«Бөјүк Бабил» нәдир?

«ВӘҺЈ» китабындакы бә’зи ифадәләри һәрфи мә’нада баша дүшмәк лазым дејил. Мәсәлән, орада алнында «Бөјүк Бабил» јазылан фаһишә бир гадындан бәһс едилир. Бу гадын «халглар вә милләтләр» үзәриндә отуруб (Вәһј 17:1, 5, 15). Тамамилә ајдындыр ки, бу тәсвир һәгиги гадына ујғун ҝәлмир. Демәли, Бөјүк Бабил символик мә’на дашыјыр. Бәс бу символик фаһишә нәји тәмсил едир?

Бу символик гадын Вәһј 17:18 ајәсиндә ‘јер үзүнүн һөкмдарлары үзәриндә шаһлыг едән бөјүк шәһәр’ адланыр. «Шәһәр» дедикдә тәшкил олунмуш инсан групу нәзәрдә тутулур. Бу ‘бөјүк шәһәр’ ‘јер үзүнүн һөкмдарларыны’ идарә етдији үчүн, «Бөјүк Бабил» адлы гадын бејнәлхалг мигјаслы нүфуза саһиб олан тәшкилатдыр. Ону дүнја империјасы адландырмаг дүзҝүн оларды. Бәс о неҹә империјадыр? Дини. Ҝәлин «Вәһј» китабынын буну неҹә тәсдиг етдијини нәзәрдән кечирәк.

Сијаси, дини вә тиҹарәт империјалары мөвҹуддур. «Бөјүк Бабил» адлы гадын сијаси империја ола билмәз, чүнки Аллаһын Кәламында ‘јерин һөкмдарларынын’, јә’ни бу дүнјанын сијаси гүввәләринин ‘онунла ҹинси әхлагсызлыг’ етдикләри дејилир. Бу гадынын әхлагсызлығы ондан ибарәтдир ки, о, бу дүнјанын һакимләри илә мүгавиләләр бағлајыр. Елә буна ҝөрә дә, о, ‘бөјүк фаһишә’ адланыр (Вәһј 17:1, 2; Јагуб 4:4).

Бөјүк Бабил тиҹарәт империјасы да ола билмәз, чүнки «дүнјанын таҹирләри», јә’ни тиҹарәт тәшкилатлары бу символик шәһәр мәһв олундугда онун үчүн ҝөз јашлары төкәҹәкләр. Бундан әлавә, Мүгәддәс Китабда һөкмдарларын вә таҹирләрин «узагда дуруб» Бөјүк Бабилә бахдыглары дејилир (Вәһј 18:3, 9, 10, 15-17). Бунлар ҝөстәрир ки, Бөјүк Бабил сијаси вә ја тиҹарәт дејил, дини империјадыр.

Бөјүк Бабилин дини тәмсил етмәсинин даһа бир сүбуту вар. «Вәһј» китабында бу шәһәрин бүтүн халглары ‘сеһрбазлыгла’, јә’ни спиритизмлә алдатдығы дејилир (Вәһј 18:23). Спиритизмин бүтүн нөвләри динлә вә ҹинләрлә әлагәли олдуғу үчүн, Мүгәддәс Китабда Бөјүк Бабилин «ҹинләрин мәскәни» адланмасынын сәбәби ајдындыр (Вәһј 18:2; Ганунун тәкрары 18:10-12). Бу империја һәгиги динә дүшмәнҹәсинә јанашыр, ‘пејғәмбәрләри’ вә ‘мүгәддәсләри’ тә’гиб едир (Вәһј 18:24). Бөјүк Бабилин һәгиги динә олан нифрәти о гәдәр ҝүҹлүдүр ки, бу символик фаһишә ‘Исанын шаһидләрини’ амансыз тә’гибләрә мә’руз гојур вә һәтта онлары гәтлә јетирир (Вәһј 17:6). Ҝөрүндүјү кими, «Бөјүк Бабил» адлы бу гадын јалан динин дүнја империјасыны, јә’ни Јеһова Аллаһа гаршы чыхан бүтүн динләри тәмсил едир.