Аллаһы севиндирән һәјат тәрзи

1, 2. Јеһова кимләри Өзүнә јахын дост һесаб едирди?

СИЗ киминлә дост олмаг истәрдиниз? Јәгин ки, нөгтеји-нәзәрләринизә, мараг вә дәјәрләринизә шәрик олан бир инсанла. Еһтимал ки, сиз дүзҝүнлүк вә хејирхаһлыг кими јахшы хүсусијјәтләрә малик олан бир инсаны өзүнүзә дост сечәрдиниз.

² Тарих боју Аллаһын Өзүнә јахын дост сандығы инсанлар олмушдур. Мәсәлән, Јеһова Аллаһ Ибраһими Өз досту һесаб едирди (Јешаја 41:8; Јагуб 2:23). Јеһованы разы салдығы үчүн, Аллаһ Давуду ‘үрәјинә ҝөрә бир адам’ адландырмышды (Һәвариләрин ишләри 13:22). Јеһова мәләк васитәсилә Даниел пејғәмбәрә ону ‘чох севдијини’ демишди (Даниел 9:23).

3. Јеһова кимләрлә достлуг етмәк истәјир?

³ Нәјә ҝөрә Јеһова Ибраһими, Давуду вә Даниели Өзүнә дост һесаб едирди? Аллаһ Ибраһимә демишди: «Сән Мәним сөзүмә гулаг асдын» (Јарадылыш 22:18). Ҝөрүндүјү кими, Јеһова тәвазөкарлыгла Ону динләјәнләрә јахындыр. О, исраиллиләрә деди: «Сөзүмә гулаг асын. Онда Мән сизин Аллаһыныз олаҹағам, сиз дә Мәним халгым олаҹагсыныз» (Јеремја 7:23). Әҝәр Јеһоваја гулаг ассаныз, сиз дә Онун досту ола биләрсиниз!

ЈЕҺОВА ӨЗ ДОСТЛАРЫНЫ ГҮВВӘТЛӘНДИРИР

4, 5. Јеһова Өз хидмәтчиләрини неҹә гүввәтләндирир?

⁴ Аллаһла достлуғун нә демәк олдуғунун үзәриндә бир анлыға дүшүнүн. Мүгәддәс Китабда дејилир ки, Јеһова ‘үрәји бүтүнлүклә Онунла оланлары гүввәтләндирмәк’ үчүн имканлар ахтарыр (2 Салнамәләр 16:9). Јеһова сизи неҹә гүввәтләндирә биләр? Мәзмур 32:8 ајәсиндә дејилир: «Сәнә тә’лим верәҹәјәм, ҝедәҹәјин јолу өјрәдәҹәјәм. Нәсиһәт верәҹәјәм, ҝөзүм сәнин үстүндә олаҹаг».

⁵ Јеһова неҹә дә шәфгәтли вә гајғыкешдир! О сизә дүзҝүн јол ҝөстәрмәклә јанашы, бу јолла ҝетмәјинизә дә көмәк едәҹәк. Аллаһ чәтин анларынызда вә сынагларынызда сизә дәстәк олмаг истәјир (Мәзмур 55:22). Әҝәр Јеһоваја бүтүн үрәклә хидмәт едирсинизсә, сиз дә нөвбәти сөзләри дејән мәзмурчу кими әминлијә малик олаҹагсыныз: «Рәббә әбәдилик үз тутмушам, сағымда олдуғу үчүн сарсылмарам» (Мәзмур 16:8; 63:8). Бәли, Јеһова Она мәгбул һәјат тәрзи сүрмәнизә көмәк етмәјә һазырдыр. Лакин Аллаһын дүшмәни буна мане олмаг истәјир.

ШЕЈТАНЫН МЕЈДАН ОХУМАСЫ

6. Шејтан инсанлары нәдә ҝүнаһландырды?

