Дәрс 9

Аллаһын хидмәтчиләри тәмиз олмалыдырлар

Нәјә ҝөрә һәр саһәдә тәмиз олмалыјыг? (1)

Руһани (2), әхлаги (3), әгли (4), физики (5) ҹәһәтдән тәмиз олмаг нә демәкдир?

Һансы нөв натәмиз данышыгдан гачынмалыјыг? (6)

1. Јеһова Аллаһ тәмиз вә мүгәддәсдир. О ҝөзләјир ки, Онун ибадәтчиләри руһани, әхлаги, әгли вә физики тәмизлији горујуб сахласынлар (1 Петер 1:16). Аллаһын ҝөзүндә тәмиз олмаг истәјириксә, гүввә сәрф етмәлијик. Биз натәмиз дүнјада јашајырыг. Бундан әлавә, бизә хас олан пис вәрдишләрлә дә мүбаризә апармалы олуруг. Лакин тәслим олмамалыјыг.

2. Руһани тәмизлик. Јеһоваја хидмәт етмәк истәјириксә, јалан динин тә’лимләриндән вә вәрдишләриндән узаг дурмалыјыг. Јалан динлә әлагәмизи кәсмәли вә ону һеч бир вәҹһлә дәстәкләмәли дејилик (2 Коринфлиләрә 6:14-18; Вәһј 18:4). Аллаһ һаггында һәгигәти билдикдән сонра еһтијатлы олмалыјыг ки, јалан өјрәдән инсанлар бизи дүз јолдан аздырмасынлар (2 Јәһја 10, 11).

3. Әхлаги тәмизлик. Јеһова истәјир ки, Онун ибадәтчиләри һәмишә Исанын һәгиги давамчылары кими даврансынлар (1 Петер 2:12). О, бизим етдијимиз һәр шеји, һәтта ҝизли ишләримизи белә ҝөрүр (Ибраниләрә 4:13). Биз ҹинси әхлагсызлыгдан вә бу дүнјанын башга натәмиз вәрдишләриндән гачынмалыјыг (1 Коринфлиләрә 6:9-11).

4. Әгли тәмизлик. Ағлымызы тәмиз фикирләрлә долдурарыгса, давранышымыз да тәмиз олаҹагдыр (Филипилиләрә 4:8). Лакин әҝәр диггәтимизи натәмиз шејләрә јөнәлдәриксә, нәтиҹәси пис һәрәкәтләр олаҹагдыр (Матта 15:18-20). Ағлымызы чиркләндирә билән әјләнҹә нөвләриндән гачынмалыјыг. Аллаһын Кәламыны охумагла ағлымызы тәмиз фикирләрлә долдура биләрик.

5. Физики тәмизлик. Мәсиһчиләр Аллаһын нүмајәндәләри олдуглары үчүн, бәдәнләрини вә ҝејимләрини тәмиз сахламалыдырлар. Ајаг јолуна ҝетдикдән сонра, һәмчинин јемәк јемәздән вә ону һазырламаздан габаг әлләримизи јумалыјыг. Әҝәр евдә гајдасынҹа ишләјән канализасија системи јохдурса, нәҹиси басдырмаг лазымдыр (Тәснијә 23:12, 13). Физики тәмизлик, јахшы сағламлығын рәһнидир. Мәсиһчинин еви неҹә дахилдән, еләҹә дә хариҹдән тәмиз вә сәлигәли олмалыдыр. Онун еви, башгаларынын еви илә мүгајисәдә нүмунәви олмалыдыр.

6. Тәмиз данышыг. Аллаһын хидмәтчиләри һәмишә һәгигәти сөјләмәлидирләр. Јаланчылар Аллаһын Падшаһлығыны мирас алмајаҹаглар (Ефеслиләрә 4:25; Вәһј 21:8). Мәсиһчиләр сөјүш сөјмүрләр. Онлар натәмиз зарафатлары вә налајиг һадисәләри нә данышмыр, нә дә ки, динләмирләр. Тәмиз данышыглары илә ишдә, мәктәбдә вә јашадыглары әразидә онлары әһатә едән инсанлардан фәргләнирләр (Ефеслиләрә 4:29, 31; 5:3).

[19-ҹу сәһифәдә олан шәкилләр]

Аллаһын хидмәтчиләри һәр саһәдә тәмиз олмалыдырлар.