Фәсил 4
Бүтүн пејғәмбәрләрин шаһидлик етдији Шәхс
1. Ҝөјдә јашајаркән Исанын Јеһова Аллаһла һансы мүнасибәти олмушдур?
«АТА Оғулу севир вә бүтүн етдикләрини Она ҝөстәрир» (Јәһја 5:20). Оғулун, атасы Јеһова илә неҹә дә јахын мүнасибәти вар иди! Бу мүнасибәтләр онун јер үзүнә инсан кими ҝәлмәсиндән милјард илләр әввәл, јарадылдығы вахтдан башланмышдыр. О, Аллаһын ваһид Оғлудур, јәни Јеһованын шәхсән јаратдығы јеҝанә варлыгдыр. Ҝөјдә вә јердә олан бүтүн шејләр исә бу севимли илкин Оғул васитәсилә јарадылмышдыр (Колослулара 1:15, 16). О, һәмчинин Аллаһын Кәламы, јәни Аллаһын ирадәсини башгаларына чатдыран Нүмајәндә иди. Јеһованын хүсусән севдији бу Оғул, јер үзүнә Иса Мәсиһ кими ҝәлди (Сүлејманын мәсәлләри 8:22-30; Јәһја 1: 14, 18, И–93; 12:49, 50).
2. Мүгәддәс Китаб пејғәмбәрликләриндә Иса һаггында нә дәрәҹәдә әтрафлы бәһс едилир?
2 Аллаһын илкин Оғлу инсан кими мөҹүзәви сурәтдә доғулмаздан әввәл, онун һаггында чохлу пејғәмбәрликләр сөјләнилмишди. Һәвари Петер Корнелиусла сөһбәт әснасында демишди: «Бүтүн пејғәмбәрләр она шаһидлик едирләр» (Һәвариләрин ишләри 10:43). Мүгәддәс Јазыларда Исанын ролундан әтрафлы бәһс едилир. Бир мәләк һәвари Јәһјаја белә сөјләмишди: «Иса һаггындакы шәһадәт пејғәмбәрликләрин мәғзидир» (Вәһј 19:10, ЈД). Бу пејғәмбәрликләрдә Исанын Мәсиһ олдуғуна ајдын ишарә едилир, онун Аллаһын нијјәтләриндә мүхтәлиф роллары иҹра едәҹәјиндән бәһс едилирди. Бунларын һамысы бизим үчүн дәрин мәна кәсб едир.
Пејғәмбәрликләр нәји ашкар етди
3. а) Јарадылыш 3:15 ајәсиндәки илан, гадын вә иланын баласы кимләри тәмсил едир? б) Нәјә ҝөрә иланын башынын әзилмәси Јеһованын хидмәтчиләри үчүн бөјүк мараг доғурур?
3 Ән биринҹи пејғәмбәрлик Еден бағындакы үсјандан сонра сөјләнилиб. Јеһова Аллаһ илана белә демишди: «Мән сәнинлә гадын арасына, сәнин баланла онун өвлады арасына дүшмәнчилик салырам. Бу өвлад сәнин башындан вураҹаг, сән дә ону дабанындан санҹаҹагсан» (Јарадылыш 3:15). Бу пејғәмбәрлик әслиндә Шејтаны тәмсил едән илана үнванланмышды. «Гадын», сәдагәтли арвад кими Јеһоваја садиг олан сәмави тәшкилаты билдирир. Шејтанын руһуну тәзаһүр етдирәрәк, Јеһоваја вә Онун халгына гаршы чыхан бүтүн мәләкләр вә инсанлар исә иланын баласыны тәшкил едир. Иланын башынын әзилмәси Јеһоваја бөһтан атан вә бәшәријјәти олмазын бәлалара дүчар едән үсјанкар Шејтанын там мәһви демәкдир. Иланы мәғлуб едәҹәк ‘өвладын’ әсас һиссәси кимдир? Онун кимлији әсрләр боју мүгәддәс ‘сирр’ олараг галмышды (Ромалылара 14:24, 25; 16:20).
4. Исанын нәсил шәҹәрәси онун вәд едилмиш Өвлад олдуғуну мүәјјән етмәкдә неҹә көмәк едир?
