Даими никаһын ики ачары

1, 2. а) Никаһ нә гәдәр сүрмәлидир? б) Бу неҹә мүмкүндүр?

АЛЛАҺ илк киши илә гадыны никаһда бирләшдирәркән, бу бирлијин мүвәггәти олаҹағына һеч бир ишарә етмәмишдир. Адәмлә Һәвва өмүрләри боју бирликдә јашамалы идиләр (Јарадылыш 2:24, МКШ). Аллаһын шәрәфли евлилик үчүн нормасы бир кишинин бир гадынла бирләшмәсидир. Һәјат јолдашындан биринин вә ја һәр икисинин јол вердији ҹинси әхлагсызлыг Мүгәддәс Китабын бошанмаја изин вердији јеҝанә сәбәбдир. Јалныз бундан сонра јенидән никаһ гурмаг олар (Матта 5:32).

² Бәс ики шәхсин бирликдә даими хошбәхт јашамасы мүмкүндүрмү? Бәли. Мүгәддәс Китабда, буна көмәк едән ики ваҹиб амил вә ја ачар һаггында бәһс едилир. Әҝәр һәм әр, һәм дә арвад бу ачарлардан истифадә едәрләрсә, онлар хошбәхтлијин вә бир чох хејир–дуаларын гапысыны ачаҹаглар. Бу һансы ачарлардыр?

БИРИНҸИ АЧАР

3. Әрлә арвад һансы үч нөв мәһәббәти инкишаф етдирмәлидирләр?

³ Биринҹи ачар мәһәббәтдир. Мараглыдыр ки, Мүгәддәс Китабда мәһәббәтин мүхтәлиф нөвләри һаггында бәһс едилир. Онлардан бири, бир кәсә дујулан сәмими, шәхси бағлылыгдыр; мәһәббәтин бу нөвү, јахын достлар арасында олур (Јәһја 11:3). Мәһәббәтин башга нөвү, аилә үзвләри арасындакы мәһәббәтдир (Ромалылара 12:10). Үчүнҹүсү, киши вә гадын арасында олан романтик мәһәббәтдир (Сүлејманын мәсәлләри 5:15–20). Әлбәттә, әрлә арвад мәһәббәтин бүтүн бу нөвләрини инкишаф етдирмәлидирләр. Лакин мәһәббәтин диҝәрләриндән даһа зәрури олан дөрдүнҹү нөвү дә вар.

4. Мәһәббәтин дөрдүнҹү нөвү һансыдыр?

⁴ Јунанҹа Мүгәддәс Јазыларын орижинал дилиндә, мәһәббәтин дөрдүнҹү нөвү агапе адланыр. Бу сөз, 1 Јәһја 4:8 ајәсиндә ишләнир; биз орада охујуруг: “Аллаһ мәһәббәтдир”. Доғрудан да, “биз Ону [Аллаһы] севирик, чүнки О бизи биринҹи севмишдир” (1 Јәһја 4:19). Мәсиһчи, белә мәһәббәти әввәлҹә Јеһова Аллаһа, сонра исә јахынына бәсләмәлидир (Марк 12:29–31). Агапе сөзү Ефеслиләрә 5:2 ајәсиндә дә ишләнир вә орада дејилир: “Мәсиһ бизи севиб, Өзүнү бизим үчүн... фәда етдији кими, сиз дә мәһәббәтлә һәрәкәт един”. Иса, демишдир ки, онун һәгиги давамчылары мәһәббәтин бу нөвү илә танынаҹаглар: “Әҝәр бир–биринизә гаршы мәһәббәтиниз [агапе] олса, бундан һәр кәс Мәним шаҝирдләрим олдуғунузу биләҹәк” (Јәһја 13:35). Һәмчинин гејд едәк ки, агапе сөзү 1 Коринфлиләрә 13:13 ајәсиндә дә ишләнир: “Үч шеј јашајыр: иман, үмид, мәһәббәт; амма мәһәббәт [агапе] бунларын һамысындан үстүндүр”.

