Иса Мәсиһ кимдир?
“ҺӘТТА мәсиһчилијә етигад етмәјән бир чох инсанлар да Онун бөјүк вә мүдрик мүәллим олдуғуну етираф едирләр. Шүбһәсиз ки, о, бәшәр тарихиндә ән ҝөркәмли шәхсијјәтләрдән биридир” (“Уорлд бук” енсиклопедијасы). Сөһбәт кимдән ҝедир? Мәсиһчилијин баниси олан Иса Мәсиһдән. Сиз онун ким олдуғуну билирсинизми? О сизин һәјатыныза неҹәсә тәсир едирми?
Исанын хидмәти, Мүгәддәс Китабда Мүждә адланан дөрд тарихи әсәрдә јазылмышдыр. Бу мәлуматлара етибар етмәк олармы? Мүждәни дәгигликлә тәдгиг едән мәшһур тарихчи Уилл Дүрант јазырды: “Бир овуҹ садә инсанларын бу гәдәр ҝүҹлү, ҹазибәдар шәхсијјәти, бу гәдәр јүксәк әхлагы вә гардашлыг мүнасибәтиндә руһландырыҹы образы ујдурмасы, Мүждәдә јазылан бүтүн мөҹүзәләрдән ән инанылмаз мөҹүзә кими ҝөрүнүр”.
Буна бахмајараг, Шәргдә вә дүнјанын диҝәр һиссәләриндә јашајан милјонларла инсанларын Иса Мәсиһ һаггында чох аз мәлуматлары вар. Ола билсин, онун бир заманлар јашадығына инанырлар, лакин бунун шәхсән онларын һәјатларына мүәјјән тәсири олдуғуну дүшүнмүрләр. Башгалары исә, онун давамчысы олдугларыны иддиа едәнләрин һәрәкәтләрини ҝөрәрәк, Исанын диггәтәлајиг шәхсијјәт олмадығыны һесаб едирләр. Мәсәлән, јапонлар дејәҹәкләр ки, “Јапонијанын башга шәһәрләринә нисбәтән христианларын чохлуг тәшкил етдији Нагасаки шәһәринә, атом бомбасыны елә онлар атдылар”.
Әҝәр хәстә һәкимин ҝөстәришләринә әмәл етмирсә, онун сағалмамасында һәкими ҝүнаһландырмаг олармы? Әлбәттә ки, јох. Христиан дүнјасы узун мүддәтдир ки, ҝүндәлик проблемләрин өһдәсиндән ҝәлмәк үчүн Исанын вердији мәсләһәтләрә етинасызлыг ҝөстәрир. Буна ҝөрә дә, тәләбләрини јеринә јетирмәдән онун давамчылары олдугларыны иддиа едәнләр үзүндән Исаны гәбул етмәмәк үчүн тәләсмәјин. Ахы нәјә ҝөрә өзүнүз онун һаггында өјрәнмәјәсиниз? Мүгәддәс Китаба бахын вә Исанын әслиндә ким олдуғуну, сизин һәјатынызы неҹә дәјишә биләҹәјини ҝөрәҹәксиниз.
Иса башгаларыны севмәји өјрәдир
Иса Мәсиһ бөјүк мүәллим олмуш вә тәхминән 2 000 ил әввәл Фәләстиндә јашамышдыр. Онун ушаглыг илләринә даир аз мәлумат вар (Матта 1-ҹи вә 2-ҹи фәсилләр; Лука 1-ҹи вә 2-ҹи фәсилләр). Иса, ‘һәгигәтә шәһадәт етмәк үчүн 30 јашында хидмәтә башлады (Јәһја 18:37; Лука 3:21-23). Исанын һәјаты һаггында олан бу дөрд тарихи әсәр, онун мәһз јер үзүндәки сон үч ил јарым вахт әрзиндә етдији хидмәтинә һәср олунуб.
Хидмәтини иҹра едәрәк, Иса шаҝирдләринә һәјатда олан мүхтәлиф чәтинликләрин өһдәсиндән ҝәлмәкдә көмәк едән әсас принсипи ҝөстәрди. Бу принсип мәһәббәтдән ибарәтдир. Өзүнүн Дағүстү тәблиғиндә — тарихдә јахшы мәлум олан тәблиғләрдән бириндә — Иса онлара јахынларыны севмәјин үсулуну өјрәтди. О деди: “Инсанларын сизинлә неҹә рәфтар етмәсини истәјирсинизсә, сиз дә онларла елә рәфтар един” (Матта 7:12). Бу принсип гызыл ганун адланыр. “Инсанлар” һаггында данышаркән, Иса һамыны, һәтта дүшмәнләри дә нәзәрдә тутурду. О, елә һәмин тәблиғиндә деди: “Дүшмәнләринизи севин... сизи тәгиб едәнләр үчүн дуалар един” (Матта 5:44). Мәҝәр белә мәһәббәт буҝүнкү проблемләрин чохуну һәлл етмәздими? Һиндистанын сијаси хадими Моһандас Ганди буна әмин иди. О дејирди: “Әҝәр... [инсанлар] Исанын Дағүстү тәблиғиндәки тәлиминә әсасән достлашсалар, онда биз... бүтүн дүнјанын проблемләрини һәлл едә биләрик”. Бәли, Исанын өјрәтдији кими мәһәббәт ҝөстәрсәк, бәшәријјәт чатышмазлыгларындан азад ола биләр.
