Мүгәддәс Китабын әхлаг нормалары ән јахшы нормалардырмы?

“ҸӘМИЈЈӘТИН, инсанлара тәһлүкәсизлик һисси вә рәһбәрлик верән, дәјәрли әсасы олан системә еһтијаҹы вар”. Бу фикри, тәҹрүбәли алман јазычысы вә телерепортјору гејд етмишдир. Шүбһәсиз, бу сөзләр мәнтигә ујғундур. Ҹәмијјәтин рифаһы вә сабит инкишафы үчүн, мөһкәм тәмәл - доғруну јанлышдан, јахшыны писдән ајырд едән үмумбәшәри нормалар ҝәрәкдир. Мәсәлә, ҹәмијјәт вә онун үзвләри үчүн һансы нормалары ән јахшы нормалар һесаб едилмәсиндәдир.

Мүгәддәс Китабын әхлаг нормалары һамы тәрәфиндән гәбул олунарса, онлар раһат вә хошбәхт һәјат сүрмәкдә инсанлара көмәк едәҹәкдир. Нәтиҹәдә, бу нормалара риајәт едән инсан ҹәмијјәти даһа сабит вә хошбәхт олаҹагдыр. Бу һәгигәтән дә беләдирми? Ҝәлин, Мүгәддәс Китабын ики ваҹиб шеј һаггында - никаһда сәдагәт вә ҝүндәлик һәјатда дүзлүк барәдә дедикләрини нәзәрдән кечирәк.

Һәјат јолдашыныза “бағланын”

Јараданымыз әввәлҹә Адәми, сонра исә она көмәкчи олараг Һәвваны јаратды. Бу, тарихдә мөһкәм бағлылығы олаҹаг, илк никаһ иди. Аллаһ деди: “Инсан анасыны вә атасыны бурахаҹаг вә арвадына бағланаҹагдыр вә бир бәдән олаҹаглар”. Тәхминән 4 000 ил сонра, Иса Мәсиһ никаһла әлагәдар бу әмри бүтүн давамчыларына тәкрар етди. О, һәмчинин никаһдан кәнар ҹинси әлагәни мүһакимә етди (Тәквин 1:27, 28; 2:24; Матта 5:27—30; 19:5).

Мүгәддәс Китаба әсасән, хошбәхт никаһын ики ваҹиб ачары, әрлә арвадын бир-бирләринә ҝөстәрдикләри мәһәббәт вә һөрмәтдир. Аиләнин башы олан әр, арвадынын гејдинә галмаг үчүн әлиндән ҝәләни едәрәк, тәмәннасыз мәһәббәт тәзаһүр етдирмәлидир. Онунла “ағыллы” [“билијә әсасән”, ЈД] рәфтар етмәли вә “сәрт давранмамалыдыр”. Арвад исә әринә дәрин һөрмәт етмәлидир. Әҝәр әрлә арвад бу принсипләрә риајәт едирләрсә, никаһда јаранан проблемләрин чохуну һәлл едәр вә ја онлара јол вермәјә биләрләр. Беләликлә дә әр арвадына, арвад исә әринә “бағланмаға” чалышаҹагдыр (1 Петер 3:1—7, И—93; Колослулара 3:18, 19; Ефеслиләрә 5:22—33).

Мүгәддәс Китабын һәјат јолдашына сәдагәтли олмаг әмри, һәгигәтәнми никаһын хошбәхт олмасына көмәк едир? Алманијада кечирилән арашдырманын нәтиҹәләринә нәзәр салаг. Инсанлардан, хошбәхт никаһ үчүн һансы амилләрин ваҹиб олдуғу сорушулду. Онларын әксәријјәти гаршылыглы сәдагәтлилији гејд етдиләр. Сиз дә разы дејилсинизми ки, һәјат јолдашынын садиглијинә әмин оланда, әрлә арвад өзләрини даһа хошбәхт һисс едиләр?

Әҝәр проблемләр јаранарса

Әҝәр әрлә арвад арасында ҹидди фикир ајрылығы јаранарса, онда неҹә? Бәс мәһәббәт тәдриҹән зәифләјәрсә? Белә олдугда, бошанмаг даһа јахшы олмаздымы? Јохса Мүгәддәс Китабын, һәјат јолдашына садиг галмаг әмринә табе олмаг даһа мүдрик оларды?