5, 6. а) Нәјә ҝөрә мәһәббәт, иман вә үмиддән үстүндүр? б) Мәһәббәтин никаһы даими едә биләҹәк сәбәбләриндән бә’зиләри һансылардыр?

⁵ Агапе мәһәббәтини иман вә үмиддән үстүн едән нәдир? Бу мәһәббәт принсипләрә, јә’ни Аллаһын Кәламында олан әдаләт принсипләринә әсасланыр (Мәзмур 119:105). Бу, әкс тәрәфин буна лајиг олуб олмамасындан асылы олмајараг, она гаршы мүнасибәтдә дүзҝүн давранмаг вә Аллаһын нөгтеји–нәзәринә әсасән јахшылыг етмәк үчүн тәмәннасыз гајғыдыр. Белә мәһәббәт, әрлә арвадын Мүгәддәс Китабдакы нөвбәти мәсләһәтә риајәт етмәләринә имкан верир: “Бир–биринизә тәһәммүл един вә биринизин диҝәриндән шикајәти варса, бағышлајын. Мәсиһ [“Јеһова”, ЈД] сизи бағышладығы кими, сиз дә бир–биринизи бағышлајын” (Колослулара 3:13). ­Бир–биринә мәһәббәт бәсләјән вә бу һисси инкишаф етдирән әр–арвад, “бир–биринизә ҹошғун мәһәббәтиниз [агапе] олсун, чүнки мәһәббәт бир чох ҝүнаһын үстүнү өртәр” мәсләһәтинә риајәт едирләр (1 Петер 4:8). Диггәт јетирәк ки, мәһәббәт сәһвләрин үстүнү өртүр. Лакин мәһәббәт онлары арадан галдырмыр, чүнки гејри–камил инсанлар һәмишә сәһвә јол верир (Мәзмур 130:3, 4; Јагуб 3:2).

⁶ Әрлә арвад бу ҹүр мәһәббәти Аллаһа вә бир–бирләринә гаршы инкишаф етдирирләрсә, онларын никаһы давамлы вә хошбәхт олаҹаг, чүнки “мәһәббәт әсла түкәнмәз” (1 Коринфлиләрә 13:8). Мәһәббәт, “камил бирлијин” бағыдыр (Колослулара 3:14). Әҝәр евлисинизсә, һәр икиниз мәһәббәтин бу нөвүнү неҹә инкишаф етдирә биләрсиниз? Аллаһын Кәламыны бирликдә охујун вә мүзакирә един. Исанын мәһәббәт нүмунәсини тәдгиг един, дүшүнҹә вә давраныш тәрзиндә ондан нүмунә ҝөтүрмәјә чалышын. Бундан әлавә, Аллаһын Кәламынын өјрәдилдији мәсиһчи јығынҹагларында иштирак един. Һәмчинин Аллаһын мүгәддәс руһунун сәмәрәси олан мәһәббәтин бу үстүн нөвүнү инкишаф етдирмәкдә көмәк үчүн Аллаһа дуа един (Сүлејманын мәсәлләри 3:5, 6; Јәһја 17:3; Галатијалылара 5:22; Ибраниләрә 10:24, 25).

ИКИНҸИ АЧАР

7. Һөрмәт етмәк нә демәкдир вә никаһда һөрмәти ким ҝөстәрмәлидир?

⁷ Әҝәр никаһда олан әр–арвад һәгигәтән дә бир–би­ри­ни севирләрсә, онларын арасында һөрмәт дә олаҹагдыр; мәһз һөрмәт — хошбәхт никаһын икинҹи ачарыдыр. Һөрмәт етмәк, “башгаларыны нәзәрә алмаг вә онлара еһтирам етмәк” демәкдир. Аллаһын Кәламында бүтүн мәсиһчиләрә, о ҹүмләдән, әрлә арвада мәсләһәт верилир: “Бир–биринизи һөрмәтдә габаглајын” (Ромалылара 12:10). Һәвари Павел јазырды: “Еј әрләр, һәмчинин сиз дә арвадларынызла илтифатлы давранын. Онлар зәиф ҹинс... олдугларындан онлара һөрмәт ҝөстәрин” (1 Петер 3:7). Арвада исә мәсләһәт едилир ки, “әринә еһтирам етсин” (Ефеслиләрә 5:33). Әҝәр биз кимәсә еһтирам етмәк истәјириксә, һәмин шәхслә мүлајим давраныр, шәхси ләјагәтинә вә нөгтеји–нәзәрләринә һөрмәт едир вә онун ағлабатан хаһишләрини јеринә јетирмәјә чалышырыг.