4 Тәхминән 2 000 ил сонра Јеһова Аллаһ бу пејғәмбәрликлә бағлы башга тәфәррүатлары ачыглады. Аллаһ билдирди ки, Өвлад Ибраһимин нәслиндән олаҹаг (Јарадылыш 22:15-18). Өвладын онун һансы ушағындан зүһур едәҹәји илк оғуллуг һаггындан јох, Аллаһын сечиминдән асылы иди. Ибраһим Һәҹәрдән доғулмуш оғлу Исмајылы чох севсә дә, Јеһова она бәјан етди: «Әһдими... Саранын сәнә доғаҹағы Исһагла давам етдирәҹәјәм» (Јарадылыш 17:18-21). Сонрадан Јеһова бу вәдини Исһагын илки Есавла дејил, Јагубла әһд бағлајараг тәсдигләди. Јагубдан Исраилин 12 гәбиләси төрәди (Јарадылыш 28:10-14). Бир мүддәт кечәндән сонра ајдын олду ки, Өвлад Јәһуданын гәбиләсиндән, Давудун нәслиндә доғулаҹаг (Јарадылыш 49:10; 1 Салнамәләр 17:3, 4, 11-14).
5. Јердәки хидмәтинин башланғыҹында Исанын Мәсиһ олмасы нәдән ајдын олду?
5 Өвлады даһа неҹә танымаг оларды? Өвладын ҝәлишиндән тәхминән 700 ил әввәл Мүгәддәс Китабда онун Бет-Лехемдә доғулаҹағы хәбәр верилмишди. Бу пејғәмбәрликдә һәмчинин дејилирди ки, Өвлад ‘заманын башланғыҹындан’, јәни ҝөјләрдә јарандығы вахтдан мөвҹуддур (Микеја 5:2). Онун јер үзүндә Мәсиһ кими зүһур едәҹәји вахты Даниел пејғәмбәр дәгиглији илә сөјләмишди (Даниел 9:24-26). Иса мүгәддәс руһла мәсһ олунуб Јеһованын Мәсиһи олан заман, ҝөјдән Аллаһын сәси ҝәлди вә Исанын Өз оғлу олдуғуну тәсдиг етди (Матта 3:16, 17). Өвлад мүәјјән олунду! Буна ҝөрә дә Филип гәтијјәтлә демишди: «Биз Мусанын Мүгәддәс Ганунда һаггында јаздығы, пејғәмбәрләрин дә бәһс етдији... Исаны тапдыг» (Јәһја 1:45).
6. а) Исанын шаҝирдләри Лука 24:27 ајәсинә әсасән нәји баша дүшдүләр? б) Гадынын өвладынын әсас һиссәсини ким тәшкил едир вә иланын башынын әзилмәси нә демәкдир?
6 Бу вахтдан етибарән Исанын шаҝирдләри, Аллаһдан илһам алмыш Мүгәддәс Јазылардакы бир чох пејғәмбәрликләрин она аид олдуғуну дәрк етмәјә башладылар (Лука 24:27). Һәмчинин мәлум олду ки, Иса гадынын өвладынын әсас һиссәсидир вә о, иланын башыны әзәҹәк, јәни Шејтаны мәһв едәҹәк. Аллаһын бәшәријјәтә вердији бүтүн вәдләр — сәмими гәлбдән ҝөзләдијимиз һәр шеј — Исанын васитәсилә һәјата кечәҹәк (2 Коринфлиләрә 1:20).
7. Пејғәмбәрликләрдә кимдән бәһс едилдијини баша дүшәндән сонра, даһа нәји дәрк етмәк ваҹибдир?
7 Бу билик бизә неҹә тәсир ҝөстәрмәлидир? Мүгәддәс Китабда, Хиласкар вә Мәсиһ һаггындакы бу пејғәмбәрликләрин бәзиләрини охумуш бир һәбәшистанлы мәмурдан бәһс едилир. О, мүждәчи Филипдән һејрәтлә сорушмушду: «Пејғәмбәр буну кимин үчүн сөјләјир?» Мәмур јалныз ҹаваб алмагла гәнаәтләнмәди. Филипин изаһатыны диггәтлә динләдикдән сонра о анлады ки, јеринә јетмиш бу пејғәмбәрлијин дәрин мәнасыны дәрк едән адам нә исә етмәлидир. О баша дүшдү ки, мүтләг вәфтиз олунмалыдыр (Һәвариләрин ишләри 8:32-38; Јешаја 53:3-9). Бәс биздә белә истәк вармы?
