‘Һөкм вахты’ ҝәлиб

МҮГӘДДӘС КИТАБЫН “Вәһј” адлы сонунҹу китабында ҝөјүн ортасында учан вә севинҹ тәблиғ етмәк үчүн “әбәди бир Мүждәси” олан мәләк тәсвир олунур. О, уҹа сәслә бәјан едир: “Аллаһдан горхун! Она иззәт верин! Чүнки Онун һөкмүнүн вахты ҝәлди” (Вәһј 14:6, 7). ‘Һөкм вахты’ өзүнә һәм Аллаһын һөкмүнүн бәјан едилмәсини, һәм дә онун һәјата кечирилмәсини дахил едир. Бу “вахт”, јашадығымыз “ахыр ҝүнләрин” зирвәсини тәмсил едир (2 Тимотејә 3:1).

‘Һөкм вахтынын’ ҝәлмәси, салеһлији севәнләр үчүн хош хәбәрдир. Бу елә бир вахтдыр ки, Аллаһ нифрәт вә зоракылыгла долу олан бу дүнјада изтираб чәкән хидмәтчиләрини азад едәҹәк.

‘Һөкм вахты’ буҝүнкү пис дүнјанын мәһви илә баша чатмаздан әввәл, биз тәшвиг олунуруг: “Аллаһдан горхун! Она иззәт верин!” Сән бу сөзләрә мүвафиг давранырсанмы? Бу өзүнә, садәҹә сөздә “Мән Аллаһа инанырам” демәкдән даһа чох шеј дахил едир (Матта 7:21-23; Јагуб 2:19, 20). Әҝәр биз Аллаһа мәгбул горхуја маликиксә, онда Она гаршы еһтирам һисси дујаҹағыг. Бу ҹүр горху бизи пис әмәлләрдән узаглашмаға тәшвиг едәҹәк (Сүлејманын мәсәлләри 8:13). Һәмчинин белә горху хејирхаһлығы севмәк вә пис әмәлләрә нифрәт етмәк үчүн дә јахшы көмәкдир (Амос 5:14, 15). Әҝәр биз Аллаһа һәмд едириксә, онда Онун бизә дедикләринә хүсусилә диггәт јетирәҹәјик. Башымыз башга ишләрлә о дәрәҹәдә гарышмајаҹаг ки, Онун Кәламы олан Мүгәддәс Китабы мүнтәзәм олараг охумаға вахт тапмајаг. Биз һәр заман вә бүтүн үрәјимизлә Аллаһа ҝүвәнәҹәјик (Мәзмур 62:8; Сүлејманын мәсәлләри 3:5, 6). Јеһоваја һәгигәтән һәмд едәнләр әминдирләр ки, Аллаһ јерин вә ҝөјүн Јараданы олдуғу үчүн Каинатын Һөкмдарыдыр; онлар бүтүн мәхлугларын үзәриндә һөкмранлыг етмәк һүгугуна малик олан Аллаһа мәмнунијјәтлә табе олурлар. Әҝәр биз бу саһәләрдән һансындаса јахшылашмалы олдуғумузу баша дүшүрүксә, онда ҝәлин ләнҝимәдән тәдбир ҝөрәк.

Мәләјин бәјан етдији һөкмүн јеринә јетириләҹәји вахт, һәмчинин “Јеһованын ҝүнү” (ЈД) адланыр. Гәдим Јерусәлимин сакинләри Јеһованын Өз пејғәмбәрләри васитәсилә онлара вердији хәбәрдарлыглара диггәт јетирмәдикләринә ҝөрә, һәмин “ҝүн” онлар үчүн б. е. ә. 607-ҹи илдә ҝәлди. Онлар Јеһованын ҝүнүнү јаддашларында тә’хирә салмагла, һәјатларыны тәһлүкә алтына атырдылар. Јеһова онлары хәбәрдар етди ки, Онун ҝүнү “јахындыр вә чох тез ҝәлир” (Тсефанја 1:14). Јеһованын башга бир “ҝүнү” исә б. е. ә. 539-ҹу илдә гәдим Бабил үчүн ҝәлди (Ишаја 13:1, 6). Өз истеһкамларына вә аллаһларына ҝүвәндикләри үчүн, бабиллиләр Јеһованын пејғәмбәрләринин хәбәрдарлыгларына фикир вермәдиләр. Бир ҝеҹәнин ичиндә Бөјүк Бабил мидијалылар вә фарслар тәрәфиндән зәбт едилди.

