Фәсил 8
Пис руһи гүввәләрә гаршы мүбаризә
1. Пис руһларын фәалијјәти бизи нә үчүн марагландырмалыдыр?
БИР ЧОХЛАРЫНА пис руһларын мөвҹуд олмасы фикри ҝүлмәли ҝөрүнүр. Амма онлар әбәс јерә ҝүлүрләр. Адамлар инансалар да, инанмасалар да пис руһлар вар вә һәр кәсә тәсир ҝөстәрмәјә чалышырлар. Јеһованын хидмәтчиләри дә истисна дејилләр. Әксинә, онлар пис руһлар үчүн әсас һәдәфдирләр. Һәвари Павел бизи хәбәрдар едир: «Мүбаризәмиз ган вә әтә гаршы дејилдир, анҹаг [ҝөзәҝөрүнмәз] рәјасәтләрә, һакимијјәтләрә, бу гаранлыг дүнјанын һөкмранларына, јәни сәмави аләмдә олан пис руһи гүввәләрә гаршыдыр» (Ефеслиләрә 6:12). Бизим ҝүнләрдә пис руһларын тәзјиги хүсусилә шиддәтлидир, чүнки Шејтан артыг ҝөјләрдән јерә атылмышдыр вә вахтынын аз галдығындан чох гәзәблидир (Вәһј 12:12).
2. Фөвгәлбәшәр руһларла мүбаризәдә неҹә галиб ҝәлмәк олар?
2 Бәс фөвгәлбәшәр руһи гүввәләрлә мүбаризәдә галиб ҝәлмәк олармы? Олар, бу шәртлә ки, Јеһоваја там архаланмалыјыг. Биз Она гулаг асмалы вә Кәламына итаәт етмәлијик. Бу јолла биз, Шејтанын тәсири алтында оланларын чәкдији физики, емосионал вә әхлаги зәрәрдән даһа чох мүдафиә олунуруг (Јагуб 4:7).
Бу дүнјанын сәмави аләмдәки һөкмранлары
3. Шејтан кимә вә һансы јолла амансыз мүгавимәт ҝөстәрир?
3 Јеһова дүнјанын вәзијјәтини ҝөјдәки әлверишли мөвгејиндән ајдын ҝөрүб бизә тәсвир едир. Һәвари Јәһјаја верилән ҝөрүнтүдә Шејтан «бөјүк, гырмызы бир әждаһа» кими ҝөстәрилир. Аллаһын Хиласкар Падшаһлығы 1914-ҹү илдә ҝөјдә доғулан кими, бу әждаһа фүрсәти әлдән вермәдән ону удмаға һазыр иди. Ҹәһди баш тутмадығындан Шејтан, Падшаһлығын јердәки нүмајәндәләринә амансыз мүгавимәт ҝөстәрмәјә башлады (Вәһј 12:3, 4, 13, 17). О бу мүһарибәни һансы јолла апарыр? Адамлар арасындакы нүмајәндәләри васитәсилә.
4. Инсан һакимијјәтләринә сәлаһијјәти ким верир вә биз буну һарадан билирик?
4 Сонра Јәһјаја «һәр гәбилә, һәр халг, һәр дил вә һәр милләт үзәриндә» сәлаһијјәти олан једди башлы, он бујнузлу бир «ҹанавар» [“вәһши һејван”, ЈД] ҝөстәрилди. Вәһши һејван дүнја сијаси системини тәмсил едир. Јәһјаја билдирилди ки, ‘әждаһа [Шејтан Иблис] она өз гүввәтини, тахтыны вә бөјүк сәлаһијјәт верди’ (Вәһј 13:1, 2, 7). Бәли, инсан һакимијјәтләринин ҝүҹ вә сәлаһијјәт мәнбәји Шејтандыр. Һәвари Павелин јаздығы кими, ‘дүнјанын һөкмранлары’ әслиндә ‘сәмави аләмдә олан пис руһи гүввәләрдир’. Инсан һакимијјәтләрини мәһз онлар идарә едирләр. Јеһоваја хидмәт етмәк истәјән һәр кәс буну јахшы баша дүшмәлидир (Лука 4:5, 6).
