Фәсил 5
Јеһоваја ибадәт едәнләрин азадлығы
1, 2. а) Аллаһ илк киши илә гадына нә ҹүр азадлыг бәхш етмишди? б) Адәмлә Һәвванын фәалијјәтини истигамәтләндирән бәзи ганунлары садалајын.
ЈЕҺОВА илк киши илә гадыны азад јаратмышды. Онларын азадлығы илә буҝүнкү «азадлыг» арасында јерлә ҝөј гәдәр фәрг варды. Бу ики адам Ҹәннәтдә — ҝөзәл Еден бағында јашајырды. Камил зеһин вә бәдән сајәсиндә, онлар хәстәлијин нә олдуғуну билмирдиләр. Бу ҹүр һәјат онлара һәзз верирди. Өлүм бу ҝүн һәр кәсин лабүд сону олса да, илк киши илә гадын өлмәмәли идиләр. Адәмлә Һәвва робот да дејилдиләр. Аллаһ онлара гәрар гәбул етмәк габилијјәти, башга сөзлә десәк, ирадә азадлығы кими еҹазкар бир һәдијјә бәхш етмишди. Лакин бу ҝөзәл һәдијјәдән даима истифадә етмәк үчүн илк киши илә гадын Аллаһын ганунларына еһтирамла јанашмалы идиләр.
2 Мисал үчүн Аллаһын јаратдығы физики ганунлары ҝөтүрәк. Бу ганунлары јазылы шәкилдә вермәјә һеч лүзум јох иди. Адәмлә Һәвва елә јарадылмышдылар ки, физики ганунлара табе олмаг онлар үчүн тәбии иди. Аҹлыг һисси онлара хәбәр верирди ки, јемәк лазымдыр. Сусузлајанда су ичирдиләр. Ҝүнәш батанда јатмаг вахты ҝәлдијини анлајырдылар. Јеһова онлара иш дә тапшырмышды. Бу тапшырыг өз-өзлүјүндә бир ганун иди, белә ки, онларын фәалијјәтини истигамәтләндирирди. Адәмлә Һәвва дүнјаја ушаг ҝәтирмәли, бүтүн ҹанлы аләмин үзәриндә һөкмранлыг етмәли, јер үзүнү бүрүјәнәдәк Ҹәннәтин сәрһәдләрини ҝенишләндирмәли идиләр (Јарадылыш 1:28; 2:15). Бу неҹә дә ҝөзәл вә фајдалы бир ганун иди! Һәмин ганунун сајәсиндә Адәмлә Һәвванын мәмнунлуг ҝәтирән иши варды. Бу иш онлара бүтүн камил баҹарыгларындан сәмәрә илә истифадә етмәјә имкан јарадырды. Һәмчинин онлар верилмиш тапшырығын јеринә јетирилмәси илә бағлы гәрарлар гәбул етмәкдә сәрбәст идиләр. Инсана бундан артыг нә лазымдыр ки?!
3. Адәмлә Һәвва ирадә азадлығындан һикмәтлә истифадә етмәји неҹә өјрәнә биләрдиләр?
3 Әлбәттә, Адәмлә Һәвванын сәрбәст гәрар гәбул етмәк имканларынын олмасы һеч дә онларын һәр бир гәрарынын јахшы нәтиҹә верәҹәјини билдирмирди. Бу сәрбәстлик Аллаһын ганун вә принсипләри чәрчивәсиндән кәнара чыхмамалы иди. Бәс Адәмлә Һәвва онлары неҹә өјрәнә биләрдиләр? Јарадана гулаг асыб Онун ишләрини диггәтлә мүшаһидә етмәклә. Аллаһ Адәмлә Һәвваја ағыл бәхш етмишди вә онлар бунун сајәсиндә өјрәндикләрини һәјатда тәтбиг едә биләрдиләр. Камил олдугларындан, гәрар гәбул едәндә Аллаһын кејфијјәтләрини әкс етдирмәк онлар үчүн тәбии иди. Адәмлә Һәвва Аллаһын онлар үчүн нәләр етдијини гијмәтләндириб даима үрәјини севиндирмәк истәсәјдиләр, һәмишә Ону тәглид етмәјә чалышаҹагдылар (Јарадылыш 1:26, 27; Јәһја 8:29).
