Мүлајимлик вә һиссләрин ифадә едилмәси

ҺИССЛӘР инсан һәјатынын ајрылмаз һиссәсидир. Инсан һиссләрини ифадә едәндә үрәјиндәкиләри, дахили варлығыны, вәзијјәтә вә инсанлара неҹә мүнасибәт бәсләдијини ҝөстәрир. Һәјатларындакы аҹы тәҹрүбәнин, бәзи һалларда исә менталитетин тәсири нәтиҹәсиндә чохлары өз һиссләрини ҝизләдир. Лакин Јеһова бизи өзүмүздә мүсбәт кејфијјәтләр тәрбијә етмәјә вә сонра онлары мүнасиб шәкилдә ифадә етмәјә тәшвиг едир (Ром. 12:10; 1 Салон. 2:7, 8).

Данышаркән ишләтдијимиз сөзләр һиссләримизи дүзҝүн шәкилдә ифадә едә биләр. Лакин сөзләри мүнасиб һиссләрлә демәдикдә бизи динләјәнләр сәмимијјәтимизә шүбһә едә биләрләр. Диҝәр тәрәфдән, сөзләри мүнасиб һиссләрлә дејәриксә, нитгимиз ҝөзәл, долғун олар вә бизи динләјәнләрин үрәјинә јол тапа биләр.

Мүлајимлик. Һансыса инсанлар һаггында дүшүнәндә чох вахт үрәјимиздә хош дујғулар ојаныр. Буна бәнзәр тәрздә, Јеһованын ҝөзәл кејфијјәтләри һаггында данышанда вә Онун хејирхаһлығына ҝөрә миннәтдарлығымызы ифадә едәндә сәсимиз мүлајим олмалыдыр (Јешаја 63:7-9). Һәмчинин инсанларла да мүлајим данышмалыјыг.

Бир дәфә ҹүзама тутулмуш бир нәфәр Исаја јахынлашыб, ондан шәфа диләди. Исанын: «Истәјирәм, саф ол!» — дејәркән сәсинин тонуну тәсәввүр ет (Марк 1:40, 41). Һәмчинин белә бир сәһнәни ҝөзүнүн өнүндә ҹанландыр: 12 илдир ганахмадан әзијјәт чәкән гадын сакитҹә архадан Исаја јахынлашыб палтарынын әтәјинә тохунур. Бунун нәзәрдән гачмадығыны ҝөрәндә гадын титрәјәрәк ирәли чыхыб Исанын ајагларына дөшәнир, һамынын гаршысында нә үчүн онун палтарына тохундуғуну вә неҹә шәфа тапдығыны ачыб данышыр. Иса она дејир: «Гызым, иманын сәни хилас етди. Сүлһ илә ҝет» (Лука 8:42б-48). Исанын бу сөзләри һансы тәрздә дедији һагда бир дүшүн. Бу ики һадисәдә Исанын ҝөстәрдији шәфгәт инди дә үрәјимизи риггәтә ҝәтирир.

Иса кими, бизим дә инсанлара үрәјимиз јананда вә онлара көмәк етмәк истәјәндә бу, онларла неҹә данышмағымызда өзүнү бүрузә верир. Данышаркән сәсимиздәки бу мүлајимлик сүни дејил, үрәкдән ҝәлир. Бу, инсанларын неҹә һај верәҹәјинә бөјүк тәсир ҝөстәрә биләр. Хидмәт заманы, хүсусилә дә мүлаһизә јүрүдәркән, руһландыраркән, тәшвиг едәркән, киминсә дәрдинә шәрик оларкән дедијимиз сөзләрин чохуну мүлајимликлә сөјләмәк лазымдыр.

Әҝәр үрәјиндә инсанлара гаршы хош һиссләр варса, гој бу үзүндә дә ҝөрүнсүн. Мүлајимлик ҝөстәрсән, динләјиҹиләр, ҝеҹәнин ајазында оҹаға ҹан атан кими, сәнә ҹан атаҹаглар. Әҝәр үзүндә мүлајимлик һисс олунмаса, динләјиҹиләр онларын гајғысына сәмими-гәлбдән галдығына шүбһә илә јанашарлар. Мүлајимлији маска кими тахмаг мүмкүн дејил, о, сәмими олмалыдыр.