8—10. Һөрмәт, никаһ бирлијини һансы јолларла мөһкәм вә хошбәхт едә биләр?

⁸ Никаһын хошбәхт олмасы үчүн, һәр кәс өз һәјат јолдашына һөрмәт етмәлидир, јә’ни “һәр кәс јалныз өз мәнфәәтини дејил, башгаларынын да [өз һәјат јолдашынын да] мәнфәәтини” ҝүдмәлидир (Филипилиләрә 2:4). Јалныз өз мәнфәәтини ҝүдмәк егоистликдир. Бунун әвәзиндә диҝәри үчүн дә нәјин јахшы олаҹағыны дүшүнмәк зәруридир. Әлбәттә ки, һәјат јолдашынын мәнафејини өзүнүнкиндән үстүн тутмаг лазымдыр.

⁹ Һөрмәт, әрлә арвадын нөгтеји–нәзәрләриндә олан фикир ајрылыгларыны анламаға көмәк едәҹәкдир. Ики шәхсин һәр бир шејдә ејни нөгтеји–нәзәрә саһиб олмасыны дүшүнмәк дүзҝүн дејил. Әр үчүн әһәмијјәтли олан шеј, арвад үчүн әһәмијјәтсиз ола биләр, јахуд арвадын хошладығы шеј әрин хошуна ҝәлмәјә биләр. Лакин бунлар Јеһованын ганун вә принсипләринә зидд дејилсә, онлардан һәр бири диҝәринин нөгтеји–нәзәринә вә сечдији шејә һөрмәтлә јанашмалыдырлар (1 Петер 2:16; мүгајисә един Филимона 14). Бундан әлавә, әрлә арвад бир–бирләринин шәхси ләјагәтинә һөрмәт етмәли вә истәр тәнһалыгда, истәрсә дә иҹтимаи јердә бир–бирини лаға гојмагла вә ја зарафатларла алчалтмамалыдыр.

¹⁰ Беләликлә, Аллаһа вә бир–биринә бәсләнән мәһәббәт вә гаршылыглы һөрмәт, никаһын мүвәффәгијјәтли олмасы үчүн ики ваҹиб ачардыр. Бу ачарлары аилә һәјатынын бә’зи ваҹиб саһәләриндә неҹә истифадә етмәк олар?

МӘСИҺИН БАШЧЫЛЫҒЫНА БӘНЗӘР БАШЧЫЛЫГ

11. Мүгәддәс Јазылара әсасән, никаһда башчы кимдир?

¹¹ Мүгәддәс Китабда дејилир ки, киши, аиләјә мүвәффәгијјәтлә башчылыг етмәкдә лазым олан хүсусијјәтләрлә јарадылыбдыр. Демәк киши, өз арвад вә ушагларынын руһани вә физики фираванлығы үчүн Јеһованын гаршысында мәс’улијјәт дашыјыр. О, Јеһованын ирадәсини әкс етдирән таразлашдырылмыш гәрарлар гәбул етмәли вә Аллаһа мәгбул давраныш тәрзинә даир јахшы нүмунә олмалыдыр. “Гадынлар! Рәббә табе олур кими, әрләринизә табе олун. Чүнки... Мәсиһ иманлылар ҹәмијјәтинин Башчысы олдуғу кими, әр дә арвадын башчысыдыр” (Ефеслиләрә 5:22, 23). Лакин Мүгәддәс Китабда дејилир ки, әр дә, үзәриндә нүфузу олан Башчыја маликдир. Һәвари Павел јазырды: “Буну да билмәнизи истәјирәм ки, һәр әрин башчысы Мәсиһ, арвадын башчысы әр, Мәсиһин башчысы исә Аллаһдыр” (1 Коринфлиләрә 11:3). Һикмәтли әр, үзәриндә башчы олан Иса Мәсиһдән нүмунә ҝөтүрәрәк, башчылыг вәзифәсини һәјата кечирмәји өјрәнир.

