Һәгиги үмид

«Инсан доғулдуғу ҝүндән һәр ан өлә биләр; нәһајәтдә, өлүм истәр-истәмәз гачылмаз һәгигәтә чеврилир» (АРНОЛД ТОЈНБИ, БРИТАНИЈАЛЫ ТАРИХЧИ).

1. Инсанлар һансы һәгигәтин гаршысында бојун әјмәли олмушлар вә бунунла бағлы ортаја һансы суаллар чыхыр?

ЈУХАРЫДА ҝәтирилән факты ким инкар едә биләр? Тарих боју инсанларын бу һәгигәтлә барышмагдан башга јоллары олмајыб. Әзизләримиздән кимсә өләндә өзүмүзү неҹә дә аҹиз һисс едирик! Бу заман инсана елә ҝәлир ки, бу иткинин јерини һеч нә долдура билмәз. Бәс өлән әзизләримизә нә вахтса јенидән говуша биләрикми? Мүгәддәс Китаб өләнләр үчүн һансы үмиди верир? Ҝәлин бу суаллары арашдыраг.

‘Достумуз өлмүшдүр’

2-5. а) Досту Лазар өләндә Иса ону дирилтмәјә һәм истәји, һәм дә баҹарығы олдуғуну неҹә ҝөстәрди? б) Лазарын һәјата гајытмасы илә јанашы, бу мөҹүзә сајәсиндә даһа нә әлдә едилди?

² Ерамызын 32-ҹи или иди. Јерусәлимдән 3 километр аралыда јерләшән кичик Бејтанја шәһәриндә баҹылары Марта вә Мәрјәмлә бирҝә Лазар адлы бир нәфәр јашајырды. Онлар Исанын јахын достлары идиләр. Бир ҝүн Лазар бәрк хәстәләнди. Баҹылары тәшвиш ичиндә дәрһал бу хәбәри Иордан чајынын о бири тајында олан Исаја чатдырдылар. Иса Лазары вә онун баҹыларыны севдији үчүн Бејтанјаја јолланды. Јолда ҝедәркән о, шаҝирдләринә деди: «Достумуз Лазар јухуја ҝедиб; Мән исә ону ојатмаг үчүн ҝедирәм». Шаҝирдләри бу сөзләрин мәнасыны баша дүшмәдикләри үчүн Иса онлара ачыг-ајдын сөјләди: «Лазар өлмүшдүр» (Јәһја 11:1—15).

³ Исанын Бејтанјаја ҝәлдијини ешидән кими Марта ону гаршыламаға гачды. Онун кәдәрини дујуб һалына јанараг Иса деди: «Гардашын дириләҹәкдир». Марта ҹаваб верди: «Билирәм ки, дирилмә ҝүнү — гијамәт ҝүнүндә — дириләҹәкдир». Бу заман Иса она деди: «Дирилмә вә һәјат Мәнәм; Мәнә иман едән өлсә дә јашајар» (Јәһја 11:20—25).

⁴ Сонра Иса сәрдабәнин јерләшдији јерә ҝетди вә сөјләди ки, сәрдабәнин ағзындакы дашы ҝөтүрсүнләр. Уҹадан дуа едәндән сонра: «Лазар, чөлә чых!» — дејә әмр етди. Һамынын ҝөзү ора дикилмишди. Будур, Лазар һәгигәтән дә чөлә чыхды. Иса Лазары дирилтди, јәни дөрд ҝүн өлү олан адамы јенидән һәјата гајтарды! (Јәһја 11:38—44).

⁵ Марта дирилмәнин олаҹағына онсуз да инанырды (Јәһја 5:28, 29; 11:23, 24). Анҹаг бу мөҹүзә онун иманыны мөһкәмләндирди вә башгаларында иман ојатды (Јәһја 11:45). Бәс «дирилмә» дејәркән нә нәзәрдә тутулур?

‘О дириләҹәк’

6. «Дирилмә» сөзүнүн мәнасы нәдир?

