«Мәсиһи һәјаты вә ибадәти. Иш дәфтәри» үчүн мәнбәләр
ИЈУН
*** w99-Е 15/9 с. 9 ***
Әһдә садиг галмаг ваҹибдир
Аллаһа вердијимиз вәдләрә садиг галмалыјыг
Вердијимиз һеч бир вәд өзүмүзү Аллаһа һәср етмәјимиз гәдәр ваҹиб ола билмәз. Өзүмүзү Аллаһа һәср етмәклә ҝөстәририк ки, биз әбәдијјән Јеһоваја хидмәт етмәк истәјирик. Дүздүр, Аллаһын әмрләри ағыр дејил. Анҹаг нә гәдәр ки бу шәр дүнјада јашајырыг бәзән Аллаһын ирадәсини јеринә јетирмәк асан олмур (2 Тимутијә 3:12; 1 Јәһја 5:3). Лакин бир һалда ки, биз әлимизи хышын үстүнә гојмушуг, өзүмүзү Јеһоваја һәср едиб Онун хидмәтчиси вә Оғлу Иса Мәсиһин шаҝирди олмушуг, ҝәрәк архада гојдуғумуз дүнјадакы шејләрә бахмајаг (Лука 9:62).
Бәзән дуа едәндә һансыса бир зәиф ҹәһәтимизи дүзәлдәҹәјимизи, өзүмүздә мүәјјән мәсиһи кејфијјәтини јетишдирәҹәјимизи, јахуд руһани фәалијјәтин мүәјјән јөнүндә јахшылашаҹағымызы Јеһоваја вәд едирик. Бу вәдләри јеринә јетирмәјә бизә нә көмәк едә биләр? (Ваиз 5:2—5 ајәләри илә мүгајисә един.)
Инсан сәмими олараг вәд едәркән буну ағылла, дүшүнәрәк едир, амма ону бу вәди вермәјә һәм дә үрәк сөвг едир. Буна ҝөрә дә Јеһоваја нә исә вәд едәркән ҝәрәк үрәјимизи дуада Она ачаг, нәдән горхдуғумузу, арзуларымызы, зәиф ҹәһәтләримизи Она дүрүстҹәсинә билдирәк. Етдијимиз вәд барәдә дуа етсәк, бу вәдә садиг галмаға гәтијјәтли олаҹағыг. Аллаһа вердијимиз вәдләрә борҹ кими бахмаг олар. Борҹ бөјүк оланда ону јаваш-јаваш гајтарырлар. Ејнилә, Јеһоваја вердијимиз бир чох вәдләри јеринә јетирмәк үчүн вахт лазымдыр. Амма Она мүнтәзәм олараг баҹардығымызы версәк, ҝөстәрәҹәјик ки, сөзүмүзүн үстүндә дуруруг, О да әвәзиндә бизә хејир-дуа верәҹәк.
Биз вәдләримиз барәдә тез-тез, һәр ҝүн дуа етсәк, вердијимиз вәдләрә ҹидди јанашдығымызы ҝөстәрәҹәјик. Бунунла сәмави Атамыза нијјәтимизин саф олдуғуну билдирәҹәјик. Һәм дә вәдләр барәдә дуа етсәк, онлар һәмишә бизим јадымызда олаҹаглар. Давуд бу саһәдә бизим үчүн ҝөзәл нүмунә гојуб. О, бир мәзмурда Јеһоваја јалварырды: Еј Аллаһым, фәрјадымы ешит, дуамы динлә... Дүнја дурдугҹа адыны нәғмәләрдә тәрәннүм едәрәм, нәзирләрими һәр ҝүн јеринә јетирәрәм (Зәбур 61:1, 8).
*** it-2-Е с. 668. Дуа ***
Аллаһ кимләрин дуаларыны ешидир?