Биз бу ҝүн нә илә үз-үзә дурмушуг? Јеһованын даһа ваҹиб олан башга бир ҝүнү илә (2 Петер 3:11-14). Аллаһын һөкмү “бөјүк Бабил”ә гаршы бәјан едилиб. Вәһј 14:8 ајәсинә әсасән мәләк уҹадан дејир: “Јыхылды!.. бөјүк Бабил шәһәри јыхылды!” Бу артыг баш вермишдир. Бу шәһәр бир даһа Јеһованын хидмәтчиләрини өз әсарәти алтына ала билмәјәҹәк. Онун сатгынлығы вә мүһарибәләрдә иштирак етдији артыг һамыја мә’лумдур. Тезликлә о тамамилә мәһв едиләҹәк. Бу сәбәбдән Мүгәддәс Китабда олан чағырыш бу ҝүн бүтүн инсанлара јөнәлдилиб: “Еј халгым, орадан [Бөјүк Бабил шәһәриндән] чыхын ки, онун ҝүнаһларына шәрик олмајасыныз вә онун бәлаларынын биринә дүчар олмајасыныз. Чүнки онун ҝүнаһлары ҝөјә гәдәр чатды вә Аллаһ онун һагсызлыгларыны јада салды” (Вәһј 18:4, 5).

Бөјүк Бабил нәдир? Бу, гәдим Бабил илә охшар хүсусијјәтләрә малик олан үмумдүнја дин системидир (Вәһј 17, 18-ҹи фәсилләр). Бу хүсусијјәтләрин бә’зиләрини нәзәрдән кечирәк.

• Гәдим Бабилин каһинләри сијаси ишләрдә чох иштирак едирдиләр. Бу ҝүн бир чох дин хадимләри дә ејни тәрздә давранырлар.

• Бабилин каһинләри чох вахт өз өлкәләринин мүһарибәләрдә иштирак етмәсини дәстәкләјирдиләр. Бизим ҝүнләрдә мүһарибәләр заманы чох вахт дин рәһбәрләринин әсҝәрләрә неҹә хејир-дуа вердикләрини ҝөрмәк олар.

• Гәдим Бабилин тә’лим вә ајинләри халгын сон дәрәҹәдә әхлагсызлашмасына сәбәб олурду. Индики дин рәһбәрләри Мүгәддәс Китабын әхлаг нормаларыны инкар етдикләринә ҝөрә, руһаниләр вә ибадәтә ҝәләнләр арасында әхлагсызлыг ҝениш јајылмышдыр. Һәмчинин диггәтәлајиг олан факт одур ки, бу дүнја вә онун сијаси системи илә фаһишәлик едән Бөјүк Бабил “Вәһј” китабында фаһишә кими тәсвир олунур.

• Мүгәддәс Китабда һәмчинин дејилир ки, Бөјүк Бабил “күстаһ шәһвәтпәрәстлик ичиндә” јашајыр. Гәдим Бабилдә мә’бәдләрә бөјүк торпаг саһәләри мәхсус иди, каһинләр исә коммерсија фәалијјәти илә мәшһур идиләр. Бу ҝүн Бөјүк Бабил дини биналара малик олмагдан башга, ҝениш коммерсија фәалијјәтилә дә мәшғулдур. Онун тә’лимләри вә бајрамлары неҹә ки өзүнә, еләҹә дә ишҝүзар аләмин диҝәр нүмајәндәләринә бөјүк ҝәлир ҝәтирир.