12. Иса һәм табечилијә, һәм дә башчылыға даир һансы ҝөзәл нүмунәни верди?

¹² Исанын башчысы исә Јеһовадыр вә Иса, лазыми гајдада Она табе олур. Иса демишди: “Мәгсәдим өз ирадәми дејил, Мәни ҝөндәрәнин ирадәсини јеринә јетирмәкдир” (Јәһја 5:30). Неҹә дә ҝөзәл нүмунәдир! Иса, “бүтүн хилгәтдән габаг” доғуландыр (Колослулара 1:15). О, Мәсиһ олду. О, мүгәддәс руһла мәсһ едилмиш мәсиһчиләр јығынҹағынын Башчысы вә Аллаһын Падшаһлығынын сечилмиш Падшаһы олараг бүтүн мәләкләрдән үстүн мөвге тутмалы иди (Филипилиләрә 2:9–11; Ибраниләрә 1:4). Белә јүксәк мөвгејә вә ҝөзәл ҝәләҹәјә саһиб олмасына бахмајараг, Иса кобуд, инадҹыл вә ја һәддиндән артыг тәләбкар инсан дејилди. О, өз давамчыларына она табе олмалы олдугларыны һәр вахт хатырладан зүлмкар да дејилди. Иса, хүсусилә дә, кәдәрли оланлара мәһәббәт вә ҹаныјананлыг ҝөстәрирди. О дејирди: “Еј бүтүн јорғунлар вә јүкләри ағыр оланлар, Мәним јаныма ҝәлин вә Мән сизә раһатлыг верәрәм. Бојундуруғуму үзәринизә ҝөтүрүн вә Мәндән өјрәнин; чүнки Мән һәлим вә гәлбдән тәвазөкарам; вә ҹаныныза раһатлыг тапарсыныз. Чүнки бојундуруғум асан вә јүкүм јүнҝүлдүр” (Матта 11:28–30). Иса илә үнсијјәтдә олмаг мәмнунлуг бәхш едирди.

13, 14. Севән әр, Исадан нүмунә ҝөтүрәрәк өз башчылыг сәлаһијјәтини һәјата неҹә кечирәҹәкдир?

¹³ Аилә һәјатыны хошбәхт етмәјә чалышан әр, Исанын ҝөзәл хүсусијјәтләрини нәзәрә алырса, јахшы давраныр. Јахшы әр кобуд вә әмр верән олмајаҹаг вә башчылыг сәлаһијјәтиндән арвадыны горхутмаг үчүн бир дәјәнәк кими истифадә етмәјәҹәкдир. Бунун әвәзинә о арвадыны севәҹәк вә она һөрмәт едәҹәкдир. Әҝәр Иса “гәлбдән тәвазөкар” идисә, әрин белә олмасы үчүн даһа чох сәбәбләр вар, чүнки Исадан фәргли олараг, о, сәһвләрә јол верир. Әр сәһвә јол вердикдә, ҝөзләјир ки, арвады ону баша дүшәҹәк. Буна ҝөрә дә тәвазөкар әр, һәтта “бағышла; сән һаглысан”, сөзләрини демәк чәтин олса белә, өз сәһвини е’тираф едир. Арвада, мәғрур вә инадҹыл јох, һәлим вә тәвазөкар әрин башчылығына һөрмәт етмәк даһа асандыр. Өз нөвбәсиндә, әринә һөрмәт едән арвад да сәһвләринә ҝөрә үзр истәјир.

