Охумагла мәшғул ол

ИНДИ сәнин етдијини јалныз инсанлар баҹарыр. Лакин орта мәктәбдә тәһсил алмаг имканынын олмамасы уҹбатындан јер үзүнүн әһалисинин һәр алты нәфәриндән бири охуја билмир. Охумағы баҹаранларын чоху исә, надир һалларда охујур. Анҹаг охумағын сајәсиндә гаршымызда мүхтәлиф өлкәләрә сәјаһәт етмәк, инсанларла таныш олараг, онларын һәјатындан чох шеј өјрәнмәк вә һәјатын чәтинликләринин өһдәсиндән ҝәлмәк үчүн фајдалы билик әлдә етмәк имканы ачылыр.

Инсан нә гәдәр јахшы охујурса, алдығы тәһсилин она бир о гәдәр фајдасы олаҹаг. Бу баҹарыг онун неҹә иш тапаҹағына вә өзүнү тәмин етмәк үчүн нечә саат ишләјәҹәјинә тәсир едә биләр. Охумағы баҹаран евдар гадынлар дүзҝүн гидаланма, ҝиҝијена вә сағламлыг бахымындан аилә үзвләринин гајғысына даһа јахшы гала биләрләр. Јахшы охуја билән аналар һәм дә ушагларынын әгли инкишафына мүсбәт тәсир ҝөстәрирләр.

Охумағын ҝәтирдији ән бөјүк фајда исә одур ки, онун сајәсиндә ‘Аллаһы таныја’ билирик (Сүл. мәс. 2:5). Аллаһа хидмәт едәркән охумаг баҹарығындан тез-тез истифадә едирик. Јығынҹаг ҝөрүшләриндә Мүгәддәс Јазылар вә она әсасланан нәшрләр охунур. Неҹә охумағын тәблиғ хидмәтинин кејфијјәтинә ҝүҹлү тәсир едир. Хидмәтә вә јығынҹаг ҝөрүшләринә һазырлашаркән дә охумаг лазым ҝәлир. Буна ҝөрә дә сәнин руһани инкишафын охумаг вәрдишинлә сых бағлыдыр.

Һәр фүрсәтдән истифадә ет

Аллаһын ирадәсини өјрәнмәјә башлајанларын бәзиләринин савады аз олур. Руһани ҹәһәтдән инкишаф етмәләри үчүн онлара охумағы өјрәтмәк лазым ҝәлә биләр. Бәзиләринин исә, даһа јахшы охумаг үчүн көмәјә еһтијаҹы вар. Еһтијаҹ олан јерләрдә јығынҹаглар бир нечә дилдә дәрҹ едилән «Охумагла вә јазмагла мәшғул ол» нәшри әсасында савадландырма курслары тәшкил етмәјә чалышырлар. Бу мәшғәләләр артыг минләрлә инсана көмәк етмишдир. Јахшы охумаг ваҹиб олдуғу үчүн бәзи јығынҹагларда Теократик Хидмәт Мәктәби илә јанашы охумағы јахшылашдырма мәшғәләләри дә кечирилир. Бу ҹүр мәшғәләләрин кечирилмәдији јерләрдә белә, һәр ҝүн уҹадан охумаға вахт ајырмагла вә мүнтәзәм олараг мәктәбә ҝедиб орада иштирак етмәклә јахшы наилијјәтләр әлдә етмәк олар.

Әфсуслар олсун ки, башга шејләрлә јанашы, шәкилли журналлар вә телевизија чох инсанларын һәјатындан охумағы сыхышдырыб чыхарыб. Телевизора чох бахыб, охумаға аз вахт ајыран инсан јахшы охумаға, дүшүнмәјә, ајдын мүлаһизә јүрүтмәјә вә өз фикирләрини јахшы ифадә етмәјә чәтинлик чәкә биләр.

