Јығынҹаг үчүн чыхышларын һазырланмасы

ТЕОКРАТИК Хидмәт Мәктәбинин програмы бүтүн јығынҹағын тәлим алмасы үчүн тәртиб олунуб. Һәмчинин јығынҹағын диҝәр ҝөрүшләриндә, еләҹә дә конгресләрдә фајдалы мәлумат чатдырылыр. Әҝәр сәнә бу ҝөрүшләрдән бириндә чыхыш етмәк тапшырылыбса, бу о демәкдир ки, үзәринә бөјүк мәсулијјәт гојулуб. Һәвари Павел мәсиһчи јығынҹағында нәзарәтчи олан Тимотеји вердији тәлимата даим диггәт јетирмәјә тәшвиг едирди (1 Тим. 4:16). Мәсиһчи ҝөрүшләриндә иштирак едәнләр Аллаһла мүнасибәтләринә аид олан мәсәләләрә даир тәлим алмаг үчүн дәјәрли вахтларынын бир һиссәсини ајырыр, бәзиләри исә бунун үчүн хејли ҝүҹ сәрф едирләр. Белә тәлими вермәк доғрудан да бөјүк мәсулијјәтдир! Бунун өһдәсиндән мүвәффәгијјәтлә неҹә ҝәлә биләрсән?

Мүгәддәс Китабдан диггәтәлајиг фикирләр

Мәктәбин бу һиссәси Мүгәддәс Китабын һәфтәлик охунмасына әсасланыр. Бу тапшырығы јеринә јетирәркән материалын бу ҝүн бизә һансы аидијјәти олдуғуна диггәт јетирилмәлидир. Неһемја 8:8 ајәсиндә дејилир ки, Езра јолдашлары илә бирликдә халг гаршысында Аллаһын Кәламындан охујуб ајдынлашдырды вә ‘мәнасыны ҹамаата изаһ етди’. Мүгәддәс Китабдан диггәтәлајиг фикирләрлә чыхыш едәркән сәнин үчүн дә белә бир имкан јараныр.

Бу тапшырыға неҹә һазырлашмаг лазымдыр? Мүмкүн оларса, Мүгәддәс Китабдан ајрылан парчаны бир һәфтә, ја да даһа әввәлдән оху. Сонра аид олдуғун јығынҹаг вә онун тәләбатлары һаггында дүшүн. Бу һагда дуа ет. Мүгәддәс Китабын бу парчасындан олан һансы мәсләһәт, нүмунәләр вә ја принсипләр һәмин тәләбатлары өдәјә биләр?

Арашдырма апармаг сон дәрәҹә ваҹибдир. Билдијин дилдә компакт дискдә «Ҝөзәтчи Гүлләсинин китабханасы», «Ҝөзәтчи Гүлләси нәшрләринин индекси» вармы? Әҝәр јохдурса, о заман «Ҝөзәтчи Гүлләси»ндәки иллик индексдән сәмәрәли истифадә ет. Сечдијин ајәләрин изаһ едилдији нәшрләри арашдырмагла онларын јазылдығы шәраит һаггында мәлумат, пејғәмбәрликләрин, принсипләрин изаһы, мүәјјән ајәләрин Јеһова һаггында нәји ачыгладығыны өјрәнә биләрсән. Һәддиндән артыг чох фикрә тохунмаға чалышма. Диггәтини јалныз бир нечә ајәнин үзәриндә ҹәмләшдир. Ән јахшысы ҹәми бир-ики ајә сечиб, ону јахшы изаһ етмәкдир.

