Фәсил 11
Әввәлҹә Падшаһлығы ахтарын
1. а) Иса нәјә ҝөрә өз динләјиҹиләрини әввәлҹә Падшаһлығы ахтармаға сөвг едирди? б) Өзүмүздән нәји сорушмалыјыг?
ИСА 1900 ил бундан әввәл Галилејада өз динләјиҹиләринә мүраҹиәт едәркән демишди: «Әввәлҹә Аллаһын Сәлтәнәтини вә Онун [Аллаһын] салеһлијини ахтарын». Ҝөрәсән јубанмадан һәрәкәт етмәјә бир сәбәб варды? Мәҝәр Мәсиһ һәлә бир нечә әсрдән сонра Падшаһ олмајаҹагды? Бәли, бу беләдир, лакин Јеһова мәһз Хиласкар Падшаһлыг васитәсилә Өз һөкмранлығына бәраәт газандырмалы вә јер үзү илә бағлы мөһтәшәм нијјәтини һәјата кечирмәли иди. Бу мәсәләләрин ваҹиблијини анлајан инсанлар һәјатда әсас јери Падшаһлыға верирдиләр. Әҝәр биринҹи әсрдә бу белә идисә, ҝөрүн Мәсиһ Падшаһ оландан сонра буну етмәк нә дәрәҹәдә өнәмлидир! Бунунла бағлы ортаја белә бир суал чыхыр: һәјат тәрзим әввәлҹә Аллаһын Падшаһлығыны ахтардығымы ҝөстәрирми? (Матта 6:33).
2. Үмумиликдә ҝөтүрдүкдә, инсанлар нәјә ҹан атырлар?
2 Бу ҝүн јер үзүндә милјонларла инсан Падшаһлығы һәјатларында биринҹи јерә гојур. Онлар өзләрини Јеһованын ирадәсини јеринә јетирмәјә һәср етмәклә Падшаһлығы дәстәкләдикләрини нүмајиш етдирирләр. Инсанларын бөјүк әксәријјәти исә дүнјәви шејләрә ҹан атыр. Онларын фикри-зикри пул газанмаг, наз-немәт ичиндә јашамагдыр. Јахуд да вар-гүввәләрини карјера гурмаға сәрф едирләр. Бу инсанларын һәјат тәрзи ҝөстәрир ки, онлар јалныз өзләрини, вар-дөвләти вә кеф чәкмәји дүшүнүрләр. Беләләри үчүн Аллаһ ја һарадаса арха пландадыр, ја да һеч јохдур (Матта 6:31, 32).
3. а) Иса шаҝирдләрини һансы хәзинәни јығмаға тәшвиг едирди вә нә үчүн? б) Нәјә ҝөрә мадди шејләр үчүн һәддән зијадә нараһат олмаг лазым дејил?
3 Иса өз шаҝирдләринә белә бир мәсләһәт вермишди: «Јер үзүндә өзүнүзә хәзинәләр јығмајын». Вар-дөвләт әбәди дејил, бунун әвәзинә Јеһоваја хидмәт етмәклә «өзүнүзә ҝөјдә хәзинәләр јығын». Иса давамчыларына ҝөзләрини «сағлам» сахламағы, јәни Аллаһын ирадәсини вар-гүввәләри илә јеринә јетирмәји төвсијә едирди. О дејирди: «Сиз Аллаһа вә маммона [вар-дөвләтә] гуллуг едә билмәзсиниз». Бәс ҝејим, јемәк, ев кими зәрури тәләбатлар? Онлары ким тәмин едәҹәк? Иса «гајғы чәкмәјин» дејә төвсијә едирди. О, шаҝирдләринә гушлары вә ҝүлләри мисал ҝәтирди: Аллаһ гушлары једиздирир, ҝүлләри исә ҝејиндирир. Мәҝәр Аллаһын шүурлу хидмәтчиләри онлардан гат-гат үстүн дејилләр? Иса демишди: «Лакин әввәлҹә Аллаһын Сәлтәнәтини вә Онун салеһлијини ахтарын; вә бунларын [зәрури шејләрин] һамысы сизә әлавә олараг вериләҹәкдир» (Матта 6:19-34). Әмәлләрин буна инандығыны ҝөстәрирми?
Падшаһлыг һәгигәтини үрәјиндә боғма
4. Мадди шејләрә чох әһәмијјәт верән инсанын ахыры неҹә ола биләр?