«Садиг вә ағыллы гул» бизә Мүгәддәс Китабы анламаға көмәк едән нәшрләр тәгдим едир. Бу нәшрләрдә ваҹиб руһани мәсәләләрә даир чохлу мәлумат вар (Мат. 24:45; 1 Кор. 2:12, 13). Бундан әлавә, онлар бизә дүнјада баш верән мүһүм һадисәләр вә онларын мәнасы һагда мәлумат верир, тәбиәтлә таныш едир вә чәтинликләрин өһдәсиндән ҝәлмәји өјрәдир. Анҹаг бу нәшрләрдә әсас диггәт Аллаһа дүзҝүн хидмәт етмәк вә Онун лүтфүнү газанмаг үчүн нә етмәли олдуғумуза јөнәлдилир. Белә фајдалы нәшрләри охумаг руһани ҹәһәтдән јеткин инсан олмаға көмәк едәҹәк.

Сөзсүз ки, јахшы охумағы баҹармаг өз-өзлүјүндә үстүнлүк дејилдир. Бу баҹарыгдан дүзҝүн истифадә етмәк лазымдыр. Һәр әлимизә дүшән шеји јемәдијимиз кими, охујанда да сечиҹи олмалыјыг. Организмимизә һеч бир фајда ҝәтирмәјән, һәтта ону зәһәрләјә билән јемәји нә үчүн јемәлијик?! Буна бәнзәр тәрздә, зеһнимизи вә үрәјимизи мурдарлајан шејләри, арадабир дә олса, нијә охујаг ки?! Мүгәддәс Китабда охујаҹағымыз шејләри сечмәјә көмәк едән принсипләр вар. Сечим етмәздән әввәл нөвбәти ајәләри јадына сал: Ваиз 12:12, 13; Ефеслиләрә 4:22-24; 5:3, 4; Филипилиләрә 4:8; Колослулара 2:8; 1 Јәһја 2:15-17 вә 2 Јәһја 10.

Дүзҝүн нијјәтлә оху

Мүждәләри арашдыранда дүзҝүн нијјәтлә охумағын ваҹиблији ајдын ҝөрүнүр. Мәсәлән, «Маттанын Мүждәси»ндән өјрәнирик ки, Иса савадлы дин рәһбәрләринин һијләҝәр суалларына Мүгәддәс Јазылар әсасында ҹаваб вермәздән әввәл сорушурду: «Охумамысыныз?» вә ја «Һеч охумамысынызмы?» (Мат. 12:3, 5; 19:4; 21:16, 42; 22:31, 32). Бурадан алдығымыз дәрсләрдән бири одур ки, әҝәр дүзҝүн нијјәтлә охумуругса, онда јанлыш нәтиҹәләрә ҝәләҹәк, јахуд әсас фикри үмумијјәтлә нәзәрдән гачыраҹағыг. Фәрисејләр Мүгәддәс Јазылар васитәсилә әбәди һәјаты алаҹагларыны зәнн етдикләри үчүн бу Јазылары охујурдулар. Анҹаг Иса ҝөстәрмишди ки, Аллаһы севмәјәнләр вә Онун хилас үчүн тәгдим етдији васитәни гәбул етмәјәнләр бу мүкафаты алмајаҹаглар (Јәһ. 5:39-43). Нијјәтләри худбин олдуғундан фәрисејләр чох вахт јанлыш нәтиҹәјә ҝәлирдиләр.

Бизи Аллаһын Кәламыны охумаға тәшвиг едән ән әсас нијјәт Јеһоваја мәһәббәт олмалыдыр. Белә мәһәббәт үрәјимиздә Аллаһын ирадәсини өјрәнмәк истәји ојадыр, чүнки мәһәббәт ‘һәгигәтә шадланыр’ (1 Кор. 13:6). Ола билсин, әввәлләр охумағы елә дә хошламамышыг, лакин буна бахмајараг, Јеһованы ‘бүтүн дүшүнҹәмизлә’ севмәк бизи тәшвиг едәҹәк ки, зеһнимизи фәал сурәтдә Аллаһы јахындан танымаға сәрф едәк (Мат. 22:37). Мәһәббәт мараг ојадыр, мараг исә өјрәнмәјә һәвәс јарадыр.

