Бәјан етмәли олдуғумуз хәбәр

«АЛЛАҺДАН ГОРХ, ОНУН ӘМРЛӘРИНИ ЈЕРИНӘ ЈЕТИР»

МӘСИҺЧИЛИКДӘН чох илләр әввәл Јеһова садиг хидмәтчиси Ибраһимә ‘дүнјанын бүтүн милләтләринин’ хејир-дуа алаҹағына даир нијјәтини ачыгламышды (Јар. 22:18). О, һәмчинин бүтүн инсанлардан әсас етибарилә нә тәләб олундуғуну билдирмәк үчүн Сүлејмана нөвбәти сөзләри јазмаға илһам вермишди: «Аллаһдан горх, Онун әмрләрини јеринә јетир. Бәли, инсанын әсас вәзифәси будур» (Ваиз 12:13). Бәс бүтүн халглардан олан инсанлар бу шејләри неҹә өјрәнәҹәкдиләр?

Аллаһын Кәламына инанан инсанлар һәмишә олуб, лакин Мүгәддәс Китабда ҝөстәрилирди ки, хош хәбәрин бүтүн халглара чатдырылмасынын вә дүнја мигјасында шаһидлик едилмәсинин вахты «Рәббин ҝүнүндә» јетишәҹәк. Һәмин ҝүн 1914-ҹү илдә башлајыб (Вәһј 1:10). Бу вахтла бағлы Вәһј 14:6, 7 ајәләриндә әввәлҹәдән билдирилмишди ки, мәләјин рәһбәрлији алтында «һәр милләтә, һәр гәбиләјә, һәр дилә вә һәр халга» ваҹиб хәбәр бәјан едиләҹәк. Онлар үчүн белә бир чағырыш сәсләнәҹәкди: «Аллаһдан горхун! Она иззәт верин! Чүнки Онун һөкмүнүн вахты ҝәлди. Ҝөјү, јери, дәнизи вә су булагларыны Јарадана сәҹдә един!» Һәмин хәбәр Аллаһын ирадәси илә чатдырылыр. Бу ишдә иштирак етмәк шәрәфи бизим дә пајымыза дүшүб.

‘Һәгиги Аллаһ’. Јеһованын: «Сизсиниз Мәним шаһидләрим», — дејә бәјан етдији сөзләрин контекстинә бахсаг ҝөрәҹәјик ки, бурада кимин Аллаһ олдуғу мүзакирә едилир (Јешаја 43:10). Чатдырылмалы олан хәбәр садәҹә инсанларын һәр һансы дини гәбул етмәли, јахуд һансыса аллаһа инанмалы олдугларына даир хәбәр дејил. Әксинә, онлара имкан јаратмаг лазымдыр ки, ҝөјү вә јери Јараданын ваһид һәгиги Аллаһ олдуғуну билсинләр (Јешаја 45:5, 18, 21, 22; Јәһ. 17:3). Јалныз һәгиги Аллаһ ҝәләҹәји дәгигликлә дејә биләр. Кечмишдә Јеһованын сөзләринин һәјата кечмәсинин Онун ҝәләҹәјә даир бүтүн вәдләринин дә јеринә јетәҹәјинә әмин олмаг үчүн тутарлы сүбутдур. Бизим дә вәзифәмиз буну инсанлара ҝөстәрмәкдир (Јешуа 23:14; Јешаја 55:10, 11).

Дүздүр, шаһидлик етдијимиз инсанларын чоху ја башга аллаһлара ибадәт едир, ја да үмумијјәтлә һеч бир аллаһа ибадәт етмәдикләрини иддиа едир. Онларын бизә гулаг асмасы үчүн сөһбәтә ортаг мөвзудан башламаг лазым ҝәлә биләр. Һәвариләрин ишләри 17:22-31 ајәләриндәки нүмунәнин бу мәсәләдә бизә фајдасы дәјә биләр. Диггәт јетир ки, нәзакәтли олмасына бахмајараг, һәвари Павел јери вә ҝөјү Јарадан Аллаһ гаршысында һәр кәсин мәсулијјәт дашыдығыны ачыгҹа вурғулады.

Аллаһын адыны билдиририк. Инсанлара һәгиги Аллаһын адыны билдирмәк имканыны әлдән вермә. Јеһова Өз адыны севир (Чых. 3:15; Јешаја 42:8). О, инсанларын бу ады билмәсини истәјир. Јеһова иззәтли адынын Мүгәддәс Китабда 7 000 дәфәдән чох јазылмасынын гејдинә галмышдыр. Инсанлары бу адла таныш етмәк бизим борҹумуздур (Ганун. т. 4:35).

Бүтүн инсанларын ҝәләҹәји Јеһованы танымаларындан вә Ону иманла чағырмаларындан асылыдыр (Јоел 2:32; Мал. 3:16; 2 Салон. 1:8). Лакин чохлары Јеһованы танымыр. Онларын әксәријјәти Мүгәддәс Китабда һаггында бәһс едилән Аллаһа ибадәт етдикләрини иддиа едәнләрдир. Онларын һәтта Мүгәддәс Китабы олса да, ону охусалар да, јенә дә Аллаһын шәхси адыны билмирләр, чүнки бу ад бир чох мүасир тәрҹүмәләрдән чыхарылмышдыр. Бәзи инсанлар Јеһова адыны јалныз дин рәһбәрләри онлара бу ады чәкмәмәји сөјләјәркән ешидибләр.