⁶ «Дирилмә» «јенидән галхмаг» мәнасыны дашыјан јунанҹа анастасис сөзүндән тәрҹүмә олунмушдур. Ибраниләр јунанҹа анастасис сөзүнү ибрани дилинә «өлүләрин һәјата гајытмасы» мәнасыны верән техијат һамметим кими тәрҹүмә етмишләрa. Беләликлә, дирилмә өлмүш инсанын өлү вәзијјәтиндән галхмасы, өз хүсусијјәтләри илә јенидән јарадылмасы демәкдир.

7. Нәјә ҝөрә инсанлары дирилтмәк Јеһова Аллаһ вә Иса Мәсиһ үчүн чәтин дејил?

⁷ Сонсуз мүдриклијә вә мүкәммәл јаддаша малик олан Јеһова Аллаһ үчүн инсаны дирилтмәк һеч дә чәтин дејил. Јеһова өлән инсанын һәјаты илә бағлы һәр шеји, онун хүсусијјәтләрини, кечмишини вә онун һаггында бүтүн хырдалыглары асанлыгла јадында сахлајыр. (Әјјуб 12:13; Јешаја 40:26 ајәси илә мүгајисә един.) Јеһова һәмчинин һәјатын Банисидир. Буна ҝөрә дә О, јаратдығы јени бәдәнә әввәлки хүсусијјәтләри верәрәк өлән инсаны һәјата гајтармаға гадирдир. Үстәлик, Лазарын дирилмәсиндән ҝөрүнүр ки, Иса Мәсиһин дә өлүләри дирилтмәјә һәм истәји, һәм дә баҹарығы вар. (Лука 7:11—17; 8:40—56 ајәләри илә мүгајисә един.)

8, 9. а) Дирилмә вә руһун өлмәзлији тәлимләри нәјә ҝөрә бир-биринә зидд ҝедир? б) Өлүмүн әсарәтиндән азад олмағын јеҝанә јолу нәдир?

⁸ Мүгәддәс Јазыларда олан дирилмә тәлими руһун өлмәзлији тәлими илә узлашмыр. Әҝәр инсан өләндән сонра руһ јашасајды, онда кимисә дирилтмәјин, јәни һәјата гајтармағын нә мәнасы оларды? Марта да өлүмдән сонра һарадаса јашајан өлмәз руһ һаггында, бир кәлмә дә олсун, демәмишди. О, Лазарын руһани аләмдә јашамаға давам етдијини дүшүнмүрдү. Әксинә, Аллаһын өлүмүн бүтүн нәтиҹәләрини арадан галдыраҹағына иман етдијини ҝөстәрмишди. О демишди: «Билирәм ки, дирилмә ҝүнү — гијамәт ҝүнүндә — дириләҹәкдир» (Јәһја 11:23, 24). Ејнилә, Лазар да өләндән сонра онунла баш верәнләр барәдә һеч нә данышмамышды. Чүнки данышыласы һеч бир шеј јох иди.

⁹ Мүгәддәс Китабда јазыланлардан белә нәтиҹәјә ҝәлирик ки, инсан өләндән сонра руһ јашамаға давам етмир вә өләнләр үчүн јеҝанә үмид дирилмәдир. Лакин илк инсан Адәмдән башлајараг буҝүнәдәк милјардларла инсан һәјатыны итириб. Бәс онда кимләр вә һарада дирилдиләҹәк?

«Гәбирләрдә оланларын һамысы»

10. Иса гәбирләрдә оланларла бағлы һансы вәди верди?

¹⁰ Иса Мәсиһ демишди: «Елә бир саат ҝәлир ки, гәбирләрдә оланларын һамысы Онун [Исанын] сәсини ешидәҹәкләр вә гәбирләриндән чыхаҹаглар» (Јәһја 5:28). Бәли, Иса Мәсиһ вәд етмишди ки, Јеһованын јаддашында оланларын һамысы дирилдиләҹәк. Индијә кими јер үзүндә милјардларла инсан јашајыб вә өлүб. Бәс кимләр Аллаһын јаддашындадыр вә дирилмәни ҝөзләјир?