4. а) Јалныз бир ағаҹын мејвәсиндән јемәмәк әмри Адәмлә Һәвванын азадлығыны мәһдудлашдырырдымы? б) Аллаһын тәләбинин әдаләтли олдуғу нәдән ҝөрүнүр?
4 Аллаһ тамамилә һаглы олараг, Адәмлә Һәвванын Она бир Јарадан кими бәсләдији сәдагәти вә гојдуғу чәрчивә дахилиндә галыб-галмајаҹағыны јохламаг гәрарына ҝәлди. Бу сәбәбдән Јеһова Адәмә әмр етди: «Бағдакы бүтүн ағаҹларын бәһрәсиндән истәјәндә јејә биләрсән. Анҹаг хејирлә шәри билмә ағаҹынын мејвәсиндән јемә, чүнки ондан јејән ҝүн һөкмән өләҹәксән» (Јарадылыш 2:16, 17). Һәвва јарадыландан сонра бу ганун она да чатдырылды (Јарадылыш 3:2, 3). Бәс бу мәһдудијјәт онлары азадлыгдан мәһрум етмирди? Әсла јох. Һәмин о ағаҹын мејвәсиндән башга, үрәкләри истәдикләри бүтүн мејвәләри јејә биләрдиләр (Јарадылыш 2:8, 9). Онлар гәбул етмәли идиләр ки, Аллаһ Јарадан олдуғу үчүн јер Она мәхсусдур вә Онун ганун вермәк һүгугу вар. Аллаһын ганунлары Онун нијјәтинә мүвафигдир вә инсанларын хејринәдир (Мәзмур 24:1, 10).
5. а) Адәмлә Һәвва еҹазкар азадлыгларыны неҹә итирдиләр? б) Адәмлә Һәвванын азадлығынын јерини нә тутду вә бунун бизә һансы тәсири олду?
5 Бәс нә баш верди? Худпәсәнд нијјәтләрә ҹан атан бир мәләк, өз ирадә азадлығындан суи-истифадә едиб Шејтан, башга сөзлә десәк, «дүшмән» олду. О Һәвваны алдатды вә ону Аллаһын ирадәсинә зидд чыхмаға тәһрик етди (Јарадылыш 3:4, 5). Һәвва Аллаһын ганунуну позду, Адәм дә она гошулду. Онлар ихтијарлары чатмајан бир шејә әл узатмагла еҹазкар азадлыгларындан мәһрум олдулар. Ҝүнаһ илк киши вә гадынын үзәриндә ағалыг етмәјә башлады вә нәтиҹәдә Аллаһын хәбәрдарлыг етдији кими онлар өлдүләр. Адәмлә Һәвва ҝүнаһы бүтүн ҝәләҹәк нәсилләринә мирас гојдулар вә бу, анаданҝәлмә пислијә мејлдә өзүнү бүрузә верир. Хәстәликләр, гоҹалыг вә өлүм дә ҝүнаһын нәтиҹәсидир. Шејтанын тәсири алтында даһа да ҝүҹләнән пислијә мејл нәтиҹәсиндә, ҹәмијјәтдә нифрәт, ҹинајәт, зүлм вә милјонларла инсан һәјатына сон гојан мүһарибәләр ади һала чеврилмишдир. Бу, Аллаһын башланғыҹда инсанлара бәхш етдији азадлыгдан неҹә дә фәргләнир! (Ганунун тәкрары 32:4, 5; Әјјуб 14:1, 2; Ромалылара 5:12; Вәһј 12:9).
Азадлығы һарадан тапмаг олар
6. а) Әсл азадлығы һарадан тапмаг олар? б) Иса һансы азадлыгдан данышырды?
6 Тәәҹҹүблү дејил ки, һәр јанда баш алыб ҝедән писликдән ҹана ҝәлмиш адамлар даһа ҝениш азадлыг арзусундадырлар. Белә исә әсл азадлығы һарадан тапмаг олар? Иса Мәсиһ демишди: «Әҝәр сиз Мәним сөзүмә садиг галсаныз, һәгигәтән Мәним шаҝирдләримсиниз. Сиз һәгигәти дәрк едәҹәксиниз; вә һәгигәт сизи азад едәҹәкдир» (Јәһја 8:31, 32). Бу, инсанларын рәһбәрләри вә ја бир гурулушу башгасы илә әвәз етмәклә газанмаға үмид етдикләри азадлыг дејил. Иса бүтүн проблемләрин көкү олан ҝүнаһын көләлијиндән гуртулмагдан данышырды (Јәһја 8:24, 34-36, И–93). Беләликлә әҝәр инсан Иса Мәсиһин шаҝирди олурса, онун һәјатында ҝөзәчарпан дәјишикликләр баш верир. О әсл азадлыға говушур!