Инсанлары Аллаһын ады илә неҹә таныш едә биләрик? Бу ады Мүгәддәс Китабдан, әҝәр мүмкүнсә, онларын өз китабындан ҝөстәрмәк ән ҝөзәл үсулдур. Бәзи тәрҹүмәләрдә бу ада бир нечә мин дәфә раст ҝәлинир. Азәрбајҹан дилиндә олан тәрҹүмәдә исә она Јарадылыш 22:14, Чыхыш 17:15, Һакимләр 6:24, Језекел 48:35 ајәләриндә вә Чыхыш 3:15 ајәсинин һашијәсиндә «Јаһве» формасында тәсадүф едилир. Бир чох башга тәрҹүмәләрдә исә орижинал мәтндә Аллаһын шәхси ады олан јерләрдә фәргли шрифтлә «Рәбб» вә «Аллаһ» титулу јазылыб. Әлиниздә олан тәрҹүмәдә Аллаһын шәхси ады тамамилә ҝөтүрүлүбсә, вәзијјәтин нә јердә олдуғуну баша салмаг үчүн башга тәрҹүмәләрдән истифадә етмәк олар. Бәзи өлкәләрдә инсанлара Аллаһын адына дини маһныларда вә ја иҹтимаи биналарын үстүндә раст ҝәлиндијини сөјләмәк олар.

Һәтта башга аллаһлара ибадәт едән инсанлара да түркҹә Мүгәддәс Китабдан Јеремја 32:17-19 ајәләрини ҝөстәрмәк фајдалы оларды. Орада тәкҹә Аллаһын ады ҝөстәрилмир, һәм дә Онун ким олдуғу ајдын шәкилдә изаһ едилир.

Христиан дүнјасынын етдији кими, Јеһова адыны «Рәбб» вә «Аллаһ» титулу илә әвәз етмә. Бу о демәк дејил ки, һәр сөһбәтин лап әввәлиндән Аллаһын адыны чәкмәк лазымдыр. Белә ки, гәрәзли фикирләрин уҹбатындан бәзи инсанлар сөһбәти кәсә биләрләр. Лакин сөһбәт алынандан сонра бу ады чәкмәкдән утанма.

Диггәтәлајиг һалдыр ки, Мүгәддәс Китабда Аллаһын шәхси ады «Рәбб» вә «Аллаһ» кими титулларын үмуми сајындан чох ишләнир. Лакин Мүгәддәс Китабы јазанлар һәр ҹүмләдә Аллаһын адыны јазмаға чалышмајыблар. Ону тәбии, үрәкдән вә һөрмәтҹил шәкилдә истифадә едибләр. Бу, бизим үчүн дә ҝөзәл нүмунәдир.

Бу адын архасында дуран Шәхс. Аллаһын шәхси адынын олмасы өз-өзлүјүндә ваҹиб һәгигәт олса да, Ону танымагда бу, һәлә илк аддымдыр.

Јеһованы севмәк вә Ону иманла чағырмаг үчүн инсанлар Онун неҹә Аллаһ олдуғуну билмәлидирләр. Јеһова Сина дағында адыны Мусаја ачанда садәҹә «Јеһова» сөзүнү тәкрарламады. О, диггәти Өзүнүн ҝөзәл кејфијјәтләринин бәзиләринә јөнәлтди (Чых. 34:6, 7). Бу, тәглид едилмәли нүмунәдир.

Тәзә марагланан инсанлара шаһидлик етмәјиндән, јахуд јығынҹагда чыхыш етмәјиндән асылы олмајараг, Падшаһлығын хејир-дуалары һаггында данышанда онларын бу ҹүр вәдләри верән Аллаһ һаггында нәји ачыгладығыны ҝөстәр. Јеһованын әмрләринә истинад едәндә онларда әкс олунан мүдриклији вә мәһәббәти вурғула. Аллаһын әмрләринин һеч дә чәтин олмадығыны, әксинә, бизим хејримиз үчүн верилдијини ајдын ҝөстәр (Јешаја 48:17, 18; Мик. 6:8). Јеһованын Өз ҝүҹүнү тәзаһүр етдирдији һәр вәзијјәтдә Онун шәхсијјәти, нормалары вә нијјәти һаггында нәјин исә ачыгландығыны изаһ ет. Диггәти Онун Өз кејфијјәтләрини таразлы шәкилдә неҹә тәзаһүр етдирдијинә јөнәлт. Јеһоваја дујдуғун һиссләри инсанлар гаршысында дилә ҝәтир. Јеһоваја олан мәһәббәтин башгаларынын да үрәјиндә Она гаршы белә мәһәббәт ојада биләр.

Бизим ҝүнләрдә сәсләнән ваҹиб хәбәр бүтүн инсанлары Аллаһдан горхмаға чағырыр. Сөзләримизлә инсанларда бу һисси ојатмаға чалышмалыјыг. Аллаһ горхусу Јеһоваја еһтирамы вә дәрин һөрмәти өзүнә дахил едән сағлам горхудур (Мәз. 89:7). Бу горхуја малик олан инсан Јеһованы али Һаким кими гәбул едир вә ҝәләҹәк һәјатынын Она мәгбул јашамагдан асылы олдуғуну етираф едир (Лука 12:5; Ром. 14:12). Буна ҝөрә дә бу ҹүр горху Аллаһа дәрин мәһәббәтлә вә беләликлә дә Ону разы салмаг истәји илә әлагәлидир (Ганун. т. 10:12, 13). Аллаһ горхусу, һәмчинин бизи тәшвиг едир ки, пислијә нифрәт едәк, Аллаһын әмрләринә табе олаг вә Она бүтүн үрәјимизлә ибадәт едәк (Ганун. т. 5:29; 1 Салн. 28:9; Сүл. мәс. 8:13). Бу, бизи үрәјимизин јарысы дүнја малында гала-гала Аллаһа хидмәт етмәкдән горујур (1 Јәһ. 2:15-17).

