Бүтүн изтираблара тезликлә сон гојулаҹаг!
Јәгин ки, нә вахтса «бу гәдәр изтираблар нәјә ҝөрә мөвҹуддур?» дејә өзүнүздән сорушмусунуз. Мин илләрдир ки, бәшәр аиләси мүһарибәләр, јохсуллуг, тәбии фәлакәтләр, ҹинајәт, хәстәликләр вә өлүм уҹбатындан әзијјәт чәкир. Өтән әсрдә инсанларын чәкдији изтираблар әввәлкиндән даһа чох олмушдур. Бүтүн бунлара нә вахтса сон гојулаҹагмы?
Бәли гојулаҹаг, өзү дә чох тезликлә! Аллаһын Кәламы олан Мүгәддәс Китабда дејилир: «Пис јох олаҹаг... Мәзлумлар өлкәни мүлк олараг алаҹаг, әмин-аманлығын боллуғундан зөвг тапаҹаг». Онлар бу ҹүр шәраитдә нә гәдәр вахт јашајаҹаглар? «Салеһләр өлкәни мүлк олараг алаҹаг, онлар орада әбәди мәскән салаҹаг» (Мәзмур 37:10, 11, 29).
Аллаһ пислији вә изтираблары арадан галдырандан сонра Јер күрәси Ҹәннәтә чевриләҹәк. Инсанлар тамамилә сағлам олаҹаг вә хошбәхтлик ичиндә әбәди јашајаҹаглар. Аллаһын Кәламында габагҹадан дејилмишдир: «Аллаһ онларын ҝөзләриндән бүтүн јашлары силәҹәкдир. Артыг өлүм мөвҹуд олмајаҹаг; артыг нә кәдәр, нә фәрјад, нә дә ағры олаҹагдыр, чүнки әввәлки шејләр кечиб ҝетди» (Вәһј 21:4).
Гаршыдан ҝәлән јени дүнјада өләнләр дә һәјата гајтарылаҹаг вә хошбәхт һәјата говушаҹаглар: «Һәм салеһ, һәм дә салеһ олмајан өлүләрин дирилмәси олаҹагдыр» (Һәвариләрин ишләри 24:15). Мәһз буна ҝөрә Иса төвбә едән вә она иман ҝәтирән ҝүнаһкара «сән Мәнимлә бәрабәр ҹәннәтдә олаҹагсан» демишдир (Лука 23:43).
Изтираблар нә үчүн башланды?
Әҝәр Аллаһ бәшәријјәт үчүн белә ҝөзәл ҝәләҹәк нәзәрдә тутмушдурса, изтирабларын башланмасына вә бу гәдәр вахт давам етмәсинә нәјә ҝөрә јол верди?
Аллаһ Адәмлә Һәвваны һәр ҹәһәтдән камил јаратмыш, ҝөзәл Ҹәннәт бағында јерләшдирмиш вә онлара мәмнунедиҹи иш тапшырмышды. Мүгәддәс Китабда дејилир: «Аллаһ ҝөрдү ки, јаратдығы һәр шеј чох јахшыдыр» (Јарадылыш 1:31). Әҝәр онлар Аллаһа итаәт етсәјдиләр, дүнјаја ҝәтирдикләри ушаглар камил оларды. Јер күрәси исә инсанларын хошбәхт вә сүлһ ичиндә әбәди јашаја биләҹәкләри Ҹәннәтә чевриләрди.
Аллаһ Адәмлә Һәвваја ирадә азадлығы кими ҝөзәл һәдијјә бәхш етмишдир. Онлар робота бәнзәр шүурсуз варлыг дејилдиләр. Лакин хошбәхтликләрини итирмәмәк үчүн Адәмлә Һәвва ирадә азадлығындан дүзҝүн истифадә етмәли, јәни Аллаһын ганунларына риајәт етмәли идиләр. Аллаһын Өзү дејир: «Аллаһын Рәбб Мәнәм, Мән сәнин хејринә сәни өјрәдирәм, ҝетдијин лазым олан јолла сәни апарырам» (Јешаја 48:17). Ирадә азадлығындан суи-истифадә етмәк мүтләг фәлакәтә ҝәтириб чыхарарды. Чүнки Аллаһ инсанлары елә јаратмамышды ки, Ондан асылы олмадан мүвәффәгијјәтли ола билсинләр. Мүгәддәс Китабда дејилир: «Инсанын өмрү өз әлиндә дејил. Аддымларыны дүзәлтмәк ҝедән адамын иши дејил» (Јеремја 10:23).
Тәәссүфләр олсун ки, улу валидејнләримиз Аллаһын рәһбәрлији олмадан мүвәффәгијјәтли олаҹагларыны дүшүндүләр. Онлар Аллаһын һөкмранлығыны рәдд етдикдән сонра камилликдән мәһрум олдулар. Тәдриҹән сағламлыгларыны итирдиләр вә ахырда да гоҹалыб өлдүләр. Онларын өвладлары олдуғумуз үчүн, гејри-камиллији вә өлүмү мирас алмышыг (Ромалылара 5:12).
Һөкмранлыг һүгугу кимә мәхсусдур?
