Аллаһын Кәламындан зөвг ал
‘РӘББИН ганунундан зөвг алан’ инсан бәхтијардыр. О, Аллаһын Кәламыны ‘ҝеҹә-ҝүндүз алчагдан охујур’ (Мәз. 1:1, 2, YD). Сән дә бу зөвгү дујурсанмы? Аллаһын Кәламынын сәнә даһа чох севинҹ ҝәтирмәси үчүн нә едә биләрсән?
Јеһованын сөзләрини динлә
Сөзләри садәҹә охумагла кифајәтләнмә. Охудугларыны тәсәввүрүндә ҹанландыр. Данышанларын сәсләрини тәсәввүр ет. Мүгәддәс Китабын илк фәсилләрини охудугҹа, јери инсанлар үчүн һазырлајаркән аддымбааддым нә етдијини Јеһованын Өзүндән ешитмәјә чалыш. Маһир Уста олан Оғлуна илк инсанлары јаратмағын вахты чатдығыны демәсинә гулаг ас. Бу сәһнәни тәсәввүрүндә ҹанландыр: Адәмлә Һәвва үсјан галдырырлар, Аллаһ онлара һөкм чыхарыр вә сонра ҹәннәтдән говур (Јарадылыш 1-3 фәс.). Ҝөјдән ҝәлән сәсин Иса Мәсиһин Аллаһын севимли оғлу олдуғуну вә инсанларын уғрунда һәјатыны гурбан вермәк үчүн ҝөндәрилдијини дедији һагда охујаркән гој үрәјин Аллаһа гаршы еһтирамла долсун (Мат. 3:16, 17). Јеһова: «Будур, Мән һәр шеји јениләшдирирәм» дејәркән һәвари Јәһјанын кечирдији һиссләри тәсәввүр етмәјә чалыш (Вәһј 21:5). Доғрудан да, Аллаһын Кәламыны бу ҹүр охумаг инсана зөвг верир!
Аллаһдан илһам алмыш сөзләри охудугҹа, Јеһованы әзәмәтли вә еһтирам доғуран бир Шәхс кими таныјаҹагсан. Беләликлә, бизи севән, мәрһәмәт ҝөстәрән, ирадәсини тәвазөкарлыгла јеринә јетирдијимиз тәгдирдә, көмәјини биздән әсирҝәмәјән, ҝөрдүјүмүз һәр ишдә уғур газанмағы бизә өјрәдән Аллаһа даһа да јахынлашаҹагсан (Јешуа 1:8; Мәз. 8:1; Јешаја 41:10).
Мүгәддәс Китабы охумаға нә гәдәр чох вахт ајырсан, бир о гәдәр дә чох мәмнунлуг дујаҹагсан, чүнки Аллаһын сәнә даир ирадәсини ҝетдикҹә даһа дәриндән дәрк едәҹәксән. Анҹаг Аллаһын Кәламыны охумагдан алдығын зөвг бунунла битмәјәҹәк. Охудугларын проблемләрин өһдәсиндән мүдрикликлә ҝәлмәкдә сәнә көмәк едәндә сән дә мәзмурчу кими ејни сөзләри дејәҹәксән: «Өјүдләринин һејрәтамизлијинә ҝөрә онлара үрәкдән әмәл едирәм» (Мәз. 119:129). Мүгәддәс Китабдан дүшүнҹә тәрзини вә арзуларыны Аллаһын нормаларына ујғунлашдырмаға көмәк едән принсипләри охумаг да сәнә севинҹ ҝәтирәҹәк (Јешаја 55:8, 9).
Мүгәддәс Китабда бизи тәһлүкәдән горујан вә дүзҝүн јолла апаран әхлаг нормалары вар. Ону охудугҹа анлајырыг ки, Јеһова ҝүнаһлы тәбиәтимизин арзуларына ујмағын һансы проблемләрә ҝәтириб чыхараҹағыны билән Атадыр. О истәмир ки, биз Онун јүксәк әхлаг нормаларына бармагарасы бахыб, сонра да бунун гачылмаз аҹы нәтиҹәләриндән әзаб чәкәк. О, бизим гејдимизә галыр вә бизә ҝөзәл һәјат арзулајыр. Мүгәддәс Китабы охудугҹа, Јеһованын Аллаһымыз вә сәмави Атамыз олмасынын бөјүк хејир-дуа олдуғуну даһа дәриндән баша дүшүрүк.