Аллаһын ады «гүввәтли бир галадыр». Јеһованы сөзүн әсил мәнасында таныјанлар ҝүҹлү мүдафиә әлдә едирләр. Бу, садәҹә Јеһованын адыны чәкдикләринин, јахуд бәзи хүсусијјәтләрини садалаја билдикләринин јох, Она етибар етдикләринин сајәсиндәдир. Сүлејманын мәсәлләри 18:10 ајәсиндә белә инсанлар һаггында дејилир: «Рәббин ады гүввәтли бир галадыр, салеһ гачыб она пәнаһ апарыр».

Инсанлары Јеһоваја етибар етмәјә тәшвиг етмәк үчүн һәр фүрсәтдән истифадә ет (Мәз. 37:3; Сүл. мәс. 3:5, 6). Бу ҹүр етибар Јеһоваја вә Онун вәдләринә иманын тәзаһүрүдүр (Ибр. 11:6). Инсанлар Јеһованы Каинатын Һөкмдары кими гәбул етдији, јолларыны севдији, һәгиги хиласын јалныз Ондан ҝәләҹәјинә там инандығы үчүн Онун ‘адыны зикр едәрсә’, Аллаһын Кәламынын бизи әмин етдији кими, хилас олаҹаглар (Ром. 10:13, 14). Башгаларыны өјрәдәркән онлара һәјатларынын бүтүн саһәләриндә мәһз бу ҹүр иманы тәзаһүр етдирмәјә көмәк ет.

Чохларынын проблеми башындан ашыр. Ола билсин, онлар чыхыш јолу ҝөрмүрләр. Онлары Јеһованын ирадәси һаггында өјрәнмәјә, Она етибар етмәјә вә өјрәндикләрини һәјатларында тәтбиг етмәјә тәшвиг ет (Мәз. 25:5). Һәмчинин дуада Аллаһдан исрарла көмәк диләмәјә вә хејир-дуаларына ҝөрә тәшәккүр етмәјә тәшвиг ет (Филип. 4:6, 7). Онлар Јеһованы садәҹә Мүгәддәс Китабдан мүәјјән ајәләри охумагла јох, вәдләринин өз һәјатларында јеринә јетдијини ҝөрмәклә таныјанда Онун адынын мәғзини дүзҝүн баша дүшмәјин ҝәтирдији мүдафиәни дујаҹаглар (Мәз. 34:8; Јер. 17:7, 8).

Һәр фүрсәтдән истифадә едәрәк инсанлара һәгиги Аллаһ Јеһовадан горхмағын вә Онун әмрләринә бағлы галмағын мүдриклик олдуғуну анламаға көмәк ет.

‘ИСАЈА ОЛАН ШӘҺАДӘТӘ БАҒЛЫ ГАЛЫРЫГ’

ДИРИЛДИКДӘН сонра, ҝөјә гајытмаздан әввәл, Иса Мәсиһ шаҝирдләринә нөвбәти ҝөстәриши верди: «Дүнјанын ән узаг јерләринә гәдәр Мәнә шаһид олаҹагсыныз» (Һәв. иш. 1:8). Аллаһын бизим ҝүнләримиздә јашајан садиг хидмәтчиләри «Исаја олан шәһадәтләринә бағлы галан» инсанлар кими тәсвир олунурлар (Вәһј 12:17). Бәс сән шаһидлик етмәк ишиндә нә гәдәр сәјлә чалышырсан?

Исаја инандыгларыны сөјләјән бир чох сәмими инсанлар онун инсан кими јашамаздан әввәлки мөвҹудлуғу һагда һеч нә билмирләр. Онлар Исанын јер үзүндә оларкән сөзүн һәрфи мәнасында инсан олдуғуну баша дүшмүрләр. Онун һансы мәнада Аллаһын Оғлу олдуғуну анламырлар. Аллаһын нијјәтинин јеринә јетмәсиндә ојнадығы рол һагда чох аз шеј билирләр. Онун инди нә етдијиндән хәбәрсиздирләр вә ҝәләҹәкдә ҝөрәҹәји ишләрин һәјатларына неҹә тәсир едәҹәјини дәрк етмирләр. Бәзиләри һәтта јанлыш олараг Јеһованын Шаһидләринин Исаја инанмадығыны дүшүнүр. Бизим дә үзәримизә дүшән мәсулијјәт одур ки, бу мәсәләләрлә бағлы һәгигәти инсанлара чатдыраг.

Башга бир груп инсанлар Мүгәддәс Китабда тәсвир олунан Иса адында бир шәхсин нә вахтса јашадығына инанмыр. Бәзиләри Исаја садәҹә даһи бир инсан кими бахырлар. Чохлары Исанын Аллаһын Оғлу олмасы фикрини рәдд едирләр. Белә инсанлар арасында ‘Исаја шәһадәт етмәк’ үчүн нәзакәтли олмаг, еләҹә дә чохлу ҝүҹ вә сәбир тәләб олунур.