Тапшырығына динләјиҹиләрдән Мүгәддәс Китабын һәфтәлик охунмасындан һансы фајданы әлдә етдикләрини сорушмаг да дахил ола биләр. Охудугларындан шәхси вә ја аиләви өјрәнмәләрини, хидмәтләрини јахшылашдыраҹаг вә һәјатларында фајдалы олаҹаг һансы фикирләри тапыблар? Инсанларла вә халгларла мүнасибәтиндә Јеһова һансы кејфијјәтләри тәзаһүр етдирмишдир? Динләјиҹиләр иманларыны мөһкәмләндирән вә үрәкләриндә Јеһоваја миннәтдарлыг ојадан һансы фикирләри өјрәнмишләр? Хырдалыглара вә долашыг фикирләрә диггәт јөнәлтмәјә еһтијаҹ јохдур. Сечдијин фикирләрин мәнасыны изаһ ет вә практики дәјәрини вурғула.

Тәлим нитги

Бу тапшырыг чап олунмуш материала, мәсәлән «Ҝөзәтчи Гүлләси» вә «Ојанын!» журналындан, јахуд китабдан ҝөтүрүлмүш бир парчаја әсасланыр. Әксәр һалларда ајрылмыш вахт үчүн лазым оландан чох материал тапмаг олур. Бу тапшырығы неҹә јеринә јетирмәк лазымдыр? Бир мүәллим кими, сәнин ишин садәҹә материалы чатдырмагдан ибарәт дејил. Нәзарәтчи ‘өјрәтмәјә габилијјәтли олмалыдыр’ (1 Тим. 3:2).

Һазырлашмаға тәјин олунмуш материалы өјрәнмәкдән башла. Ајәләрә бах. Дүшүн. Чалыш бунлары чыхыш етмәздән кифајәт гәдәр әввәл едәсән. Јадда сахла ки, гардашлар чыхышын әсасландығы чап олунмуш материалы габагҹадан охумаға тәшвиг олунурлар. Сәнин тапшырығын садәҹә ону данышмаг, јахуд јығҹам шәкилдә ифадә етмәк јох, неҹә тәтбиг етмәји ҝөстәрмәкдир. Материалын мүнасиб һиссәләрини јығынҹаға һәгигәтән фајда ҝәтирәҹәк тәрздә чатдыр.

Һәр ушағын өз хасијјәти олдуғу кими, һәр јығынҹағын да өзүнүн сәҹијјәви хүсусијјәтләри вар. Ушағыны јахшы өјрәдән валидејн әхлаг нормаларыны она садәҹә диктә етмәклә кифајәтләнмир. О, ушагла бирликдә мүлаһизә јүрүдүр. Онун хасијјәтини вә үзләшдији проблемләри нәзәрә алыр. Ејни тәрздә, јығынҹагдакы мүәллимләр дә хитаб етдикләри динләјиҹиләрин тәләбатларыны баша дүшүр вә диггәтини онлара јөнәлдир. Амма узагҝөрән мүәллим динләјиҹиләрдән кимисә пәрт едәҹәк нүмунәләр ҹәкмәјәҹәк. О, Јеһованын јоллары илә јеримәјин артыг ҝәтирдији фајдалары ҝөстәрәҹәк вә Мүгәддәс Јазылардан јығынҹаға үзләшдији проблемләрин өһдәсиндән мүвәффәгијјәтлә ҝәлмәјә көмәк едәҹәк мәсләһәтләри вурғулајаҹаг.

Јахшы өјрәтмәк динләјиҹиләрин үрәјинә тәсир едир. Бу, садәҹә фактлары чатдырмағы јох, һәм дә онларын архасында дуран шејләри баша салмағы тәләб едир. Бунун үчүн тәлим верилән шәхсләрә сәмими мараг ҝөстәрмәк лазымдыр. Руһани чобанлар сүрүнү јахшы танымалыдырлар. Әҝәр онлар јығынҹағын ајры-ајры үзвләринин үзләшдији проблемләри мәһәббәтдән ирәли ҝәләрәк јадда сахласалар, руһландырыҹы тәрздә данышмағы, анлајыш, мәрһәмәт вә шәфгәт ҝөстәрмәји баҹараҹаглар.