Мүгәддәс Китабда, јазылмышдыр ки, инсанларын гејри-камиллији нәтиҹәсиндә евли оланларын һамысынын чәтинликләри олаҹадыр (1 Коринфлиләрә 7:28). Бунунла белә, Мүгәддәс Китабын әхлаг нормаларына риајәт едән әр-арвадлар бир-бирләринин сәһвләрини бағышламаға вә чәтинликләри бирҝә һәлл етмәјә чалышырлар. Әлбәттә, зинакарлыг вә ја аиләдә зоракылыг кими һаллар мөвҹуддур ки, бу заман мәсиһчи һаглы олараг бошанмаг вә ја ајры јашамаг барәдә дүшүнә биләр (Матта 5:32; 19:9). Анҹаг һеч бир ҹидди сәбәб олмадан, јахуд бир башгасы илә евләнмәк үчүн тез-тәләсик бошанмаг, егоистлији вә башгаларына гаршы е’тинасызлығы ҝөстәрир. Шүбһәсиз ки, бу ҹүр әһвал-руһијјә инсанын һәјатына сабитлик вә хошбәхтлик ҝәтирмир. Бир нүмунәни нәзәрдән кечирәк.

Питерә елә ҝәлирди ки, онун никаһы әввәлки тәравәтини итирибa. Буна ҝөрә дә, арвадыны тәрк етди вә әриндән ајрылмыш Мониканын јанына көчдү. Сонра нә олду? Бир нечә ајдан сонра Питер анлады ки, Моника илә јашамаг “һеч дә дүшүндүјү кими асан дејил”. Нә үчүн? Инсана хас олан чатышмазлыглар, арвады илә мүнасибәтләриндә олдуғу кими, јени рәфигәсилә мүнасибәтләриндә дә ајдын ҝөрүнүрдү. Даһа дәһшәтлиси дә одур ки, бу ҹүр тәләсик вә егоист бир гәрар нәтиҹәсиндә Питерин ҹидди малијјә чәтинликләри јаранды. Үстәлик, аиләдә баш верән бөјүк дәјишикликләр үзүндән Мониканын ушагларына ҝүҹлү мә’нәви зәрбә вурулмушду.

Бу нүмунәдән көрүндүјү кими, никаһ ҝәмиси фыртына илә гаршылашанда, ону тәрк етмәк һеч дә проблемләрин һәлли демәк дејил. Лакин Аллаһын Кәламынын әхлаг принсипләринә риајәт етмәк, әр-арвада чох вахт һәјати фыртыналары кечмәјә вә сакит лимана ҝедән јолу тапмаға көмәк едир. Томас вә Дорис илә дә белә олду.

Томас һәддиндән артыг ичмәјә башлајанда, артыг 30 ил иди ки, Дорислә евли иди. Дорисдә руһ дүшкүнлүјү јаранды вә онларын һәр икиси бошанма һаггында дүшүнүрдүләр. Дорис дәрдини Јегованын Шаһидләриндән биринә ачды. Шаһид, Мүгәддәс Китабын никаһ һаггында дедикләрини ҝөстәрәрәк, ајрылмаға тәләсмәмәсини вә әввәлҹә отуруб әри илә бирликдә чыхыш јолу ахтармасыны мәсләһәт ҝөрдү. Дорис белә дә етди. Бир нечә ајдан сонра, артыг бошанма һаггында һеч сөһбәт белә едилмирди. Томас вә Дорис проблемләрини бирҝә һәлл етмәјә чалышырдылар. Мүгәддәс Китабын мәсләһәтләрини тәтбиг етмәк, онларын никаһыны мөһкәмләндирди вә чәтинликләрин өһдәсиндән ҝәлмәјә имкан верди.