8. а) Ибраһимин Исһагы гурбан ҝәтирмәјә һазыр олмасы нәјә ишарә едирди? б) Јеһова нә үчүн Ибраһимә бүтүн милләтләрин онун нәслинин васитәсилә хејир-дуа алаҹағыны деди вә бунун бизә һансы аидијјәти вар?
8 Һәмчинин Ибраһимин Сарадан доғулмуш јеҝанә оғлу Исһагы гурбан ҝәтирмәјә һазыр олмасы һаггындакы үрәји риггәтә ҝәтирән әһвалаты хатырлајаг (Јарадылыш 22:1-18). О әһвалат Јеһованын Өз ваһид Оғлуну гурбан ҝәтирәҹәјинә ишарә едирди: «Аллаһ дүнјаны елә севди ки, ваһид Оғлуну она верди; буну она ҝөрә етди ки, Она иман едәнләрин һеч бири һәлак олмасын, һамысынын әбәди һәјаты олсун» (Јәһја 3:16). Јеһова нијјәтини һәјата кечирмәк үчүн Өз ваһид Оғлуну белә әсирҝәмәдисә, демәли галан һәр шеји бизә мәмнунијјәтлә бәхш едәҹәк (Ромалылара 8:32). Бәс биздән нә тәләб олунур? Јарадылыш 22:18 ајәсиндән бәлли олур ки, Ибраһим Јеһованын ‘сөзүнә гулаг асдығы’ үчүн бүтүн милләтләр онун нәслинин васитәсилә хејир-дуа алаҹаг. Биз дә Јеһоваја вә Онун Оғлуна гулаг асмалыјыг: «Оғула иман едәнин әбәди һәјаты вардыр; лакин Оғула итаәт етмәјән, һәјат ҝөрмәјәҹәкдир, Аллаһын гәзәби онун үзәриндә галаҹагдыр» (Јәһја 3:36).
9. Исанын фидијә гурбанлығы сајәсиндә гаршымызда ачылан әбәди һәјат үмидинә ҝөрә миннәтдарыгса, нә едәҹәјик?
9 Әҝәр биз Исанын фидијә гурбанлығынын гаршымызда ачдығы әбәди јашамаг үмидинә ҝөрә миннәтдарыгса, Јеһованын Өз Оғлу васитәсилә дедикләринә әмәл едәҹәк, јәни Аллаһы вә гоншумузу севәҹәјик (Матта 22:37-39). Иса ҝөстәрди ки, Аллаһа мәһәббәт бизи онун ‘әмр етдији һәр шејә риајәт етмәји’ башгаларына өјрәтмәјә сөвг едәҹәк (Матта 28:19, 20). Бундан әлавә, биздә Јеһованын диҝәр хидмәтчиләринә онлары севдијимизи билдирмәк истәји јаранаҹаг, буна ҝөрә дә јығынҹаг ҝөрүшләриндә мүнтәзәм иштирак едәҹәјик (Ибраниләрә 10:25; Галатијалылара 6:10). Јеһоваја вә Онун Оғлуна итаәт едәркән онларын биздән камиллик ҝөзләдијини дүшүнмәмәлијик. Ибраниләрә 4:15 ајәсиндә Исанын ‘зәифликләримиздә бизә аҹыја билән’ Баш Каһин олдуғу дејилир. Зәифликләримизин өһдәсиндән ҝәлмәк үчүн Исанын васитәсилә Аллаһдан дуада көмәк диләјәндә тәсәлли тапырыг (Матта 6:12).
Мәсиһә иман ҝәтирин
10. Нә үчүн Иса Мәсиһдән башга һеч кимдә хилас јохдур?