7. а) Биз һансы мәнада артыг инди ҝүнаһдан азад ола биләрик? б) Бу ҹүр азадлыға саһиб олмаг үчүн нә етмәлијик?
7 Бу о демәк дејил ки, һәгиги мәсиһчиләрдә ҝүнаһа анаданҝәлмә мејл јох олур. Онлар ҝүнаһы мирас алдыглары үчүн, һәлә дә онунла мүбаризә апарырлар (Ромалылара 7:21-25). Лакин өз һәјатында Исанын тәлимләрини рәһбәр тутан инсан даһа ҝүнаһын гулу олмур. Артыг ҝүнаһ адам үчүн, әмрләринә сөзсүз әмәл едилән ағаја чеврилмир. Инсан мәнасыз вә виҹданы ләкәләјән һәјат тәрзинин әсарәтиндән јаха гуртарыр. Аллаһын гаршысында онун виҹданы тәмизләнир, чүнки кечмишдә ишләтдији ҝүнаһлар Исанын фидијә гурбанлығына ҝәтирдији иман сајәсиндә бағышланыр. Һәрчәнд ҝүнаһа мејл өзүнү билдирир, лакин Мәсиһин тәмиз тәлимләрини јадда сахлајараг тәслим олмајан адам ҝөстәрир ки, артыг ҝүнаһ онун ағасы дејил (Ромалылара 6:12-17).
8. а) Һәгиги мәсиһчиләрин неҹә азадлығы вар? б) Биз һаким даирәләрә неҹә мүнасибәт бәсләмәлијик?
8 Бир мәсиһчи кими алдығымыз азадлығын үзәриндә дүшүнәк. Биз јалан тәлимләрин тәсириндән, мөвһумат вә ҝүнаһын әсарәтиндән азадыг. Өлүләрин вәзијјәти вә дирилмә һаггындакы билик бизи өлүм гаршысында горхудан тамамилә азад едир. Аллаһын салеһ Падшаһлығынын гејри-камил инсан һакимијјәтләрини әвәз едәҹәјини билмәјимиз бизи үмидсизликдән гуртарыр (Даниел 2:44; Матта 6:10). Амма бу азадлыг бизә һаким даирәләрә вә онларын гојдуглары ганунлара һөрмәтсиз јанашмаг һүгугу вермир (Титуса 3:1, 2; 1 Петер 2:16, 17).
9. а) Јеһова һал-һазырда мүмкүн олан ән ҝениш азадлыгдан бизим истифадә етмәјимизә севә-севә неҹә көмәк едир? б) Биз мүдрик гәрарлары неҹә гәбул едә биләрик?
9 Јеһова Аллаһ истәмир ки, биз ән јахшы һәјат јолуну сәһвләр бураха-бураха тапаг. О гурулушумузу, нәјин бизә һәгиги мәмнунлуг вә әбәди фајда ҝәтирәҹәјини јахшы билир. Аллаһ билир ки, һансы дүшүнҹәләр вә әмәлләр инсанын Онунла вә диҝәр адамларла мүнасибәтини корлаја вә һәтта јени дүнјаја ачылан гапыны үзүнә бағлаја биләр. Јеһова Мүгәддәс Китаб вә Өзүнүн ҝөрүнән тәшкилаты васитәсилә бизи бу һагда севә-севә хәбәрдар едир (Марк 13:10; Галатијалылара 5:19-23; 1 Тимотејә 1:12, 13). Бунлара риајәт едиб-етмәмәк өзүмүздән асылыдыр, чүнки Аллаһ бизә ирадә азадлығы бәхш етмишдир. Мүгәддәс Китабда дејиләнләри үрәкдән гәбул етмишиксә, Адәмдән фәргли олараг мүдрик гәрарлар верәҹәјик. Ашкар ҝөрүнәҹәк ки, бизим үчүн Јеһова илә јахшы мүнасибәтдә олмагдан мүһүм һеч нә јохдур.