5. Бу дүнјанын һөкмдарлары һара топлашырлар?
5 Һәрчәнд бир чох сијаси рәһбәрләр бу вә ја диҝәр динә етигад едир, лакин һеч бир милләт Аллаһын һакимијјәтинә вә Онун тәјин етдији Падшаһ Иса Мәсиһә табе олмур. Һәрә өз һакимијјәтиндән өтрү гәддарҹасына вурушур. Вәһјдә ҝөстәрилдији кими, бу ҝүн ‘ҹин руһлары’ [«ҹинләрин илһамландырдығы кәлмәләр», ЈД], бу дүнјанын һөкмдарларыны Һар-Меҝидона, «Күлл-Ихтијар Аллаһын бөјүк ҝүнүндә баш верәҹәк мүһарибәјә» топлајырлар (Вәһј 16:13, 14, 16; 19:17-19).
6. Алданыб Шејтанын системини дәстәкләмәмәк үчүн нәјә ҝөрә еһтијатлы олмаг лазымдыр?
6 Инсанлар һәр ҝүн бәшәр аиләсини парчалајан сијаси, иҹтимаи, игтисади вә дини чәкишмәләрин тәсиринә мәруз галырлар. Онлар үчүн бу чәкишмәләрдә мәнсуб олдуглары милләтин, гәбиләнин, дил групунун вә ја иҹтимаи синфин тәрәфини дилдә јахуд әмәлдә тутмаг ади һалдыр. Һәтта чәкишмәјә билаваситә ҹәлб едилмәдикләри һалларда белә, адамлар чох вахт бу вә ја диҝәр тәрәфә рәғбәт бәсләјирләр. Һансы шәхсә вә ја тәрәфә рәғбәт бәсләдикләриндән асылы олмајараг, әслиндә онлар кимин тәрәфини тутурлар? Мүгәддәс Китабда ачыг-ајдын дејилир: «Бүтүн дүнја... шәририн һакимијјәти алтындадыр» (1 Јәһја 5:19). Әксәријјәт кими алданмамаг үчүн нә етмәлијик? Бу дүнјанын чәкишмәләриндә там битәрәф галмалы вә јалныз Аллаһын Падшаһлығыны дәстәкләмәлијик (Јәһја 17:15, 16).
Шәририн мәкрли фәндләри
7. Шејтанын јалан диндән мәһарәтлә истифадә етмәси нәдән ҝөрүнүр?
7 Шејтан бүтүн дөврләрдә ҹүрбәҹүр тәгибләрлә инсанлары һәгиги ибадәтдән дөндәрмәјә чалышыб. Ејни заманда о чох мәһарәтлә һијләләр ишләдиб. Мәсәлән, бәшәријјәтин бөјүк бир гисми Аллаһа хидмәт етдијини дүшүнүр, әслиндә исә Шејтан ону јалан дин васитәсилә ҹәһаләтдә сахлајыр. Аллаһ һаггында дәгиг биликләри вә һәгигәтә гаршы севҝиләри олмадығындан, белә адамлары мүәммалы вә емосионал характерли дини ајинләр ҹәлб едир, мөҹүзәләр һејрәтә ҝәтирир (2 Салониклиләрә 2:9, 10). Ејни заманда Мүгәддәс Китаб бизи хәбәрдар едир ки, бир вахт һәгиги ибадәтдә оланлардан «бәзиләри... дөнәҹәк, јолдан чыхаран руһлара вә ҹинләрин тәлимләринә гулаг асаҹаглар» (1 Тимотејә 4:1). Бу неҹә ола биләр?
8. Јеһоваја ибадәт етмәјимизә бахмајараг, Шејтан бизи товлајыб јалан динә неҹә чәкә биләр?