¹⁴ Аллаһ гадыны ҝөзәл хүсусијјәтләрлә јарадыб ки, о, аиләнин хошбәхтлијинә көмәк етмәк үчүн онлардан истифадә едә билсин. Һикмәтли әр буну е’тираф едир вә арвадыны өзүнә табе етмәјә чалышмыр. Бир чох гадынлара, аиләнин гејдинә галмаг вә инсанлар арасында гаршылыглы мүнасибәт јаратмаг үчүн ҝәрәкли олан ҹаныјананлыг вә һәссаслыг кими кејфијјәтләр хасдыр. Адәтән гадын, еви зөвглә сәлигәјә салмаг үчүн кифајәт гәдәр баҹарыглыдыр. “Сүлејманын мәсәлләри” китабынын 31–ҹи фәслиндә тәсвир едилән “баҹарыглы арвад” бир чох ҝөзәл кејфијјәт вә габилијјәтләрә малик иди вә бунлар онун аиләсинә фајда ҝәтирирди. Нә үчүн? Чүнки “әринин үрәји она е’тибар едир” (Сүлејманын мәсәлләри 31:10, 11).

15. Әр, Мәсиһин мәһәббәт вә һөрмәтинә бәнзәр кејфијјәтләри өз арвадына неҹә ҝөстәрә биләр?

¹⁵ Бә’зи халгларда әрин башчылығына о дәрәҹәдә хүсуси әһәмијјәт верилир ки, һәтта она суал вермәк белә һөрмәтсизлик сајылыр. О өз арвады илә, демәк олар ки, бир гул кими даврана биләр. Әрин бу ҹүр јанлыш башчылығы јалныз арвадла дејил, Аллаһла олан мүнасибәтини дә позур. (1 Јәһја 4:20, 21 илә мүгајисә един.) Диҝәр тәрәфдән, бә’зи әрләр башчылығы өз үзәринә ҝөтүрмүр, аиләдә арвадын ағалыг етмәсинә јол верирләр. Мәсиһә лазыми тәрздә табе олан әр, арвадыны истисмар етмир вә онун шәхси ләјагәтини тапдаламыр. Әксинә, о, Исанын фәдакар мәһәббәтиндән нүмунә ҝөтүрүр вә Павелин мәсләһәтинә мүвафиг давраныр: “Әрләр, арвадларынызы севин, неҹә ки, Мәсиһ дә иманлылар ҹәмијјәтини севди вә онун уғрунда Өзүнү фәда етди” (Ефеслиләрә 5:25). Мәсиһ Иса өз давамчыларыны о дәрәҹәдә севирди ки, онларын уғрунда өлдү. Јахшы әр, арвадына гаршы һәддиндән артыг тәләбкар јох, әксинә, хејирхаһ олмаға чалышараг, белә тәмәннасыз давранышдан нүмунә ҝөтүрәҹәкдир. Әҝәр әр Мәсиһә табе олараг, онун кими мәһәббәт вә һөрмәт тәзаһүр етдирирсә, бу, арвады белә бир әрә табе олмаға тәһрик едәҹәкдир (Ефеслиләрә 5:28, 29, 33).

АРВАДЫН ТАБЕЧИЛИЈИ

16. Арвад, әри илә гаршылыглы мүнасибәтиндә һансы кејфијјәтләри ҝөстәрмәлидир?

¹⁶ Адәми јаратдыгдан бир гәдәр сонра, “Рәбб Аллаһ јенә деди: “Инсанын тәк олмасы јахшы дејил; Мән она мүнасиб олан [“ону тамамлајан”, ЈД] бир көмәкчи јарадаҹағам” (Јарадылыш 2:18, МКШ). Аллаһ, Һәвваны рәгабәтчи дејил, бир “тамамлајыҹы” кими јаратмышды. Никаһ, бир–бири илә рәгабәт апаран ики капитанлы ҝәмијә бәнзәмәли дејилди. Әр мәһәббәтлә башчылыг етмәли, арвад исә мәһәббәт, һөрмәт тәзаһүр етдирмәли вә көнүллү сурәтдә әринә табе олмалы иди.

