Әхлаг дәјәрләри гијмәтини итирир
“ӘВВӘЛЛӘР буна бәнзәр шејләр әсла баш вермәзди”. Бу, Алманијанын кечмиш баш назири Һелмут Шмидтин гејд етдији сөзләрдир. О, бу јахынларда вәзифәли шәхсләр арасында баш верән, гәзет сенсасијасына сәбәб олан, ҝөрүнмәмиш фырылдагчылыг һадисәләринә ҝөрә кәдәрләнирди. О дејирди: “Аҹҝөзлүк уҹбатындан әхлаг нормалары итирилиб”.
Онунла чохлары разылашаҹаглар. Аллаһын Кәламы олан Мүгәддәс Китабда көк салан вә чох инсанлар тәрәфиндән әсрләр боју хејир вә шәр ме’јары кими гәбул олунан әхлаг нормалары инкар едилир. Бу, һәтта христиан өлкәләриндә дә баш верир.
Мүгәддәс Китабын әхлаг нормалары фајдалыдырмы?
Мүгәддәс Китабын тә’лимләринә әсасланан әхлаг нормаларына, дүзлүк вә тәмизлик дә дахилдир. Анҹаг јаланчылыг, рүшвәтхорлуг вә фырылдагчылыг ҝениш јајылмагдадыр. Лондонда чап олунан “The Times” гәзетинин мә’луматына әсасән, бә’зи полис мүвәккилләри “мүсадирә олунмуш наркотикләри алыб- сатараг вә јахуд ҹинајәт дүнјасы башчыларынын әлејһинә олан дәлилләри итирәрәк, һәр дәфә 100 000 фунт стерлинги мәнимсәмәкдә иттиһам олунурлар”. Австријада сығорта саһәсиндә фырылдагчылыг ади иш һесаб олунур. Бу јахынларда, “алман елм дүнјасында баш вермиш фырылдагчылығын” ифша олунмасы Алманијанын елм ҹәмијјәтини ҝүҹлү сурәтдә сарсытды.
“Алман ҝенетикләри арасында бөјүк хадим олан” бир профессор, бөјүк мигдарда сүбутлары тәһриф етмәкдә вә ја сахталашдырмагда ҝүнаһландырылды.
Мүгәддәс Китабын әхлаг нормалары, ејни заманда, никаһда сәдагәти, јә’ни даими гаршылыглы мүнасибәти дә нәзәрдә тутур. Лакин бошанмаг үчүн мәһкәмәјә мүраҹиәт едәнләрин сајы ҝет-ҝедә артыр. Бир католик гәзетиндә гејд олунурду ки, “һәтта “мүһафизәкар” Исвечрәдә белә, бошанманын сајы ҝетдикҹә чохалыр” (“Christ in der Gegenwart”). Нидерландда никаһларын 33 фаизи бошанма илә нәтиҹәләнир. Өтән илләр әрзиндә Алманијада баш верән бу ҹүр иҹтимаи дәјишикликләрә ҝөрә нараһат олан бир гадын јазырды: “Бу ҝүн никаһа, көһнәлмиш вә дәбдән дүшмүш бир шеј кими бахылыр. Артыг инсанлар өмрү боју бәрабәр јашамаг үчүн евләнмирләр”.
Диҝәр тәрәфдән, милјонларла инсан Мүгәддәс Китабын өјрәтдији әхлаг нормаларынын е’тибара лајиг вә мүасир дөврүмүздә һәјати ваҹиб олдуғуну дүшүнүр. Исвечрә-Алманија сәрһәддиндә јашајан әрлә арвад белә бир нәтиҹәјә ҝәлибләр ки, Мүгәддәс Китабын нормалары әсасында јашамағы өјрәндикдән сонра даһа хошбәхт олублар. Онларын фикринҹә, “һәјатын бүтүн саһәләриндә тәтбиг едилә билән јалныз бир рәһбәрлик мөвҹуддур. Бу рәһбәрлик Мүгәддәс Китабдыр”.
Бәс сиз неҹә дүшүнүрсүнүз? Мүгәддәс Китаб гијмәтли рәһбәрлик ола биләрми? Мүгәддәс Китаба әсасланан әхлаг нормалары бу ҝүн дә тәтбиг едиләндирми?