Бәс нәјә ҝөрә Аллаһ Адәмлә Һәвваны мәһв едиб, башга инсан ҹүтү илә һәр шеји јенидән башламады? Чүнки Аллаһын һөкмранлыг һүгугу шүбһә алтына гојулмушду. Белә бир суал јаранмышды: һөкмранлыг һүгугу кимә мәхсусдур вә кимин һөкмранлығы дүзҝүндүр? Башга сөзләрлә, инсанлар Аллаһын һөкмранлығы олмадан даһа јахшы јашаја биләрдиләрми? Бу суала инандырыҹы ҹаваб вермәк үчүн, Аллаһ инсанлара кифајәт гәдәр вахт верди. Бу вахт әрзиндә инсанлар мүстәгил олараг мүхтәлиф сијаси, иҹтимаи, игтисади вә дини системләри сынагдан кечирә биләрдиләр.
Бу нәјә ҝәтириб чыхарды? Бәшәр тарихи ҝөстәрир ки, изтираблар ҝет-ҝедә чохалыр. Сонунҹу јүзиллик әрзиндә бәшәр аиләси һеч вахт ҝөрмәдији изтираблара мәруз галмышдыр. Икинҹи Дүнја мүһарибәси заманы милјонларла инсан мәһв едилмишдир. Диҝәр мүһарибәләрдә 100 милјондан артыг инсан гәтлә јетирилмишдир. Ҹинајәт вә зоракылыг баш алыб ҝедир. Дүнја наркоманија далғасына гәрг олуб. Ҹинси јолла өтүрүлән хәстәликләр јајылмагдадыр. Һәр ил он милјонларла инсан аҹлыг вә хәстәлик уҹбатындан өлүр. Һәр јердә аилә вә әхлаг дәјәрләри писләшир. Һеч бир һөкумәт бу проблемләри һәлл етмәк игтидарында дејил. Онлардан һеч бири гоҹалығын, хәстәликләрин вә өлүмүн өһдәсиндән ҝәлмәјиб.
Дүнјада баш верәнләр Мүгәддәс Китабда габагҹадан дејилмишдир. Аллаһын Кәламында бизим дөвр ‘чәтин анларын ҝәләҹәји ‘ахыр ҝүнләр адланыр. Мүгәддәс Китабын ‘пис адамларын вә сахтакарларын ҝетдикҹә даһа бетәр олаҹагларына даир дедикләри ҝөз гаршысындадыр (2 Тимотејә 3:1-5, 13).
Изтирабларын сону јахындыр
Инсанларын Аллаһдан асылы олмадан мүвәффәгијјәтә наил олмаг ҹәһдләри анҹаг пис нәтиҹәләрә ҝәтириб чыхармышдыр. Һәр шеј бу дөврүн сона јахынлашдығыны ҝөстәрир. Тарих сүбут едир ки, инсанларын Аллаһдан асылы олмадан идарә етмәк ҹәһдләри һеч заман баш тутмајаҹаг. Јалныз Аллаһын һөкмранлығы сүлһ, хошбәхтлик, мүкәммәл сағламлыг вә әбәди һәјат ҝәтирә биләр. Бәли, Јеһова пислијә вә изтираблара сон гојмаг нијјәтиндәдир. Аллаһ тезликлә инсанларын ишләринә мүдахилә едәҹәк вә онларын гурдуғу гејри-мүкәммәл системи тамамилә мәһв едәҹәк.
Мүгәддәс Китаб пејғәмбәрлијиндә дејилир: «О падшаһларын [мүасир һөкумәтләрин] дөврүндә ҝөјләрин Аллаһы [ҝөјдә] һеч вахт дағылмајан бир падшаһлыг гураҹаг... О бүтүн әввәлки падшаһлыглары әзиб-дағыдаҹаг, өзү исә әбәди галаҹаг» (Даниел 2:44). Аллаһын сәмави Падшаһлығы сүбут едәҹәк ки, Јеһова Каинатын Һөкмдары олмаг һүгугуна маликдир. Бу, Мүгәддәс Китабын әсас тәлимидир. «Ахыр ҝүнләр» һаггында данышаркән Иса гејд етмишдир: «Сәмави Сәлтәнәт [Падшаһлыг] һаггында олан бу Мүждә халгларын һамысына шәһадәт олараг бүтүн дүнјада тәблиғ олунаҹагдыр; вә сон о заман ҝәләҹәкдир» (Матта 24:14).
Бу системә сон гојуланда, кимләр сағ галаҹаг? Мүгәддәс Китаб ҹаваб верир: «Әмәлисалеһләр јер үзүндә сакин олаҹаг, камилләр бурада галаҹаг. Пис адамлар бу торпагдан атылаҹаг, хаинләрин көкү бурадан гопарылаҹаг» (Сүлејманын мәсәлләри 2:21, 22). Әмәлисалеһләр — Јеһованын ирадәсини өјрәнәнләр вә јеринә јетирәнләрдир. Иса Мәсиһ демишдир: «Әбәди һәјат о демәкдир ки, Сәни, ваһид һәгиги Аллаһы вә ҝөндәрдијин Иса Мәсиһи танысынлар» (Јәһја 17:3). Бәли, «дүнја... кечиб ҝедир, амма Аллаһын ирадәсини јеринә јетирән әбәди јашајыр» (1 Јәһја 2:17).