Һәр ҹүр инсан дуалары ешидән Јеһова Аллаһын һүзуруна ҝәлә биләр (Зб 65:2; Һв 15:17). Һәтта Исраил халгы Аллаһын әмлакы оланда, Јеһова әһд кәсиб онлары Өзүнә халг сечәндә дә јаделлиләр дуада Јеһоваја јахынлаша биләрдиләр. Бунун үчүн онлардан тәләб олунурду ки, Исраили Аллаһын тәјин етдији васитә кими, Јерусәлимдәки мәбәди исә гурбан тәгдим етмәк үчүн сечдији јер кими гәбул етсинләр (Гн 9:29; 2См 6:32, 33; Әш 19:22 ајәси илә мүгајисә ет). Сонралар, Мәсиһ өлүмү илә јәһудиләрлә диҝәр халглар арасындакы фәрги һәмишәлик арадан галдырды (Еф 2:11—16). Италијалы Корнилинин евиндә Бутрус баша дүшдү ки, Аллаһ ајры-сечкилик етмәјән Аллаһдыр, һәр халгын ичиндә Ондан горхан вә дүзҝүн иш ҝөрән адамдан разыдыр (Һв 10:34, 35). Демәли, һәлледиҹи амил инсанын үрәји вә үрәјинин ону нәјә тәшвиг етмәсидир (Зб 119:145; Мрс 3:41). Аллаһын әмрләринә риајәт едиб ҝөзүндә хош олан ишләр ҝөрәнләр әминдирләр ки, Аллаһ онларын дуаларыны ешидир (1Јһ 3:22; Зб 10:17; Мс 10:17; 1Бт 3:12).
*** w04-Е 1/3 с. 19—20 ***
Аллаһа мәһәббәтимизи неҹә ҝөстәрә биләрик?
Инсанын үрәјиндә Аллаһ севҝиси зеһни фәалијјәтин нәтиҹәсиндә јаранмыр. Аллаһын бүтүн дүнјада олан хидмәтчиләри тәсдиг едә биләрләр ки, инсанын үрәјиндә әсил Аллаһ севҝиси Онун кејфијјәтләри илә таныш олдугда баш галдырыр. Онун нәји севдијини, нәјә нифрәт етдијини, нәдән хошландығыны вә инсанлардан нә тәләб етдијини өјрәндикҹә исә бу севҝи даһа да ҝүҹләнир.
Јеһова мәһәббәтдән ирәли ҝәләрәк бизә Өз Кәламыны, Мүгәддәс Китабы ҝөндәриб. Бу китабда О, Өзүнү бизә таныдыр. Мүгәддәс Китабдан Јеһованын мүхтәлиф вәзијјәтләрдә неҹә даврандығыны өјрәнирик. Севдијимиз кәсдән ҝәлән мәктуб бизә неҹә зөвг верирсә, Мүгәддәс Китаб да бизә елә зөвг верир. Белә ки, һәр дәфә бу китабы охудугҹа Јеһованы јени-јени тәрәфләрдән таныјырыг.
Лакин бәзән хидмәтдә ҝөрүрүк ки, Аллаһ һаггында өјрәнән һәр инсанын үрәјиндә Она гаршы мәһәббәт баш галдырмыр. Иса Мәсиһ өз дөврүндә јашајан нанкор јәһудиләр барәдә белә демишди: Сиз Мүгәддәс Јазылары арашдырырсыныз, елә билирсиниз ки, бунларын сајәсиндә әбәди һәјата говушаҹагсыныз... Јахшы билирәм ки, сизин гәлбиниздә Аллаһа мәһәббәт јохдур (Јәһја 5:39, 42). Еләләри вар ки, илләрлә Јеһованын инсанлара олан мәһәббәти барәдә өјрәнир, амма үрәјиндә Она гаршы мәһәббәт демәк олар ки, јох сәвијјәсиндәдир. Сәбәб ондадыр ки, онлар өјрәндикләринин мәнасы барәдә дүшүнмүрләр. Анҹаг Мүгәддәс Китабы өјрәтдијимиз милјонларла сәмими-гәлбли инсанын Аллаһа мәһәббәти ҝүнбәҝүн артыр. Бәс бунун сәбәби нәдәдир? Онлар бизим кими, Асәфин нүмунәсини изләјирләр. Ҝәлин ҝөрәк неҹә.
Миннәтдарлыгла дүшүнүн
Асәф мәгсәдјөнлү шәкилдә Јеһоваја олан мәһәббәтини ҝүҹләндирирди. О јазмышды: Гәлбим дүшүнҹәләрә далыр... Мән Јаһын ҝөрдүјү ишләри хатырлајарам, гәдимдәки мөҹүзәләрини јада саларам. Әмәлләрин барәдә дүшүнҹәләрә даларам, бүтүн ишләрини дәрин-дәрин дүшүнәрәм (Зәбур 77:6, 11, 12). Ким Асәф кими, Јеһованын јоллары барәдә дәриндән дүшүнүрсә, онун да үрәјиндә Јеһоваја мәһәббәт артаҹаг.
