Инсанлар нә үчүн өлүр?
«Зирвәләрин башында
Сүкут сүрүр һөкмүнү,
Ағаҹлар да сакит, лал
Дәрин бир сүкут алыб
Мешәләрин үстүнү.
Сусубду мешәләрдә гушларын нәғмәси дә,
Дајан сәбр елә бир ан, сән дә раһат оларсан» (ЈОҺАН ВОЛФГАНГ ФОН ҺӨТЕ, АЛМАН ШАИРИ).
1, 2. а) Инсанлар һансы истәклә јарадылыблар? б) Адәмлә Һәвва һансы шәраитдә јашајырдылар?
АЛЛАҺ инсанлары әбәди јашамаға ҝүҹлү истәклә јарадыб. Мүгәддәс Китабда дејилир ки, О, ‘әбәдијјәти инсанларын үрәјинә гојуб’ (Ваиз 3:11). Лакин Аллаһ инсанлара садәҹә әбәди јашамаг истәји вермәди. О, һәмчинин бу истәји реаллашдырмаг үчүн имкан да јаратды.
2 Улу валидејнләримиз Адәм вә Һәвва һәм әгли, һәм дә физики ҹәһәтдән гүсурсуз, јәни камил јарадылмышдылар (Ганунун тәкрары 32:4). Хроники хәстәликләрин, ағрынын, горхунун вә нараһатчылығын олмадығы бир дүнјаны тәсәввүр един! Бундан әлавә, Аллаһ онлары фүсункар Ҹәннәт бағында јерләшдирди. Аллаһын нијјәти о иди ки, инсан әбәди јашасын вә тәдриҹән бүтүн јер үзүндә онун камил өвладлары сакин олсун (Јарадылыш 1:31; 2:15). Бәс онда биз нәјә ҝөрә өлүрүк?
Итаәтсизлик өлүмлә нәтиҹәләнди
3. Адәмлә Һәвванын әбәди һәјаты нәдән асылы иди?
3 Аллаһ Адәмә әмр етди: «Бағдакы бүтүн ағаҹларын бәһрәсиндән истәјәндә јејә биләрсән. Анҹаг хејирлә шәри билмә ағаҹынын мејвәсиндән јемә, чүнки ондан јејән ҝүн һөкмән өләҹәксән» (Јарадылыш 2:16, 17). Демәли, әбәди һәјат Адәмлә Һәвваја бир шәртлә верилмишди: онлар Аллаһа табе олмалы идиләр.
4. Нәјә ҝөрә Адәм вә Һәвва ҝүнаһ ишләдән заман Ҹәннәтдә әбәди јашамаг үмидләрини итирдиләр?
4 Чох тәәссүф ки, Адәм вә Һәвва Аллаһын ганунуну поздулар (Јарадылыш 3:1—6). Белә етмәклә, онлар ҝүнаһкар олдулар, чүнки ‘ҝүнаһ ганунсузлугдур’ (1 Јәһја 3:4). Нәтиҹәдә, Адәм вә Һәвва әбәди јашамаг үмидини итирдиләр. Нәјә ҝөрә? Чүнки ‘ҝүнаһын әвәзи өлүмдүр’ (Ромалылара 6:23). Буна ҝөрә дә Адәмлә Һәвваја һөкм кәсәркән Аллаһ бу сөзләри деди: «Јерин торпағысан, торпаға да гајыдаҹагсан». Һәмин вахт улу валидејнләримиз ҹәннәтдән говулдулар. Ҝүнаһ ишләтдикләри ҝүндән етибарән Адәмлә Һәвва тәдриҹән өлүмә доғру ҝетмәјә башладылар. Артыг онлар үчүн ҝеријә јол јох иди (Јарадылыш 3:19, 23, 24).
«Өлүм бүтүн инсанлара кечди»
5. Өлүм бүтүн инсанлара неҹә кечди?
5 Ҝүнаһ Адәмлә Һәвванын ҝенләриндә дәрин из бурахды. Јарарсыз гәлибдән лазыми мәһсул алынмадығы кими, онлар да дүнјаја камил нәсил ҝәтирә билмәздиләр (Әјјуб 14:4). Һәгигәтән дә, дүнјаја ҝәлән һәр бир инсан улу валидејнләримизин мүкәммәл сағламлығы вә әбәди һәјаты һәм өзләри, һәм дә нәсилләри үчүн итирдикләринә сүбутдур. Һәвари Павел јазырды: «Буна ҝөрә, неҹә ки, ҝүнаһ тәк бир адам васитәсилә вә өлүм ҝүнаһ васитәсилә дүнјаја ҝирди, еләҹә дә өлүм бүтүн инсанлара кечди; чүнки һамы ҝүнаһ ишләтмишдир». (Ромалылара 5:12; Мәзмур 51:5 ајәси илә мүгајисә един.)
6. Инсанлар нә үчүн өлүр?
6 Бу ҝүн алимләр инсанын нәјә ҝөрә гоҹалыб өлдүјүнү билмирләр. Анҹаг Мүгәддәс Китаб изаһ едир ки, биз улу валидејнләримиздән ҝүнаһы мирас алдығымыз вә ҝүнаһлы доғулдуғумуз үчүн өлүрүк. Бәс инсан өләндә онунла нә баш верир?