17, 18. Арвадын өз әринә һәгиги көмәкчи олмасы үчүн бә’зи имканлар һансылардыр?

¹⁷ Лакин јахшы арвад тәкҹә итаәткарлығы илә фәргләнмир. О, әринин гәрарларыны дәстәкләјән әсл көмәкчи олмаға чалышыр. Әлбәттә, әҝәр арвад әринин гәрарлары илә разыдырса, буну етмәк она асан олур. Һәтта онларла разы олмаса белә, онун көмәклији сајәсиндә һәмин гәрарлар даһа мүвәффәгијјәтлә јеринә јетириләҹәкдир.

¹⁸ Әрин јахшы башчы олмасына көмәк етмәк үчүн арвадын башга имканлары да вар. Әрини тәнгид етмәк вә һәмишә наразы галдығыны һисс етдирмәк әвәзинә, рәһбәрлији һәјата кечирмәсиндә ҝөстәрдији ҹәһдә ҝөрә арвад она өз миннәтдарлығыны билдирә биләр. Әри илә үнсијјәтдә оларкән мүсбәт дүшүнҹә тәрзини әкс етдирәрәк, “һәлим вә сакит руһун” јалныз әрин ҝөзүндә дејил, “Аллаһын гаршысында чох дәјәрли” олдуғуну јадда сахламалыдыр (1 Петер 3:3, 4; Колослулара 3:12). Әҝәр әри онун иманына шәрик дејилсә, бәс онда неҹә? Һәр неҹә олурса–олсун, Мүгәддәс Китаб гадынлары тәшвиг едир ки, “әрләрини, ушагларыны севсинләр, тәмкинли, исмәтли, евдар, хејирхаһ, өз әрләринә табе олсунлар ки, Аллаһын кәламы күфр олунмасын” (Титуса 2:4, 5). Виҹдан мәсәләси илә әлагәдар проблем јарандыгда исә арвад һәр шеји “мүлајимликлә вә еһтирамла” изаһ едәрсә, әр арвадынын тутдуғу мөвгејә, еһтимал ки, бөјүк һөрмәтлә јанашаҹагдыр. Арвадынын иманына шәрик олмајан бә’зи әрләр “һөрмәт ичиндә” тәмиз һәјатларыны “мүшаһидә едәрәк, арвадларынын рәфтары илә сөз олмадан” фәтһ едилмишләр (1 Петер 3:1, 2, 15, И–93; 1 Коринфлиләрә 7:13–16).

19. Әр, арвадындан Аллаһын ганунуну позмағы тәләб едәрсә, о неҹә давранмалыдыр?

¹⁹ Бәс әр арвадындан, Аллаһын гадаған етдији шеји етмәсини тәләб етдикдә неҹә? Белә олдугда, арвад унутмамалыдыр ки, онун ән јүксәк Һөкмдары Аллаһдыр. О, һәвариләрин нүмунәсини тәглид етмәлидир. Һаким даирәләр һәвариләри Аллаһын ганунуну позмаға мәҹбур едәркән, онлар Аллаһы разы салаҹаг тәрздә даврандылар. Һәвариләрин ишләри 5:29 ајәсиндә дејилир: “Петер вә диҝәр һәвариләр ҹаваб вериб дедиләр: Инсанлардан артыг, Аллаһа итаәт етмәк ҝәрәкдир”.

ЈАХШЫ ҮНСИЈЈӘТ

20. Мәһәббәт вә һөрмәт һансы әсас саһәдә ваҹибдир?