⁶ Әввәлки фәсилдән өјрәндик ки, Шејтан Иблис Јеһованын һөкмранлыг һүгугуну шүбһә алтына алды. Шејтан Аллаһы јаланчылыгда иттиһам етди вә билдирди ки, Адәмлә Һәвваны нәјин хејир, нәјин шәр олдуғуну гәрара алмаг һүгугундан мәһрум етмәк әдаләтсизликдир. Адәмлә Һәвва ҝүнаһ ишләтдикдән вә јер үзүндә онларын нәсли јашамаға башладығы вахтдан е’тибарән, Шејтан бүтүн инсанларын нијјәтләрини шүбһә алтына алды. О белә бир иддиа ирәли сүрдү: «Инсанлар Аллаһа мәһәббәтдән хидмәт етмирләр. Имканым олсајды, һәр бир инсаны Аллаһдан узаглашдырардым». Шејтанын һәгигәтән дә белә дүшүндүјүнү, Әјјубун һәјаты һаггындакы әһвалат тәсдиг едир. Әјјуб ким иди вә о, мүбаһисәли суала неҹә ҹәлб олунду?

7, 8. а) Әјјуб өз дөврүнүн адамларындан нә илә фәргләнирди? б) Шејтан Әјјубун нијјәтләринин сәмимилијини неҹә шүбһә алтына алды?

⁷ Әјјуб 3 600 ил бундан әввәл јашамышдыр. О, салеһ инсан иди вә Јеһова онун һаггында демишдир: «Јер үзәриндә онун кимиси јохдур. О, камил [«гүсурсуз», ЈД], әмәлисалеһ, Аллаһдан горхан вә өзүнү шәрдән узаг сахлајан бир адамдыр» (Әјјуб 1:8). Әјјуб Аллаһы севиндирир вә Она мәгбул давранырды.

⁸ Шејтан Әјјубун Аллаһа тәмиз нијјәтлә хидмәт етдијини шүбһә алтына алды. Иблис Јеһоваја деди: «Ҹанына, евинә, вар-дөвләтинә сипәр олуб ону [Әјјубу] горујан Сән дејилсәнми? Әлинин бүтүн әмәјинә бәрәкәт вермисән, сүрүләри бүтүн өлкәни бүрүјүб. Инди бир әл узадыб онун вар-јохуну әлиндән ал, о, ҝөзүнүн габағында мүтләг Сәнә лә’нәт едәҹәк» (Әјјуб 1:10, 11).

9. Јеһова Шејтанын галдырдығы мүбаһисәли суала неҹә ҹаваб верди вә нә үчүн?

⁹ Шејтан иддиа едирди ки, Әјјуб Аллаһа өз мәнфәәтини ҝүдәрәк хидмәт едир. Иблис, һәмчинин бәјан етди ки, Әјјуб сынаглара мә’руз галса, Аллаһдан үз дөндәрәҹәк. Јеһова Шејтанын ирәли сүрдүјү мүбаһисәли суала неҹә ҹаваб верди? Бу суал Әјјубун нијјәтләринә аид олдуғу үчүн, Јеһова Шејтана садиг хидмәтчисини сынамаға изин верди. Бунунла Әјјубун Аллаһы һәгигәтән севиб-севмәдији мә’лум олаҹагды.

ӘЈЈУБ СЫНАГЛАРА МӘ’РУЗ ГАЛЫР

10. Әјјуб һансы сынаглара мә’руз галды вә неҹә давранды?

¹⁰ Шејтан Әјјубу сәрт сынаглара мә’руз гојур. Мал-гарасынын бир һиссәси гарәт едилир, галаны исә тәләф олур. Гуллугчуларынын чоху өлүр. Әјјуб бүтүн мүлкүнү итирир. Сонра даһа бир дәһшәтли фаҹиә баш верир: туфан заманы Әјјубун он ушағы өлүр. Бу фәлакәтләрә бахмајараг, «Әјјуб өзүнә ҝүнаһ газанмады вә Аллаһы тәгсирләндирмәди» (Әјјуб 1:22).

11. а) Шејтан Әјјубу даһа нәдә ҝүнаһландырды вә Јеһова буна неҹә ҹаваб верди? б) Әјјуб әзаблы хәстәлијә неҹә мүнасибәт ҝөстәрди?

¹¹ Анҹаг Шејтан бунунла кифајәтләнмәди. Ола билсин, о белә дүшүнүрдү: «Малик олдуғу һәр шеји итирмәклә барышмасына, һәмчинин гуллугчуларынын вә ушагларынын өлүмүнә таб ҝәтирмәсинә бахмајараг, Әјјуб хәстәлијә дүчар олса, мүтләг Аллаһдан үз дөндәрәҹәк». Јеһова Шејтанын Әјјубу әзаблы хәстәлијә дүчар етмәсинә јол верди. Һәтта бу да Әјјубун иманыны сындырмады. О гәтијјәтлә деди: «Сон нәфәсимә гәдәр камиллијимдән [«нөгсансызлығымдан», ЈД] әл чәкмәјәҹәјәм» (Әјјуб 27:5).

