Фәсил 7
Аллаһын пислијә јол вермәсиндән нә өјрәнирик
1, 2. а) Јеһова Едендәки үсјанкарлары дәрһал мәһв етсәјди бизим талејимиз неҹә оларды? б) Јеһова биздән өтрү мәһәббәтлә һансы тәдбири ҝөрүб?
ГӘБИЛӘ башчысы Јагуб белә демишди: «Өмрүм аз вә ағыр олду» (Јарадылыш 47:9). Әјјуб да буна охшар фикир сөјләмишди: «Инсанын өмрү аздыр, һәјаты сыхынты илә долудур» (Әјјуб 14:1). Бизләрдән дә чохумуз чәтинликләр, һагсызлыг вә һәтта фаҹиәли һалларла үзләшмишик. Лакин дүнјаја ҝәлишимизи Аллаһ тәрәфиндән һагсызлыг адландырмаг олмаз. Доғрудур, бизим бәдәнимиз вә зеһнимиз камил дејил, һәм дә Адәмлә Һәвванын јашадығы кими Ҹәннәтдә јашамырыг. Бәс илк инсанлар гијам галдыран кими Јеһова онлары мәһв етсәјди нә оларды? О заман хәстәлик, кәдәр вә өлүм олмазды, анҹаг инсан нәсли дә олмајаҹагды. Биз һеч вахт дүнјаја ҝәлмәздик. Аллаһ Өз мәрһәмәтиндән ирәли ҝәләрәк, Адәмлә Һәвванын дүнјаја өвлад ҝәтирмәсинә иҹазә верди, һәрчәнд бу ушаглар гејри-камил доғулурдулар. Бунунла јанашы, Јеһова тәдбир ҝөрдү ки, Адәмин итирдијини, јәни јердәки Ҹәннәтдә әбәди һәјаты Мәсиһ васитәсилә бизә гајтарсын (Јәһја 10:10; Ромалылара 5:12).
2 Ҹәннәт шәраитли јени дүнјада хәстәлик, кәдәр, ағры, өлүм, һәмчинин пис адамлар олмајаҹаг. Орада әбәди јашамаг үмиди бизә неҹә дә үрәк-дирәк верир! (Сүлејманын мәсәлләри 2:21, 22; Вәһј 21:4, 5). Мүгәддәс Китаб тәлимләринә әсасән, хиласымыз бизә вә Јеһоваја чох ваҹиб олса да, өндә бундан даһа мүһүм бир мәсәләнин һәлли дурур.
Бөјүк ады наминә
3. Јеһованын јер үзү вә бәшәријјәтлә бағлы нијјәтинин иҹрасы нә илә бирбаша әлагәдардыр?
3 Аллаһын ады Онун јер үзү вә бәшәријјәтлә бағлы нијјәтинин иҹрасы илә бирбаша әлагәдардыр. Јеһова ады «олмасына сәбәб Олан» мәнасыны дашыјыр вә өз саһибини Каинатын Һөкмдары, бөјүк нијјәтләр вә һәгигәт Аллаһы кими характеризә едир. Јеһова белә јүксәк мөвге тутдуғу үчүн Каинатда сүлһ вә әмин-аманлыг наминә һамы Она итаәт етмәли вә Онун адына, һәмчинин бу адла бағлы һәр шејә дәрин еһтирам бәсләмәлидир.
4. Јеһованын јерлә әлагәдар нијјәти нәдән ибарәт иди?
4 Јеһова Адәмлә Һәвваны јаратдыгдан сонра онлара тапшырыг верди. Аллаһ ачыг-ајдын билдирди ки, онлар Ҹәннәтин сәрһәдләрини ҝенишләндириб јер үзүнә саһиб олмалыдырлар. Лакин Онун нијјәти бунунла битмирди. Бүтүн јер үзүнү инсан нәсли бүрүмәли иди (Јарадылыш 1:28). Бәс ҝүнаһ Аллаһын нијјәтинин һәјата кечмәсинә мане ола биләрдими? Күлл-Ихтијар Јеһова јер үзү вә бәшәријјәтлә бағлы нијјәтини һәјата кечирә билмәсәјди, Онун уҹа ады неҹә дә рүсвај оларды!