Һәр шејдә дүрүстлүк

Һәјат јолдашына сәдагәтли галмаг үчүн, мә’нәви ҝүҹ вә әдаләтли принсипләрә гаршы мәһәббәт тәләб олунур. Дүзлүк олмајан бир дүнјада тәмиз галмаг үчүн дә ејни хүсусијјәтләр ҝәрәкдир. Мүгәддәс Китабда дүрүстлүк һаггында чох сөһбәт едилир. Һәвари Павел, Јәһудејада јашајан биринҹи әсрин мәсиһчиләринә јазырды: “Һәр ҹәһәтҹә өзүмүзү јахшы апармаға ҹан атырыг” (Ибраниләрә 13:18). Бу нә демәкдир?

Дүрүст инсан һәгигәти сөјләјир вә сахтакарлыгдан узагдыр. Башгаларына гаршы әдаләтлидир: сәмимидир, нәҹибдир, јалан данышмыр вә һијлә ишләтмир. Дүрүст инсан виҹданлыдыр вә достларыны алдатмыр. О, инсанлар арасында е’тибарлы мүһит јарадыр вә сағлам, мөһкәм гаршылыглы мүнасибәтләрин инкишафына көмәк едир.

Дүрүст инсанлар хошбәхтдирләрми? Онларын хошбәхт олмалары үчүн сәбәбләри вар. Рүшвәтхорлуғун вә јаланын ҝениш јајылмасына бахмајараг - бәлкә дә елә бу сәбәбдән - дүрүст инсанлар башгаларыны һәмишә валеһ едирләр. Ҝәнҹләр арасында кечирилән сорғуда иштирак едәнләрин 70 фаизи, дүрүстлүјү чох јахшы хүсусијјәт адландырыблар. Үстәлик, јашымыздан асылы олмајараг, һамымыз достларымызда һәр шејдән әввәл дүрүстлүјү гијмәтләндиририк.

Кристина 12 јашындан оғурлуға өјрәдилиб. Илләр кечдикҹә о, пешәкар ҹиб оғрусу олду. Кристина дејир: “Елә ҝүн олуб ки, евә нағд 5 000 алман маркасы [2 200 АБШ доллары] ҝәтирмишәм”. Ону бир нечә дәфә һәбс едибләр вә о, һәмишә һәбсә дүшмәк тәһлүкәси алтында јашајыбдыр. Јегованын Шаһидләри она Мүгәддәс Китабын дүрүстлүк һаггында сөјләдикләрини ачыглајанда, Кристинаны Мүгәддәс Китабын әхлаг нормалары ҹәлб етди. О, “оғурлуг едән артыг оғурламасын” әмринә табе олмағы өјрәнди (Ефеслиләрә 4:28).

Кристина, вәфтиз олараг Јегованын Шаһиди оланда, артыг оғру дејилди. Јегованын Шаһидләри дүрүстлүјә вә башга мәсиһчи хүсусијјәтләринә үстүнлүк вердикләри үчүн, о, һәр шејдә өзүнү дүрүст апармаға чалышырды. Бир гәзетдә белә јазылмышды: “Дүрүстлүк, мүлајимлик вә гоншусуна мәһәббәт кими әхлаг нормалары, Шаһидләрин дининдә олдугҹа чох гијмәтләндирилир” (“Лауситзер Рундсҹһау”). Һәјатында баш верән дәјишикликләр һаггында Кристинанын өзү нә фикирдәдир? “Оғурлугдан әл чәкдијим үчүн инди даһа чох хошбәхтәм. Өзүмү ҹәмијјәтин ләјагәтли үзвү һесаб едирәм”.

Бүтүн ҹәмијјәт үчүн фајда

Һәјат јолдашына гаршы сәдагәтли вә дүрүст олан инсанлар, өзләри хошбәхт олмагла бәрабәр, һәм дә үмумијјәтлә ҹәмијјәтә фајда ҝәтирирләр. Иш саһибләри, фырылдагчылыгла мәшғул олмајан инсанлары ишә ҝөтүрмәји үстүн тутурлар. Биз һамымыз гоншуларымызын е’тибарлы олмасыны истәјирик вә дүрүст инсанларын мағазаларындан алыш-вериш етмәји хошлајырыг. Мәҝәр рүшвәтхорлуг етмәјән сијасәтчиләрә, полис вә һакимләрә һөрмәт етмирикми? Дүрүстлүк, ҹәмијјәтин үзвләри үчүн мәнфәәт јох, принсип мәсәләси олдугда, ҹәмијјәтә даһа чох фајда ҝәтирир.