12. Әјјуб Шејтанын иддиаларынын јалан олдуғуну неҹә сүбут етди?

¹² Әјјуб бу фәлакәтләрин сәбәбкарынын Шејтан олдуғундан хәбәрсиз иди. О, Аллаһын һөкмранлыг һүгугуна даир Иблисин галдырдығы мүбаһисәли суал һаггында һәр шеји билмирди вә проблемләриндә Аллаһы ҝүнаһландырырды (Әјјуб 6:4; 16:11-14). Бунунла белә, о, Јеһоваја садиг галды. Әјјуб өз нөгсансызлығы илә Шејтанын иддиаларынын јалан олдуғуну сүбут етди. Онун Аллаһа мәһәббәтдән ирәли ҝәләрәк хидмәт етдији ајдын олду.

13. Әјјубун садиглији нә илә нәтиҹәләнди?

¹³ Әјјубун садиглији сајәсиндә, Јеһова Шејтанын тәһгир­едиҹи тәрздә мејдан охумасына лајигли ҹаваб верә билди. Әјјуб Јеһованын әсл досту иди, Аллаһ да ону садиглијинә ҝөрә мүкафатландырды (Әјјуб 42:12-17).

МҮБАҺИСӘЛИ СУАЛЫН СИЗӘ ҺАНСЫ АИДИЈЈӘТИ ВАР?

14, 15. Нәјә ҝөрә демәк олар ки, Шејтанын иттиһамы јалныз Әјјуба јох, бүтүн инсанлара аиддир?

¹⁴ Шејтанын нөгсансызлыг барәдә галдырдығы суал јалныз Әјјуба аид дејилди. Бунун сизә дә аидијјәти вар. Бу, Јеһованын Сүлејманын мәсәлләри 27:11 ајәсиндәки сөзләриндән ајдын ҝөрүнүр: «Оғлум, һикмәтли ол, гој гәлбим севинсин, онда мәни утандырана ҹаваб верә биләрәм». Әјјубун өлүмүндән јүз илләр сонра јазылан бу сөзләр ҝөстәрир ки, Шејтан Аллаһа бөһтанлар атмаға вә Онун хидмәтчиләрини ҝүнаһландырмаға давам едир. Әҝәр Аллаһа мәгбул, дүзҝүн һәјат тәрзи сүрүрүксә, биз дә Шејтанын јалан иттиһамларына ҹаваб верир вә Јеһованын үрәјини севиндиририк. Бу, сиздә һансы һиссләри ојадыр? Һәјатымызда мүәјјән дәјишикликләр етмәли олсаг да, Иблисин әсассыз иттиһамларына ҹаваб вермәк неҹә дә ҝөзәл оларды, елә дејилми?!

¹⁵ Шејтан деди: «Дәри әвәзинә дәри! Инсан ҹанына ҝөрә һәр шејини верәр» (Әјјуб 2:4). Шејтан бурада «инсан» сөзүнү ишләтмәклә, иттиһамынын тәкҹә Әјјуба јох, бүтүн инсанлара јөнәлдијини ҝөстәрди. Буну јадда сахламаг чох ваҹибдир, чүнки Шејтан сизин дә нөгсансызлығынызы шүбһә алтына гојуб. Иблис истәјир ки, чәтинликләрлә гаршылашаркән, сиз Аллаһа итаәтсизлик ҝөстәриб, Онун салеһлик јолундан дөнәсиниз. Шејтан буна неҹә наил олмаға чалышыр?

16. а) Шејтан һансы үсулларла инсанлары Аллаһдан узаглашдырмаға чалышыр? б) Иблис бу үсуллары сизә гаршы неҹә истифадә едә биләр?