Темпә диггәт јетир

Охумаг ҝөрдүјүнү танымагла сых бағлыдыр. Бу сәтирләри охујаркән сөзләри таныјырсан вә онларын мәнасы јадына дүшүр. Ҝөрмә саһәсини ҝенишләндирсән, даһа тез охујарсан. Сөзләрә тәк-тәк бахмагданса, чалыш бир дәфәјә бир нечә сөзү ҝөрәсән. Белә етсән, ҝөрәҹәксән ки, охудуғуну даһа ајдын баша дүшүрсән.

Анҹаг нисбәтән ағыр материалы охујанда башга үсулдан истифадә едәрәк сәјләринин сәмәрәсини артыра биләрсән. Мүгәддәс Јазылары охумағы мәсләһәт ҝөрәркән Јеһова Јешуаја демишди: «Бу Ганун китабынын сөзләри дилиндән дүшмәсин, орада јазылан һәр шејә дәгиг әмәл етмәк үчүн ҝеҹә-ҝүндүз онун үзәриндә дүшүн» (Јешуа 1:8). Бәзән инсан дүшүнәндә өз-өзүнә, алчагдан данышыр. Буна ҝөрә дә «дүшүнмәк» кими тәрҹүмә олунан, ејни заманда «дәриндән дүшүнмәк» мәнасыны верән ибрани сөзү бәзи тәрҹүмәләрдә «алчагдан охумаг» кими верилир (Мәз. 63:6; 77:12; 143:5). Инсан дәриндән дүшүнәндә тәләсмир. Дүшүнә-дүшүнә охујанда Аллаһын Кәламы зеһнимиздә вә үрәјимиздә даһа дәрин из бурахыр. Мүгәддәс Китабда пејғәмбәрлик, мәсләһәт, мәсәлләр, шеир, Аллаһын һөкмләри, Јеһованын нијјәти һагда әтрафлы мәлуматлар вә реал һәјатдан чохлу һадисәләр јазылыб. Аллаһын јоллары илә јеримәк истәјәнләр үчүн бу шејләр бөјүк мәна кәсб едир. Мүгәддәс Китабы дүшүнҹәмиздә вә үрәјимиздә дәрин из бурахаҹаг тәрздә охумаг неҹә дә фајдалыдыр!

Фикрини ҹәмләмәји өјрән

Охудугҹа тәсвир олунан һәр сәһнәдә өзүнү тәсәввүр ет. Гәһрәманлары ҝөрмәјә вә баш верән һадисәләр заманы кечирдикләри һиссләри дујмаға чалыш. «1 Шамуел» китабынын 17-ҹи фәслиндә тәсвир олунан Давуд вә Голјат һагда олан парчаја бәнзәр һиссәләри охујанда бу, елә дә чәтин олмур. Әҝәр өлчүләри вә парчалары, јахуд бухурун, говурғанын вә јандырма гурбаны кими тәгдим олунан һејванларын ијини тәсәввүрүндә ҹанландырсан, мүгәддәс мәскәнин тикилмәси, јахуд каһинлијин тәсис олунмасы һагда «Чыхыш» вә «Левилиләр» китабындакы тәфәррүатлар да мараглы ҝәләҹәк вә һәјати ҝөрүнәҹәк. Каһинлик хидмәтинин иҹра едилмәсинин неҹә мөһтәшәм иш олдуғуну бир дүшүн! (Лука 1:8-10). Һисс вә дујғуларыны бу ҹүр ишә салмагла охудугларынын мәнасыны вә ваҹиблијини баша дүшәҹәк, онлары даһа јахшы јадда сахлајаҹагсан.