Һансы нөгтеји-нәзәрдә олмаларындан асылы олмајараг, сәни динләјәнләр Аллаһын тәгдим етдији әбәди һәјаты әлдә етмәк истәјирләрсә, Иса Мәсиһ һаггында билик алмалыдырлар (Јәһ. 17:3). Аллаһын ајдын шәкилдә ифадә олунмуш ирадәсинә ҝөрә һәр бир инсан ‘Иса Мәсиһин Рәбб олдуғуну играр етмәли’ вә онун һакимијјәтинә табе олмалыдыр (Филип. 2:9-11). Буна ҝөрә дә јанлыш нөгтеји-нәзәрин, јахуд гәрәзли фикирләрин мөһкәм көк салдығы инсанларла гаршылашанда бу мөвзудан садәҹә олараг јан кечә билмәрик. Бәзи һалларда, һәтта илк башчәкмәдә, Иса Мәсиһ һаггында сәрбәст данышмаг мүмкүн олур. Диҝәр һалларда исә, һәмсөһбәтимизә Мәсиһ һаггында дүзҝүн фикрә ҝәлмәјә көмәк етмәк үчүн сөзләри еһтијатла сечмәк, һәмчинин нөвбәти башчәкмәләрдә бу мөвзунун башга саһәләри һагда данышмаг үчүн јоллар ахтармаг лазым ҝәлә биләр. Бунунла белә, Мүгәддәс Китаб өјрәнмәси кечирәнә кими бу мөвзу илә бағлы һәр шеји мүзакирә етмәк мүмкүн олмаја биләр (1 Тим. 2:3-7).

Аллаһын нијјәтиндә Исанын ваҹиб ролу. Исанын «јол» олдуғу вә ‘онун васитәчилији олмадан Атанын јанына һеч кимин ҝәлә билмәдији’ үчүн Иса Мәсиһә иман етмәдән Аллаһла јахшы мүнасибәтләр гурмағын гејри-мүмкүн олдуғуну инсанлара баша салмаг лазымдыр (Јәһ. 14:6). Јеһованын илк Оғлуна ајырдығы ваҹиб ролу дәрк етмәјинҹә инсан Мүгәддәс Китабы баша дүшмәјәҹәк. Нә үчүн? Чүнки Јеһова бүтүн нијјәтләринин һәјата кечмәсиндә әсас ролу Оғлуна вериб (Колос. 1:17-20). Мүгәддәс Китабдакы пејғәмбәрликләр бу факт әтрафында ҹәмләниб (Вәһј 19:10). Шејтанын үсјаны вә Адәмин ҝүнаһы нәтиҹәсиндә јаранан бүтүн проблемләр мәһз Иса Мәсиһин васитәсилә арадан галдырылаҹаг (Ибр. 2:5-9, 14, 15).

Мәсиһин ојнадығы ролу баша дүшмәк үчүн инсан бәшәријјәтин аҹынаҹаглы вәзијјәтдә олдуғуну вә бу вәзијјәтдән өз ҝүҹү илә гуртула билмәјәҹәјини дәрк етмәлидир. Һамымыз ҝүнаһ ичиндә доғулуруг. Бу, һәјатымыз боју бизә мүхтәлиф ҹүр тәсир етсә дә, әввәл-ахыр һамы өлүр (Ром. 3:23; 5:12). Шаһидлик етдијин инсанларла бу һагда мүлаһизә јүрүт. Сонра ҝөстәр ки, Јеһова Иса Мәсиһин фидјә гурбанлығы васитәсилә буна иман едәнләрин ҝүнаһ вә өлүмдән азад олмалары үчүн мәһәббәтлә гајғы ҝөстәрмишдир (Марк 10:45; Ибр. 2:9). Бу, онларын гаршысында әбәди һәјата вә камиллијә наил олмаг имканы ачыр (Јәһ. 3:16, 36). Һеч бир башга үсулла буну әлдә етмәк мүмкүн дејил (Һәв. иш. 4:12). Истәр бир нәфәрлә сөһбәт едәркән, истәрсә дә јығынҹаг гаршысында чыхыш едәркән бир мүәллим кими садәҹә бу фактлары сөјләмәклә кифајәтләнмә. Меһрибанлыг вә сәбирлә инсанларда Мәсиһин Хиласкар кими ојнадығы рола ҝөрә миннәтдарлыг ојат. Бу, инсанын давранышына, әһвал-руһијјәсинә вә һәјатдакы мәгсәдләринә бөјүк тәсир ҝөстәрә биләр (2 Кор. 5:14, 15).

Дүздүр, Иса Мәсиһ һәјатыны јалныз бир дәфә гурбан вермишдир (Ибр. 9:28). Буна бахмајараг, о, инди фәал сурәтдә Баш Каһин кими хидмәт едир. Инсанлара бунун нә демәк олдуғуну баша сал. Бәлкә онлар чәтинликдәдирләр, үмидләри пуч олуб, нәдәнсә әзијјәт чәкирләр, јахуд әтрафдакы инсанларын амансызлығы уҹбатындан проблемләрлә үзләширләр? Иса јер үзүндә оланда бүтүн бунлары өз үзәриндә һисс етмишди. О, бизим кечирдијимиз һиссләри баша дүшүр. Бәс биз гејри-камиллик уҹбатындан Аллаһын мәрһәмәтинә еһтијаҹымыз олдуғуну дәрк едирикми? Әҝәр дуада Аллаһдан Исанын гурбанлығы әсасында әфв диләјириксә, Иса ‘Атанын јанында Мүдафиәчи’ кими һәрәкәтә кечир. Шәфгәтдән ирәли ҝәләрәк, о, «бизим үчүн вәсатәт едир» (1 Јәһ. 2:1, 2; Ром. 8:34). Исанын гурбанлығы әсасында вә Баш Каһин кими хидмәт етмәси сајәсиндә биз вахтында јардым алмаг үчүн «лүтфкар Аллаһын тахтына» јахынлаша билирик (Ибр. 4:15, 16). Гејри-камил олсаг да, Исанын Баш Каһин кими тәгдим етдији көмәк бизә Аллаһа тәмиз виҹданла хидмәт етмәјә имкан верир (Ибр. 9:13, 14).