10 Јәһудеја Али мәһкәмәсиндә Мүгәддәс Китаб пејғәмбәрликләринин Исанын үзәриндә јеринә јетдијини изаһ етдикдән сонра һәвари Петер сөзүнә гәтијјәтлә јекун вурду: «Башга һеч кимдә хилас јохдур; чүнки сәма алтында инсанлара верилмиш башга бир ад јохдур ки, онунла хилас ола биләк» (Һәвариләрин ишләри 4:12). Адәмин бүтүн нәсли ҝүнаһлы олдуғу үчүн онларын өлүмүнүн һеч бир дәјәри јохдур вә һеч кими ҝүнаһдан гуртармаға гадир дејил. Амма Иса камил олдуғундан, онун һәјатынын хилас етмә гүввәси вар иди (Мәзмур 49:6-9; Ибраниләрә 2:9). О, Аллаһа Адәмин итирдији камил һәјата там мүвафиг фидијә тәгдим етди (1 Тимотејә 2:5, 6). Бу фидијә бизә Аллаһын јени дүнјасына апаран јолу ачды.
11. Исанын фидијә гурбанлығынын бизә нә дәрәҹәдә бөјүк фајда ҝәтирдијини изаһ ет.
11 Мәсиһин фидијә гурбанлығы артыг индидән бизә фајда ҝәтирир. Мәсәлән, ҝүнаһларын бағышланмасы сајәсиндә биз, ҝүнаһкар инсанлар виҹданымызы тәмизләјә биләрик. Тәмиз виҹдан, исраиллиләрин Мусанын ганунуна ҝөрә тәгдим етдикләри гурбанларын ҝәтирдији фајдадан гат-гат дәјәрлидир (Һәвариләрин ишләри 13:38, 39; Ибраниләрә 9:13, 14; 10:22). Лакин ҝүнаһларымызын бағышланмасы үчүн Мәсиһин фидијә гурбанлығына бөјүк еһтијаҹымыз олдуғуну дәрк етмәлијик: «Әҝәр ҝүнаһсызыг дејириксә, биз өз-өзүмүзү алдадырыг вә биздә һәгигәт јохдур. Әҝәр ҝүнаһларымызы етираф едириксә, садиг вә адил олан Аллаһ ҝүнаһларымызы бағышлајыб, бизи һәр јаманлыгдан тәмизләјәҹәкдир» (1 Јәһја 1:8, 9).
12. Аллаһын гаршысында тәмиз виҹдан газанмаг үчүн нәјә ҝөрә суда вәфтиз олунмаг лазымдыр?
12 Бәс ҝүнаһлы инсанлар Мәсиһә вә онун фидијә гурбанлығына неҹә иман ҝәтирә биләрләр? Биринҹи әсрдә иман јолуна гошуланлар буну ашкар нүмајиш етдирирдиләр. Неҹә? Вәфтиз олунмагла. Нә үчүн? Она ҝөрә ки, Иса бүтүн шаҝирдләринә вәфтиз олунмағы тапшырмышды (Матта 28:19, 20; Һәвариләрин ишләри 8:12; 18:8). Јеһованын Иса васитәсилә мәһәббәтлә вердији әнама ҝөрә үрәкдән миннәтдар олан инсан, ләнҝимәдән һәрәкәт едәҹәк. О, һәјатында лазыми дәјишикликләр едәҹәк, дуада Аллаһа һәср олунаҹаг вә суда вәфтиз олунмагла буну символизә едәҹәк. Иманын сөвг етдији бу аддымлары атмагла инсан Јеһовадан тәмиз виҹдан диләјир (1 Петер 3:21, КМ).
13. Ҝүнаһ ишләтдијимизи анладыгда нә етмәлијик вә нәјә ҝөрә?