11. Кимләр дирилдиләҹәкләр?

¹¹ Салеһлик јолунда јеријән вә Јеһоваја хидмәт едән кәсләр дирилдиләҹәкләр. Лакин милјонларла инсан Аллаһын салеһ нормаларына ујғун јашамаг истәјиб-истәмәдикләрини ҝөстәрмәдән өлүб. Онлар ја Јеһованын тәләбләриндән бихәбәр олублар, ја да лазыми дәјишикликләр етмәјә кифајәт гәдәр вахтлары олмајыб. Онлар да Аллаһын јаддашындадырлар вә буна ҝөрә дә дирилдиләҹәкләр. Бунунла бағлы Мүгәддәс Китабда дејилир: «Һәм салеһ, һәм дә салеһ олмајан өлүләрин дирилмәси олаҹагдыр» (Һәвариләрин ишләри 24:15).

12. а) Һәвари Јәһја дирилмә илә бағлы һансы вәһји алмышды? б) «Одлу ҝөлә» нә атылыр вә ‘одлу ҝөл’ нәдир?

¹² Һәвари Јәһја дирилдилмиш инсанларын Аллаһын тахты гаршысында дурдуғуну тәсвир едән валеһедиҹи бир вәһј ҝөрмүшдү. О јазырды: «Дәниз, өзүндә олан өлүләри тәслим етди; өлүм вә өлүләр аләми дә өзләриндә олан өлүләри тәслим етдиләр. Вә һәр биринә өз әмәлләринә ҝөрә һөкм олунду. Сонра өлүм вә өлүләр аләми одлу ҝөлә атылды. Бу одлу ҝөл икинҹи өлүмдүр» (Вәһј 20:12—14). Бу һагда бир дүшүнүн! Аллаһын јаддашында оланларын һамысы Һадесдән, јахуд Шеолдан, јәни бәшәријјәтин үмуми мәзары олан өлүләр аләминдән чыхаҹаглар (Мәзмур 16:10; Һәвариләрин ишләри 2:31). О заман «өлүм вә өлүләр аләми» там мәһвин символу олан «одлу ҝөлә» атылаҹаг. Бәшәријјәтин үмуми мәзары јох олаҹаг.

Дирилмә һарада олаҹаг?

13. Нәјә ҝөрә бәзиләри ҝөјләр һәјатына дирилдиләҹәкләр вә Јеһова онлара неҹә бәдән верәҹәк?

¹³ Аз сајда киши вә гадын ҝөјләр һәјатына дирилдиләҹәк. Онлар Мәсиһлә бирҝә падшаһ вә каһин кими һөкмранлыг едәҹәк вә бәшәријјәтин илк инсан Адәмдән мирас алдығы өлүмүн бүтүн нәтиҹәләрини арадан галдыраҹаглар (Ромалылара 5:12; Вәһј 5:9, 10). Мүгәддәс Китаба әсасән, онларын сајы 144 000-дир вә онлар садиг һәвариләрдән башлајараг Мәсиһин диҝәр давамчылары арасындан сечилмишләр (Лука 22:28—30; Јәһја 14:2, 3; Вәһј 7:4; 14:1, 3). Ҝөјдә јашаја билмәләри үчүн Јеһова онлары руһани бәдәндә дирилдәҹәк (1 Коринфлиләрә 15:35, 38, 42—45; 1 Петер 3:18).

14, 15. а) Дирилдиләнләрин әксәријјәти һансы шәраитдә јашајаҹаг? б) Итаәткар бәшәријјәт һансы хејир-дуалары дадаҹаг?