Үстәлик, Иса Аллаһ тәрәфиндән мәсиһчи јығынҹағынын Башы кими тәјин олундуғу үчүн бөјүк сәлаһијјәтә маликдир (Мат. 28:18; Ефес. 1:22, 23). Беләҹә, о, Аллаһын ирадәсинә ујғун олараг лазыми рәһбәрлији тәгдим едир. Инсанлары өјрәдәркән онлара баша сал ки, јығынҹағын башы һәр һансы инсан јох, Иса Мәсиһдир (Мат. 23:10). Илк сөһбәтдән марагланан инсанлары ‘садиг вә ағыллы гулун’ васитәсилә тәгдим олунан материалын көмәјилә Мүгәддәс Китабы өјрәндијимиз јығынҹаг ҝөрүшләринә дәвәт ет. Онлара тәкҹә ‘гулун’ јох, һәмчинин Ағанын да ким олдуғуну баша сал ки, Исанын башчы олдуғуну билсинләр (Мат. 24:45-47). Онлары ағсаггалларла таныш ет вә онларын Мүгәддәс Јазылара әсасланан һансы тәләбләрә ҹаваб вермәли олдугларыны изаһ ет (1 Тим. 3:1-7; Тит. 1:5-9). Баша сал ки, јығынҹаг ағсаггаллара мәхсус дејил, онлар бизә садәҹә олараг Иса Мәсиһин изләри илә ҝетмәјә көмәк едирләр (Һәв. иш. 20:28; Ефес. 4:16; 1 Пет. 5:2, 3). Гој марагланан инсанлар бу тәшкилатын Мәсиһин башчылығы алтында мүтәшәккил сурәтдә фәалијјәт ҝөстәрән үмумдүнја ҹәмијјәт олдуғуну ҝөрсүнләр.

Мүждәләрдән өјрәнирик ки, Иса өлүмүндән бир аз әввәл Јерусәлимә дахил оланда шаҝирдләри: «Рәббин ады илә ҝәлән Һөкмдара һәмд олсун!» — дејәрәк ону алгышладылар (Лука 19:38). Инсанлар Мүгәддәс Китабы даһа дәриндән арашдырдыгҹа Јеһованын Исаја идарә етмәк сәлаһијјәти вердијини вә бунун бүтүн халглардан олан инсанлара тәсир етдијини өјрәнирләр (Дан. 7:13, 14). Јығынҹагда чыхыш едәркән, јахуд өјрәнмә кечирәркән Исанын һакимијјәтинин бизим үчүн нә мәна кәсб етмәли олдуғуну баша дүшмәјә вә буна ҝөрә миннәтдар олмаға көмәк ет.

Бизим һәјат тәрзимизин Иса Мәсиһин Падшаһ олдуғуна һәгигәтән дә инаныб-инанмадығымызы вә онун рәһбәрлијинә үрәкдән табе олуб-олмадығымызы ҝөстәрдијини вурғула. Диггәти Исанын Падшаһ кими мәсһ олундугдан сонра давамчыларына тапшырдығы ишә јөнәлт (Мат. 24:14; 28:18-20). Еҹазкар Мәсләһәтчи олан Исанын һәјатда нәјин ваҹиб олдуғуна даир дедикләрини мүзакирә ет (Јешаја 9:6, 7; Мат. 6:19-34). Әмин-аманлыг Һөкмдарынын сөзләринә әсасән, давамчыларынын һансы руһу тәзаһүр етдирмәли олдугларыны гејд ет (Мат. 20:25-27; Јәһ. 13:35). Диггәтли ол ки, башгаларынын бу руһу лазым олан гәдәр тәзаһүр етдириб-етдирмәдикләринә даир һөкм етмәк һүгугуну мәнимсәмәјәсән. Әксинә, онлары һәрәкәтләринин Мәсиһин Падшаһлығына табе олмагла бағлы нәји ҝөстәрдијини арашдырмаға тәшвиг ет. Бу заман өзүнүн дә ејни шеји етмәли олдуғуну јаддан чыхарма.

Иса Мәсиһ тәмәлдир. Мүгәддәс Китаб шаҝирд һазырламаг ишини тәмәли Иса Мәсиһ олан бинаны тикмәјә бәнзәдир (1 Кор. 3:10-15). Буна наил олмаг үчүн инсанлара Исаны Мүгәддәс Китабда тәсвир олундуғу кими танымаға көмәк ет. Еһтијатлы ол ки, онлар сәни изләмәли олдугларыны дүшүнмәсинләр (1 Кор. 3:4-7). Онларын диггәтини Иса Мәсиһә јөнәлт.