Јахшы мүәллим билир ки, чыхышын ајдын мүәјјән едилмиш мәгсәди олмалыдыр. Материалы елә тәрздә чатдырмаг лазымдыр ки, әсас фикирләр сечилсин вә јадда галсын. Динләјиҹиләр һәјатларына тәсир едәҹәк фикирләри јадда сахлаја билмәлидирләр.

Хидмәти ҝөрүш

«Бизим Падшаһлыг Хидмәтимиз»дәки мәгаләјә әсасланараг чыхыш едәндә башга чәтинликлә үзләшә биләрсән. Инди сәндән ән мүнасиб олан фикирләри сечмәк јох, јазыланы тамлығы илә динләјиҹиләрә чатдырмаг тәләб олунур. Верилән мәсләһәтин әсасландығы ајәләрин үзәриндә дүшүнмәјә динләјиҹиләрә көмәк ет (Тит. 1:9). Вахт мәһдуддур, буна ҝөрә дә әксәр һалларда әлавә мәнбәдән мәлумат ҝәтирмәјә имкан олмур.

Диҝәр һалларда исә, елә ола биләр ки, тәгдим едәҹәјин материал «Бизим Падшаһлыг Хидмәтимиз»ә әсасланмасын. Тапшырыг «Ҝөзәтчи Гүлләси» мәгаләсинә әсаслана, јахуд бир нечә гыса гејддән ибарәт ола биләр. Тәјин олунмуш материалы јығынҹағын тәләбатлары илә әлагәләндирмәк бир мүәллим кими сәнин үзәринә дүшүр. Бу заман гыса, мүнасиб нүмунә чәкмәк, јахуд һадисә данышмаг олар. Јадда сахла ки, сәнин тапшырығын садәҹә мөвзу әтрафында данышмаг јох, ону елә тәрздә чатдырмагдыр ки, јығынҹаға Аллаһын Кәламында јазылан иши јеринә јетирмәјә вә ондан севинҹ дујмаға көмәк етсин (Һәв. иш. 20:20, 21).

Тапшырығы һазырлајаркән јығынҹағын үзвләринин шәраитини нәзәрә ал. Онлары һал-һазырда етдикләри ишләрә ҝөрә тәрифлә. Бу материалдакы мәсләһәтләри јеринә јетирмәк онлара хидмәтләрини јахшылашдырмаға вә ондан даһа чох севинҹ дујмаға неҹә көмәк едәҹәк?

Тапшырығына сәһнәҹик вә ја мүсаһибә дахилдирми? Әҝәр дахилдирсә, онлары габагҹадан јахшы тәшкил етмәк лазымдыр. Ола биләр, буну башгасына һәвалә етмәк үрәјиндән кечсин, анҹаг бу һәмишә јахшы нәтиҹәләр ҝәтирмир. Әҝәр мүмкүндүрсә, ҝөрүшдән бир ҝүн әввәл сәһнәҹик вә мүсаһибәләри мәшг ет. Елә ет ки, чыхышынын бу һиссәси верилән тәлимин тәсирини артырсын.

Конгресләр

Јахшы натиг вә мүәллим олан руһән јеткин гардашлардан вахт кечдикҹә конгрес програмларында чыхыш етмәји хаһиш едә биләрләр. Теократик тәлимин верилмәсиндә конгресләр хүсуси рол ојнајыр. Програмда чыхыш етмәк тапшырылан гардашлара һазыр мәтн, план, Мүгәддәс Китаба әсасланан вә мүасир ҝүнләрә тәтбиг едилән драма даир рәһбәрлик, јахуд бир нечә јазылы ҝөстәриш верилә биләр. Әҝәр сән дә белә програмда чыхыш етмәк шәрәфинә лајиг ҝөрүлмүсәнсә, материалы диггәтлә өјрән. Дәјәрини баша дүшәнә гәдәр онун үзәриндә ишлә.

