Бајрамлара мүнасибәтимиз неҹә олмалыдыр?

БУ ҜҮН дүнјада бир чох мәшһур дини вә дүнјәви бајрамлар гејд едилир. Бунларын һеч бири Мүгәддәс Китаба әсасланмыр. Бәс онда бајрамларын көкү һара ҝедиб чыхыр? Јәгин ки, бу суалы енсиклопедијаларын көмәји илә арашдырмаг сизин үчүн мараглы олаҹаг. Бир нечә нүмунәни нәзәрдән кечирәк.

Пасха. «Британија енсиклопедијасы»нда дејилир: «Јунанҹа Мүгәддәс Јазыларда Иса Мәсиһин дирилмәсинин бајрам едилмәсинә даир һеч бир ишарә јохдур» («The Encyclopedia Britannica»). Бу бајрамын Исанын дирилмәсинин шәрәфинә гејд едилдији һесаб едилсә дә, Пасха ән’әнәләри бүтпәрәстликлә әлагәлидир. Мәсәлән, «Пасха довшаны» һаггында «Католик енсиклопедијасы»нда дејилир: «Довшан бүтпәрәстлик символудур вә о боллуг рәмзи сајылыр» («The Catholic Encyclopedia»).

Јени ил бајрамы. Јени ил бајрамынын кечирилмә тарихи вә бунунла әлагәдар адәтләр мүхтәлиф өлкәләрдә мүхтәлиф ҹүрдүр. «Уорлд бук» енсиклопедијасында бу бајрамын јаранма тарихи барәдә дејилир: «Илин јанварын 1-дән башланмасыны б. е. ә. 46-ҹы илдә Рома императору Јули Сезар тә’јин етмишдир. Ромалылар бу ҝүнү ҝириш вә чыхышларын, гапыларын вә бүтүн башланғыҹларын аллаһы сајылан Јануса һәср етмишдиләр. Јанвар ајы ики үзлү: бир үзү кечмишә, о бири үзү ҝәләҹәјә јөнәлдилмиш формада тәсвир олунан Јанус аллаһын шәрәфинә адланмышды» («The World Book Encyclopedia»). Ҝөрүндүјү кими, јени ил бајрамынын көкү бүтпәрәстлик ајинләринә дајаныр.

Һеллоуин. Бир енсиклопедијада дејилир: «Һеллоуин ајинләри мәсиһчиликдән әввәлки дөврә аиддир вә друидләрин (гәдим келтләрин каһинләри) ајин вә ән’әнәләри илә бағлыдыр. Келтләр ики әсас аллаһын — ҝүнәш аллаһынын вә өлүләр аллаһынын шәрәфинә бајрам кечирирдиләр. Өлүләр аллаһынын шәрәфинә кечирдикләри бајрамы 1 нојабрда гејд едирдиләр (бу ҝүн, келтләрдә јени илин башланғыҹы һесаб едилирди). Вахт кечдикҹә бу бајрам Христиан бајрамларынын сырасына дахил олду» («The Encyclopedia Americana»).

Диҝәр бајрамлар. Бу ҝүн дүнјада гејд олунан бајрамларын һамысыны мүзакирә етмәк мүмкүн дејил. Лакин тамамилә ајдындыр ки, инсанлары вә ја тәшкилатлары иззәтләндирән бајрамлар Јеһоваја мәгбул дејил (Јеремја 17:5-7; Һәвариләрин ишләри 10:25, 26). Һәмчинин јадда сахламаг ваҹибдир ки, дини бајрамларын Јеһоваја мәгбул олуб-олмадығыны мүәјјән етмәјә онун мәншәји көмәк едир (Јешаја 52:11; Вәһј 18:4). Бу китабын 16-ҹы фәслиндә ҝәтирилән Мүгәддәс Китаб принсипләри Аллаһын бу вә ја диҝәр бајрамларда иштирак етмәјә неҹә јанашдығыны өјрәнмәјинизә көмәк едәҹәк.