Мүгәддәс Китабы һәр ҝүн оху
Мәзмурчу Аллаһын Кәламыны һәр ҝүн охујан адам һагда белә демишди: «Етдији һәр ишдә уғур газанар» (Мәз. 1:3). Бәли, гејри-камиллијимизә, Шејтанын пис дүнјасында јашамағымыза вә онун бизи ашырмаг үчүн ҝөстәрдији ҹәһдләрә бахмајараг, Аллаһын Кәламыны мүнтәзәм охумаг вә тәтбиг етмәк бизә Јеһова илә мүнасибәтләримизә аид олан һәр шејдә уғур газанмаға көмәк едәҹәк.
Бу көһнә дүнја бизи әзмәјә чалышдығындан, Јараданын дүшүнҹә тәрзини мәнимсәмәк үчүн һәр ҝүн ајырдығымыз бир нечә гијмәтли дәгигә белә, бизи ҝүҹләндирә биләр. Иманларына ҝөрә һәбс едиләнләрин бәзиләри јалныз гәзетләрдә растларына чыхан бир нечә ајә илә кифајәтләнмәли олмушлар. Онлар бу ајәләри кәсиб ҝөтүрүр, әзбәрләјир вә үзәриндә дәриндән дүшүнүрдүләр. Јеһова онларын ҹәһдләринә хејир-дуа верирди, чүнки Аллаһын Кәламыны дәрк етмәк үчүн имканлары дахилиндә әлләриндән ҝәләни едирдиләр (Мат. 5:3). Әлбәттә, онлара баханда әксәријјәтимиз даһа чох сәрбәстик. Ҝүндә бир дәфә тәләм-тәләсик бир ајә охумағын мөҹүзәви тәсири олаҹағыны дүшүнмәк дүзҝүн олмазды. Анҹаг һәр ҝүн Мүгәддәс Китабдан бир парча охујуб үзәриндә дүшүнмәји вә өјрәндикләримизи һәјатымызда тәтбиг етмәји биринҹи јерә гојсаг, хејир-дуа алаҹағыг.
Дүздүр, һәр шеј һәмишә планлашдырдығымыз кими олмур. Бу һалда белә, һәгигәтән әһәмијјәт кәсб едән шејләрә үстүнлүк веририк. Мәсәлән, биз билә-билә бүтүн ҝүнү, јахуд ики ҝүн далбадал сусуз галмарыг. Буна ҝөрә дә, ҝүндәлик һәјатымызда нә баш верирсә-версин, өзүмүзү һәгигәт сулары илә тәравәтләндирмәк үчүн вахт ајырмалыјыг (Һәв. иш. 17:11).
Аллаһын Кәламыны әввәлдән-ахыра гәдәр оху
Сән шәхсән Мүгәддәс Китабы башдан-ајаға кими охумусанмы? Мүгәддәс Китабы «Јарадылыш»дан «Вәһј»ә кими охумаг фикри бәзиләрини горхудур. Буна ҝөрә дә, Мүгәддәс Китабы бүтүнлүклә охумаг истәјән бир чох адам Јунанҹа Мүгәддәс Јазылардан башлајыб. Нә үчүн? Ола билсин, она ҝөрә ки, Мәсиһин изләри илә ҝедән инсанлар кими, Мүгәддәс Јазыларын бу һиссәсинин шәхсән өзләринә неҹә аид олдуғуну ҝөрмәк онлара даһа асан олмушдур. Јахуд да Мүгәддәс Китабын дөрддә бир һиссәсиндән бир аз чох олан һәмин јазылар онларын ҝөзүнә елә дә бөјүк ҝөрүнмәмишдир. Анҹаг бу 27 китабы охујуб гуртардыгдан сонра онлар 39 китабдан ибарәт олан Ибраниҹә Мүгәддәс Јазылары охумаға башламыш вә бундан зөвг дујмушлар. Ибраниҹә Мүгәддәс Јазылары охујуб гуртаранда онлар артыг Мүгәддәс Китабы мүнтәзәм охумаға вәрдиш етмиш, буна ҝөрә дә икинҹи дәфә Јунанҹа Мүгәддәс Јазылары охумаға башламыш вә бу вәрдиши һеч вахт тәрҝитмәмишләр. Сән дә Аллаһын Кәламыны ҝүндәлик охумағы өмүрлүк вәрдишинә чевир.
Аиләндә, јахуд јығынҹагда охумағы баҹармајан кимсә вармы? Нәјә ҝөрә она Мүгәддәс Китабы бирликдә мүнтәзәм охумағы тәклиф етмәјәсән? Бунун һәм сәнә, һәм дә ешитдикләринин үзәриндә дүшүндүкҹә вә һәјатында тәтбиг етдикҹә, онун өзүнә фајдасы олаҹаг (Вәһј 1:3).