Мүлајимлик сәсиндә дә өзүнү бүрузә вермәлидир. Әҝәр сәсин кобуд вә галындырса, данышаркән мүлајимлик ифадә етмәк чәтин ола биләр. Анҹаг ҹәһд ҝөстәрсән, бир мүддәтдән сонра буну баҹараҹагсан. Сырф техники бахымдан бир шеји јадда сахла ки, гыса, гырыг-гырыг сәсләр нитги кобудлашдырыр. Саитләри бир аз узун тәләффүз етмәји өјрән. Бу, нитгинә мүлајимлик гатмаға көмәк едәҹәк.

Анҹаг ән ваҹиби фикрини һара ҹәмләмәјиндир. Әҝәр фикрин мүраҹиәт етдијин инсанлардадырса вә онлар үчүн фајдалы олан мәлуматы чатдырмағы үрәкдән арзулајырсанса, бу, сәнин данышыг тәрзиндә өз әксини тапаҹаг.

Ҹанлы нитг инсаны һәрәкәтә тәшвиг етсә дә, зәриф һиссләр дә бөјүк рол ојнајыр. Инсанларын ағлына тәсир етмәк һәмишә кифајәт етмир, биз һәм дә онларын үрәјинә јол тапмалыјыг.

Диҝәр һиссләрин ифадә едилмәси. Ҝәрҝин вәзијјәтә дүшән инсан һәјәҹан, горху вә мәјуслуг кими һиссләр кечирир. Анҹаг бизим һәјатымызда башлыҹа јери тутмалы олан һисс севинҹ олмалыдыр вә инсанларла сөһбәт едәркән ону чәкинмәдән тәзаһүр етдирмәлијик. Бәзи һиссләри исә ҹиловламаг лазымдыр. Онлар мәсиһчијә јарашмыр (Ефес. 4:31, 32; Филип. 4:4). Истәнилән һисси сөзләрлә, сәсин тону илә, ҝүҹү илә, үз ифадәләри вә жестләрлә ифадә етмәк олар.

Мүгәддәс Китабда инсан хисләтинә хас олан бүтүн һиссләр һаггында данышылыр. Бәзи һалларда онларын садәҹә ады чәкилир, диҝәр һалларда исә, онлары һәр һансы һадисәдән вә ја ситат ҝәтирилән сөзләрдән мүәјјән етмәк олар. Белә һиссәләри уҹадан охујаркән һәмин һиссләр сәсиндә әкс олунса, бу һәм сәнә, һәм дә сәни динләјәнләрә даһа бөјүк тәсир бағышлајаҹаг. Бунун үчүн өзүнү барәсиндә охудуғун адамларын јериндә тәсәввүр етмәк лазымдыр. Амма мәрузәни тамашаја чевирмәк олмаз, буна ҝөрә дә еһтијатлы ол ки, һәддиндән артыг ҹанфәшанлыг етмәјәсән. Чалыш охудуғун парчалары динләјиҹиләрин тәсәввүрүндә ҹанландырасан.

Мөвзуја ујғун һиссләр. Шөвг кими, мүлајимлији вә диҝәр һиссләри дә әсас етибарилә мөвзудан асылы олараг ифадә етмәк лазымдыр.

Матта 11:28-30 ајәләрини ач вә орада дејиләнләрә диггәт јетир. Сонра фәрисејләри вә дин алимләрини мүһакимә едәркән Исанын дедији сөзләри Матта 23-ҹү фәсилдән оху. Ола билмәз ки, Иса бу ҹүр төһмәтләндириҹи кәскин сөзләри гуру вә сүст шәкилдә десин.

Сәнҹә, Јәһуданын өз гардашы Бинјамин үчүн јалвармасы тәсвир олунан Јарадылыш 44-ҹү фәсли һансы һиссләрлә охумаг лазымдыр? 13-ҹү ајәдә ифадә олунан һиссләрә, 16-ҹы ајәдә Јәһуданын баш верән бәдбәхтлијә ҝөрә нәләр кечирдијинә вә Јарадылыш 45:1 ајәсиндә ҝөстәрилдији кими, Јусифин кечирдији һиссләрә диггәт јетир.

Беләликлә, јахшы охумаг вә ја данышмаг үчүн тәкҹә сөзләрә вә фикирләрә јох, һәм дә онларын һансы һиссләрлә дејилмәли олдуғуна диггәт јетирмәк лазымдыр.