Тәмәл дүзҝүн гојулса, өјрәнән баша дүшәҹәк ки, Иса ‘изләри илә ҝетмәјимиз’ үчүн бизә нүмунә гојуб (1 Пет. 2:21). Бу тәмәл үзәриндә тикмәк үчүн өјрәнәни Мүждәләри бир тарих кими јох, рәһбәрлик кими охумаға тәшвиг ет. Онлара Исаја хас олан кејфијјәтләри вә онун неҹә дүшүндүјүнү јадда сахламаға көмәк ет. Онлары Исанын өз Атасына неҹә јанашдығына, сынаглара вә имтаһанлара неҹә таб ҝәтирдијинә, Аллаһа неҹә итаәткар галдығына вә мүхтәлиф вәзијјәтләрдә инсанларла неҹә рәфтар етдијинә диггәт јетирмәјә тәшвиг ет. Исанын һәјатында ваҹиб јер тутан иши вурғула. Белә етсән, сынаг вә имтаһанларла үзләшдикдә Мүгәддәс Китабы өјрәнән өзүндән сорушаҹаг: «Бу вәзијјәтдә Иса нә едәрди? Давранышымдан Исанын мәним үчүн етдикләринә ҝөрә миннәтдар олдуғум ҝөрүнәҹәкми?»

Јығынҹаг гаршысында чыхыш едәркән елә фикирләшмә ки, һәмиманлыларын артыг Исаја иман етдикләри үчүн она хүсуси диггәт јетирмәјә еһтијаҹ јохдур. Әҝәр бу иман үзәриндә тиксән, дедикләрин онлар үчүн даһа бөјүк әһәмијјәт кәсб едәҹәк. Ҝөрүшләр һаггында данышанда буну Исанын јығынҹағын башы кими ојнадығы ролла әлагәләндир. Тәблиғ хидмәти һагда сөһбәт едәркән диггәти Исанын бу иши һансы әһвал-руһијјә илә етдијинә јөнәлт вә хидмәтин Мәсиһин бир Падшаһ кими, јени дүнјада јашајаҹаг инсанлары топламаг үчүн ҝөрдүјү ишләрдән бири олдуғуну изаһ ет.

Ајдындыр ки, Иса һаггында әсас фактлары өјрәнмәк кифајәт етмир. Әсил мәсиһчи олмаг үчүн она иман етмәк вә ону үрәкдән севмәк лазымдыр. Белә мәһәббәт сәдагәтлә итаәт етмәјә тәшвиг едир (Јәһ. 14:15, 21). Бунун сајәсиндә инсанлар фәлакәтә дүшәндә белә иманда мөһкәм галыр, бүтүн һәјатлары боју Мәсиһин изләри илә ҝедир вә мөһкәм ‘көк салыб тәмәл гојан’ јеткин мәсиһчи олурлар (Ефес. 3:18). Бу ҹүр һәјат тәрзи Иса Мәсиһин Атасы вә Аллаһы олан Јеһоваја иззәт ҝәтирир.

«СӘМАВИ СӘЛТӘНӘТ ҺАГГЫНДА ОЛАН БУ МҮЖДӘ»

ИШТИРАКЫНЫН әламәтинин тәфсилатлары вә бу системин сону һагда данышаркән Иса пејғәмбәрлик етмишди: «Сәмави Сәлтәнәт һаггында олан бу Мүждә халгларын һамысына шәһадәт олараг бүтүн дүнјада тәблиғ олунаҹагдыр; вә сон о заман ҝәләҹәкдир» (Мат. 24:14).

Белә ҝениш мигјасда чатдырылмалы олан бу хәбәр конкрет олараг нәдән ибарәтдир? Бу, Исанын: «Сәлтәнәтин ҝәлсин», — дејә барәсиндә дуа етмәји өјрәтдији Падшаһлыг һагда хәбәрдир (Мат. 6:10). Вәһј 11:15 ајәсиндә о, јериндә олараг, «Рәббимизин [Јеһованын] вә Онун Мәсиһинин сәлтәнәти» кими тәсвир олунур, чүнки һакимијјәт сәлаһијјәтинин мәнбәји Јеһовадыр вә бу сәлаһијјәт Мәсиһә верилиб. Анҹаг диггәт јетир ки, Исанын бизим ҝүнләрдә тәблиғ олунаҹағыны дедији хәбәр биринҹи әсрдә онун шаҝирдләринин чатдырдығы хәбәрдән фәргли олараг, өзүнә даһа чох шеји дахил едир. Онлар халга дејирдиләр: «Аллаһын Сәлтәнәти сизә јахынлашды» (Лука 10:9). Һәмин вахт Падшаһ олмаг үчүн мәсһ олунмуш Иса онларын арасында иди. Лакин Матта 24:14 ајәсиндә јазылдығы кими, Иса Аллаһын нијјәтинин јеринә јетмәсиндә мүһүм рол ојнајан башга һадисәнин дә дүнја мигјасында бәјан едиләҹәјини пејғәмбәрлик етмишди.