²⁰ Мәһәббәт вә һөрмәт, никаһын диҝәр саһәси олан үнсијјәт үчүн дә ваҹибдир. Севән әр арвады илә онун ишләри, проблемләри һаггында сөһбәт едир вә мүхтәлиф мәсәләләрә даир онун нөгтеји–нәзәри илә марагланыр. Арвадын буна еһтијаҹы вар. Арвады илә сөһбәт едән вә онун сөјләдикләрини һәгигәтән дә динләјән әр, она гаршы олан мәһәббәт вә һөрмәтини ҝөстәрир (Јагуб 1:19). Бә’зи арвадлар ҝилејләнирләр ки, әрләри онларла сөһбәт етмәјә чох аз вахт ајырырлар. Бу чох кәдәрли һалдыр. Доғрудур, бизим чәтин зәманәдә әрләр евдән кәнарда чох ишләмәли олурлар вә ағыр игтисади вәзијјәт нәтиҹәсиндә бә’зи арвадлар да ишләмәјә мәҹбурдурлар. Лакин әрлә арвад бир–бирләринә вахт ајырмалыдырлар. Әкс тәгдирдә, онлар бир–бирләриндән узаглаша биләрләр. Әҝәр әрлә арвадын аиләдән кәнарда шәфгәтли, мүлајим үнсијјәт ахтармаг арзусу јаранарса, ҹидди проблемләрә јол ачыла биләр.

21. Нәзакәтли сөһбәт никаһын хошбәхтлијини горумаға неҹә көмәк едәҹәкдир?

²¹ Әрлә арвадын неҹә үнсијјәтдә олмаглары ваҹибдир. “Хош сөзләр, ҹана ширинлик, сүмүкләрә шәфа верәр” (Сүлејманын мәсәлләри 16:24, МКШ). Һәјат јолдашларындан биринин диҝәринин иманына шәрик олуб олмамасындан асылы олмајараг, Мүгәддәс Китабын: “Гој сөзүнүз һәмишә нәвазишли олсун, она дуз гатылмыш кими олсун”, јә’ни дадлы олсун мәсләһәти тәтбиг едиләндир (Колослулара 4:6). Онлардан биринин ҝүнү ҝәрҝин кечәрсә, диҝәринин бир нечә ширин вә шәфгәтли сөзү јериндә оларды. “Јериндә дејиләрсә сөзләр, ҝүмүш ојмалар ичиндә гызыл алмалара бәнзәр” (Сүлејманын мәсәлләри 25:11, МКШ). Сәсин тону вә сечилән сөзләр чох ваҹибдир. Мәсәлән, аҹыглы–аҹыглы: “Гапыны өрт!” дејә тәләб етмәк олар. Амма сакит вә анлајышлы сәслә дејилән “Зәһмәт олмаса, гапыны өрт” сөзләринә даһа чох “дуз гатылмыш” олар.

22. Јахшы үнсијјәти горумаг үчүн, әрлә арвад бир–бирләринә неҹә мүнасибәт ҝөстәрмәлидирләр?

²² Меһрибанҹасына дејилән сөзләр, хош бахышлар вә мүлајим һәрәкәтләр, мәрһәмәт, гаршылыглы анлајыш вә инҹәлик ифадә едилән јердә үнсијјәт даһа да јахшы олур. Јахшы үнсијјәти горумаға сә’ј ҝөстәрәрәк, әрлә арвад бир–бирләринә өз тәләбатлары һаггында демәјә утанмајаҹаглар, үмидсизлик вә ја стресс заманы бир–бирләри үчүн тәсәлли вә көмәк мәнбәји ола биләҹәкләр. Аллаһын Кәламы “үрәксизләрә тәсәлли” вермәјә, тәшвиг едир (1 Салониклиләрә 5:14, КМ). Һәјатда әрин дә, арвадын да руһ дүшкүнлүјүнә мә’руз галдыглары анлар олур. Онлар бир–бирләринә тәсәлли вериб, көмәк едә биләрләр (Ромалылара 15:2).

23, 24. Наразылыг јаранан заман мәһәббәт вә һөрмәт неҹә көмәк едәҹәкдир? Мисал чәкин.