Башга нөв азадлыг арзусу
10. Јеһованын Шаһидләриндән бәзиләри һансы нөв азадлыға ҹан атырлар?
10 Бәзи ҝәнҹ вә һәтта ҝәнҹлик илләри артыг архада галмыш Јеһованын Шаһидләриндә арабир башга нөв азадлыг арзусу баш галдыра биләр. Ола билсин дүнја онлара ҹазибәдар ҝөрүнүр вә бу һагда чох дүшүндүкҹә инди ҝениш јајылмыш, лакин мәсиһчијә јарашмајан ишләрә һәвәс бир о гәдәр ҝүҹләнир. Чох еһтимал бу мәсиһчиләр наркотик маддәләр гәбул етмәк, сәрхошлуг вә әхлагсызлыгла мәшғул олмаг фикриндә дејилләр. Анҹаг онлар һәгиги мәсиһчи олмајанларла үнсијјәт гурур вә бу адамларын һөрмәтини газанмаг истәјирләр. Белә мәсиһчиләр һәтта онларын данышыг вә һәрәкәт тәрзини јамсылаја да биләрләр (3 Јәһја 11).
11. Мәсиһчини пис иш ҝөрмәјә бәзән кимләр ширникләндирә биләр?
11 Бәзән өзләрини Јеһованын хидмәтчиси кими гәләмә верәнләр, мәсиһчини Аллаһа мәгбул олмајан ишләрә гошулмаға ширникләндирә биләрләр. Еркән мәсиһчиләрин бәзиләрилә дә бу баш вермишди вә бизим дөврдә дә белә ола биләр. Чох вахт белә адамлар Аллаһын ганунуна зидд олан ишләрә мејл салырлар, чүнки бу ишләрдән һәзз алаҹагларыны дүшүнүрләр. Онлар башгаларыны «әјләнмәјә» дәвәт едиб, «азадлыг вәд едирләр, һалбуки өзләри позғунлуғун көләсидирләр» (2 Петер 2:19).
12. Аллаһын ганунларына вә принсипләринә зидд әмәлләрин агибәти неҹә олур?
12 Бу ҹүр «азадлығын» нәтиҹәси һәмишә ағыр олур, чүнки инсан Аллаһын ганунларыны позур. Мәсәлән, никаһдан кәнар ҹинси јахынлығын нәтиҹәси виҹдан әзабы, хәстәлик, өлүм, арзуедилмәз һамиләлик вә никаһын позулмасы ола биләр (1 Коринфлиләрә 6:18; 1 Салониклиләрә 4:3-8). Наркотик маддәләрдән суи-истифадә етмәјин нәтиҹәсиндә әсәбилик, башҝиҹәлләнмә, тәнҝәнәфәслик, гарабасма јараныр, һәмчинин адамын дили топуг чалыр вә ҝөзләри зәифләјир. Бу һәтта өлүмлә нәтиҹәләнә биләр. Адамда асылылыг јарана биләр вә бу һалда о наркотик маддәләр алмаға пул тапмаг үчүн ҹинајәт дә төрәдә биләр. Сәрхошлуғун да агибәти тәхминән ејнидир (Сүлејманын мәсәлләри 23:29-35). Бу ҹүр ишләрә гошуланлар азад олдугларыны дүшүнә биләрләр, лакин сонра ҝүнаһын көләсинә чеврилдикләрини баша дүшәндә артыг ҝеҹ олур. Ҝүнаһ исә чох залым ағадыр! Әҝәр биз индидән бу һагда фикирләшсәк, белә ишләрдән өзүмүзү горуја биләрик (Галатијалылара 6:7, 8).
Проблемләрин көкү
13. а) Проблемләрин көкүндә дуран еһтирас чох вахт нәјин нәтиҹәсиндә ојаныр? б) Достлуғун јахшы јахуд пис олдуғуну мүәјјән етмәк үчүн кимин бахышларыны билмәк лазымдыр? в) 13-ҹү абзасдакы суаллара ҹаваб верәндә Јеһованын нөгтеји-нәзәринә хүсуси фикир верин.