Даниел пејғәмбәрә бу һадисә илә бағлы ҝөрүнтү верилмишди. О, ‘бәшәр оғлуна бәнзәр бирисинин’, Иса Мәсиһин ‘Әзәлдән Вар Оландан’, Јеһова Аллаһдан бүтүн халглара, милләтләрә вә дилләрә мәнсуб адамлар она хидмәт етсин дејә, һакимијјәт, иззәт вә падшаһлыг алдығыны ҝөрмүшдү (Дан. 7:13, 14). Бүтүн каинат үчүн бөјүк әһәмијјәт кәсб едән бу һадисә 1914-ҹү илдә ҝөјдә баш верди. Бундан сонра Шејтан вә онун ҹинләри јерә атылды (Вәһј 12:7-10). Көһнә систем өз ахыр ҝүнләрини јашамаға башлады. Лакин һәлә ки, о, тамамилә мәһв едилмәјиб бүтүн дүнјада Јеһованын мәсһ олунмуш Падшаһынын артыг сәмави тахтындан идарә етдији һагда хәбәр бәјан едилир. Бу хәбәр һамыја чатдырылыр. Инсанларын неҹә һај вермәси онларын Һагг-Таалаја «инсан падшаһлығы» үзәриндәки Һөкмдар кими неҹә мүнасибәт бәсләдикләрини ҝөстәрир (Дан. 4:32).

Ирәлидә исә бизи даһа мөһтәшәм һадисәләр ҝөзләјир! Биз һәлә дә: «Сәлтәнәтин ҝәлсин», — дејә дуа едирик, лакин бу, Аллаһын Падшаһлығынын ҝәләҹәкдә гурулаҹағыны билдирмир. Әксинә, бу сөзләрлә Падшаһлығын Даниел 2:44 вә Вәһј 21:2-4 ајәләриндәки кими пејғәмбәрликләри һәјата кечирмәк үчүн гәти һәрәкәтә кечәҹәји нәзәрдә тутулур. О, јер үзүнү Аллаһы вә инсанлары севән адамларын мәскун олаҹағы Ҹәннәтә чевирәҹәк. Инсанлара ‘сәмави Сәлтәнәт һаггында олан бу Мүждәни’ тәблиғ едәндә ҝәләҹәкдә баш верәҹәк һәмин һадисәләр һагда данышырыг. Бундан әлавә, биз әминликлә Јеһованын бүтүн һакимијјәти Өз Оғлуна һәвалә етдијини елан едирик. Падшаһлыг һаггында шаһидлик едәркән инсанларын диггәтини бу мүждәјә јөнәлдирсәнми?

Падшаһлығын нә демәк олдуғуну изаһ ет. Аллаһын Падшаһлығыны бәјан етмәк тапшырығыны неҹә јеринә јетирә биләрик? Инсанда мараг ојатмаг үчүн сөһбәтә мүхтәлиф мөвзулар һагда данышараг башласаг да, тезликлә ајдын олмалыдыр ки, чатдырдығымыз хәбәр Аллаһын Падшаһлығы һаггындадыр.

Бу ишин әсас һиссәси өзүнә Падшаһлыға аид ајәләри охумағы вә ја ситат ҝәтирмәји дахил едир. Падшаһлыг һаггында данышаркән инсанларын онун нә демәк олдуғуну баша дүшүб-дүшмәдијинә диггәт јетир. Садәҹә Аллаһын Падшаһлығынын һөкумәт олдуғуну сөјләмәк кифајәт етмәјә биләр. Бәзиләринә ҝөзлә ҝөрүнмәјән бир шеји һөкумәт кими тәсәввүр етмәк чәтин ҝәлир. Белә инсанлара мүхтәлиф дәлилләр ҝәтирмәк олар. Мәсәлән, биз ҹазибә гүввәсини ҝөрмүрүк, анҹаг онун бизим һәјатымыза ҝүҹлү тәсир етдији данылмаздыр. Биз ҹазибә ганунуну Јараданы ҝөрмәсәк дә, Онун бөјүк ҝүҹә малик олдуғуна шүбһә јохдур. Мүгәддәс Китаб Ону «әсрләрин Һөкмдары» адландырыр (1 Тим. 1:17). Јахуд дејә биләрсән ки, бөјүк өлкәләрдә инсанларын чоху һеч вахт өлкәнин пајтахтында олмамыш вә ја дөвләт башчысыны шәхсән ҝөрмәмишләр. Онлар бу һагда хәбәрләрдән ешидиб өјрәнирләр. Буна бәнзәр тәрздә, 2 200-дән чох дилдә нәшр олунан Мүгәддәс Китаб бизә Аллаһын Падшаһлығы һагда мәлумат верир; сәлаһијјәтин кимә верилдијини вә Падшаһлығын һал-һазырда нә етдијини ачыглајыр. Истәнилән дөври мәтбуатдан чох дилдә чыхан «Ҝөзәтчи Гүлләси», үз габығында јазылдығы кими, «Јеһованын Падшаһлығыны елан едир».

Падшаһлығын нә демәк олдуғуну баша салмаг үчүн адәтән инсанларын һакимијјәтдән ҝөзләдији бәзи шејләри — игтисади сабитлији, сүлһү, ҹинајәтдән мүдафиәни, бүтүн етник групларын бәрабәр һүгуга малик олмасыны, тәһсил вә тибби хидмәт алмаг имканыны гејд едә биләрсән. Инсанларын дүзҝүн арзуларынын јалныз Аллаһын Падшаһлығы васитәсилә там шәкилдә һәјата кечириләҹәјини ҝөстәр (Мәз. 145:16).