²³ Бир–бирләринә мәһәббәт вә һөрмәт бәсләјән әр–арвад, һәр һансы наразылығы бөјүк проблем кими гәбул етмәјәҹәкләр. Онлар чалышаҹаглар ки, бир–бирләринә гаршы “сәрт” олмасынлар (Колослулара 3:19). Онларын һәр икиси дә јадда сахламалыдыр ки, “һәлим ҹаваб һирси јатырар” (Сүлејманын мәсәлләри 15:1, МКШ). Үрәјиндә оланлары сизә сөјләјән һәјат јолдашынызы алчалдыб, мүһакимә етмәмәк үчүн еһтијатлы олмалысыныз. Чүнки һәјат јолдашыныз һиссләрини сизә изаһ едәндә, онун нөгтеји–нәзәрләрини даһа јахшы анламаг имканыныз јаранаҹагдыр. Јаранан фикир ајрылығыны арадан галдырмаг вә бир нәтиҹәјә ҝәлмәк үчүн бирҝә чалышын.

²⁴ Бир һадисәни хатырладаг. Сара әри Ибраһимә бир мәсәләни неҹә һәлл етмәсинә даир мәсләһәт верәркән, Ибраһимин бу мәсләһәтдән хошу ҝәлмәди. Буна бахмајараг, Аллаһ Ибраһимә деди: “Саранын сәнә сөјләдији бүтүн сөзләрә гулаг ас” (Јарадылыш 21:9–12, МКШ). Ибраһим дејиләнә риајәт етди вә буна ҝөрә хејир–дуа алды. Ејни тәрздә, әҝәр арвад әринин планына ујғун олмајан бир шеји мәсләһәт едәрсә, әр һеч олмаса ону динләмәлидир. Бунунла бәрабәр, арвад сөһбәтдә тәшәббүсү өз үзәринә ҝөтүрмәмәли вә әринин дедијинә гулаг асмалыдыр (Сүлејманын мәсәлләри 25:24). Әрин вә ја арвадын һәр заман өз дедији үстүндә дурмасы, онларда мәһәббәтин вә һөрмәтин чатышмадығыны ҝөстәрир.

25. Јахшы үнсијјәт, аилә һәјатынын интим саһәләриндә хошбәхтлијә неҹә көмәк едәҹәк?

²⁵ Јахшы үнсијјәт әрлә арвадын ҹинси мүнасибәтләриндә дә ваҹибдир. Егоистлик вә өзүнү идарә едә билмәмәк никаһда ән интим олан бу мүнасибәтә, чох ҝүҹлү зәрәр вура биләр. Ачыг сөһбәт етмәк вә сәбирли олмаг лазымдыр. Әҝәр әрлә арвад бир–биринин рифаһы үчүн гајғы ҝөстәрәрләрсә, чәтин ки, онларын ҹинси мүнасибәтләриндә ҹидди проблемләри јарансын. Башга мәсәләләрдә олдуғу кими, бу мүнасибәтдә дә “һәр кәс өзүнүн мәнфәәтини дејил, башгасынынкыны ахтарсын” (Коринфлиләрә 7:3–5; 10:24).

26. Һәр бир никаһда јахшы вә пис анларын олмасына бахмајараг, Аллаһын Кәламына риајәт етмәк әрлә арвадын хошбәхтлик тапмаларына неҹә көмәк едәҹәк?

²⁶ Аллаһын Кәламында неҹә дә ҝөзәл мәсләһәтләр верилир! Әлбәттә, һәр бир никаһда пис вә јахшы анлар олаҹагдыр. Лакин әҝәр әр–арвад Јеһованын Мүгәддәс Китабда ҝөстәрилән нөгтеји–нәзәрләринә риајәт едәрләрсә вә онларын гаршылыглы мүнасибәтләри мәһәббәт вә һөрмәт принсипинә әсасланарса, никаһларынын даими вә хошбәхт олаҹағына там әмин ола биләрләр. Бунунла онлар јалныз бир–бирләринә дејил, һәм дә никаһын Баниси олан Јеһова Аллаһа еһтирам ҝөстәрәҹәкләр.