4 Өзүмүзүн вә аиләмизин мадди еһтијаҹларыны тәмин етмәк дүзҝүндүр. Интәһасы, инсан мадди шејләр барәсиндә һәддән артыг нараһат олурса, бунун ахыры пис ола биләр. Белә инсан Падшаһлыға инандығыны дејә биләр. Амма онун һәјатында башга шејләр даһа өнәмлидирсә, Падшаһлыг һәгигәти әввәл-ахыр үрәјиндә ‘боғулаҹаг’ (Матта 13:18-22). Мисал үчүн, бир дәфә бир ҹаван варлы рәис Исадан сорушмушду: «Әбәди һәјаты мирас алмаг үчүн нә етмәлијәм?» О јүксәк әхлаглы вә хошхасијјәт адам олса да, мал-дөвләтинә чох бағлы иди вә һәтта Мәсиһин давамчысы олмаг наминә белә, варындан һеч ҹүр ајрыла билмирди. Тәәссүф ки, о, ҝәләҹәкдә, сәмави Падшаһлыгда Мәсиһлә бирликдә олмаг имканыны әлдән бурахды. Она ҝөрә дә Иса демишди: «Сәрвәти оланлар Аллаһын Сәлтәнәтинә нә чәтинликлә ҝирәҹәкләр!» (Марк 10:17-23)
5. а) Павел Тимотеји нә илә кифајәтләнмәјә тәшвиг едирди вә нә үчүн? б) Шејтан инсанлары мәһведиҹи ‘пулпәрәстлик’ торуна неҹә салыр?
5 Бир нечә ил сонра һәвари Павел варлы тиҹарәт шәһәри Ефесдә јашајан Тимотејә јазырды: «Биз дүнјаја һеч бир шеј ҝәтирмәмишик; вә ајдындыр ки, орадан һеч бир шеј дә апара билмәрик. Амма јемәјимиз вә палтарымыз варса, бунларла кифајәтләнирик». Ишләјиб өзүнү вә аиләсини гида, ҝејим вә евлә тәмин етмәк дүзҝүндүр. Лакин Павел башга шејдән хәбәрдар едир: «Варланмаг истәјәнләр исә јолдан чыхыр вә тора дүшүрләр вә инсанлары фәлакәтә вә һәлака апаран бир чох мәнасыз вә зијанвериҹи еһтираслара гапылырлар». Шејтан һијләҝәрдир. О әввәлҹә инсаны хырда-пара шејләрлә ширникләндирә биләр. Сонрадан тәзјиги ҝет-ҝедә артырыр: адама вәзифәдә ирәли чәкилмәк вә јахуд јүксәк маашлы, амма руһани шејләрә ајырдығы вахты оғурлајан бир иш тәклиф едилир. Ајыг олмасаг, «пулпәрәстлик» даһа ваҹиб шејләри, Падшаһлығын марагларыны боға биләр. Павел буну белә ифадә етмишди: «[Пулпәрәстлијә] гапылан бәзиләри иман јолундан узаглашыб, өзләринә бир чох әзаблар чәкдирдиләр» (1 Тимотејә 6:7-10).
6. а) Вар-дөвләтә алудә олмамаг үчүн нә етмәлијик? б) Дүнјадакы игтисади вәзијјәтдән асылы олмајараг, биз нәјә әмин ола биләрик?
6 Павел мәсиһчи гардашы Тимотејә мәһәббәтлә төвсијә едирди: «Бунлардан узаг гач... иман уғрунда ҝедән мүбаризәдә јахшы чарпыш» (1 Тимотејә 6:11, 12). Әҝәр бу дүнјада һөкм сүрән вар-дөвләт һәрислијинә алудә олмаг истәмириксә, вар-ҝүҹүмүзлә мүгавимәт ҝөстәрмәлијик. Иманымыза ујғун јашамаг үчүн әлимиздән ҝәләни едириксә, Јеһова биздән һеч вахт үз дөндәрмәјәҹәк. Баһачылыға вә ишсизлијә бахмајараг, Аллаһ гејдимизә галараг бизи ән зәрури шејләрлә тәмин едәҹәк. Павел јазырды: «Һәјатыныз пулпәрәстликдән азад олсун, өзүнүздә олан шејләрлә кифајәтләнин; чүнки [Аллаһ] демишдир: “Сәни һеч бурахмајаҹағам вә әсла тәрк етмәјәҹәјәм”. Буна ҝөрә, биз ҹәсарәтлә дејирик: “Рәбб мәнә јардымчыдыр, мән горхмарам; инсан мәнә нә едә биләр?”» (Ибраниләрә 13:5, 6). Давуд падшаһ да јазмышды: «Ҝәнҹлијимдән гоҹалығымадәк салеһин тәрк едилдијини, нәслинин чөрәк үчүн диләндијини ҝөрмәмишәм» (Мәзмур 37:25).