¹⁴ Лакин өләнләрин әксәријјәти јер үзүндә јашамаг үчүн дирилдиләҹәк (Мәзмур 37:29; Матта 6:10). О заман јер үзү неҹә олаҹаг? Бу ҝүн јер үзүндә мүнагишәләр, зоракылыг баш алыб ҝедир, инсанлар бир-биринин ганыны төкүр вә әтраф мүһити чиркләндирирләр. Әҝәр өләнләр белә бир шәраитдә дирилсәјди, онда чәтин ки, онларын хошбәхтлији узун сүрәрди. Анҹаг Јарадан вәд едир ки, тезликлә О, Шејтанын һакимијјәти алтында олан дүнјаја сон гојаҹаг (Сүлејманын мәсәлләри 2:21, 22; Даниел 2:44). Ону салеһ инсан ҹәмијјәти, јәни «јени јер» әвәз едәҹәк (2 Петер 3:13). О заман һеч ким «“хәстәјәм” демәјәҹәк» (Јешаја 33:24). Өлүмүн өзү илә бәрабәр ҝәтирдији гәм-гүссә дә арадан галдырылаҹаг, чүнки Аллаһ «онларын ҝөзләриндән бүтүн јашлары силәҹәкдир. Артыг өлүм мөвҹуд олмајаҹаг; артыг нә кәдәр, нә фәрјад, нә дә ағры олаҹагдыр, чүнки әввәлки шејләр кечиб ҝетди» (Вәһј 21:4).

¹⁵ Аллаһын вәд етдији јени дүнјада һәлим инсанлар «әмин-аманлығын боллуғундан зөвг тапаҹаг» (Мәзмур 37:11). Иса Мәсиһ вә онун 144 000 һакимијјәт шәрикиндән ибарәт олан сәмави һөкумәт тәдриҹән бәшәријјәтә улу валидејнләримиз Адәмлә Һәвванын итирдији камиллији гајтараҹаг. Һәмин јерин сакинләри арасында дириләнләр дә олаҹаг (Лука 23:42, 43).

16-18. Дирилмә аиләләрә һансы севинҹи бәхш едәҹәк?

¹⁶ Мүгәддәс Китаб бизә дирилмәнин аиләләрә бәхш едәҹәји севинҹи ҝөрмәкдә көмәк едир. Иса дәфн мәрасимини дајандырыб, Наиндән олан дул гадынын оғлуну дирилдәндә ананын кечирдији севинҹ һиссини бир тәсәввүр един! (Лука 7:11—17). Сонралар, Иса Галилеја дәнизи јахынлығында 12 јашлы гызы һәјата гајтаранда онун валидејнләри «чох һејрәтләндиләр». (Марк 5:21—24, 35—42; һәмчинин 1 Падшаһлар 17:17—24; 2 Падшаһлар 4:32—37 ајәләринә дә бахын.)

¹⁷ Һал-һазырда өлүм јухусунда олан милјонларла инсан сүлһүн һөкм сүрдүјү јени дүнјада дириләҹәк. Бир тәсәввүр един: бу брошүранын әввәлиндә адлары чәкилән Томмини вә бизнесмени неҹә дә ҝөзәл ҝәләҹәк ҝөзләјир! Томми ҝөзүнү Ҹәннәтдә ачанда анасынын таныдығы һәмин Томми олаҹаг. Лакин әввәлкиндән фәргли олараг, сағлам олаҹаг. Анасы она тохунаҹаг, бағрына басыб әзизләјәҹәк. Ејнилә, һиндистанлы бизнесменин дә јенидән доғулма дөвријјәсиндә сонсуз дөвр етмәк әвәзинә, Аллаһын јени дүнјасында ҝөзләрини ачмаг вә оғулларына говушмаг имканы вар.

¹⁸ Руһ, өлүләрин вәзијјәти вә дирилмә үмиди һаггында һәгигәти билмәк һал-һазырда јер үзүндә јашајан инсанларын да һәјатына ҝүҹлү тәсир бағышлаја биләр. Ҝәлин ҝөрәк, бу, неҹә мүмкүндүр.

[Һашијә]

[26-ҹы сәһифәдәки шәкил]

Дирилмә түкәнмәз севинҹ бәхш едәҹәк