Бундан башга, хидмәтдә олан һадисәләри јада саланда да Аллаһла мүнасибәтимиз мөһкәмләнир. Һәвари Булус демишди ки, биз Аллаһын әмәкдашларыјыг. Әмәкдашлары исә бир-биринә хүсуси достлуг телләри бағлајыр (1 Коринфлиләрә 3:9). Биз севҝимизи дилә ҝәтирәндә Јеһоваја чох хош олур вә Онун гәлби севинир (Мәсәлләр 27:11). Үстәлик, дар ҝүнүмүздә Јеһовадан көмәк диләјәндә вә О бизә јол ҝөстәрәндә баша дүшүрүк ки, О, бизимләдир вә Она олан севҝимиз артыр.
Достлар бир-биринә һиссләрини ифадә едәндә онларын мүнасибәти даһа да мөһкәмләнир. Еләҹә дә биз Јеһоваја Ону нәјә ҝөрә севдијимизи сөјләјәндә Она мәһәббәтимиз ҝүҹләнир. Белә оланда Исанын сөзләри ағлымыздан ҝетмәјәҹәк: Аллаһын Јеһованы бүтүн гәлбинлә, бүтүн варлығынла, бүтүн ағлынла вә вар ҝүҹүнлә сев (Марк 12:30). Бәс Јеһованы һәмишә бүтүн гәлбимизлә, бүтүн варлығымызла, бүтүн ағлымызла вә бүтүн ҝүҹүмүзлә севмәк үчүн нә етмәлијик?
Јеһованы бүтүн гәлбимизлә севәк
Мүгәддәс Јазылардан символик үрәкдән данышылыр. Символик үрәк инсанын дахили варлығыны — онун арзуларыны, дүшүнҹә тәрзини вә һиссләрини билдирир. Демәли, Јеһованы бүтүн гәлбимизлә севмәк о демәкдир ки, бизим ән үмдә арзумуз Јеһованы разы салмагдыр (Зәбур 86:11). Әҝәр Аллаһын хошуна ҝәлмәк үчүн хасијјәтимизи дәјишириксә, писликдән икраһ едиб, јахшылыға сарылараг Аллаһа бәнзәмәјә чалышырыгса, бу ҝөстәрир ки, һәгигәтән дә гәлбимиздә Аллаһа бу ҹүр мәһәббәт вар (Ромалылара 12:9).
Аллаһа мәһәббәт һәр шејә мүнасибәтимизә тәсир ҝөстәрир. Мәсәлән, ола билсин, ишимиз чох мараглыдыр. Анҹаг биз бу ишә үрәкдән бағланмырыг. Биз Јеһованы бүтүн гәлбимизлә севдијимиз үчүн һәр шејдән әввәл биз Онун хидмәтчиләријик. Буна бәнзәр тәрздә, биз валидејнләримизи, һәјат јолдашымызы, мүдири разы салмаг истәјирик, лакин биринҹи нөвбәдә Јеһованы разы салмаға чалышараг Ону бүтүн гәлбизимлә севдијимизи сүбут едирик. Јеһова үрәјимиздә ән биринҹи јери тутмаға лајигдир (Мәтта 6:24, 10:37).
*** it-1-Е с. 1160 ***
Һәлимлик
Һәр кәс, кишиләр дә, гадынлар да башчылара табе олмалыдырлар вә һәр һансы бир тәјинаты, јахуд мәсулијјәти алмаг үчүн Јеһованы ҝөзләмәлидирләр, чүнки буну верән Јеһовадыр (Зб 75:6, 7). Гарун оғулларындан олан лавилиләр демишкән: Аллаһын евинин кандарында дурмаг шәр адамын чадырында јашамагдан гат-гат јахшыдыр (Зәбур 84:10). Бу, әсил һәлимликдир. Бу ҹүр һәлим олмаг үчүн вахт лазымдыр. Мүгәддәс Јазыларда нәзарәтчи үчүн олан тәләбләр садаланаркән гејд едилир: О һәмчинин имана тәзә ҝәләнләрдән олмамалыдыр ки, гүррәләниб Иблисә чыхарылмыш һөкмә дүчар олмасын (1Тм 3:6).