8 Иблис бизим зәифликләримиздән мәкрлә истифадә едир. Инсан горхусу һәлә дә бизи пәнҹәсиндә сыхырмы? Белә олдугда биз гоһум вә гоншуларымызын тәзјиги алтына дүшүб јалан дин мәншәли мәрасимләрдә иштирак едә биләрик. Гүрурлујугму? Бу һалда бизә мәсләһәт вериләндә вә башгалары фикирләримизә шәрик чыхмајанда инҹијә биләрик (Сүлејманын мәсәлләри 15:10; 29:25; 1 Тимотејә 6:3, 4). Дүшүнҹә тәрзини дәјишиб Мәсиһин нүмунәсинә мүвафиг олмаг әвәзинә, биз садәҹә «Мүгәддәс Китабы оху, бәсиндир, тәки үрәјин тәмиз олсун» дејәрәк ‘сәсләри гулағымыза хош ҝәләнләрә’ мејл салаҹағыг (2 Тимотејә 4:3). Башга дини група гошулаҹағымызын, ја да шәхси дини тәсәввүрләримизә әсасән јашајаҹағымызын Шејтан үчүн һеч бир тәфавүтү јохдур, тәки Јеһоваја Өз Кәламы вә тәшкилаты васитәсилә ҝөстәрдији јолла ибадәт етмәјәк.
9. Шејтан инсанларын ҹинси јахынлыг истәјиндән өз мәгсәди үчүн мәкрлә неҹә истифадә едир?
9 Шејтан даһа бир һијләјә әл атыр: о, инсанлары тәбии истәкләрини јанлыш јолла тәмин етмәјә тәһрик едир. Ҹинси јахынлыг истәјини ҝөтүрәк. Дүнјада бир чохлары Мүгәддәс Китабын әхлаг нормаларыны рәдд едиб никаһда олмајанлар арасында ҹинси әлагәни нормал сајыр вә ја бунунла һәдди-бүлуға чатдыгларыны сүбут етмәк истәјирләр. Бәс никаһда оланлар һаггында нә демәк олар? Бир чох адам һәјат јолдашына хәјанәт едир. Еләләри дә вар ки, башгасы илә јашамаг үчүн һәјат јолдашындан бошанмаг вә ја ајрылмаг истәјир. Шејтанын мәгсәди, инсанларда ҝөрдүкләри ишләрин өзләринә вә башгаларына, әләлхүсус Јеһова вә Онун Оғлу илә мүнасибәтләринә неҹә тәсир ҝөстәрәҹәјинә ҝөз јумуб елә инди кеф чәкмәк арзусу ојатмагдыр (1 Коринфлиләрә 6:9, 10; Галатијалылара 6:7, 8).
10. Шејтан әхлагсызлыға вә зоракылыға гаршы бахышларымызы корламаға неҹә чалышыр?
10 Истираһәт вә әјләнҹә даһа бир тәбии истәкдир. Сәфалы истираһәт физики, әгли вә емосионал ҹәһәтдән тәравәтләндирир. Бәс Шејтан истираһәт заманы бизи мүәјјән шејләрә Аллаһын ҝөзү илә дејил, гејри-камил инсан ҝөзү илә бахмаға тәһрик едәндә өзүмүзү неҹә апарырыг? Мәсәлән, биз билирик ки, Јеһова ҹинси әхлагсызлыға вә зоракылыға нифрәт едир. Кино, телевизија верилиши вә ја театр тамашасында бу ҹүр сәһнәләр ҝөстәриләндә отуруб бахырыгмы? Унутмајаг ки, ‘дибсиз дәринликләрә’ атылаҹағы вахтын јахынлашдығыны билән Шејтан, араны даһа да гызышдырмаг үчүн вар ҝүҹү илә чалышыр. Буна ҝөрә дә «пис адамлар вә сахтакарлар... алдадыб алданараг, ҝетдикҹә даһа бетәр олаҹаглар» (2 Тимотејә 3:13; Вәһј 20:1-3). Шејтанын торуна дүшмәмәк үчүн даим ајыг олмалыјыг (Јарадылыш 6:13; Мәзмур 11:5; Ромалылара 1:24-32).
11. Һәтта спиритизм һаггында һәгигәти билән адам ајыг олмаса тәләјә неҹә дүшә биләр?