Еркән мәсиһчиләрин нүмунәси
7. Иса тәблиғлә әлагәдар шаҝирдләринә һансы ҝөстәришләри вермишди вә нәјә ҝөрә демәк олар ки, онлар јерсиз дејилди?
7 Иса һәвариләринә лазыми гајдада тәлим вериб онлары Исраилдә «Сәмави Сәлтәнәт јахындыр» дејәрәк хош хәбәри јајмаға ҝөндәрди. Неҹә дә мөһтәшәм бир хәбәр! Хиласкар Падшаһ Иса Мәсиһ онларын јанында иди. Һәвариләр өзләрини бүтөвлүкдә хидмәтә һәср етдикләри үчүн Иса онлары Аллаһа ҝүвәнмәјә тәшвиг едирди. Аллаһ онларын гејдинә галаҹагды. Иса дејирди: «Јола бир шеј ҝөтүрмәјин: нә әса, нә торба, нә чөрәк, нә дә пул. Вә нә дә ики көјнәјиниз олсун. Һансы евә ҝирсәниз, орада галын вә орадан да јола чыхын» (Матта 10:5-10; Лука 9:1-6). Јеһова онларын еһтијаҹларыны һәмвәтәнләри исраиллиләр васитәсилә тәмин едәҹәкди. Гонагпәрвәрлик исраиллиләр арасында ади бир һал иди.
8. а) Нә үчүн Иса өлүмүндән бир гәдәр әввәл шаҝирдләринә тәблиғлә әлагәдар јени ҝөстәриш верди? б) Исанын давамчыларынын һәјатында әсас јери әввәлки кими нә тутмалы иди?
8 Өлүмүндән габаг Иса шаҝирдләрини хәбәрдар етмишди ки, ҝәләҹәкдә онлар башга шәраитдә хидмәт едәҹәкләр. Дөвләт тәрәфиндән тәгиб едиләҹәкләринә ҝөрә Исраилдә онлара әввәлки кими гонагпәрвәрлик ҝөстәрилмәјәҹәк. Бундан әлавә, онлар бир аздан Падшаһлыг хәбәрини башга халглара да чатдырмалы идиләр. Артыг шаҝирдләр ‘кисә’ вә чөрәк ‘торбасы’ ҝөтүрмәли идиләр. Бунунла белә, онлар әввәлҹә Јеһованын Падшаһлығыны вә Онун салеһлијини ахтармаға давам етмәли вә Аллаһын, јемәјә вә ҝејимә олан тәләбатларыны тәмин едәҹәјинә ҝүвәнмәли идиләр (Лука 22:35-37).
9. Еһтијаҹларыны өзү тәмин етсә дә, нәјә ҝөрә демәк олар ки, Падшаһлыг Павелин һәјатында әсас јери тутурду вә бунунла бағлы о мәсиһчиләри нәјә чағырырды?