Анҹаг диггәтли олмасан, охујанда фикрин јајынар. Ҝөзләрин сәһифәјә бахса да, фикрин башга јердә долаша биләр. Евдә мусиги сәсләнирми? Бәс телевизор ишләјир? Бәлкә, аилә үзвләрин сөһбәт едир? Әҝәр мүмкүндүрсә, ән јахшысы сакит јердә охумагдыр. Анҹаг адамын фикри сакит шәраитдә дә јајына биләр. Ола билсин, ҝүнүн ҝәрҝин кечиб. Ҝүн әрзиндә баш верәнләр өзүндән асылы олмајараг, ҝөзүнүн өнүндән лент јазысы кими бир-бир өтүб-кечир. Дүздүр, ҝүн әрзиндә баш верәнләри фикирләшмәк фајдалыдыр, анҹаг буну охујан заман етмәк лазым дејил. Ола билсин, охумаға башламаздан әввәл сән бүтүн диггәтини ҹәмләмиш вә һәтта дуа да етмишдин. Анҹаг охујанда, фикирләрин һаралардаса долашмаға башлајыр. Бир дә ҹәһд ҝөстәр. Өзүнү өјрәшдир ки, охујанда фикрин јајынмасын. Тәдриҹән бу сәндә алынаҹаг.

Баша дүшмәдијин сөзә раст ҝәләндә нә едирсән? Бәзән таныш олмајан сөзләрин мәнасы елә мәтндәҹә изаһ вә ја мүзакирә олунур. Јахуд мәнасыны контекстдән баша дүшмәк олар. Белә олмадыгда, әҝәр варса, лүғәтә бах вә ја сөзү гејд ет ки, сонра кимдәнсә сорушасан. Бунун сајәсиндә сөз еһтијатын артаҹаг вә охудугларыны јахшы баша дүшәҹәксән.

Аудиторија гаршысында охумаг

Һәвари Павел Тимотејә охумагла мәшғул олмағы тапшыранда әсас етибарилә башгаларына фајда ҝәтирмәк үчүн охумағы нәзәрдә тутурду (1 Тим. 4:13). Аудиторија гаршысында јахшы охумаг садәҹә јазылан сөзләри охумаг дејил. Охујанда сөзләрин мәнасыны баша дүшмәк вә онларын ифадә етдији фикирләри анламаг лазымдыр. Јалныз белә олдуғу һалда, фикирләри дүзҝүн чатдырмаг вә динләјиҹиләрдә лазыми һиссләри ојатмаг мүмкүн олаҹаг. Сөзсүз ки, бунун үчүн јахшы һазырлыг вә мәшг тәләб олунур. Буна ҝөрә дә Павел нәсиһәт едирди: «Мүгәддәс Јазылары ҹәмијјәтә охумагла... мәшғул ол». Теократик Хидмәт Мәктәбиндә бу саһә илә бағлы фајдалы тәлим алаҹагсан.

Охумаг үчүн вахт ајыр

«Чалышганын нијјәти хејир ҝәтирәр, тәләсән еһтијаҹ ичинә дүшәр» (Сүл. мәс. 21:5). Охумаг һәвәсимизә ҝәлдикдә, бу сөзләр неҹә дә јериндәдир! «Хејир» әлдә етмәк үчүн чалышыб ишимизи елә планлашдырмалыјыг ки, башга ишләр охумаға ајырдығымыз вахты әлимиздән алмасын.

Сән нә вахт охујурсан? Бәлкә сәһәр тездән охумаг сәнә даһа фајдалыдыр? Јохса өзүнү ҝүнорта ҝүмраһ һисс едирсән? Әҝәр һәр ҝүн охумаг үчүн 15-20 дәгигә вахт ајырсан, әлдә едилән нәтиҹәләр сәни һејран едәҹәк. Әсас мәсәлә мүнтәзәмликдир.

Јеһова Өз мөһтәшәм нијјәтләрини нәјә ҝөрә китаба јаздырыб? Она ҝөрә ки, инсанлар мәсләһәт үчүн Онун јазылы Кәламына үз тута билсинләр. Бунун сајәсиндә онларын Јеһованын мөһтәшәм ишләри һагда дүшүнмәк, бунлары өвладларына данышмаг вә Аллаһын ишләрини унутмамаг имканы вар (Мәз. 78:5-7). Јеһованын бу ҹүр сәхавәтинә ҝөрә миннәтдар олдуғумузу ҝөстәрмәјин ән јахшы үсулу Онун һәјат верән Кәламыны охумагла мәшғул олмагдыр.