11 Јеһова һәмчинин спиритизмин һәр һансы нөвү — фалчылыг, ҹадуҝәрлик вә руһ чағырмагла мәшғул оланлардан икраһ едир (Ганунун тәкрары 18:10-12). Буну билдијимиздән руһчағыранлара мүраҹиәт етмәк вә өз шејтани баҹарыгларыны нүмајиш етдирмәк үчүн онлары евә чағырмаг һеч ағлымыза да ҝәлмәз. Бәс телевизија екранында вә ја интернетдә онлары динләјәрдикми? Биз мүалиҹә үчүн һеч вахт екстрасенсә мүраҹиәт етмәрик. Бәс хәта-бәладан, бәд нәзәрдән горунмаг үчүн үзәрлик јандырар вә ја ушаға ҝөзмунҹуғу тахарыгмы? Мүгәддәс Китабда овсунчуларын иттиһам едилдијини биләрәк һипнозчунун зеһнимизә тәсир ҝөстәрмәсинә јол верәрикми? (Галатијалылара 5:19-21).
12. а) Мусиги бизи гәбаһәтли шејләр үзәриндә дүшүнмәјә неҹә ширникдирә биләр? б) Инсанын сач дүзүмү, ҝејим вә ја данышығы, Јеһоваја мәгбул һәјат сүрмәјәнләрә пәрәстиш етдијини неҹә ҝөстәрә биләр? в) Шејтанын мәкрли фәндләринин гурбаны олмаг истәмириксә нә етмәлијик?
12 Мүгәддәс Китабда дејилир ки, ҹинси әхлагсызлығын вә һәр ҹүр натәмизлијин (пис мәгсәдлә) ады белә арамызда чәкилмәмәлидир (Ефеслиләрә 5:3-5). Бәс белә мөвзулар хош мусиги, асан јадда галан мелодија вә ја ојнаг ритмләрлә мүшајиәт едиләрсә, онда неҹә? Никаһсыз ҹинси әлагәни, наркотик маддәләри вә башга ҝүнаһ сајылан һәрәкәтләри тәрәннүм едән маһныларын сөзләрини тәкрар едәрдикми? Јахуд белә ишләрлә мәшғул олан инсанларын јашајыш тәрзини тәглид етмәјин дүзҝүн олмадығыны билә-билә сач дүзүмү, ҝејимдә вә ја данышыгда өзүмүзү онлара бәнзәдәрдикми? Инсанлары товлајыб дүшүнҹәләрини корламагла өзүнә бәнзәтмәјә чалышан Шејтанын фәндләри неҹә дә мәкрлидир! (2 Коринфлиләрә 4:3, 4). Онун мәкрли нијјәтләринин гурбаны олмамаг үчүн бу дүнјанын ахынына гошулмамалыјыг. Бу гаранлыг дүнјанын һөкмранларынын кимләр олдуғуну һеч вахт унутмамалы вә онларын тәзјигинә гәтијјәтлә синә ҝәрмәлијик (1 Петер 5:8).
Галиб ҝәлмәк үчүн јарагланмышыг
13. Гејри-камиллијимизә бахмајараг, һәр биримиз Шејтанын ағалыг етдији дүнјаја неҹә галиб ҝәлә биләрик?
13 Өлүмүндән габаг Иса шаҝирдләринә демишди: «Ҹәсур олун, мән дүнјаја галиб ҝәлдим» (Јәһја 16:33). Шаҝирдләр дә дүнјаја галиб ҝәлә биләрдиләр. Тәхминән 60 ил сонра һәвари Јәһја јазмышды: «Исанын Аллаһын Оғлу олдуғуна иман едәндән башга, дүнјаја галиб ҝәлән кимдир?» (1 Јәһја 5:5). Исанын әмрләрини јеринә јетирмәклә вә онун кими Аллаһын Кәламына етибар етмәклә биз дә белә иман саһиби олдуғумузу ҝөстәрәҹәјик. Бунун үчүн даһа нә тәләб олунур? Исанын башчылыг етдији јығынҹаға сых бағлы галмаг лазымдыр. Ҝүнаһ ишләтмишиксә, сәмими гәлбдән төвбә етмәли вә Исанын фидијә гурбанлығы әсасында Аллаһдан әфв диләмәлијик. Гејри-камиллијимизә вә сәһвләримизә бахмајараг, биз дә бу јолла галиб ҝәлә биләрик (Мәзмур 130:3, 4).
