Фәсил 21
Јеһованын нијјәти еҹазкар тәрздә һәјата кечир
1, 2. а) Јеһованын шүурлу мәхлугларла бағлы нијјәти нәдән ибарәтдир? б) Аллаһын Она бирликдә ибадәт едән аиләсинә кимләр дахил иди?
ЈЕҺОВАНЫН мәһәббәтдән доған нијјәти ондан ибарәтдир ки, бүтүн шүурлу мәхлуглар ваһид һәгиги Аллаһа ибадәтдә бирләшиб Аллаһын өвладларынын иззәтли азадлығына говушсунлар. Салеһлији севәнләр дә буну үрәкдән арзулајырлар.
2 Јеһова јарадылыш фәалијјәтинин илк анындан бу мөһтәшәм нијјәтини һәјата кечирмәјә башлады. Онун илк јаратдығы варлыг Оғул иди. Оғул өлүләрдән дириләндән сонра «Аллаһын иззәтинин нуру вә маһијјәтинин там сурәти» олду (Ибраниләрә 1:1-3). Бу Оғул јеҝанә шәхсијјәтдир ки, Аллаһ ону биләваситә Өзү јаратмышдыр. Галан һәр шеј исә — әввәлҹә ҝөјдәки мәләкләр, сонра јердәки инсанлар бу Оғул васитәсилә јарадылмышдыр (Әјјуб 38:7; Лука 3:38). Онлар бир аиләни тәшкил едирдиләр. Јеһова онларын һамысы үчүн Аллаһ, Каинатын Һөкмдары вә севән Ата иди.
3. а) Һамымыз илк валидејнләримиздән нәји мирас алмышыг? б) Јеһова Адәмин нәсли үчүн нә етди?
3 Илк валидејнләримиз гәсдән ҝүнаһ ишләтдикләри үчүн өлүмә мәһкум едилдиләр. Аллаһ онлары рәдд едиб Едендән говду. Онлар артыг Аллаһын аиләсинин үзвү дејилдиләр (Јарадылыш 3:22-24; Ганунун тәкрары 32:4, 5). Биз һамымыз онларын нәслијик, она ҝөрә дә ҝүнаһа мејлли доғулуруг. Лакин Јеһова билирди ки, Адәмлә Һәвванын нәслиндән бәзиләри салеһлији севәҹәкләр. Бу сәбәбдән онларын «Аллаһын өвладларынын иззәтли азадлығына» говушмалары үчүн мәһәббәтлә тәдбир ҝөрдү (Ромалылара 8:20, 21).
Исраил Аллаһын илтифатыны итирир
4. Јеһова гәдим Исраил халгына һансы үстүнлүјү вермишди?
4 Адәмин јарадылмасындан тәхминән 2 500 ил сонра Јеһова мүәјјән адамлара Өзү илә хүсуси мүнасибәт гурмаға имкан јаратды. О гәдим Исраили сечиб Өзүнә халг етди вә онлара Ганунуну верди (Јарадылыш 12:1, 2). Аллаһ исраиллиләри бир милләт кими формалашдырыб Өз нијјәтиндә онлара хүсуси јер ајырды (Ганунун тәкрары 14:1, 2; Јешаја 43:1). Анҹаг исраиллиләр ҝүнаһын вә өлүмүн көләси олараг галырдылар, онларын лап әввәлдә Адәмлә Һәвваја верилмиш иззәтли азадлығы јох иди.
5. Исраиллиләр Аллаһ илә хүсуси мүнасибәтләрини неҹә итирдиләр?
5 Бунунла белә Аллаһ исраиллиләрә илтифат ҝөстәрмишди. Онлар исә Аллаһа бир Ата кими еһтирам ҝөстәрмәли вә Онун ирадәсинә ујғун давранмалы идиләр. Иса да бунун ваҹиблијини вурғуламышды (Матта 5:43-48). Лакин Исраил халгы бу илтифаты доғрултмады. Һәрчәнд јәһудиләр «бизим бир Атамыз вар, О да Аллаһдыр» дејә иддиа етсәләр дә, Иса бу иддиаларын јалан олдуғуну онларын әмәлләриндән вә әһвал-руһијјәсиндән ҝөрүндүјүнү сөјләмишди (Јәһја 8:41, 44, 47). Аллаһ ерамызын 33-ҹү илиндә Гануну ләғв етди вә Исраил илә Өзү арасындакы хүсуси мүнасибәтә сон гојду. Бәс белә олдугда инсанлар нә вахтса Аллаһын илтифатына лајиг ҝөрүләҹәкдиләрми?
