегованын көмәји олмадан бәшәријјәт үзәриндә мүвәффәгијјәтлә идарә едә биләҹәкләрини дүшүнмәк, инсанлар тәрәфиндән ағылсызлыг оларды. Бу онларын јарадылышына зидд ҝәләрди. Јегованын рәһбәрлијиндән асылы олмамаг, мүтләг худбинлијә, нифрәтә, гәддарлыға, зоракылыға, мүһарибәләрә вә өлүмә ҝәтириб чыхарарды. “Бир адамын диҝәр адам үзәриндә һакимијјәти өз зәрәринә” оларды (Ваиз 8:9).
15. Улу валидејнләримизин јанлыш сечимләринин нәтиҹәси неҹә олду?
15 Бәдбәхтликдән, улу валидејнләримиз Аллаһын рәһбәрлијинә еһтијаҹлары олмадыгларыны дүшүндүләр вә Ондан асылы олмадан јашамағы үстүн тутдулар. Аллаһ онларын камил галмаларына изин вермәди. Онлар, ҹәрәјан мәнбәјиндән ајрылан електрик ҹиһазы кими олдулар. Вахт кечдикҹә, онлар “сүр’әтләрини азалдаҹаг” вә “дајанаҹагдылар”, јә’ни өләҹәкдиләр. Онлар зәдәли бир гәлиб кими, өз өвладларына ҝүнаһлы вәзијјәтләриндән башга бир шеј верә билмәдиләр (Ромалылара 5:12). “[Јегова] Гајадыр, онун иши тамдыр; чүнки, бүтүн јоллары һагдыр... Она гаршы фәсад етдиләр, онун оғуллары дејилләр, онларын нөгсаныдыр” (Тәснијә 32:4, 5). Бу доғрудур ки, Адәм вә Һәвваја, гијамчы руһани мәхлуг олан Шејтан тә’сир ҝөстәрди; амма онларын ағыллары камил иди вә онлар Шејтанын јанлыш тәклифләрини инкар едә биләрдиләр (Тәквин 3:1—19; Јагуб 4:7).
16. Аллаһдан асылы олмамағын нә илә нәтиҹәләндијинә тарих неҹә шәһадәтлик едир?
16 Тарих, Аллаһдан асылы олмамағын нә илә нәтиҹәләндијинә ајдын шәһадәтлик едир. Минилләр әрзиндә инсанлар һакимијјәтин мүхтәлиф формаларыны, мүхтәлиф игтисади системләри вә иҹтимаи гурулушлары сынагдан кечирдиләр. Бунунла јанашы, пис инсанлар “писликдә инкишаф” едирләр (2 Тимотејә 3:13). Буну ХХ әср сүбут етди. Тарихин һеч бир дөврү бу гәдәр азғын әдавәт, зоракылыг, мүһарибәләр, аҹлыглар, јохсуллуглар вә изтираблар ҝөрмәмишдир. Вә тибби наилијјәтләрә бахмајараг, бүтүн инсанлар ҝеҹ-тез өлүрләр (Ваиз 9:5, 10). Инсанлар, аддымларыны истигамәтләндирмәјә чалышараг, өзләрини Шејтанын вә онун ҹинләринин гурбаны етдиләр. Шејтанын вә ҹинләринин инсанлар үзәриндәки һакимијјәти о гәдәр бөјүкдүр ки, Мүгәддәс Китаб Шејтаны “бу әсрин танрысы” адландырыр (2 Коринфлиләрә 4:4).
Ирадә азадлығы һәдијјәси
17. Ирадә азадлығындан неҹә истифадә етмәк лазым иди?
17 Инсанларын истәдикләри јол илә ҝетмәләринә Јегова нәјә ҝөрә изин верди? Она ҝөрә ки, О, онлары ҝөзәл ирадә азадлығы илә - сечмәк габилијјәти илә јаратмышды. Һәвари Павел деди: “Рәббин Руһу һарада исә, азадлыг да орададыр” (2 Коринфлиләрә 3:17). Һеч ким робот олмағы вә ҝүнүн һәр санијәсиндә дејәҹәји сөзә вә ја едәҹәји ишә киминсә гәрар вермәсини истәмир. Лакин Јегова, инсанларын ирадә азадлыгларындан мә’сулијјәтлә истифадә етмәләрини, Јегованын ирадәсини јеринә јетирмәјин вә Она табе олмағын мүдрик аддым олдуғуну ҝөрмәләрини истәјирди (Галатијалылара 5:13). Бу сәбәбдән инсанлар там азад олмалы дејилдиләр, әкс тәгдирдә өзбашыналыг јаранарды. Ирадә азадлығы, Аллаһын мәһәббәтлә диктә едилмиш ганунлары чәрчивәсиндә истифадә олунмалы иди.
18. Аллаһ инсана азад сечими һәјата кечирмәјә имкан верәрәк, нәји ҝөстәрди?