5. а) Илк инсанлар хејирлә шәри билмә ағаҹынын мејвәсиндән једикләри тәгдирдә нә вахт өлмәли идиләр? б) Јеһова јерлә әлагәдар нијјәтини дәјишмәдән, Јарадылыш 2:17 ајәсиндәки сөзләрини неҹә јеринә јетирди?
5 Јеһова Адәмлә Һәвваны хәбәрдар етди ки, әҝәр онлар итаәтсизлик ҝөстәриб хејирлә шәри билмә ағаҹынын мејвәсиндән јесәләр, һәмин «ҝүн» өләҹәкләр (Јарадылыш 2:17). Јеһова сөзүнүн үстүндә дурараг ҝүнаһ ишләтдикләри ҝүн онлары мәсулијјәтә чағырды вә өлүмә мәһкум етди. Аллаһын ҝөзүндә Адәмлә Һәвва мәһз һәмин ҝүн өлдүләр. Анҹаг јерлә бағлы нијјәтини һәјата кечирмәк үчүн Јеһова иҹазә верди ки, физики ҹәһәтдән өлмәмишдән габаг онларын өвладлары олсун. Аллаһ үчүн мин ил бир ҝүн кими ола биләр. Белә ҝөтүрсәк, Адәм 930 ил өмүр сүрүб һәмин «ҝүн» өлдү (2 Петер 3:8; Јарадылыш 5:3-5). Беләликлә ҹәзанын нә вахт иҹра олунмасы илә әлагәдар Јеһованын сөзләри дүз чыхды. Ејни заманда, инсанларын өлүмү Аллаһын нијјәтинә манечилик төрәдә билмәди вә гејри-камил инсанлара, писләр дә дахил олмаг шәртилә, бир мүддәт јашамаға иҹазә верилди.
6, 7. а) Чыхыш 9:15, 16 ајәләринә әсасән, Јеһова писләрин бир мүддәт мөвҹуд олмасына нә үчүн изин верир? б) Јеһова фирона Өз ҝүҹүнү неҹә ҝөстәрди вә Онун ады неҹә мәшһурлашды? в) Бу пис системин агибәти неҹә олаҹаг?
6 Мусанын ҝүнләриндә Јеһованын Мисир һөкмдарына дедији сөзләр, Аллаһын писләрин мөвҹуд олмасына нә үчүн изин вердијинин сәбәбини анламаға көмәк едир. Фирон исраиллиләри Мисирдән бурахмаг истәмәјәндә Јеһова ону дәрһал өлдүрмәди. О, ҝүҹүнү һејрәтамиз шәкилдә нүмајиш етдирәрәк Мисир торпағына он бәла ҝөндәрди. Јеһова фирону једдинҹи бәладан хәбәрдар едәндә деди ки, ону вә халгыны бир ҝөз гырпымында мәһв едә биләрди. Сонра әлавә етди: «Амма она ҝөрә сәни горујуб сахладым ки, Өз ҝүҹүмү сәнә ҝөстәрим вә адым бүтүн дүнјаја елан едилсин» (Чыхыш 9:15, 16).