• Бу ҝүн дүнјанын бир чох јерләриндә олдуғу кими, гәдим Бабилдә дә сурәтләрә ибадәт, маҝија вә ҹадуҝәрлик ҝениш јајылмышды. Өлүмә бир һәјатдан диҝәр һәјата кечид кими бахырдылар. Бабилдә мүхтәлиф аллаһларын шәрәфинә уҹалдылмыш чохлу бөјүк вә кичик мә’бәдләр вар иди, Јеһоваја ибадәт едәнләрә исә бабиллиләр дүшмәнҹәсинә јанашырдылар. Ејни е’тигад вә адәт-ән’әнәләр бу ҝүн Бөјүк Бабилә дә хасдыр.

Гәдим заманларда сијаси вә һәрби ҹәһәтдән гүввәтли олан дөвләтләрдән истифадә едәрәк, Јеһова Она вә Онун ирадәсинә лагејдлик ҝөстәрәнләри ҹәзаландырды. Мәсәлән, б. е. ә. 740-ҹы илдә Самарија ассуријалылар тәрәфиндән дағыдылды. Б. е. ә. 607-ҹи илдә Јерусәлим бабиллиләр тәрәфиндән вә б. е. 70-ҹи илиндә ромалылар тәрәфиндән дағыдылды. Бабилин өзү исә б. е. ә. 539-ҹу илдә мидијалылар вә фарслар тәрәфиндән ишғал едилди. Бизим јашадығымыз ҝүнләр һаггында Мүгәддәс Китабда габагҹадан дејилмишдир ки, сијаси һөкумәтләр, вәһши һејван кими, “фаһишәјә” һүҹум едәҹәкләр. Онлар онун әсл маһијјәтини ифша едәрәк, ону чылпаг гојаҹаг вә тамамилә мәһв едәҹәкләр (Вәһј 17:16).

Бу дүнјанын һөкумәтләри һәгигәтәнми белә давранаҹаглар? Мүгәддәс Китабда дејилир ки, буну “Аллаһ онларын үрәјинә” салаҹаг (Вәһј 17:17). Бу јаваш-јаваш јох, гәфилдән, сарсыдыҹы тәрздә баш верәҹәк.

Сән һансы тәдбири ҝөрмәлисән? Өзүндән соруш: “Тә’лим вә адәт ән’әнәләрлә мурдарландығы үчүн ону Бөјүк Бабилин бир һиссәси едән дини тәшкилатла индијә кими мәним бир әлагәм вармы?” Һәтта белә бир динә мәнсуб олмасан да өзүндән соруша биләрсән: “Онун руһунун мәнә тә’сир ҝөстәрмәсинә јол верирәмми?” Бурада сөһбәт нәдән ҝедир? Әхлагсыз һәрәкәт тәрзинә јол верән руһдан, мадди шејләри вә зөвгү Аллаһдан даһа чох севмәкдән вә ја һәтта ҹүз’и мәсәләләрдә белә Јеһованын Кәламына биләрәкдән е’тинасызлыг ҝөстәрмәкдән. Бу саһәләрдә өзүнү диггәтлә јохла.

Јеһованын бизә илтифат ҝөстәрмәси үчүн һәм әмәлләримизлә, һәм дә үрәјимиздә олан арзуларла сүбут етмәлијик ки, Бөјүк Бабил илә һеч бир әлагәмиз јохдур. Инди јубанмағын вахты дејил. Мүгәддәс Китаб бизә сонун гәфләтән ҝәләҹәји һагда хәбәрдарлыг едәрәк дејир: “Бөјүк шәһәр Бабил... шиддәтлә девриләҹәкдир вә артыг тапылмајаҹагдыр” (Вәһј 18:21).

