Таныш вәзијјәтләрдән нүмунәләр чәк

СӨЗСҮЗ КИ, чәкдијин нүмунәнин мүзакирә етдијин мөвзуја ујғун олмасы ваҹибдир. Анҹаг нүмунәнин тәсирли олмасы үчүн онун аудиторијаја ујғун олмасы да ејни дәрәҹәдә әһәмијјәтлидир.

Бир груп гаршысында чыхыш едәркән һансы нүмунәни чәкәҹәјинә аудиторија неҹә тәсир едә биләр? Иса Мәсиһ неҹә нүмунәләр чәкирди? Истәр издиһама, истәрсә дә шаҝирдләринә мүраҹиәт едәркән Иса һеч вахт кәнар халглара хас олан шејләрдән нүмунәләр чәкмирди. Онун динләјиҹиләри үчүн бу ҹүр нүмунәләр јад оларды. Мәсәлән, Иса Мисирин сарај һәјатындан вә ја Һиндистанын дини адәтләриндән данышмырды. Анҹаг о, бүтүн халглара таныш олан ишләрдән нүмунәләр чәкирди. О, палтар јамамагдан, ишләрин апарылмасындан, гијмәтли бир шеји итирмәкдән вә тој зијафәтиндән данышырды. Иса мүхтәлиф вәзијјәтләрә дүшәндә инсанларын неҹә даврандыгларыны билир вә бу биликдән истифадә едирди (Марк 2:21; Лука 14:7-11; 15:8, 9; 19:15-23). Јалныз Исраил халгына тәблиғ етдији үчүн Иса әксәр һалларда нүмунәләриндә бу халгын ҝүндәлик һәјатынын бир һиссәси олан ишләрә вә мәишәт әшјаларына истинад едирди. Белә ки, о, әкинчиликдән, гојунларын чобанын сәсинә неҹә һај вермәсиндән, шәраб сахламаг үчүн һејван дәрисиндән дүзәлән тулугдан данышырды (Марк 2:22; 4:2-9; Јәһ. 10:1-5). О, һәмчинин һамыја таныш олан тарихи һадисәләри: илк инсанын јаранмасыны, Нуһун ҝүнләриндәки Дашгыны, Содом вә Һоморранын мәһвини, Лутун арвадынын өлүмүнү гејд етмишди (Мат. 10:15; 19:4-6; 24:37-39; Лука 17:32). Сән дә нүмунәләр вә бәдии ифадәләр сечәркән динләјиҹиләринин мәншәји вә онлара һансы ишләрин таныш олдуғу һагда дүшүнүрсәнми?

Бәс әҝәр ҝениш аудиторијаја јох, бир вә ја бир нечә нәфәрә мүраҹиәт едирсәнсә, онда неҹә? Һәмин кичик аудиторијаја хүсусилә ујғун олан нүмунә сечмәјә чалыш. Иса Сухар јахынлығында самаријалы гадына гују башында шаһидлик едәркән «һәјат сују», ‘әсла сусамамаг’, «әбәди һәјата говушдуран су мәнбәји» кими бәдии ифадәләрдән истифадә етмишди. Бунларын һамысы гадынын о анда мәшғул олдуғу ишлә бағлы иди (Јәһ. 4:7-15). Балыгчы торларыны јујан кишиләрлә данышанда исә, балыгчылыгла бағлы бәдии ифадәләрдән истифадә етмишди (Лука 5:2-11). Әкинчилијин ҝениш јајылдығы әразидә јашадыглары үчүн, Иса һәр ики һалда әкинчиликдән даныша биләрди, лакин тәсәввүрләриндә образ ҹанландырмаг үчүн онларын өзләринин мәшғул олдуғу ишә истинад етмәк даһа тәсирли үсул иди. Сән дә белә етмәјә чалышырсанмы?

Иса диггәтини ‘Исраил халгынын гејб олмуш гојунларына’ ҹәмләдији һалда, һәвари Павел тәкҹә исраиллиләр јох, һәм дә гејри-јәһудиләр үчүн ҝөндәрилмишди (Мат. 15:24; Һәв. иш. 9:15). Бу, Павелин нүмунә сечиминә тәсир етмишдими? Бәли. Коринфдәки мәсиһчиләрә јазаркән о, гачыш үзрә кечирилән јарышлардан, бүтләрин шәрәфинә тикилмиш мәбәдләрдә јемәк јемә мәрасимләриндән вә тәнтәнәли јүрүшләрдән — һәмин гејри-јәһудиләрә јахшы таныш олан шејләрдән сөз ачмышды (1 Кор. 8:1-10; 9:24, 25; 2 Кор. 2:14-16).

Тәлим верәркән чәкәҹәјин нүмунәләри Иса вә Павел кими диггәтлә сечирсәнми? Динләјиҹиләринин мәншәјини вә мәшғуллијјәтләрини нәзәрә алырсанмы? Әлбәттә, биринҹи әсрдән бу јана дүнјада чох шеј дәјишиб. Телевизија васитәсилә әксәр инсанлар дүнјада баш верәнләрдән хәбәр тутур. Һәмчинин хариҹи өлкәләрдәки һәјат тәрзи дә чохларына танышдыр. Буна бахмајараг, инсанлары ән чох шәхсән онларын һәјатына — евләринә, аиләләринә, ишләринә, гидаларына, јашадыглары әразидәки һаваја аид шејләр марагландырыр.

Әҝәр чәкдијин нүмунәни узун-узады изаһ етмәли олурсанса, демәли, динләјиҹиләринә таныш олмајан мөвзу һаггында данышырсан. Белә нүмунә вермәк истәдијин нәсиһәтин мәғзини көлҝәдә гојаҹаг. Нәтиҹәдә, динләјиҹиләр нүмунәни јадда сахласа да, Мүгәддәс Јазылардан чатдырмаг истәдијин һәгигәти унудаҹаглар.

Иса мүгајисә етмәк үчүн мүрәккәб анлајышлардан јох, садә, ҝүндәлик ишләрдән истифадә едирди. О, хырда шејләрин васитәсилә бөјүк, асан шејләрин васитәсилә мүрәккәб анлајышлары изаһ едирди. Ҝүндәлик ишләрлә һәгигәт арасындакы охшарлығы ҝөстәрәрәк Иса өјрәтдији руһани һәгигәтләри баша дүшмәјә вә јадда сахламаға инсанлара көмәк едирди. Бу, бизим үчүн неҹә дә ҝөзәл нүмунәдир!