Һазыр мәтн вериләндә гардашлар ону сөзбәсөз охумалыдырлар. Онлар фикирләри өз сөзләри илә ифадә едә вә ја ҹүмләләрин јерини дәјишә билмәзләр. Әсас фикирләри вә онларын неҹә ачыгландығыны баша дүшмәк үчүн мәтни јахшы өјрәнмәлидирләр. Чыхышы дүзҝүн мәна вурғусу, руһ јүксәклији илә, ҹанлы, һиссләрлә, тәмкинлә, әминликлә, ҝениш аудиторија үчүн мүнасиб тонда вә темпдә охумағы баҹарана гәдәр мәшг етмәк лазымдыр.

Мәрузә планы вериләндә гардашлар пландан кәнара чыхмајараг материалы изаһ етмәлидирләр. Чыхыш заманы планы охумаг вә ја ону сөзбәсөз јазмаг әвәзинә, натиг материалы сәрбәст шәкилдә, үрәкдән тәгдим етмәлидир. Һәр әсас бәнди јахшы изаһ етмәк үчүн планда ҝөстәрилән вахтдан кәнара чыхмамаг ваҹибдир. Натиг әсас бәндләрин алтындакы фикирләрдән вә ајәләрдән јахшы истифадә етмәлидир. О, пландакы фикирләрин әвәзинә өз хошуна ҝәлән әлавә фикирләр дахил етмәмәлидир. Сөзсүз ки, верилән тәлимин әсасыны Аллаһын Кәламы тәшкил едир. ‘Кәламы тәблиғ етмәк’ мәсиһчи ағсаггалларын мәсулијјәтидир (2 Тим. 4:1, 2). Буна ҝөрә дә натиг пландакы ајәләрә хүсуси диггәт јетирмәли, онлары изаһ етмәли вә неҹә тәтбиг етмәји ҝөстәрмәлидир.

Ахыра сахлама

Хидмәт етдијин јығынҹагда чыхыш етмәк үчүн тез-тезми имкан јараныр? Онларын һәр биринә кифајәт гәдәр неҹә диггәт јетирә биләрсән? Чыхыш едәҹәјин һиссәләрә һазырлашмағы ахырынҹы дәгигәјә сахлама.

Чыхышларын јығынҹаға һәгиги мәнада фајда ҝәтирмәси үчүн әввәлҹәдән әтрафлы дүшүнмәк тәләб олунур. Буна ҝөрә дә һәр дәфә тапшырыг алан кими материалы охумаға вәрдиш ет. Белә етсән, башга ишләрлә мәшғул оларкән дә онун үзәриндә дүшүнә биләҹәксән. Чыхышындан әввәлки ҝүнләр вә ја һәфтәләр әрзиндә мәлуматы ән јахшы шәкилдә тәтбиг етмәјинә көмәк едән фикирләр ешидә биләрсән. Мөвзунун лап јеринә дүшдүјүнү ҝөстәрән һадисәләр баш верә биләр. Тапшырығы алан кими охујуб үзәриндә дүшүнмәк үчүн вахт ајырмаг лазым олса да, бу, сәмәрә илә кечирилән вахтдыр. Ахырда планын үзәриндә ишләјәндә әввәлҹәдән онун үзәриндә дүшүнмәјин фајдасыны ҝөрәҹәксән. Тапшырыглары бу ҹүр јеринә јетирсән, ҝәрҝинлијин азалаҹаг вә материалы фајдалы шәкилдә тәгдим едиб јығынҹагдакыларын гәлбинә јол тапаҹагсан.

Јеһованын халгына тәлим вермәклә бағлы сәнә етибар олунан мәсулијјәти нә гәдәр гијмәтләндирирсәнсә, Јеһоваја о гәдәр иззәт ҝәтирәҹәк вә Ону севәнләр үчүн хејир-дуа олаҹагсан (Јешаја 54:13; Ром. 12:6-8).