7 Јеһова исраиллиләри азад етдикдән сонра Онун ады чох мәшһурлашды (Јешуа 2:1, 9-11). Үстүндән 3500 ил кечмәсинә бахмајараг, о әзәмәтли һадисә бу ҝүнәдәк унудулмајыб. О вахт јалныз Јеһова ады дејил, һәм дә бу адын Саһиби һаггында һәгигәт елан едилди. Мәлум олду ки, Јеһова бүтүн вәдләрини јеринә јетирән вә Өз хидмәтчиләрини мүдафиә едән Аллаһдыр (Јешуа 23:14). Бу һәм дә сүбут етди ки, Күлл-Ихтијар олдуғу үчүн нијјәтләрини һәјата кечирмәкдә Она һеч нә мане ола билмәз (Јешаја 14:24, 27). Бу сәбәбдән әмин ола биләрик ки, О тезликлә Өз садиг хидмәтчиләринин мүдафиәсинә галхаҹаг вә Шејтанын натәмиз системини бүсбүтүн мәһв едәҹәк. Јеһованын әзәмәтли ҝүҹүнүн белә тәзаһүрү вә адына ҝәтирәҹәји иззәт һеч вахт јаддан чыхмајаҹаг. Бу, Аллаһын бүтүн садиг хидмәтчиләринә әбәди фајда ҝәтирәҹәк (Језекел 38:23; Вәһј 19:1, 2).
‘Еј Аллаһын һикмәтинин дәринлији!’
8. Павел бизи нәјин үзәриндә дүшүнмәјә сәсләјир?
8 Ромалылара јаздығы мәктубунда һәвари Павел белә бир суал галдырыр: «Мәҝәр Аллаһын јанында һагсызлыгмы вар?» Өзү дә гәтијјәтлә ҹаваб верир: «Әсла!» Сонра о, Аллаһын мәрһәмәтини вурғулајыр вә Јеһованын фирону нә үчүн дәрһал мәһв етмәдијини ачыглајан сөзләрини тәкрар едир. Павел һәм дә дејир ки, биз, адамлар дулусчунун әлиндәки ҝилә бәнзәјирик. О давам едир: «Әҝәр Аллаһ, гәзәбини ҝөстәрмәк вә гүдрәтини билдирмәк истәјәрәк, һәлак үчүн һазырланмыш, гәзәбинә уғрајаҹаг габлара чох сәбирлә тәһәммүл етдисә, вә әввәлҹәдән иззәт үчүн һазырладығы, мәрһәмәт тапан габлара иззәтинин зәнҝинлијини билдирмәк үчүн белә етдисә, нә олар? Јалныз јәһудиләрдән дејил, диҝәр халглардан да дәвәт етдији о габлар бизик» (Ромалылара 9:14-24).
9. а) ‘Һәлак үчүн һазырланмыш, гәзәбә уғрајаҹаг габлар’ кимләри тәмсил едир? б) Јеһова нәјә ҝөрә дүшмәнләринә гаршы чох бөјүк сәбир нүмајиш етдирир вә һадисәләр ахырда Ону севәнләрин хејринә неҹә гуртараҹаг?
9 Едендәки үсјандан бу јана Јеһоваја вә Онун ганунларына зидд ҝедәнләр ‘һәлак үчүн һазырланмыш, гәзәбә уғрајаҹаг габлар’ олурлар. Бүтүн бу вахт әрзиндә Јеһова чох бөјүк сәбир тәзаһүр етдирмишдир. Пис адамлар Аллаһын ҝөстәрдији јоллара ришхәнд етмиш, Онун хидмәтчиләрини тәгиб етмиш вә һәтта Оғлуну өлдүрмүшләр. Јеһова мисилсиз тәмкинлик нүмајиш етдирәрәк кифајәт гәдәр вахт ајырды ки, бүтүн шүурлу варлыглар Аллаһа гаршы едилмиш үсјанын вә Ондан мүстәгил инсан һакимијјәтинин фаҹиәли нәтиҹәләрини ҝөрсүнләр. Һәмчинин О тәдбир ҝөрдү ки, Исанын өлүмү итаәткар адамларын хиласына јол ачсын вә «иблисин әмәлләрини пуч етсин» (1 Јәһја 3:8; Ибраниләрә 2:14, 15).
10. Јеһова сон 1 900 ил әрзиндә писләрә нә үчүн дөзүр?