13 Әлбәттә ҝүнаһа мејллијимиз вәфтиздән сонра да өзүнү бүрузә верәҹәк. Белә һалда нә етмәлијик? Һәвари Јәһја демишди: «Бунлары сизә она ҝөрә јазырам ки, ҝүнаһ ишләтмәјәсиниз. Әҝәр бири ҝүнаһа батса белә, Атанын јанында Мүдафиәчијә, јәни адил олан Иса Мәсиһә маликик. О Өзү ҝүнаһларымыз... үчүн әфв тәмин едән гурбандыр» (1 Јәһја 2:1, 2). Онда елә чыхыр ки, неҹә ҝүнаһ ишләдириксә ишләдәк, садәҹә дуа етсәк Аллаһ бизи бағышлајаҹаг? Әсла јох! Әфв олунмаг үчүн сидги-үрәкдән төвбә етмәк лазымдыр. Һәмчинин бизә мәсиһчи јығынҹағынын даһа тәҹрүбәли үзвләринин көмәји ҝәрәк ола биләр. Биз пис иш ҝөрдүјүмүзү етираф етмәли, үрәкдән пешманчылыг чәкмәли вә вар-гүввәмизлә бу сәһви тәкрар етмәмәјә чалышмалыјыг (Һәвариләрин ишләри 3:19; Јагуб 5:13-16). О заман биз Исанын көмәјинә вә Јеһова илә мүнасибәтләримизин бәрпа олунаҹағына әмин ола биләрик.
14. а) Исанын фидијә гурбанлығынын бизә һансы мүһүм ҹәһәтдән фајда ҝәтирдијини изаһ ет. б) Әҝәр иманымыз варса, нә едәҹәјик?
14 Исанын фидијә гурбанлығы Јарадылыш 3:15 ајәсиндә данышылан Өвладын икинҹи дәрәҹәли һиссәси, «кичик сүрү» үчүн ҝөјләр һәјатына јол ачды (Лука 12:32; Галатијалылара 3:26-29). Милјардларла инсан үчүнсә јерүзү Ҹәннәтдә әбәди јашамаға имкан јаратды (Мәзмур 37:29, КМ; Вәһј 20:11, 12; 21:3, 4). Әбәди һәјат Аллаһын Иса Мәсиһ васитәсилә вердији һәдијјәдир (Ромалылара 6:23; Ефеслиләрә 2:8-10). Әҝәр бу һәдијјәјә инаныр вә онун нәјин баһасына верилдијини гијмәтләндиририксә, онда миннәтдарлығымыз әмәлләримиздән бәлли олаҹаг. Јеһованын нијјәтләриндә Исанын ролуну вә онун нүмунәсини дәгигликлә изләмәјин нә гәдәр ваҹиб олдуғуну баша дүшсәк, биз мәсиһчи хидмәтини һәјатымызда ән мүһүм ишләрдән бири едәҹәјик. Аллаһын һејрәтамиз әнамындан гәтијјәтлә данышаркән иманымыз һамыја бәлли олаҹаг (Һәвариләрин ишләри 20:24).
15. Иса Мәсиһә олан иман һансы бирләшдириҹи гүввәјә маликдир?
15 Бу ҹүр иманын ҝүҹлү бирләшдириҹи гүввәси вар. Онун сајәсиндә Јеһова Аллаһ, Иса Мәсиһ вә јығынҹагдакы баҹы-гардашларымызла даһа да јахынлашырыг (1 Јәһја 3:23, 24). Биз чох севинирик, чүнки Јеһова мәһәббәтлә Өз Оғлуна «бүтүн адлардан [Аллаһын адындан башга] үстүн олан ады бәхш етди ки, ҝөјдә, јердә вә јерин алтында оланларын һамысы Исанын адына һөрмәтлә диз чөксүн» (Филипилиләрә 2:9, 10).
Тәкрар үчүн суаллар
• Аллаһын Кәламына һәгигәтән инананлар Мәсиһин кимлијини нә үчүн асанлыгла мүәјјән едә билдиләр?
• Исанын фидијә гурбанлығына ҝөрә миннәтдар олдуғумузу неҹә ҝөстәрә биләрик?
• Исанын фидијә гурбанлығы һансы саһәләрдә бизә фајда ҝәтириб? Јеһоваја ҝүнаһларымызын бағышланмасы үчүн дуа едәркән Исанын фидијә гурбанлығы бизә неҹә көмәк едир?
[36-ҹы сәһифәдәки шәкил]
Иса давамчыларына тапшырмышды: ‘Сизә әмр етдијим һәр шејә риајәт етмәји инсанлара өјрәдин’