¹⁶ Онунҹу фәсилдә, инсанлары Аллаһдан узаглашдырмаг үчүн Шејтанын мүхтәлиф үсуллара әл атдығы мүзакирә олунурду. Онун үсулларындан бири, «нә’рә чәкән вә ашырмаг үчүн кимисә ахтаран аслан кими» һүҹум етмәкдир (1 Петер 5:8). Достларыныз, гоһумларыныз вә диҝәр инсанлар сизин Мүгәддәс Китабы өјрәнмәјинизә вә онун принсипләрини һәјата кечирмәјинизә мане олдуглары заман, Шејтанын тә’сири өзүнү хүсусилә бүрузә верирa (Јәһја 15:19, 20). Бундан әлавә, Шејтан «нур мәләји ҹилдинә» ҝирә билир (2 Коринфлиләрә 11:14). Јә’ни о сизи алдатмаг вә дүзҝүн јолдан аздырмаг үчүн, һијләјә әл ата биләр. Һәмчинин мә’јуслуға гапылдығыныз заман, о сизи Аллаһа хидмәт етмәјә лајиг олмадығынызы дүшүнмәјә вадар едә биләр (Сүлејманын мәсәлләри 24:10). «Нә’рә чәкән аслан» вә ја «нур мәләји» кими һәрәкәт етмәсиндән асылы олмајараг, Шејтанын мәгсәди бирдир: о, сизин сынаглар вә ја чәтинликләр гаршысында Аллаһа хидмәт етмәјә сон гојаҹағынызы сүбут етмәјә чалышыр. Сиз Шејтанын галдырдығы мүбаһисәли суала Әјјуб кими неҹә ҹаваб верә биләр вә Аллаһа садиглијинизи сүбут едә биләрсиниз?

ЈЕҺОВАНЫН ӘМРЛӘРИНӘ РИАЈӘТ ЕДИН

17. Јеһованын әмрләринә риајәт етмәјә башлыҹа олараг бизи нә тәшвиг етмәлидир?

¹⁷ Аллаһа мәгбул һәјат тәрзи сүрмәклә, Шејтанын галдырдығы мүбаһисәли суала ҹаваб верә биләҹәксиниз. Бунун үчүн нә етмәк лазымдыр? Мүгәддәс Китабда дејилир: «Аллаһын Рәбби бүтүн гәлбинлә, бүтүн варлығынла, вар ҝүҹүнлә сев» (Ганунун тәкрары 6:5). Аллаһа олан мәһәббәтиниз артдыгҹа, Ону разы салмаг арзунуз даһа да ҝүҹләнәҹәк. Һәвари Јәһја демишдир: «Аллаһы севмәк, Аллаһын әмрләринә риајәт етмәк демәкдир». Әҝәр Јеһованы бүтүн үрәјинизлә севирсинизсә, Онун әмрләри сизин үчүн ағыр олмајаҹаг (1 Јәһја 5:3).

18, 19. а) Јеһованын әмрләриндән бә’зиләри һансылардыр? (122-ҹи сәһифәдәки чәрчивәјә бахын.) б) Һарадан билирик ки, Аллаһ биздән мүмкүн олмајан шејләр тәләб етмир?

¹⁸ Јеһованын әмрләри нәдән ибарәтдир? Онлардан бә’зиләри нәдән гачмалы олдуғумузу ҝөстәрир. Мәсәлән, 122-ҹи сәһифәдәки «Јеһованын нифрәт етдији әмәлләрдән гачын» адлы чәрчивәјә диггәт јетирин. Орада Мүгәддәс Китабын бирмә’налы олараг мүһакимә етдији әмәлләр садаланыр. Онлардан бә’зиләри илк бахышдан бир о гәдәр дә пис ҝөрүнмәјә биләр. Анҹаг Мүгәддәс Китаб ајәләри үзәриндә дүшүнмәк, Јеһованын ганунларындакы мүдриклији ҝөрмәјинизә көмәк едәҹәк. Һәјатынызда нәји исә дәјишмәк асан олмаја биләр, бу, һәтта сизин үчүн ән ағыр сынаға чеврилә биләр. Лакин јадда сахлајын ки, Аллаһа мәгбул, дүзҝүн һәјат тәрзи хошбәхтлик ҝәтирир (Јешаја 48:17, 18). Бәли, Аллаһа мәгбул тәрздә јашамаг мүмкүндүр. Биз буну һарадан билирик?