10 Исанын дирилмәсиндән 1 900 илдән артыг вахт кечмишдир, амма Јеһова ‘гәзәбә уғрајаҹаг габлара’ һәлә дә дөзүр вә онлары мәһв етмир. Нәјә ҝөрә? Биринҹиси О, Иса Мәсиһин сәмави Падшаһлыгдакы һакимијјәт шәрикләрини — сәмави синфи һазырлајыр. Онларын сајы ҹәми 144 000 нәфәрдир вә онлар һәвари Павелин дедији ‘мәрһәмәт тапан габлардыр’. Бу сәмави синфин илк нүмајәндәләри јәһудиләр олмушдур. Сонрадан Аллаһ диҝәр халглардан да инсанлары онларын сырасына дәвәт етмишди. Јеһова һеч кәси Онун хидмәтчиси олмаға мәҹбур етмәјиб. О севҝи долу тәдбирләринә ҝөрә миннәтдар оланларын бир гисминә Өз Оғлу илә сәмави Падшаһлыгда һакимијјәт сүрмәк имканыны бәхш едиб. Бу сәмави синиф демәк олар ки, артыг һазырдыр (Лука 22:29; Вәһј 14:1-4).
11. а) Аллаһын бөјүк сәбри инди кимин хејринәдир? б) Өлүләри нә ҝөзләјир?
11 Бәс јердә кимсә јашајаҹагмы? Јеһова Аллаһын бөјүк сәбри сајәсиндә бу ҝүн бүтүн милләтләрдән бөјүк издиһам јығылыр. Һал-һазырда бу адамларын сајы артыг бир нечә милјондур. Аллаһ вәд едиб ки, јердә јашамаға үмид едәнләр бу системдән сағ чыхаҹаг вә јерүзү Ҹәннәтдә әбәди јашајаҹаглар (Вәһј 7:9, 10; Мәзмур 37:29; Јәһја 10:16). Аллаһын тәјин етдији вахтда, өлмүш сајсыз-һесабсыз адамлар дириләҹәк вә онлара да сәмави Падшаһлығын јердәки тәбәәләри олмаг имканы вериләҹәк. Аллаһын Кәламында охујуруг: «Һәм салеһ, һәм дә салеһ олмајан өлүләрин дирилмәси олаҹагдыр» (Һәвариләрин ишләри 24:15; Јәһја 5:28, 29).
12. а) Пислијин мөвҹудлуғуна мүвәггәти јол вермәсиндән Јеһова һаггында нә өјрәнирик? б) Јеһованын мүбаһисәли мәсәләни белә јолла һәлл етмәси һаггында нә дүшүнүрсән?
12 Сәнҹә, бүтүн бунларда бир һагсызлыг вармы? Хејр, чүнки ‘гәзәбә уғрајаҹаг габлары’, башга сөзлә писләри мәһв етмәјә тәләсмәмәклә, Јеһова башгаларына шәфгәт ҝөстәрир вә нијјәтини һәјата кечирир. Бүтүн бунлар Јеһованын нә гәдәр мәрһәмәтли вә севән Аллаһ олдуғуну ҝөстәрир. Һәмчинин Аллаһын нијјәтинин тәдриҹән неҹә јеринә јетдијини ҝөрдүкҹә Онун Өзү һагда даһа чох өјрәнирик. Биз Јеһованын шәхсијјәтинин мүхтәлиф тәрәфләринә — әдаләтинә, мәрһәмәтинә, бөјүк сәбринә, чохшахәли һикмәтинә һејран галырыг. Јеһованын Каинатда һөкмранлыгла бағлы мүбаһисәли мәсәләнин, јәни Өзүнүн һөкмранлыг етмәк һүгугу мәсәләсинин һәллинә бөјүк һикмәтлә јанашмасы Онун идарә тәрзиндән јахшысынын олмадығына әбәдијјәт боју шәһадәт едәҹәк. Биз һәвари Павелин сөзләринә шәрикик: «Еј Аллаһын зәнҝинлик вә һикмәт вә елминин дәринлији! Онун һөкмләри нә дәрәҹәдә ағласығмаз вә Онун јоллары нә дәрәҹәдә кәшфедилмәздир!» (Ромалылара 11:33).