‘Һөкм вахтынын’ диҝәр ҹәһәти дә одур ки, Јеһова Аллаһ дүнјанын сијаси системини, онун рәһбәрләрини вә Иса Мәсиһ башда олмагла сәмави Падшаһлыг васитәсилә Аллаһын һәјата кечирдији әдаләтли һакимијјәтә тәрәфдар олмајанлары мәс’улијјәтә ҹәлб едәҹәк (Вәһј 13:1, 2; 19:19-21). Даниел 2:20-45 ајәләриндә јазылан пејғәмбәрлик рө’јасында гызылдан, ҝүмүшдән, мисдән, дәмирдән вә ҝилдән дүзәлдилмиш бөјүк бир һејкәл тәсвир олунур. О, гәдим Бабилдән башлајараг бизим ҝүнләрә кими мөвҹуд олан сијаси һакимијјәтләри тәмсил едир. Бизим ҝүнләрә даир пејғәмбәрликдә дејилир: “Ҝөјләрин Аллаһы әбәдијјән дағылмајаҹаг бир падшаһлыг гураҹаг”. Һәмчинин Мүгәддәс Китабда бу Падшаһлығын Јеһованын ‘һөкм ҝүнүндә’ нә едәҹәји һагда да дејилир: ‘[Инсан] падшаһлыгларынын һамысыны о парчалајаҹаг вә мәһв едәҹәк, өзү исә әбәдијјән дураҹаг’ (Даниел 2:44).

Мүгәддәс Китаб Аллаһын һәгиги ибадәтчиләрини “дүнјада олан шејләри”, јә’ни Аллаһдан узаглашмыш дүнјаја хас олан һәјат тәрзини севмәкдән чәкиндирир (1 Јәһја 2:15-17). Сәнин гәрарларын вә ишләрин тамамилә Аллаһын Падшаһлығына тәрәфдар олдуғуну ҝөстәрирми? Һәгигәтәнми Падшаһлыг сәнин һәјатында башлыҹа јери тутур? (Матта 6:33; Јәһја 17:16, 17).

[14-ҹү сәһифәдә олан чәрчивәләр]

Сон нә заман ҝәләҹәк?

“Инсан Оғлу сизин зәнн етмәдијиниз саатда ҝәләҹәкдир” (Матта 24:44).

“Ојаг дурун, чүнки сиз нә... ҝүнү вә нә дә сааты билирсиниз” (Матта 25:13).

“Ҝеҹикмәјәҹәк” (Һабаккук 2:3).

Әҝәр билсәјдин, башга ҹүр јашамаға башлајардынмы?

Әҝәр сән Аллаһын һөкм вахтынын јахын бир нечә ил әрзиндә баш вермәјәҹәјини дәгиг билсәјдин, башга ҹүр јашамаға башлајардынмы? Әҝәр бу пис дүнја системинин сону сән ҝөзләдијин вахтда ҝәлмәјибсә, Јеһоваја хидмәтдә зәифләмисәнми? (Ибраниләрә 10:36-38).

Аллаһын һөкм вахтыны дәгиг билмәмәјимиз бизә имкан верир ки, Аллаһа тәмиз нијјәтлә хидмәт етдијимизи ҝөстәрәк. Јеһованы таныјанлар баша дүшүрләр ки, һәр кәсин үрәјини ҝөрән Аллаһа билаваситә сон ҝәлмәздән әввәл ҝөстәрилән сә’јлә тәәссүрат бағышламаг мүмкүн дејил (Јеремја 17:10; Ибраниләрә 4:13).

Јеһова, Ону һәгигәтән севәнләрин һәјатында ән башлыҹа јери тутур. Башга инсанлар кими, Мәсиһин һәгиги давамчылары да өзләринин ҝүндәлик тәләбатларынын гајғысына галмалыдырлар. Лакин онларын мәгсәди варланмаг јох, өзләрини зәрури олан шејләрлә тә’мин етмәк вә еһтијаҹы оланлара көмәк ҝөстәрмәк имканына малик олмагдыр (Ефеслиләрә 4:28; 1 Тимотејә 6:7-12). Һәмчинин онлар фајдалы истираһәтә вә вәрдиш етдикләри һәјат ритминин дәјишилмәсинә севинирләр. Лакин онлар бу дүнјанын истираһәт тәрзини тәглид етмирләр, амма чалышырлар ки, истираһәт онлары тәравәтләндирсин (Марк 6:31; Ромалылара 12:2). Иса Мәсиһ кими, онлар да Аллаһын ирадәсини јеринә јетирмәкдән мәмнунлуг дујурлар (Мәзмур 37:4; 40:8).