‘Ҝөјдәки шејләрин’ топланмасы
6. Һәвари Павелин Ефеслиләрә 1:9, 10 ајәләриндә хатырлатдығы «ишләрин идарәси» һансы мәгсәд үчүндүр?
6 Һәвари Павел ҝөстәрмишди ки, бәзи адамлар Аллаһ илә хүсуси мүнасибәт гура биләҹәкләр. Јеһова иманлыларын Онун ев сакинләри сырасына дахил ола билмәси үчүн тәдбир ҝөрдү. Павел бу барәдә белә јазмышды: «Аллаһ... Өз илтифатына ҝөрә, Өз ирадәсинин сиррини бизә билдирди. Вахт тамам олдугда [“ишләрин идарәси васитәсилә”, ЈД] иҹра едиләҹәк бу нијјәт, һәм ҝөјләрдә, һәм дә јердә олан һәр шеји Мәсиһин башчылығы алтында бирләшдирмәкдир» (Ефеслиләрә 1:9, 10). Бу ‘ишләрин идарәсиндә’ башлыҹа ролу Иса Мәсиһ иҹра едир. Онун васитәсилә инсанлар Аллаһын илтифатыны газана биләрләр. Сајҹа мәһдуд инсан ҝөјдә јашамаға үмид бәсләјир. Сајы гат-гат чох инсан исә јер үзүндә әбәди јашајаҹаг.
7. ‘Ҝөјдәки шејләр’ кимләрдән ибарәтдир?
7 Ерамызын 33-ҹү илинин Пентикост ҝүнүндән башлајараг диггәт илк нөвбәдә ‘ҝөјдәки шејләрә’, јәни Сәмави Падшаһлыгда Мәсиһлә һакимијјәт шәрики олаҹаг адамлара јөнәлдилди. Исанын гурбанлығынын фидијә дәјәринә иман ҝәтирдикләри үчүн Аллаһ онлары салеһ бәјан едир (Ромалылара 5:1, 2). Сајы 144 000 олаҹаг ‘ҝөјдәкиләрә’ сонрадан һәм јәһудиләр, һәм дә гејри-јәһудиләр дахил едилдиләр (Галатијалылара 3:26-29; Вәһј 14:1). Онларын кичик бир галығы һәлә јердә јашајыр.
‘Јердәки шејләрин’ топланмасы
8. ‘Јердәки шејләрә’ кимләр аиддир вә онлар Јеһова илә неҹә мүнасибәтдәдирләр?
8 «Ишләрин идарәси» һәмчинин ‘јердәки шејләрин’ топланмасына да сирајәт едир. Инди јер үзүндә әбәди јашамаға үмид едән милјонларла инсан топланыр. Падшаһлығын варисләринин галығы илә бирликдә онлар Јеһованын адыны вә Она ибадәти уҹа тутурлар (Јешаја 2:2, 3; Сефанја 3:9). Онлар да Јеһоваја «Ата» дејә мүраҹиәт едирләр, чүнки О һәјат мәнбәјидир. Исанын төкүлмүш ганына инандыглары үчүн онлар Аллаһын илтифатыны газанырлар (Вәһј 7:9, 14). Лакин һәлә гејри-камил олдугларындан онлар јалныз ҝәләҹәкдә сөзүн әсл мәнасында Аллаһын өвладлары олаҹаглар.
9. Ромалылара 8:21 ајәсиндә бәшәријјәтә нә вәд едилир?
9 Јердә јашамаға үмид бәсләјәнләр бәшәријјәтин ‘чүрүклүјә олан көләликдән азад олунаҹағы’ вахты сәбирсизликлә ҝөзләјирләр (Ромалылара 8:21). Бу азадлыг Мәсиһ ҝөјдәки ордусу илә Һар-Меҝидонда бөјүк мәшәггәти сона чатдыранда башлајаҹаг. Шејтанын пис системи тамамилә јох едиләҹәк, ону боллуҹа немәтләр ҝәтирәҹәк Падшаһ Мәсиһин Миниллик һакимијјәти әвәз едәҹәк (Вәһј 19:17-21; 20:6).