Вахт кечдикҹә, сәндә Мүгәддәс Китабы һансыса хүсуси план үзрә охумаг истәји јарана биләр. Онлардан бәзиләри Мүгәддәс Китабын мүхтәлиф һиссәләри арасындакы әлагәни даһа дәриндән баша дүшмәјә көмәк едә биләр. Әҝәр истифадә етдијин Мүгәддәс Китабда паралел ајәләрә истинадлар варса, онлар сәни тарихи деталлара вә паралел һадисәләрә јөнәлдәҹәк. Онларын көмәјилә мүхтәлиф мәзмурларын, еләҹә дә Иса Мәсиһин һәвариләринин мәктубларынын һансы вәзијјәтдән ирәли ҝәләрәк јазылдығыны баша дүшәҹәксән. «Мүгәддәс Јазыларын дәрк едилмәси» енсиклопедијасында (инҝ.) Мүгәддәс Китабда адлары чәкилән халглар, јерләр вә кејфијјәтләр һаггында зәнҝин мәлумат вар. Ҹәдвәлләр диггәти Мүгәддәс Китаб пејғәмбәрликләринин јеринә јетмәсинә јөнәлдир, һансы падшаһларын һансы пејғәмбәрләрин мүасири олдуғуну вә Мүгәддәс Китабдакы бир чох һадисәләрин тәхмини вахтыны ҝөстәрир.
Өјрәндикләрин үзәриндә дүшүндүкҹә, Аллаһын халгынын дүшдүјү мүәјјән вәзијјәтләрин сәбәбини анлајаҹагсан. Һәмчинин Јеһованын нәјә ҝөрә Өз халгы илә бу вә ја диҝәр тәрздә рәфтар етмәсини баша дүшәҹәксән. Дөвләтләрин, халгларын вә ајры-ајры адамларын һәрәкәтләринә Јеһованын неҹә гијмәт вердијини ҝөрәҹәксән. Бунун сајәсиндә Онун фикирләрини даһа дәриндән анлајаҹагсан.
Һадисәләрин баш вердији јерләри тәсәввүрүндә ҹанландыранда, Мүгәддәс Китаб тарихи сәнә даһа мараглы ҝәләҹәк. Мүгәддәс Китабда адлары чәкилән өлкәләрин хәритәләри мүхтәлиф јерләр арасындакы мәсафәләри, һәмчинин әразиләри ҝөстәрир. Мәсәлән, исраиллиләр Гырмызы дәнизи тәхминән һарадан кечмишдиләр? Вәд едилмиш дијарын саһәси нә гәдәр олуб? Јер үзүндә хидмәт едәркән Иса Мәсиһ һаралара ҝедиб? Павел миссионер сәјаһәти заманы һаралардан кечиб? Охудугларыны ҝөзүнүн өнүндә ҹанландырмаг үчүн хәритәләрдә вә ҹоғрафи тәсвирләрдә чохлу тәфсилатлар вар. Мүгәддәс Китабда адлары чәкилән өлкәләрин хәритәләрини һарадан әлдә етмәк олар? Онларын бир гисмини Мүгәддәс Китабда тапмаг олар. «Мүгәддәс Јазыларын дәрк едилмәси» енсиклопедијасында (инҝ.) тәхминән 70 хәритә, биринҹи ҹилдин сонунда исә хәритә индекси вар. Диҝәр хәритәләри тапмаг үчүн «Ҝөзәтчи Гүлләси нәшрләринин индекси»нә бах. Әҝәр бу мәнбәләр әлчатан дејилсә, онда Мүгәддәс Китабы охујаркән «Ҝөзәтчи Гүлләси»ндә чап едилән хәритәләрдән истифадә ет.
Ибраниҹә Мүгәддәс Јазыларда Давуд падшаһ Јеһованы бу сөзләрлә уҹалдыр: «Еј Аллаһ, мәним үчүн фикирләринин гијмәти чохдур, онларын сајы-һесабы јохдур!» (Мәз. 139:17). Јунанҹа Мүгәддәс Јазыларда һәвари Павел Јеһоваја һәмд едирди, чүнки О, «үрәкләримизи ишыгландырды ки, Иса Мәсиһин симасында Аллаһ иззәтини дәрк етмәк нуруна малик олаг» (2 Кор. 4:6). Давудла Павел мүхтәлиф әсрләрдә јашамышлар, анҹаг һәр икиси дә Аллаһын Кәламындан зөвг алырдылар. Илһамланмыш Кәламынын сәһифәләриндә Јеһованын сәнә чатдырдығы һәр шеји охумаға вахт ајырсан, бу зөвгү сән дә дујарсан.