14. Ефеслиләрә 6:13-17 ајәләрини оху, суалларын вә абзасдакы ајәләрин көмәји илә руһани зиреһләрин һәр биринин ҝәтирдији фајданы нәгл ет.
14 Гәләбә чалмаг үчүн «Аллаһын бүтүн зиреһләрини» ҝөтүрмәк лазымдыр. Зәһмәт олмаса, Мүгәддәс Китабында Ефеслиләрә 6: 13-17 ајәләрини ачыб бу зиреһләрин тәсвирини оху. Сонра онларын һәр биринин бизи неҹә горудуғу үзәриндә дүшүнәрәк ашағыдакы суаллара ҹаваб вер.
‘Һәгигәт гуршағы’
Һәгигәти билсәк дә Мүгәддәс Китаб һәгигәтләрини мүнтәзәм өјрәнмәк, үзәриндә дүшүнмәк вә јығынҹаг ҝөрүшләринә ҝетмәк бизи неҹә горујур? (1 Коринфлиләрә 10:12, 13; 2 Коринфлиләрә 13:5; Филипилиләрә 4:8, 9).
‘Салеһлик зиреһи’
Салеһлик нормаларыны ким тәјин едир? (Вәһј 15:3).
Јеһованын салеһлик јолларындан азмаг адамын руһанилијинә неҹә зәрәр ҝәтирир? Изаһ ет (Ганунун тәкрары 7:3, 4; 1 Шамуел 15:22, 23).
‘Сүлһ Мүждәсини тәблиғ етмәјә һазыр ајаглар’
Аллаһын сүлһә апаран ишләрини инсанлара данышмагла фәал мәшғул олмағымыз бизи неҹә горујур? (Мәзмур 73:2, 3; Ромалылара 10:15; 1 Тимотејә 5:13).
‘Иман галханы’
Иманымызын тәмәли мөһкәмдирсә, башгаларынын үрәјимизә шүбһә јахуд горху салмаг ҹәһдләринә неҹә мүнасибәт ҝөстәрәҹәјик? (2 Падшаһлар 6:15-17; 2 Тимотејә 1:12).
‘Хилас дәбилгәси’
Хилас үмиди мадди немәтләр барәдә һәддиндән артыг нараһат олмамаға неҹә көмәк едир? (1 Тимотејә 6:7-10, 19).
‘Руһун гылынҹы’
Өзүмүзүн вә башгаларынын руһанилијинә хәләл ҝәтирән шејләрлә мүбаризәдә нәјә архаланмалыјыг? (Мәзмур 119:98; Сүлејманын мәсәлләри 3:5, 6; Матта 4:3, 4).
Руһани мүһарибәдә мүвәффәгијјәт газанмаг үчүн даһа нә лазымдыр? Буну «һәр вахт» неҹә едә биләрик? Кимләри унутмамалыјыг? (Ефеслиләрә 6:18, 19).
15. Руһани мүһарибәдә һүҹума неҹә кечә биләрик?
15 Биз Мәсиһин бөјүк ордусунун әсҝәрләријик вә руһани мүһарибәдә иштирак едирик. Ајыг олуб, Аллаһын тәгдим етдији зиреһләрин һамысындан дүзҝүн истифадә етсәк бу мүһарибәдә һәлак олмарыг. Әксинә, бизимлә бирҝә Аллаһа хидмәт едәнләрә дајаг оларыг. Шејтанын һиддәтлә мүгавимәт ҝөстәрдији сәмави һакимијјәт — Аллаһын Хиласкар Падшаһлығы һаггындакы хош хәбәри башгалары илә бөлүшмәклә һәмишә һүҹума кечмәјә һазыр олаҹағыг.
Тәкрар үчүн суаллар
• Јеһоваја ибадәт едәнләр бу дүнјадакы чәкишмәләрдә нә үчүн там битәрәфдирләр?
• Мәсиһчиләрә руһани зәрәр вурмаг үчүн Шејтанын ишләтдији бәзи мәкрли фәндләр һансылардыр?
• Аллаһын тәгдим етдији руһани зиреһләр бизи руһани мүһарибәдә неҹә горујур?
[76-ҹы сәһифәдәки шәкил]
Бу дүнјанын милләтләри Һар-Меҝидона јығышыр