Иса мәһәббәти әмәлдә ҝөстәрирди
Иса вердији тәлимә әсасән давранырды. О, илк нөвбәдә өзүнү дејил, башгаларыны дүшүнүр вә мәһәббәтини әмәлләри илә сүбут едирди. Бир дәфә Иса вә шаҝирдләринин башлары чохсајлы инсанлара көмәк етмәјә о дәрәҹәдә гарышмышды ки, јемәк јемәјә белә вахтлары олмамышды. Шаҝирдләрин истираһәтә еһтијаҹы олдуғуну ҝөрән Иса, онларла бәрабәр сакит бир јерә јолланды. Лакин ораја чатдыгда халгын онлары ҝөзләдијини ҝөрдүләр. Исанын јеринә олсајдыныз сиз буна неҹә јанашардыныз? Исанын “онлара јазығы ҝәлди” вә “онлара чох шејләр өјрәтмәјә башлады” (Марк 6:30-34). Бәли, ҝүҹлү мәрһәмәт һисси ону башгаларына көмәк етмәјә тәшвиг етди.
Лакин Исанын башгаларынын рифаһы үчүн етдији ишләр руһани тәлимләрлә мәһдудлашмырды. О, практики көмәклик дә ҝөстәрирди. Бир дәфә Иса, ахшамдан хејли кечәнәдәк ону динләјән 5 000 адамы (гадын вә ушаглардан савајы) једиздирди. Башга бир вахт исә 4 000 адамы једиздирди. Биринҹи дәфә онун беш чөрәји вә ики балығы, икинҹидә исә једди чөрәји вә бир нечә балығы варды (Матта 14:14-21; 15:32-38; Марк 6:35-44; 8:1-9). Дејәҹәксиниз, мөҹүзәдир. Бәли, Иса мөҹүзәләр ҝөстәрә билирди.
Бундан башга, Иса бир чох хәстәләрә шәфа верирди. Онларын арасында корлар, топаллар, ҹүзамлылар вә карлар варды. О, һәтта өлүләри дә дирилдирди! (Лука 7:22; Јәһја 11:30-45). Бир дәфә Исанын јанына ҹүзама тутулмуш бир нәфәр ҝәлди вә јалварды: “Әҝәр истәсән, мәни саф едә биләрсән”. Иса неҹә давранды? О, әлини узадыб она тохунду вә деди: “Истәјирәм саф ол!” (Марк 1:40, 41). Иса башгаларына көмәк етмәк истәјирди вә бу мөҹүзәләрдә онун әзаб чәкәнләрә олан мәһәббәти тәзаһүр олунурду.
Дејәҹәксиниз мөҹүзәләр олмур. Лакин бу мөҹүзәләрин әксәријјәтини Иса һамынын ҝөзү гаршысында едирди. Һәтта һәр дәфә нәдә исә ону ҝүнаһландырмаг бәһанәси ахтаран дүшмәнләри дә, онун мөҹүзәләр етдијини дана билмирдиләр (Јәһја 9:1-34). Бундан әлавә, мөҹүзәләр мүәјјән мәгсәдә хидмәт едирди. Онлар инсанлары әмин едирди ки, Исаны Аллаһ ҝөндәриб (Јәһја 6:14).
Исанын һәјатыны вә тәлимләрини гысаҹа ҝөздән кечирмәклә, биздә она гаршы мәһәббәт һисси јараныр вә онун кими, биз дә башгаларына мәһәббәт ҝөстәрмәк истәјирик. Лакин онун һәјатымыза ҝөстәрдији тәсир бунунла мәһдудлашмыр. Иса, садәҹә олараг севмәји өјрәдән бөјүк мүәллим дејилди. О дејирди ки, јерә ҝәлмәздән өнҹә ҝөјләрдә Аллаһын ваһид оғлу кими һәјат сүрмүшдүр (Јәһја 1:14; 3:16; 8:58; 17:5; 1 Јәһја 4:9). Бундан әлавә, Иса инди дә јашамаға давам едир. Бу исә бизим үчүн бөјүк мәна дашыјыр. Мүгәддәс Китабда дејилир ки, Иса дирилмиш вә Аллаһын Падшаһлығынын Падшаһыдыр (Вәһј 11:15). Иса деди: “Әбәди һәјат о демәкдир ки, Сәни, ваһид һәгиги Аллаһы вә ҝөндәрдијин Иса Мәсиһи танысынлар” (Јәһја 17:3; 20:31). Бир анлыға дүшүнүн: Иса Мәсиһ һаггындакы билик сизә Ҹәннәтдә әбәди һәјат ҝәтирә биләр. Бәс бу неҹә мүмкүндүр? Нә үчүн сиз Иса һаггында даһа чох өјрәниб, ‘Мәсиһин мәһәббәтинин бизи ону тәглид етмәјә неҹә тәшвиг етдијини нәзәрдән кечирмәјәсиниз? (2 Коринфлиләрә 5:14) Бу ишдә Јеһованын Шаһидләри сизә мәмнунијјәтлә көмәк едәрләр (Јәһја 13:34, 35).