*** w04-Е 1/4 с. 21—22 ***
Ҝөзүнүзү мүкафата дикирсинизми?
Руһани ҝөзүмүзү итиләјәк
Биз ејни заманда ики шејә баха билмәрик. Ејни шеј руһани ҝөзүмүзә дә аиддир. Ҝөзүмүзү индики дүнјадакы шејләрә диксәк, Аллаһын вәд етдији јени дүнја мүтләг нәзәримиздән јајынаҹаг. Вахт кечдикҹә бу тутгун, буланыг тәсвир даһа бизә ҹәлбедиҹи ҝәлмәјәҹәк вә јаваш-јаваш үмумијјәтлә ҝөздән итәҹәк. Бу, чох бөјүк фаҹиә олар (Лука 21:34). Буна ҝөрә дә сон дәрәҹә ваҹибдир ки, ҝөзүмүзү тох сахлајаг, јәни ҝөзүмүзү Аллаһын Падшаһлығына вә әбәди һәјат мүкафатына ҹәмләјәк (Мәтта 6:22).
Ҝөзү Падшаһлыға ҹәмләмәк һәмишә асан олмур. Һәр ҝүн һансыса проблемләри һәлл етмәли олуруг, нәләрсә диггәтимизи јајындырыр, һәтта бәзән бизи дүз јолдан сапдырмаға чалышан сынагларла үзләширик. Белә олан һалда неҹә едә биләрик ки, һәм диҝәр ваҹиб ишләри башлы-башына бурахмајаг, һәм дә диггәтимизи Падшаһлыға вә Аллаһын вәд етдији јени дүнјаја ҹәмләјәк? Ҝәлин бунун үч јолуну нәзәрдән кечирәк.
Аллаһын Кәламыны һәр ҝүн мүталиә един. Мүгәддәс Китабы вә она әсасланан нәшрләри мүнтәзәм олараг охумаг диггәтимизин руһани мәсәләләрә ҹәмләниб галмасына көмәк едир. Ола билсин ки, биз Аллаһын Кәламыны артыг илләрдир ки, мүталиә едирик, буна бахмајараг, ону мүталиә етмәјә давам етмәлијик. Ахы биз нә вар-нә вар минләрлә дәфә јемәк једијимиз үчүн јемәк јемәкдән имтина етмирик. Јашамаг истәјириксә һәмишә јемәк јемәлијик. Беләликлә, Мүгәддәс Китабы нә гәдәр јахшы билсәк дә, һәмишә, мүнтәзәм олараг ондан гидаланмалыјыг ки, үмидимиз парлаг, иманымыз вә мәһәббәтимиз исә ҝүҹлү галсын (Зәбур 1:1—3).
Аллаһын Кәламы үзәриндә миннәтдарлыгла дүшүнүн. Ахы нәјә ҝөрә дүшүнмәк ваҹибдир? Бунун ики сәбәби вар. Әввәла, дүшүнмәјин сајәсиндә биз охудуғумузу мәнимсәјирик вә гәлбимиздә миннәтдарлыг јараныр. Икинҹиси исә, дүшүнсәк, Јеһованы, Онун мөһтәшәм ишләрини вә гаршымызда ачылан үмиди һеч вахт унутмајаҹағыг. Нүмунә үчүн бахаг исраиллиләрә. Муса илә Мисирдән чыхан исраиллиләр Јеһованын һејрәтамиз гүдрәтини өз ҝөзләри илә ҝөрмүшдүләр. Һәмчинин Јеһова онлары мирас алаҹаглары торпаға апаранда ачыг-ајдын ҝөрүрдүләр ки, О, онлары неҹә горујур. Анҹаг онлар сәһраја чатар-чатмаз башладылар ҝилеј-ҝүзар етмәјә. Бунунла да ҝөстәрдиләр ки, үрәкләриндә иман јохдур (Зәбур 78:11—17). Проблем нәдә иди?