10. Јеһованын хидмәтчиләри һансы һәмд нәғмәсини охујаҹаглар?
10 Јеһованын јер үзүндәки хидмәтчиләри сәсләрини Онун ҝөјдәки хидмәтчиләринин сәсинә гошанда неҹә дә мөһтәшәм шәнлик олаҹаг! Ҝөјдәки хидмәтчиләр фәрәһлә охујурлар: «Еј Күлл-Ихтијар Рәбб Аллаһ! Сәнин әмәлләрин бөјүк вә харигуладәдир. Еј милләтләрин Һөкмдары! Сәнин јолларын доғру вә һәгигидир. Ја Рәбб! Ким Сәндән горхмајаҹаг вә Сәнин адыны иззәтләндирмәјәҹәкдир? Чүнки јалныз Сән мүгәддәссән. Бүтүн халглар ҝәләҹәк вә Сәнин өнүндә сәҹдә едәҹәкләр; чүнки Сәнин адил ишләрин изһар олунду» (Вәһј 15:3, 4). Бәли, Јеһованын бүтүн хидмәтчиләри ваһид һәгиги Аллаһа ибадәтдә бирләшәҹәкләр. Һәтта өлүләр дә дирилдилиб Јеһованы һәмд едәнләрә гошулаҹаглар (Һәвариләрин ишләри 24:15).
Гаршыда еҹазкар азадлыг ҝөзләнилир
11. Бөјүк мәшәггәтдә сағ галанлара һансы еҹазкар азадлыг нәсиб олаҹаг?
11 Сон һәдди Һар-Меҝидонла баша чатаҹаг бөјүк мәшәггәт Јер күрәсини писликдән тәмизләдикдән сонра Шејтан Иблис һеч вахт «бу әсрин танрысы» олмајаҹаг. Јеһоваја ибадәт едәнләрә бир даһа Шејтанын пис тәсиринә гаршы дурмаг лазым ҝәлмәјәҹәк (2 Коринфлиләрә 4:4; Вәһј 20:1, 2). Јалан дин артыг Јеһова һаггында һәгигәти тәһриф етмәјәҹәк вә инсан ҹәмијјәтинә парчалајыҹы тәсир ҝөстәрмәјәҹәк. Һәгиги Аллаһын хидмәтчиләри һагсызлыға вә һакимијјәт органлары тәрәфиндән тәгибләрә мәруз галмајаҹаглар. Ҝөр неҹә дә еҹазкар бир азадлыг олаҹаг!
12. Һәр кәс ҝүнаһ вә онун нәтиҹәләриндән неҹә гуртулаҹаг?
12 «Дүнјанын ҝүнаһыны арадан галдыран Аллаһ Гузусу» Иса бәшәријјәтин ҝүнаһыны силмәк үчүн өзүнүн фидијә гурбанлығынын дәјәрини тәтбиг едәҹәк (Јәһја 1:29). Иса јердә оланда киминсә ҝүнаһыны бағышлајаркән сүбут үчүн һәмин инсаны сағалдырды (Матта 9:1-7; 15:30, 31). Мәсиһ Иса сәмави Падшаһлығын Падшаһы кими корлары, карлары, шикәстләри, руһи хәстәләри вә башга нөв хәстәликләрдән әзаб ҹәкәнләри мәһз бу ҹүр, мөҹүзә илә сағалдаҹаг (Вәһј 21:3, 4). Бүтүн итаәткар инсанлар ‘ҝүнаһын ганунунун’ тәсириндән азад олунаҹаглар. О заман онларын фикирләри вә әмәлләри һәм өзләринә, һәм дә Аллаһа хош олаҹаг (Ромалылара 7:21-23). Миниллијин сонунда бу адамлар камиллијә јетишәрәк ваһид һәгиги Аллаһын сурәтиндә вә бәнзәриндә олаҹаглар (Јарадылыш 1:26).