¹⁹ Јеһова һеч вахт биздән едә биләҹәјимиздән артыг шеј тәләб етмир (Ганунун тәкрары 30:11-14). О, имканларымызы вә мәһдудијјәтләримизи биздән јахшы билир (Мәзмур 103:14). Үстәлик, дүзҝүн давранмағымыз үчүн Јеһова бизә ҝүҹ верә биләр. Һәвари Павел јазмышдыр: «Аллаһ садигдир; О, ҝүҹүнүздән артыг имтаһан олунманыза разылыг вермәз, лакин имтаһан илә јанашы, гуртулушу да тә’мин едәҹәкдир ки, таб ҝәтирә биләсиниз» (1 Коринфлиләрә 10:13). Таб ҝәтирә билмәниз үчүн, Јеһова сизә, һәтта ‘ән үстүн гүдрәти’ верә биләр (2 Коринфлиләрә 4:7). Павел чохлу сынаглара таб ҝәтирдикдән сонра там әминликлә дејә билди: «Мәни мөһкәмләндирән... васитәсилә һәр шеји етмәјә гадирәм» (Филипилиләрә 4:13).

АЛЛАҺА МӘГБУЛ КЕЈФИЈЈӘТЛӘР ИНКИШАФ ЕТДИРИН

20. Аллаһа мәгбул олан һансы кејфијјәтләри инкишаф етдирмәк лазымдыр вә бу, нәјә ҝөрә ваҹибдир?

²⁰ Јеһованын нифрәт етдији әмәлләрдән гачмаг кифајәт дејил. Аллаһы мәмнун етмәк үчүн, Онун севдији әмәлләри севмәк лазымдыр (Ромалылара 12:9). Бахышларыныза, мараг вә дәјәрләринизә шәрик олан инсанларла үнсијјәтдә олмаг сизә хошдурму? Јеһова да белә инсанларла дост олмаг истәјир. Буна ҝөрә дә, Онун дәјәрләндирдији һәр шеји севмәји өјрәнин. Бунлардан бә’зиләри Мәзмур 15:1-5 ајәләриндә јазылмышдыр. Бу ајәләрдән Аллаһын досту олмаг үчүн нә етмәли олдуғумуз һагда охујуруг. Јеһованын достлары Мүгәддәс Китабда руһун сәмәрәси адланан кејфијјәтләри тәзаһүр етдирирләр. Руһун сәмәрәсинә «мәһәббәт, севинҹ, сүлһ, сәбир, лүтфкарлыг, јахшылыг, сәдагәт, һәлимлик, өзүнә һаким олмаг» кими кејфијјәтләр дахилдир (Галатијалылара 5:22, 23).

21. Аллаһа мәгбул кејфијјәтләр инкишаф етдирмәкдә сизә нә көмәк едәҹәк?

²¹ Мүгәддәс Китабы ҝүндәлик охумаг вә өјрәнмәк Аллаһа мәгбул кејфијјәтләр инкишаф етдирмәкдә сизә көмәк едәҹәк. Аллаһын тәләбләри һаггында өјрәнәрәк, сиз өз дүшүнҹәләринизи Онун нөгтеји-нәзәрләри илә ујғунлашдыра биләҹәксиниз (Јешаја 30:20, 21). Јеһоваја олан мәһәббәтиниз ҝүҹләндикҹә, сиз Ону даһа чох севиндирмәк вә Она мәгбул һәјат тәрзи сүрмәк истәјәҹәксиниз.

22. Аллаһа мәгбул һәјат тәрзи сүрсәниз, нәјә наил олаҹагсыныз?

²² Аллаһы разы салмаг үчүн сә’ј тәләб олунур. Мүгәддәс Китабда һәјат тәрзинин дәјишилмәси, инсанын көһнә мәнлији чыхарыб јени мәнлији ҝејинмәси илә мүгајисә едилир (Колослулара 3:9, 10). Јеһованын әмрләри һаггында мәзмурчу јазмышдыр: «Онлара әмәл едәнин бол мүкафаты вар» (Мәзмур 19:11). Аллаһа мәгбул һәјат тәрзинин бол хејир-дуалар ҝәтирдијинә сиз дә әмин олаҹагсыныз. Бунунла сиз Шејтанын ирәли сүрдүјү мүбаһисәли суала ҹаваб верә биләҹәк вә Јеһованын үрәјини севиндирәҹәксиниз!