Сәдагәтимизи ҝөстәрмәк имканы
13. Чәтинликләр бизим үчүн һансы фүрсәт јарадыр вә мүдрик давранмаға бизә нә көмәк едир?
13 Аллаһын хидмәтчиләриндән чохлары мүхтәлиф әзијјәтләрә гатлашмалы олурлар. Әзаб-әзијјәт индијәдәк давам едир, чүнки Аллаһ писләри мәһв едәрәк бәшәријјәти әввәлҹәдән вәд етдији камиллијә һәлә чатдырмајыб. Бәс биз буна ҝөрә сәртләшәҹәјик? Јохса белә вәзијјәтә Иблисин јаланчы олдуғуну сүбут етмәк фүрсәти кими бахаҹағыг? Әҝәр «оғлум, һикмәтли ол, гој гәлбим севинсин, онда мәни утандырана [“мәнә истеһза едәнә”, ЈД] ҹаваб верә биләрәм» чағырышыны даима јадымызда сахласаг, Иблиси ифша етмәкдә гәтијјәтли олаҹағыг (Сүлејманын мәсәлләри 27:11). Јеһова Аллаһа истеһза едән Шејтан иддиа едирди ки, инсанын вары-јоху әлиндән чыхса вә ја өзү әзаблара дүчар олса, Аллаһы ҝүнаһландыраҹаг вә һәтта Ону ләнәтләјәҹәк (Әјјуб 1:9-11; 2:4, 5). Чәтинликләрә дүшәндә Јеһоваја садиг галмагла, биз Онун үрәјини севиндирир вә сүбут едирик ки, Шејтанын бизә гаршы иттиһамлары јаландыр.
14. Сынаглар заманы Јеһоваја ҝүвәнәндә бизи һансы хејир-дуалар ҝөзләјир?
14 Сынаглар заманы Јеһова Аллаһа ҝүвәнәндә өзүмүзә гијмәтли кејфијјәтләр ашылаја биләрик. Мәсәлән, Иса Мәсиһ дә пајына дүшмүш сынаглар васитәсилә јени бир јолла «итаәтли олмағы өјрәнди». Сынаглар бизә дә чох сәбирли, дөзүмлү, Јеһованын салеһ јоллары үчүн миннәтдар олмағы өјрәдә биләр (Ибраниләрә 5:8-10; 12:11; Јагуб 1:2-4).
15. Чәтинликләрә сәбирлә дөзмәјимиз башгаларына һансы фајданы ҝәтирә биләр?
15 Давранышымыз башгаларынын ҝөзүндән јајынмајаҹаг. Онлар салеһлији севдијимизә ҝөрә чәкдијимиз әзијјәтләри ҝөрдүкдә, чох ҝүман ки, бир нечә вахтдан сонра бу ҝүн кимләрин һәгиги мәсиһчи олдуғуну дәрк едәҹәкләр. Бизимлә бир ибадәтдә бирләшмәклә онлар да әбәди һәјатын ҝәтирәҹәји хејир-дуалары ала биләрләр (Матта 25:34-36, 40, 46). Јеһова Аллаһ вә Онун Оғлу истәмирләр ки, инсанлар белә имканы әлдән бурахсынлар.
16. Чәтинликләрә мүнасибәт вә бирлик арасында һансы әлагә вар?
16 Чәтинликләрә, Јеһоваја сәдагәтимизи сүбут етмәк вә Онун ирадәсинин һәјата кечмәсиндә иштирак етмәк имканы кими јанашмағымыз чох тәгдирәлајигдир! Бунунла биз Аллаһла вә Иса Мәсиһлә бирлијә ҹан атдығымызы ҝөстәририк. Иса бүтүн һәгиги давамчыларындан өтрү Аллаһа дуа едирди: «Јалныз онлар үчүн [јахын шаҝирдләри үчүн] дејил, онларын сөзү илә мәнә иман едәҹәк оланлар үчүн дә хаһиш едирәм ки, һамысы бир олсун; неҹә ки, еј Ата, Сән мәндәсән вә мән дә Сәндәјәм, онлар да биздә олсунлар ки, мәни Сән ҝөндәрдијинә дүнја иман етсин» (Јәһја 17:20, 21).
