Һәгигәти өјрәнмәк истәјирсинизми?

СӨҺБӘТ һансы һәгигәтдән ҝедир? Инсанлары тарих боју нараһат етмиш ән мүһүм суаллардан. Чох ҝүман ки, ашағыдакы суаллар сизи дә дүшүндүрүр:

• Аллаһ, доғрудан да, бизим гејдимизә галырмы?

• Мүһарибәләр вә әзаб-әзијјәтин нә вахтса сону олаҹагмы?

• Инсан өләндән сонра онунла нә баш верир?

• Өлүләри ҝәләҹәкдә нә ҝөзләјир?

• Аллаһын мәни ешитмәси үчүн неҹә дуа етмәлијәм?

• Мән сөзүн әсил мәнасында неҹә хошбәхт ола биләрәм?

Бу суаллара ҹавабы һарадан тапмаг олар? Китабханалара вә ја китаб мағазаларына мүраҹиәт етсәниз, орада бу суаллара ҹаваб вердијини иддиа едән минләрлә китаб тапа биләрсиниз. Амма чох вахт бу китабларда бири-биринә зидд фикирләрә раст ҝәлмәк олар. Бәзи китаблар гыса мүддәтдән сонра актуаллығыны итирир; ја онлара дүзәлишләр едилир, ја да јениләри илә әвәз олунур.

Лакин бир китаб вардыр ки, бу суаллара етибарлы ҹаваблар верир. Бу китабда һәгигәт јазылмышдыр. Иса Мәсиһ Аллаһа дуа едәркән демишди: «Һәгигәт Сәнин сөзүндүр» (Јәһја 17:17). Һәмин Сөз бу ҝүн Мүгәддәс Китаб кими таныныр. Нөвбәти сәһифәләрдән бу суаллара Мүгәддәс Китабын вердији ајдын, доғруҹул ҹаваблары охуја биләрсиниз.

Аллаһ, доғрудан да, бизим гејдимизә галырмы?

СУАЛЫН ЈАРАНМАСЫНА СӘБӘБ: Биз гәддарлыг вә һагсызлығын ҹөвлан етдији бир дүнјада јашајырыг. Бир чох динләр өјрәдир ки, пајымыза дүшән әзаб-әзијјәт «Аллаһын ишидир».

МҮГӘДДӘС КИТАБ НӘ ДЕЈИР: Пислијин сәбәбкары Аллаһ дејил. Әјјуб 34:10 ајәсиндә дејилир: «Аллаһ гәтијјән пислик етмәз, Гүдрәт Саһиби һагсызлыг етмәз!» Аллаһ инсанлары севир вә онларын јахшылығыны истәјир. Бу сәбәбдән Иса Мәсиһ белә дуа етмәји өјрәдирди: «Ҝөјләрдә олан Атамыз... Гој Падшаһлығын ҝәлсин. Гој Сәнин ирадән ҝөјдә олдуғу кими, јердә дә јеринә јетсин» (Мәтта 6:9, 10). Аллаһ бизи о гәдәр чох севир ки, бизим уғрумузда мисли ҝөрүнмәмиш бир гурбан вериб (Јәһја 3:16).

Һәмчинин Јарадылыш 1:26—28; Јагуб 1:13 вә 1 Бутрус 5:6, 7 ајәләринә бахын.

Мүһарибәләр вә әзаб-әзијјәтин нә вахтса сону олаҹагмы?

СУАЛЫН ЈАРАНМАСЫНА СӘБӘБ: Бу ҝүн дә мүһарибәләрдә сајсыз-һесабсыз инсан һәлак олур. Мүһарибәләрин ағры-аҹысы һеч биримиздән јан кечмир.

МҮГӘДДӘС КИТАБ НӘ ДЕЈИР: Аллаһ бүтүн дүнјада әмин-аманлыг гураҹағыны вәд етмишдир. О, јер үзүнү идарә етмәјә башлајанда инсанлар артыг «мүһарибә етмәји өјрәнмәјәҹәкләр». Бунун әвәзинә онлар «гылынҹларындан ҝаваһын» дүзәлдәҹәкләр (Әшија 2:4). Аллаһ бүтүн һагсызлыға вә әзаблара сон гојаҹаг. Мүгәддәс Китабда вәд едилир: «О, онларын ҝөзләриндән бүтүн јашлары силәҹәк. Артыг өлүм олмајаҹаг. Нә дәрд, нә фәрјад, нә дә ағры олмајаҹаг, чүнки әввәлки шејләр [о ҹүмләдән буҝүнкү һагсызлыг вә әзаблар] кечиб ҝетди» (Вәһј 21:3, 4).

Һәмчинин Зәбур 37:10, 11; 46:9 вә Микә 4:1—4 ајәләринә бахын.

Инсан өләндән сонра онунла нә баш верир?

СУАЛЫН ЈАРАНМАСЫНА СӘБӘБ: Дүнјадакы әксәр динләр инсан өләндән сонра онун руһунун јашадығыны өјрәдир. Бәзиләринин фикринҹә, өлүләр дириләрә зәрәр вура биләр вә ја пис адамлар өләндән сонра Аллаһ онлары әбәдијјән ҹәһәннәм одунда ҹәзаландырыр.

МҮГӘДДӘС КИТАБ НӘ ДЕЈИР: Өләндән сонра инсан һеч јердә, һеч бир формада мөвҹуд олмур. Ваиз 9:5 ајәсиндә дејилир: «Өлүләр һеч нә билмир». Өлүләр һеч нә дәрк вә һисс етмәдикләри үчүн дириләрә нә зәрәр тохундура, нә дә көмәк едә биләрләр (Зәбур 146:3, 4).

Һәмчинин Јарадылыш 3:19 вә Ваиз 9:6, 10 ајәләринә бахын.