13 Ҝәлин чох вахт проблемләрин нәдән башландығы үзәриндә дүшүнәк. Мүгәддәс Китаб изаһ едир: «Һәр кәс өз еһтирасы илә апарылараг вә алданараг имтаһан олунур. Еһтирас исә бојлу галыб ҝүнаһ доғурур. Јетишән ҝүнаһ да өлүм төрәдир» (Јагуб 1:14, 15). Еһтирас нәдән ојаныр? Бејнимизә дахил олан шејләрдән. Чох вахт бу, Мүгәддәс Китаб принсипләринә риајәт етмәјәнләрлә үнсијјәтдән сонра баш верир. Әлбәттә һамы билир ки, «пис достлуг»дан узаглашмаг лазымдыр (1 Коринфлиләрә 15:33). Бәс һансы достлуғу пис сајмаг олар? Јеһова бу мәсәләјә неҹә бахыр? Нөвбәти суалларын вә ајәләрин үзәриндә дүшүнмәклә дүзҝүн ҹаваб тапа биләрик.
Бәзи адамлар халг арасында һөрмәтли сајылса да, сәнҹә, онлардан бизә јахшы дост чыхар? (Јарадылыш 34:1, 2, 18, 19).
Онларын мәсиһчијә јарашмаз сөһбәт вә зарафат етдикләрини ҝөрүрүксә, бу адамларла јахын достлуг етмәјә дәјәр? (Ефеслиләрә 5:3, 4).
Аллаһы севмәјән адамларла достлуг етсәк, Јеһова һансы һиссләри кечирәҹәк? (2 Салнамәләр 19:1, 2).
Әгидәмизи бөлүшмәјәнләрлә бир јердә ишләдијимиз вә ја охудуғумуз һалларда нә үчүн еһтијатлы олмалыјыг? (1 Петер 4:3, 4).
Телевизија верилишләри, кино, интернет, китаб, гәзет вә журналлар үнсијјәт васитәләридир. Онлардан истифадә едәндә нәдән чәкинмәлијик? (Сүлејманын мәсәлләри 3:31; Јешаја 8:19; Ефеслиләрә 4:17-19).
Дост сечимимиз Јеһоваја бизим барәмиздә нә дејир? (Мәзмур 26:1, 4, 5; 97:10).
14. Артыг индидән Аллаһын Кәламынын вердији рәһбәрлијә сәдагәтлә риајәт едәнләри һансы еҹазкар азадлыг ҝөзләјир?
14 Биз артыг Аллаһын јени дүнјасынын астанасындајыг. Аллаһын ҝөјдәки Падшаһлығы бәшәријјәти Шејтанын вә онун пис системинин тәсириндән азад едәҹәк. Итаәткар инсанлар тәдриҹән ҝүнаһын бүтүн нәтиҹәләриндән гуртулаҹаглар. О заман онларын зеһни вә бәдәни камил олаҹаг вә онлар Ҹәннәтдә әбәди јашајараг һәјатдан һәзз алаҹаглар. Ахырда бүтүн ҹанлы мәхлугларын ‘Рәббин руһуна’ мүвафиг азадлығы олаҹаг (2 Коринфлиләрә 3:17). Инди Аллаһын Кәламынын рәһбәрлијини гулагардына вуруб, бүтүн бунлары итирмәк мүдрик һәрәкәт олмазды. Ҝәлин мәсиһчи азадлығымыздан һикмәтлә истифадә едәрәк ачыг нүмајиш етдирәк ки, биз доғрудан да ‘Аллаһын өвладларынын иззәтли азадлығыны’ арзулајырыг! (Ромалылара 8:21).
Тәкрар үчүн суаллар
• Илк киши илә гадынын неҹә азадлығы вар иди? Бәс инди бәшәријјәт һансы вәзијјәтдәдир?
• Һәгиги мәсиһчиләрин һансы азадлығы вар? Бу азадлыг дүнјадакы «азадлыг»дан нә илә фәргләнир?
• «Пис достлуг»дан узаг дурмаг нә үчүн ваҹибдир? Нәјин пис олдуғуну ајырд етмәкдә Адәмдән фәргли олараг биз кимин тәрәфини тутуруг?
[46-ҹы сәһифәдәки шәкилләр]
Аллаһын Кәламы бизи хәбәрдар едир: «Алданмајын: пис достлуг јахшы әхлагы позар»