Бундан әлавә, һәјат јолдашына сәдагәтли олмаг - мөһкәм аиләләрин тәмәлидир. Бир чох инсанлар авропалы сијасәтчинин сөзләри илә разылашаҹаглар: “[Ән’әнәви] аилә, бу ҝүнә гәдәр дә инсанын тәһлүкәсизлик вә һәјатын мә’насыны әлдә едә биләҹәји әсас лиман олараг галыр”. Бөјүкләрин вә ушагларын, өзләрини психоложи ҹәһәтдән тәһлүкәсиз һисс етмәк имканлары оланда, аиләдә сүлһ һөкм сүрүр. Буна ҝөрә дә, һәјат јолдашына садиг оланлар, ҹәмијјәтин сабитлијинә көмәк едирләр.

Дүшүнүн! Тәрк едилмиш һәјат јолдашлары, бошанма үчүн мүраҹиәт едилән мәһкәмәләр вә ушаглары гәјјумлуға ҝөтүрмәк үчүн мәһкәмә ишләри олмасајды, һамы үчүн неҹә дә јахшы оларды. Бәс ҹиб оғрулары, фырылдагчылар, мағаза оғрулары, һәмчинин сатгын мә’мурлар вә сахтакар елм адамлары олмаса неҹә? Бу садәҹә бир арзудурму? Мүгәддәс Китабла вә орада ҝәләҹәк һаггында дејиләнләрлә дәриндән марагланан инсанлар белә дүшүнмүрләр. Аллаһын Кәламы вә’д едир ки, Јегованын Хиласкар Падшаһлығы тезликлә бүтүн јер үзүнү идарә едәҹәк. Бу Падшаһлығын һөкмранлығы алтында онун вәтәндашлары, Мүгәддәс Китабын әхлаг нормаларына ујғун јашамаға өјрәдиләҹәкләр. О заман, “салеһләр јери мирас алар вә онда әбәдијјән јашајарлар” сөзләри јеринә јетәҹәк (Мәзмур 37:29).

Мүгәддәс Китабын әхлаг нормалары ән јахшысыдыр

Мүгәддәс Јазыларла јахындан таныш олан милјонларла инсанлар, Мүгәддәс Китабын мәсләһәтләринин, инсан дүшүнҹәсиндән гат-гат үстүн олан Аллаһын мүдриклијинә әсасландығыны дәрк етдиләр. Бу инсанлар, Мүгәддәс Китабын е’тибара лајиг вә онун принсипләринин бизим ҝүнләримиздә һәјат үчүн ваҹиб олдуғуна әминдирләр. Онлар билирләр ки, Аллаһын Кәламындакы мәсләһәтләри динләмәк чох фајдалыдыр.

Буна ҝөрә дә, онлар Мүгәддәс Китабын мәсләһәтләринә диггәт јетирирләр: “Бүтүн үрәјинлә РӘББӘ ҝүвән вә өз анлајышына архаланма; бүтүн јолларында ону таны, О да сәнин јолларыны доғрулдар” (Сүлејманын мәсәлләри 3:5, 6). Белә давранараг, бу инсанлар даһа да хошбәхт олур вә башгаларына да хошбәхтлик бәхш едирләр. Онлар, бүтүн бәшәријјәтин Мүгәддәс Китабын әхлаг нормаларына әсасән јашајаҹағы “ҝәләҹәк һәјата” мөһкәм әминлик инкишаф етдирирләр (1 Тимотејә 4:8).

[Һашијә]

[5-ҹи сәһифәдәки шәрһ]

Мүгәддәс Китабын әхлаг принсипләринә риајәт етмәк, чох вахт әр-арвада һәјати фыртыналары кечмәјә вә сакит лимана ҝедән јолу тапмаға көмәк едир.

[6-ҹы сәһифәдәки шәрһ]

Рүшвәтхорлуғун вә јаланын ҝениш јајылмасына бахмајараг - бәлкә дә елә бу сәбәбдән - дүрүст инсанлар башгаларыны һәмишә валеһ едирләр.