18 Бәшәр аиләсинә истәдикләри јол илә ҝетмәјә иҹазә верәрәк, Јегова бирдәфәлик ҝөстәрди ки, Онун рәһбәрлијинә еһтијаҹымыз вар. Онун рәһбәрлик тәрзи, јә’ни али һөкмранлығы, јеҝанә доғру јолдур. Онун рәһбәрлији даһа чох хошбәхтлик, мәмнунлуг вә фираванлыг ҝәтирир. Бу онунла изаһ олунур ки, Јегованын нијјәтинә ҝөрә бизим ағлымыз вә бәдәнимиз, Онун ганунларына риајәт едәркән даһа јахшы фәалијјәт ҝөстәрир. “Фајдалы оланы сәнә өјрәдән вә сәни ҝетмәли олдуғун јол илә апаран Аллаһын РӘБ мәнәм” (Ишаја 48:17). Аллаһын ганунлары чәрчивәсиндән чыхмајан азад сечим инсанлара јүк олмазды, анҹаг онлара ән мүхтәлиф гидалар һазырламаға, евләр тикмәјә, сәнәт әсәрләри јаратмаға вә мусиги бәстәләмәјә имкан верәрди. Дүзҝүн олараг һәјата кечирилән ирадә азадлығы, јер үзү ҹәннәтдә валеһедиҹи, сонсуз ҝөзәл һәјатла нәтиҹәләнәрди.
19. Аллаһ һансы васитәнин көмәјилә инсанлары Өзү илә барышдырыр?
19 Лакин јанлыш сечим едәрәк, инсанлар Јеговадан узаглашдылар. Бундан сонра онлар камиллији итирдиләр, ҹырлашыб өлмәјә башладылар. Онларын бу аҹынаҹаглы вәзијјәтдән хилас олунмаға вә Аллаһла мүнасибәтләрини бәрпа етмәјә, Онун оғуллары вә гызлары олмаға еһтијаҹлары вардыр. Аллаһын бу мәгсәд үчүн сечдији васитә Падшаһлыг, Хиласкар исә Иса Мәсиһдир (Јәһја 3:16). Бунун сајәсиндә, Исанын мәсәлиндәки гејб олмуш оғул кими, һәгигәтән пешиман олан кәсләр Аллаһла барышыб, јенидән Онун өвладлары ола биләрләр (Лука 15:11—24; Ромалылара 8:21; 2 Коринфлиләрә 6:18).
20. Падшаһлыг Аллаһын ирадәсини неҹә һәјата кечирәҹәк?
20 Јегованын ирадәси јер үзүндә һөкмән јеринә јетириләҹәкдир (Ишаја 14:24, 27; 55:11). Мәсиһин рәһбәрлији алтындакы Падшаһлығынын васитәсилә, Аллаһ Һөкмдарымыз олмаг һүгугуна там бәраәт газандыраҹаг (вә ја буну сүбут едәҹәк). Падшаһлыг, инсанларын вә ҹинләрин бу дүнја үзәриндәки рәһбәлијинә сон гојаҹагдыр. Сонра Падшаһлыг бөлүнмәз олараг ҝөјдән мин ил әрзиндә идарә едәҹәкдир (Ромалылара 16:20; Вәһј 20:1—6). Лакин бу мүддәт әрзиндә Јегованын рәһбәрлијинин үстүнлүјү неҹә мә’лум едиләҹәк? Вә мин илдән сонра Падшаһлыг һансы ролу ојнајаҹаг? Бу суаллара нөвбәти мәгаләдә бахылаҹаг.
Тәкрар үчүн бәндләр
• Мүгәддәс Китабын башлыҹа мөвзусу нәдир?
• Јерин јени һакимијјәтинин тәркибинә кимләр дахилдир?
• Нәјә ҝөрә Аллаһдан асылы олмајан инсан һакимијјәтләри мүвәффәгијјәт әлдә едә билмир?
• Ирадә азадлығындан неҹә истифадә етмәк лазымдыр?
[8-ҹи сәһифәдәки шәкил]
Исанын тә’лимләриндә, Аллаһын Падшаһлыг васитәсилә едәҹәји рәһбәрлијинә хүсуси диггәт верилирди.
[10-ҹу сәһифәдәки шәкилләр]
Падшаһлыг, дүнјанын бүтүн өлкәләриндә, Јегованын Шаһидләринин өјрәтдикләри башлыҹа тә’лимдир.
[12-ҹи сәһифәдәки шәкилләр]
Тарих, Аллаһдан асылы олмамағын нә гәдәр писликләр төрәтдијинә шәһадәтлик едир.
[Иҹазә илә]
Биринҹи дүнја мүһарибәсинин әсҝәрләри: U.S. National Archives photo; һәбс дүшәрҝәси: Oświęcim Museum; ушаг: UN PHOTO 186156/J. Isaac