9 Мәсиһин мәсләһәтинә әмәл етмәкдә ҝөзәл нүмунә гојмуш инсанлардан бири дә һәвари Павелдир. Хидмәт онун һәјатында ән башлыҹа јери тутурду (Һәвариләрин ишләри 20:24, 25). Тәблиғ етдији јерләрдә еһтијаҹларыны өзү тәмин едир, һәтта чадыр һазырламагла мәшғул олурду. О башгаларындан һеч нә уммурду (Һәвариләрин ишләри 18:1-4; 1 Салониклиләрә 2:9). Бунунла јанашы адамлар Павелә мәһәббәтдән ирәли ҝәләрәк гонагпәрвәрлик ҝөстәрәндә вә һәдијјә верәндә, о бунлары миннәтдарлыгла гәбул едирди (Һәвариләрин ишләри 16:15, 34; Филипилиләрә 4:15-17). Павел истәмирди ки, мәсиһчиләр аиләләрини башлы-башына бурахыб јалныз тәблиғлә мәшғул олсунлар. Һәвари онлары мүхтәлиф мәсулијјәтләринә таразлы шәкилдә јанашмаға тәшвиг едирди. О, мәсиһчиләрә зәһмәткеш, аиләҹанлы вә әлиачыг олмағы төвсијә едирди (Ефеслиләрә 4:28; 2 Салониклиләрә 3:7-12). Павел онлары вар-дөвләтә дејил, Аллаһа ҝүвәнмәјә вә јашајышлары илә һәјатда нәләрин даһа ваҹиб олдуғуну анладыгларыны ҝөстәрмәјә чағырырды. Бу, Исанын өјрәтдији кими, әввәлҹә Аллаһын Падшаһлығыны вә Онун салеһлијини ахтармаг демәк иди (Филипилиләрә 1:9-11).
Гој Падшаһлыг һәјатында әсас јери тутсун
10. Әввәлҹә Падшаһлығы ахтармаг нә демәкдир?
10 Падшаһлыг һаггында хош хәбәрин тәблиғиндә нә дәрәҹәдә фәал иштирак едирик? Бу гисмән шәраитимиздән вә һәмчинин миннәтдарлығымызын дәрәҹәсиндән асылыдыр. Унутмајаг ки, Мәсиһ «бош-бикар оланда Падшаһлығы ахтарын» демәмишди. Падшаһлығын ваҹиблијини дәрк едән Иса, Атасынын ирадәсини бу сөзләрлә ифадә етмишди: «Аллаһын Падшаһлығыны даима ахтарын» (Лука 12:31, ЈД). Дүздүр, өзүмүзү вә аиләмизи тәмин етмәк үчүн ишләмәлијик, амма иманымыз мөһкәмдирсә, Падшаһлығын тәблиғи иши һәјатымызда ваҹиб јери тутаҹаг. Ејни заманда, аиләмизин дә гејдинә галаҹағыг (1 Тимотејә 5:8).
11. а) Иса Падшаһлыг хәбәринин тәблиғиндә һамынын ејни дәрәҹәдә иштирак едә билмәјәҹәјини әјани сурәтдә неҹә ҝөстәрмишди? б) Тәблиғчинин нә гәдәр хидмәт етдијинә һансы амилләр тәсир ҝөстәрир?
11 Бәзиләримиз Падшаһлыг һаггында хош хәбәрин тәблиғинә диҝәрләринә нисбәтән даһа чох вахт сәрф едирик. Амма Иса мүхтәлиф нөв торпаг һаггындакы мәсәлиндә ҝөстәрмишди ки, јалныз үрәкләри мүнбит торпаға бәнзәјәнләрин һамысы бар ҝәтирәҹәк. Нә гәдәр? Һәр кәс имканына ҝөрә. Мисал үчүн, киминин јашы, сәһһәти, киминин аилә шәраити бурада өз ролуну ојнајыр. Амма инсан хош хәбәрә ҝөрә үрәкдән миннәтдардырса, о чох шеј едә биләр (Матта 13:23).
12. Ҝәнҹләрә һансы руһани мәгсәдләрин үзәриндә дүшүнмәк мәсләһәт ҝөрүлүр?
12 Падшаһлығын тәблиғиндә даһа чох иштирак етмәк үчүн гаршымыза мәгсәдләр гојмаг јахшы оларды. Ҝәнҹләр чалышган ҝәнҹ мәсиһчи Тимотејдән әла нүмунә ҝөтүрә биләрләр (Филипилиләрә 2:19-22). Тәһсилләрини баша вурдугдан сонра таммүддәтли хидмәтә башламагдан ҝөзәл нә ола биләр? Јахшы дүшүнүлмүш руһани мәгсәдләр јашҹа даһа бөјүк оланлара да фајда ҝәтирәр.
13. а) Хидмәтдә нә гәдәр чалышаҹағымызы ким мүәјјәнләшдирир? б) Әввәлҹә Падшаһлығы үрәкдән ахтармагла нәји сүбут едирик?