Мәсиһин һәгиги давамчылары Јеһоваја әбәдијјән хидмәт едәрәк јашамаг истәјирләр. Бә’зи хејир-дуалары башланғыҹда дүшүндүјүмүздән бир гәдәр артыг ҝөзләмәли олдуғумуз үчүн, бу үмид һеч дә өз дәјәрини итирмир.

[15-ҹи сәһифәдә олан чәрчивә вә шәкил]

Һөкмранлыға даир мүбаһисәли суал

Аллаһын бу гәдәр изтираблара нәјә ҝөрә јол вердијини анламаг үчүн, биз әввәлҹә һөкмранлыға даир мүбаһисәли суалын нәдән ибарәт олдуғуну баша дүшмәлијик.

Јеһова Јарадан олдуғу үчүн, Јер вә онун бүтүн сакинләри үзәриндә һөкмранлыг етмәк һүгугуна маликдир. Лакин Мүгәддәс Китабда изаһ олунур ки, бәшәр тарихинин башланғыҹында Јеһованын һөкмранлыг етмәк һүгугу суал алтына гојулмушдур. Шејтан Иблис иддиа едирди ки, Јеһова инсанларла һәддиндән артыг сәрт давраныр вә вердији ганунларына итаәтсизлик ҝөстәрмәјин нәтиҹәләринә даир улу валидејнләримизә јалан сөјләмишдир. Һәмчинин Иблис иддиа едирди ки, онлар тамамилә Аллаһсыз кечинә биләрләр вә Аллаһдан асылы олмајан һакимијјәт формасы онлар үчүн ән јахшысы олаҹаг (Тәквин 2, 3-ҹү фәсилләр).

Әҝәр Аллаһ үсјанчылары дәрһал мәһв етсәјди, О бунунла Өз гүдрәтини тәзаһүр етдирмиш оларды, лакин галдырылан мүбаһисәли суал һәлл олунмамыш галарды. Буна ҝөрә дә Јеһова јол верди ки, бүтүн шүурлу варлыглар үсјанын нә илә нәтиҹәләнәҹәјини ҝөрсүнләр. Бу јолда инсанлары изтираблар ҝөзләмәсинә бахмајараг, онлара дүнјаја ҝәлмәк имканы верилди.

Бундан әлавә, бу, Јеһоваја чох баһа баша ҝәлсә дә, О, Өз Оғлуну фидијә гурбаны кими мәһәббәтлә тәгдим етди. Бунун сајәсиндә, бу гурбанлыға иман ҝәтирән вә Аллаһа итаәт едән бүтүн инсанларын ҝүнаһ вә онун нәтиҹәләриндән азад олунуб Ҹәннәтдә јашамаг имканлары олаҹагдыр. Өлүләрә исә бу ҹүр имкан дирилмә васитәсилә тәгдим олунаҹагдыр.

Һәмчинин мүбаһисәли суалын һәллинә ајрылан вахт сајәсиндә имкан јаранды ки, Аллаһын хидмәтчиләри Онун мәһәббәтинә ҝөрә миннәтдар олдугларыны әмәлләриндә ҝөстәрсинләр вә ән мүхтәлиф вәзијјәтләрдә белә Јеһованын гаршысында нөгсансызлыгларыны горујуб сахласынлар. Аллаһын һөкмранлығына даир мүбаһисәли суалын вә онунла бағлы олан инсанларын нөгсансызлығына даир мәсәләнин һәлли, Каинатдакы бүтүн сүурлу варлыгларын Аллаһын ганунуна лазыми һөрмәтлә јанашмалары үчүн олдугҹа ваҹибдир. Бу ҹүр һөрмәт олмадан, һәгиги сүлһүн олмасы гејри-мүмкүндүрa.

Сијаси һакимијјәтин дүнја системи өз сонуна чатаҹаг.

[Һашијәләр]