Инсанларын үрәјиндә Падшаһы Иса Мәсиһ олан Падшаһлығын тәбәәләри олмаг арзусу ојат. Онун сәмави Падшаһ кими ҝөрәҹәји ишләрин нүмунәси олан мөҹүзәләринә диггәти јөнәлт. Тез-тез тәзаһүр етдирдији ҝөзәл кејфијјәтләри һагда даныш (Мат. 8:2, 3; 11:28-30). Изаһ ет ки, о, бизим уғрумузда өз һәјатыны гурбан вериб вә бундан сонра Аллаһ ону дирилдәрәк ҝөјләрдә өлмәзлик бәхш едиб. Иса Падшаһ кими мәһз ҝөјләрдән идарә едир (Һәв. иш. 2:29-35).

Аллаһын Падшаһлығынын артыг ҝөјләрдән идарә етдијини вурғула. Лакин унутма ки, әксәр инсанлар Аллаһын Падшаһлығынын идарә етдијинә сүбут кими бу ҝүн дүнјада баш верәнләри јох, башга шејләри ҝөзләјирләр. Разылаш ки, чохлары белә дүшүнүрләр. Иса Мәсиһин сүбут кими һансы әламәти сөјләдијиндән хәбәрләри олуб-олмадығыны соруш. Матта 24, Марк 13 вә Лука 21-ҹи фәсилдә тәсвир олунан әламәти тәшкил едән ҹәһәтләрин бәзиләрини вурғула вә Мәсиһин ҝөјдә тахта чыхмасындан сонра дүнјанын нә үчүн бу вәзијјәтә дүшдүјүнү соруш. Онун диггәтини Вәһј 12:7-10, 12 ајәләринә јөнәлт.

Падшаһлығын һал-һазырда нә етдијини ҝөстәрмәк үчүн Матта 24:14 ајәсини оху, бу ҝүн һәјата кечирилән вә Мүгәддәс Китаба әсасланан үмумдүнја тәлим програмыны тәсвир ет (Јешаја 54:13). Јеһованын Шаһидләринин тәлим алдығы мүхтәлиф мәктәбләр һагда даныш. Бу мәктәбләр пулсуз кечирилир вә онларын програмы Мүгәддәс Китаба әсасланыр. Бизим 230-дан чох өлкә вә әразидә јалныз евдән-евә тәблиғ етдијимизи јох, һәм дә инсанлара ајры-ајрылыгда вә аиләви олараг пулсуз Мүгәддәс Китаб өјрәнмәси тәклиф етдијимизи сөјлә. Һансы инсан һакимијјәти нәинки өз вәтәндашлары үчүн, һәтта бүтүн дүнјадакы инсанлар үчүн бу ҹүр ҝениш тәһсил програмыны һәјата кечирә биләр? Бу тәһсилин инсанларын һәјатына неҹә тәсир етдијини ҝөрмәләри үчүн онлары Јеһованын Шаһидләринин Падшаһлыг Залына вә конгресләрә дәвәт ет (Јешаја 2:2-4; 32:1, 17; Јәһ. 13:35).

Бәс ев саһиби бунун шәхсән онун һәјатына һансы аидијјәти олдуғуну баша дүшәҹәкми? Нәзакәтлә изаһ етмәк олар ки, ҝәлишинин мәгсәди инсанларла һамынын гаршысында ачылан имкан — Аллаһын Падшаһлығынын тәбәәси олараг һәјаты сечмәк имканы һагда данышмагдыр. Бу сечими неҹә етмәк олар? Аллаһын тәләбләрини өјрәнмәклә вә артыг индидән онлара мүвафиг јашамагла (Ганун. т. 30:19, 20; Вәһј 22:17).

Инсанлара Падшаһлығы биринҹи јерә гојмаға көмәк ет. Падшаһлыг хәбәрини гәбул етдикдән сонра да инсана бир чох гәрарлар гәбул етмәк лазым ҝәләҹәк. Аллаһын Падшаһлығы онун һәјатында һансы јери тутаҹаг? Иса шаҝирдләрини ‘әввәлҹә Аллаһын Сәлтәнәтини ахтармаға’ тәшвиг едирди (Мат. 6:33). Һәмиманлыларымыза бу ишдә неҹә көмәк едә биләрик? Бу саһәдә өзүн јахшы нүмунә гојмаға чалыш вә буну етмәјин неҹә мүмкүн олдуғуну мүзакирә ет. Һәрдән инсанын мүәјјән имканлар һагда дүшүнүб-дүшүнмәдијини сорушмаг вә бу мәсәлә илә бағлы башгаларынын неҹә даврандыгларыны данышмаг олар. Мүгәддәс Китабдакы һадисәләри арашдыраркән инсанын Јеһоваја мәһәббәтини артырмаға чалыш. Падшаһлығын реал олдуғуну вурғула. Диггәти Падшаһлығын тәблиғ ишинин сон дәрәҹә ваҹиб олдуғуна јөнәлт. Чох вахт инсанлара онларын нә етмәли олдуғуну демәк јох, онларда буну етмәк истәји јаратмаг јахшы нәтиҹә верир.

Тамамилә ајдындыр ки, тәблиғ етмәли олдуғумуз ваҹиб хәбәр әсас диггәти Јеһова Аллаһа, Иса Мәсиһә вә Падшаһлыға јөнәлдир. Бунларла бағлы ваҹиб һәгигәтләр шаһидлик ишиндә, јығынҹаг ҝөрүшләриндә вә шәхси һәјатымызда вурғуланмалыдыр. Белә етмәклә ҝөстәририк ки, Теократик Хидмәт Мәктәбиндә алдығымыз тәлим бизә һәгигәтән дә фајда ҝәтирир.