Халг диггәтини Јеһовадан, Онун вердији ҝөзәл үмиддән чәкиб, мөвҹуд нараһатчылыға вә гајғылара ҹәмләди. Шәхсән шаһиди олдуглары мөҹүзәләрә вә әламәтләрә бахмајараг, бир чох исраиллиләр имансызлыг ҝөстәриб шикајәтләнмәјә башлады. Зәбур 106:13 дејилир: Амма чох чәкмәди ки, (Јеһованын) ишләрини унутдулар, мәсләһәтини ҝөзләмәдиләр. Онларын бу ҹүр сәһләнкарлығы үзүрсүз иди вә онлара чох баһа баша ҝәлди. Онлар Вәд едилмиш дијардан мәһрум олдулар.
Беләликлә, Мүгәддәс Китабы, јахуд Мүгәддәс Китабы өјрәнмәк үчүн олан вәсаитләри охујанда охудуғунуз үзәриндә дүшүнүн. Дүшүнмәк сизин руһани сағламлығыныз вә инкишафыныз үчүн сон дәрәҹә ваҹибдир. Мәсәлән, јухарыда гисмән ситат ҝәтирилән 106-ҹы мәзмуру охујанда Јеһованын кејфијјәтләри барәдә дүшүнүн. Фикир верин, О, исраиллиләрлә неҹә сәбирлә давраныр, онлара нә гәдәр рәһм едирди, Вәд олунмуш дијара чатмалары үчүн онлара баҹардығы гәдәр неҹә көмәк едирди. Халгын ағласығмаз нанкорлуғу Јеһованын сәбир касасыны дашыранда, артыг мәрһәмәт ҝөстәрмәјә јер галмајанда Јеһованын дујдуғу кәдәри, гәлб ағрысыны һисс един. Бундан башга, 106-ҹы мәзмурун 30 вә 31-ҹи ајәсиндә Фәнһасын салеһлик наминә гәтијјәтлә вә ҹәсарәтлә һәрәкәтә кечмәсиндән данышылыр. Бу ајәләр үзәриндә дүшүнәндә әмин олуруг ки, Јеһова һеч вахт садиг бәндәләрини унутмур вә онлары бол-бол мүкафатландырыр.
Мүгәддәс Китабдакы принсипләри һәјатынызда тәтбиг един. Мүгәддәс Китаб принсипләрини тәтбиг етдикҹә өз тәҹрүбәмиздә шаһид олуруг ки, Јеһованын мәсләһәти инсанын хејринәдир. Мәсәлләр 3:5, 6 ајәләриндә дејилир: Бүтүн гәлбинлә Јеһоваја етибар ет, өз ағлына ҝүвәнмә. Һәр ишиндә Ону дүшүн, О да јолларыны рәван едәр. Бир чох инсанларын әхлагсыз һәрәкәтләринин нәтиҹәсиндә бичдији мәнәви, әгли вә физики проблемләр барәдә дүшүнүн. Бу ҹүр инсанлар јашадыглары ани һәззин алтыны илләрлә, бәзән исә бүтүн һәјатлары боју чәкирләр. Лакин бунун әксинә олараг, енсиз јолла ҝедәнләр артыг индидән јени дүнјанын ләззәтини дујур, бу исә онлары бундан сонра да һәјата апаран јолда јеримәјә әзмли едир (Мәтта 7:13, 14; Зәбур 34:8).
*** w12-Е 1/11 с. 14 ***
Мүгәддәс Китаб һәјатлары дәјишир
Мүгәддәс Китабы өјрәндикҹә Аллаһ һаггында тәсәввүрүм бүсбүтүн дәјишилди. Өјрәндим ки, пислијин вә әзаб-әзијјәтин сәбәбкары О дејил вә инсанлар пис ишләр тутанда О, кәдәрләнир (Јарадылыш 6:6; Зәбур 78:40, 41). Гәти олараг гәрара алдым ки, чалышаҹағам һеч вахт Јеһованы кәдәрләндирмәјим. Мән Онун гәлбини севиндирмәк истәјирдим (Мәсәлләр 27:11). Әјјашлығын, сигаретин дашыны атдым, әхлагсызлыгдан әл чәкдим. 1994-ҹү илин мартында вәфтиз олунуб Јеһованын Шаһиди олдум.
*** w11-Е 1/7 с. 10 ***
Јеһованын һиссләри вармы?