13 Зәннимизҹә хидмәтдә даһа чох иштирак етмәјә имканлары олуб, амма буну етмәјәнләрә тәнгиди јанашмагданса, иманымыз бизи тәкмилләшмәјә вә хидмәтдә имканымыз дахилиндә баҹардығымызы етмәјә һәвәсләндирмәлидир (Ромалылара 14:10-12, КМ; Галатијалылара 6:4, 5). Әјјубун башына ҝәләнләрдән ҝөрүндүјү кими, Шејтан иддиа едир ки, бизи ән чох вар-дөвләт, раһатлығымыз марагландырыр вә Аллаһа шәхси мәнфәәт ҝүдәрәк хидмәт едирик. Лакин әввәлҹә Падшаһлығы ахтарырыгса, онда Иблисин бөјүк јаланчы олдуғуну сүбут едир вә ҝөстәририк ки, бизим үчүн һәјатда ән әсас шеј Аллаһа хидмәтдир. Беләҹә, Јеһоваја бөјүк мәһәббәт бәсләдијимизи, Онун һөкмранлығыны сәдагәтлә дәстәкләдијимизи вә инсанлара севҝимизи сөздә вә әмәлдә сүбут едирик (Әјјуб 1:9-11; 2:4, 5; Сүлејманын мәсәлләри 27:11).
14. а) График хидмәтдә бизә неҹә көмәк едә биләр? б) Бир чох Шаһидләр тәблиғ хидмәтиндә нә дәрәҹәдә фәал иштирак едирләр?
14 График тутмагла ади вахтлардан даһа чох хидмәт едә биләрик. Јеһова да Өз нијјәтини јеринә јетирмәк үчүн ‘вахт тәјин едир’ (Чыхыш 9:5; Марк 1:15). Имканымыз дахилиндә һәфтәдә бир вә ја бир неҹә дәфә тәблиғ хидмәтиндә иштирак етмәк үчүн вахт ајырсаг јахшы олар. Бүтүн дүнјада јүз минләрлә Јеһованын Шаһиди көмәкчи пионер кими хидмәт едәрәк тәблиғ ишинә ҝүндә тәхминән ики саат вахт сәрф едирләр. Јүз минләрлә диҝәр баҹы-гардашымыз Падшаһлыг хәбәрини јајмаға ҝүндә тәхминән ики саат јарым вахт һәср етмәклә даими пионер кими хидмәт едирләр. Хүсуси пионерләр вә миссионерләр исә ҝүн әрзиндә даһа чох тәблиғ едирләр. Бундан әлавә, һәр кәс фүрсәт ахтарыб, гејри-рәсми шәраитдә дә Падшаһлыг хәбәрини динләмәк истәјәнләрлә бөлүшә биләр (Јәһја 4:7-15). Бу ишдә имканымыз јол вердији гәдәр там иштирак етмәјә һәвәсимиз олмалыдыр. Иса демишди: «Сәмави Сәлтәнәт һаггында олан бу Мүждә халгларын һамысына шәһадәт олараг бүтүн дүнјада тәблиғ олунаҹагдыр; вә сон о заман ҝәләҹәкдир» (Матта 24:14; Ефеслиләрә 5:15-17).
15. 1 Коринфлиләрә 15:58 ајәсиндәки мәсләһәти хидмәтимизә неҹә тәтбиг едә биләрик?
15 Јашадыглары өлкәдән асылы олмајараг, Јеһованын Шаһидләри дүнјанын һәр јериндә тәблиғ хидмәтиндә јекдилликлә иштирак едирләр. Онлар Мүгәддәс Китабдакы мәсләһәти өзләринә тәтбиг едирләр: «Мөһкәм, сарсылмаз олун, һәр заман Рәббин ишиндә тәрәгги един вә билин ки, Рәббин јолунда чәкдијиниз әмәк әбәс дејилдир» (1 Коринфлиләрә 15:58).
Тәкрар үчүн суаллар
• Исанын сөзләринә әсасән, әввәлҹә Аллаһын Падшаһлығыны ахтарырыгса, нәләри арха плана чәкәҹәјик?
• Өзүмүзүн вә аиләмизин гејдинә галмаг вәзифәсинә неҹә јанашмалыјыг? Аллаһ бизә неҹә көмәк едәҹәк?
• Хидмәтин һансы нөвләриндә иштирак едә биләрик?
[107-ҹи сәһифәдәки шәкил]
Нә гәдәр ки сон ҝәлмәјиб, Јеһованын Шаһидләри бүтүн өлкәләрдә хош хәбәри тәблиғ едирләр