13. Мәсиһ Миниллик һакимијјәтин сонунда нә едәҹәк вә бунун нәтиҹәси нә олаҹаг?
13 Мәсиһ бәшәријјәти камиллијә чатдырандан сонра бу иши јеринә јетирмәк үчүн алдығы һакимијјәти Атасына гајтараҹаг: «О һәр рәјасәт, һәр һакимијјәт вә гүдрәти ләғв едиб, сәлтәнәти Ата Аллаһа тәслим етдији заман, сон ҝәлмиш олаҹагдыр. Чүнки Аллаһ Онун бүтүн дүшмәнләрини ајагларынын алтына салынҹаја кими О, сәлтәнәт сүрмәлидир» (1 Коринфлиләрә 15:24, 25). Падшаһлыг миниллик һакимијјәти әрзиндә гаршысына гојулмуш тапшырығы там јеринә јетирәҹәк. Артыг Јеһова илә инсанлар арасында дуран бу јардымчы һакимијјәтә еһтијаҹ галмајаҹаг. Ҝүнаһ вә өлүм јох едилиб бәшәријјәт азад олдуғу үчүн, Исанын Хиласкар ролу баша чатаҹаг. Мүгәддәс Китабда дејилир: «Оғулун Өзү дә, Она һәр шеји табе Етдирәнә табе олаҹаг ки, Аллаһ һәр шејдә һәр шеј олсун» (1 Коринфлиләрә 15:28).
14. Камиллијә јетмиш бүтүн инсанларла нә олаҹаг вә нә үчүн?
14 Бундан сонра камиллијә јетмиш инсанлара Аллаһа әбәдијјән хидмәт етмәк истәдикләрини сүбут етмәк үчүн имкан вериләҹәк. Елә буна ҝөрә дә Јеһова камиллијә јетмиш бүтүн инсанлары Өз өвладлары кими гәбул етмәздән габаг онлары ахырынҹы дәфә сынагдан кечирәҹәк. Шејтан вә онун ҹинләри дибсиз дәринликдән бурахылаҹаг. Јеһованы үрәкдән севәнләр үчүн бунун һеч бир тәһлүкәси олмајаҹаг. Аллаһа итаәтсизлик ҝөстәрәрәк хәјанәткар чыханлар, илк үсјанкар вә онун ҹинләри илә бирликдә һәмишәлик мәһв едиләҹәкләр (Вәһј 20:7-10).
15. Јеһованын јаратдығы бүтүн шүурлу мәхлуглар јенидән нәјә севинәҹәкләр?
15 Јеһова ахырынҹы сынаг заманы Онун һакимијјәтини дәстәкләјән бүтүн камил инсанлары Өз өвладлары кими гәбул едәҹәк. Һәмин вахтдан етибарән онлар Аллаһын аиләсинин бир һиссәси олмагла Аллаһын өвладларынын иззәтли азадлығыны там дадаҹаглар. Ҝөјдәки вә јердәки бүтүн шүурлу мәхлуглар јенә дә ваһид һәгиги Аллаһа ибадәтдә бирләшәҹәкләр. Јеһованын нијјәти еҹазкар тәрздә һәјата кечәҹәк! Әбәдијјәт боју өмүр сүрәҹәк бу ваһид, хошбәхт аиләнин үзвү олмаг истәјирсәнми? Елә исә, биз сәни Мүгәддәс Китабын «дүнја вә онун еһтирасы кечиб ҝедир, амма Аллаһын ирадәсини јеринә јетирән әбәди јашајыр» сөзләрини үрәкдән мәнимсәмәјә дәвәт едирик (1 Јәһја 2:17).
Тәкрар үчүн суаллар
• Едендәки үсјандан әввәл Јеһова илә Она ибадәт едәнләр арасында неҹә мүнасибәт вар иди?
• Аллаһа хидмәт едәнләрдән нә тәләб олунур?
• Ҝәләҹәкдә кимләр Јеһованын өвлады олаҹаг вә бу, Аллаһын ибадәтдә бирлик нијјәти илә неҹә бағлыдыр?
[190-ҹы сәһифәдәки шәкил]
Итаәткар инсанлар Ҹәннәтә чеврилмиш јер үзүндә јашајаҹаглар