Аллаһа јахынлашын
Әҝәр ҹаваб бәлидирсә, о заман башга суал ортаја чыхыр: Бизим һәрәкәтләримиз Аллаһа тәсир едирми? Башга сөзлә, һәрәкәтләримизлә Аллаһы севиндирә вә ја кәдәрләндирә биләрикми? Гәдимдә јашамыш бәзи философларын фикринҹә, бунун ҹавабы хејрдир. Онлар дејирдиләр ки, һеч кәсин һәрәкәти Аллаһа тәсир едә билмәз, буна ҝөрә дә демәли О, һиссиз-дујғусуздур. Лакин Мүгәддәс Китабда Јеһова Аллаһ башга ҹүр тәсвир олунур. Ҝөстәрилир ки, Јеһованын һиссләри вар вә О, бизим һәрәкәтләримизә лагејд дејил. Ҝәлин Зәбур 78:40, 41 ајәләринә нәзәр салаг.
78-ҹи мәзмурда Аллаһын Исраил халгы илә мүнасибәтиндән данышылыр. Халгы Мисирдән азад етдикдән сонра Јеһова халга Онунла хүсуси мүнасибәтә дахил олмағы тәклиф етди. О вәд етди ки, әҝәр онлар Онун ганунларына табе олсалар, онун мәхсуси халгы олаҹаглар, вә Онун нијјәтинин јеринә јетмәсиндә мүһүм рол ојнајаҹаглар. Халг разылашды вә Ганун әһдинә дахил олду. Бәс ҝөрәк онлар бу разылашмаја ујғун даврандылармы (Чыхыш 19:3—8).
Мәзмурда дејилир: Нечә дәфә сәһрада Она аси олдулар (40-ҹы ајә). Нөвбәти ајәдә әлавә олунур: Дөнә-дөнә Аллаһы сынадылар (41-ҹи ајә). Фикир верин, мәзмурда үсјанын даими характер алдығы тәсвир олунур. Исраиллиләрин бу чиркин хасијјәти чох тез — Мисирдән чыхандан аз сонра сәһрада өзүнү бүрузә верди. Халг Аллаһдан шикајәтләнмәјә, Онун онларын гајғысына гала биләҹәјинә, үмумијјәтлә Онлары севдијинә шүбһә етмәјә башлады (Сајлар 14:1—4). Мүгәддәс Китаб тәрҹүмәчиләри үчүн олан бир елми әсәрдә дејилир ки, Она аси олдулар сөзләрини белә бир ифадә илә тәрҹүмә етмәк олар: онлар үрәкләрини Аллаһа гаршы даш етдиләр, јахуд Аллаһа јох дедиләр. Анҹаг халг төвбә едәндә Јеһова рәһм едиб онлары бағышлајырды. Амма онлар јенә дә өз шакәрләри үзрә үсјан едирдиләр вә бу, белә дә давам едирди (Зәбур 78:10—19, 38).
Хәјанәткар халг гијам галдыранда Јеһова һансы һиссләри кечирирди? 40-ҹы ајәдә дејилир: Ону кәдәрләндирдиләр. Башга бир тәрҹүмәдә дејилир ки, Она дәрд вердиләр. Мүгәддәс Китаб үзрә бир елми әсәрдә белә изаһ олунур: Бу о демәкдир ки, сөзә гулаг асмајан, үсјанкар ушаг кими, ибраниләрин дә давранышы Аллаһа дәрд верирди. Сөзә бахмајан ушаг валидејнләринә гәлб ағрысы вердији кими, үсјанкар исраиллиләр дә Исраилин Мүгәддәсини инҹидирдиләр (41-ҹи ајә).
Бу мәзмурдан нә өјрәнирик? Биз севинирик ки, Јеһова Өз хидмәтчиләринә чох бағлыдыр, О, дәрһал онлардан әлини үзмүр. Ејни заманда, биз диггәтли олмалыјыг. Чүнки Јеһованын һиссләри вар вә бизим һәрәкәтләримиз Она тәсир едир. Буну билмәк сизә неҹә тәсир едир? Бу сизи дүзҝүн давранмаға тәшвиг етмир?
Биз ҝүнаһ едиб Јеһованы кәдәрләндирмәкдәнсә, дүзҝүн јолу сечиб Онун үрәјини шад едә биләрик. О, хидмәтчиләриндән мәһз буну истәјир: Оғлум, һикмәтли ол, гәлбим севинсин (Мәсәлләр 27:11). Бәли, биз өз һәјат тәрзимизлә Јеһованын гәлбини шад едә биләрик. Бу, бизим Јеһоваја ән гијмәтли һәдијјәмиз олар.