17. Јеһова Аллаһа садиг галырыгса нәјә әмин ола биләрик?
17 Әҝәр биз Јеһова Аллаһа садиг галырыгса, О бизә боллуҹа хејир-дуа верәҹәк. Аллаһын Кәламында дејилир: «Мөһкәм, сарсылмаз олун, һәр заман Рәббин ишиндә тәрәгги един вә билин ки, Рәббин јолунда чәкдијиниз әмәк әбәс дејилдир» (1 Коринфлиләрә 15:58). Орада һәмчинин јазылыб: «Аллаһ һагсыз дејилдир ки, сизин ишинизи... Онун ады наминә ҝөстәрдијиниз мәһәббәти унутсун» (Ибраниләрә 6:10). Јагуб 5:11 ајәсиндә дејилир: «Будур, биз тәһәммүл едәнләри бәхтијар һесаб едирик: Әјјубун тәһәммүлү барәсиндә ешитмисиниз вә Рәббин ахырда нә етдијини дә ҝөрдүнүз; чүнки Рәбб чох шәфгәтли вә мәрһәмәтлидир». Әјјубун агибәти неҹә олмушду? «Рәбб Әјјубун ахыр ҝүнләрини әввәлки ҝүнләриндән даһа чох бәрәкәтли етди» (Әјјуб 42:10-16). Бәли, Јеһова ‘Ону ахтаранлара мүкафат верән’ Аллаһдыр (Ибраниләрә 11:6). Ҝөр бизи гаршыда неҹә ҝөзәл мүкафат ҝөзләјир — јер үзү Ҹәннәтдә әбәди һәјат!
18. Аҹы хатирәләр неҹә олаҹаг?
18 Аллаһын Падшаһлығы өтән минилликләр әрзиндә бәшәријјәтә дәјмиш бүтүн зијаны јох едәҹәк. Бу Падшаһлығын дөврүндә инсанларын һәдсиз-һүдудсуз севинҹи инди чәкдијимиз бүтүн әзаб-әзијјәтләрин ағрысыны һеч едәҹәк. Кечмиш изтирабларын аҹы хатирәси бизи бир даһа тәгиб етмәјәҹәк. Јени дүнјада һәјатымызы һәр ҝүн долдураҹаг сағлам фикирләр вә әмәлләр онлары јаваш-јаваш јаддашымыздан силәҹәк. Јеһова Аллаһ бәјан едир: «Мән јени ҝөјләр [бәшәријјәти идарә едәҹәк јени сәмави Падшаһлыг вә ја һакимијјәт] вә јени јер [салеһ инсан ҹәмијјәти] јарадырам. Әввәлки ишләр бир даһа хатырланмајаҹаг, һеч јада дүшмәјәҹәк. Јаратдығыма әбәдилик севинин, шадланын». Бәли, Јеһованын јени дүнјасында салеһләр дејәҹәк: «Бүтүн дүнја сакитлик вә раһатлыг ичиндә севинҹдән ҹошур» (Јешаја 14:7; 65:17, 18).
Тәкрар үчүн суаллар
• Пислијин мөвҹудлуғуна јол вермәсинә бахмајараг, Јеһова Өз адына неҹә еһтирам ҝөстәрди?
• ‘Гәзәбә уғрајаҹаг габлара’ сәбир етмәси илә Јеһова бизә неҹә мәрһәмәт ҝөстәрир?
• Пајымыза дүшән чәтинликләрә неҹә јанашмалыјыг?
[67-ҹи сәһифәдәки шәкилләр]
Јеһова «Әјјубун ахыр ҝүнләрини әввәлки ҝүнләриндән даһа чох бәрәкәтли етди»