Өлүләри ҝәләҹәкдә нә ҝөзләјир?

СУАЛЫН ЈАРАНМАСЫНА СӘБӘБ: Һәр биримиз севдијимиз адамларла хошбәхтлик ичиндә өмүр сүрмәји арзулајырыг. Өлән әзизләримизин хиффәтини чәкмәк вә онлары јенидән ҝөрмәк истәји тамамилә тәбиидир.

МҮГӘДДӘС КИТАБ НӘ ДЕЈИР: Өлмүш адамларын әксәријјәти дирилдиләҹәк. Иса пејғәмбәр сөз вермишди ки, «гәбирләрдә оланларын һамысы... дириләҹәкләр» (Јәһја 5:28, 29). Аллаһын әзәли нијјәтинә әсасән, һәјата гајтарылмыш инсанлар Ҹәннәтә чеврилмиш јер үзүндә јашајаҹаглар (Әшија 65:21—25). Вәд едилмиш ҝәләҹәкдә итаәткар инсанлар тамамилә сағлам олаҹаг вә әбәди јашајаҹаглар. Мүгәддәс Китабда дејилир: «Салеһләр јерә саһиб олаҹаг, орада әбәди јашајаҹаглар» (Зәбур 37:29).

Һәмчинин Әјјуб 14:14, 15; Лука 7:11—17 вә Һәвариләрин ишләри 24:15 ајәләринә бахын.

Аллаһын мәни ешитмәси үчүн неҹә дуа етмәлијәм?

СУАЛЫН ЈАРАНМАСЫНА СӘБӘБ: Демәк олар ки, бүтүн динләрдә диндарлар дуа едирләр. Бунунла белә чохларына елә ҝәлир ки, дуалары ҹавабсыз галыр.

МҮГӘДДӘС КИТАБ НӘ ДЕЈИР: Иса пејғәмбәр өјрәдирди ки, дуалар әзбәрдән сөјләнилмәмәлидир. О демишди: «Дуа едәндә... ејни сөзләри тәкрар–тәкрар демәјин» (Мәтта 6:7). Аллаһын дуаларымызы динләмәсини истәјириксә, биз Онун бәјәндији тәрздә дуа етмәлијик. Буну етмәк үчүн биз Аллаһын ирадәсини өјрәнмәли вә өјрәндикләримизә ујғун дуа етмәлијик. Һәвари Јәһјанын биринҹи мәктубунун 5:14 ајәсиндә изаһ едилир: «Биз Онун [Аллаһын] ирадәсинә ујғун шәкилдә бир шеј диләјириксә, О бизи ешидир».

Һәмчинин Зәбур 65:2; Јәһја 16:23, 24 вә 1 Јәһја 3:22 ајәләринә бахын.

Мән сөзүн әсил мәнасында неҹә хошбәхт ола биләрәм?

СУАЛЫН ЈАРАНМАСЫНА СӘБӘБ: Бир чохлары әминдирләр ки, хошбәхтлик вар-дөвләт, ҝөзәллик вә шан-шөһрәтдәдир. Бүтүн бунлардан өтрү онлар дәридән габыгдан чыхыр, амма хошбәхт ола билмирләр ки, билмирләр.

МҮГӘДДӘС КИТАБ НӘ ДЕЈИР: Иса Мәсиһин ашағыдакы сөзләриндә хошбәхтлијин сирри ачыгланыр: «Аллаһын сөзүнү ешидиб она әмәл едәнләр хошбәхтдирләр» (Лука 11:28). Инсан өзүнүн ән бөјүк тәләбатыны — Аллаһ вә Онун бизимлә әлагәдар нијјәти кими руһани һәгигәтләрә олан еһтијаҹыны тәмин етмәјә ҹан атдығы тәгдирдә әсил хошбәхтлијә чата биләр. Бу һәгигәтләри Мүгәддәс Китабда тапа биләрик. Һәгигәти билмәјимиз һәјатда нәјин, доғрудан да, ваҹиб, нәјин исә әһәмијјәтсиз олдуғуну дәрк етмәјә көмәк едир. Мүгәддәс Китаб һәгигәтинин гәрар вә һәрәкәтләримизи истигамәтләндирмәсинә јол верәндә һәјатымыз даһа да мәналы олур.

Һәмчинин Мәсәлләр 3:5, 6, 13—18 вә 1 Тимутијә 6:9, 10 ајәләринә бахын.

Јухарыдакылар Мүгәддәс Китабын ҹәми алты суала вердији ҹавабларын гыса иҹмалы иди. Даһа әтрафлы мәлумат алмаг истәрдинизми? Һәгигәти ахтаран бир инсан кими шүбһәсиз ки, истәрдиниз. Ола биләр сизи башга суаллар дүшүндүрүр. Мәсәлән: Аллаһ бизим һаггымызда дүшүнүрсә, онда нә үчүн бу гәдәр пислијә вә әзаб-әзијјәтә ҝөз јумур? Аиләмин даһа да хошбәхт олмасы үчүн нә едә биләрәм? Мүгәддәс Китаб бу вә бир чох диҝәр суаллара әтрафлы вә инандырыҹы ҹаваб верир.

Буна бахмајараг, бу ҝүн чохлары Мүгәддәс Китабла таныш олмадыглары үчүн бу китаба мүраҹиәт етмәкдән чәкинир. Бәс сиз Мүгәддәс Китабын суалларыныза неҹә ҹаваб вердијини билмәк истәрдинизми? Јеһованын Шаһидләринин тәгдим етдији ики вәсаит бу ишдә сизә јардымчы ола биләр.

Бу вәсаитләрдән биринҹиси «Илаһи мүждә» брошүрүдүр. Бу нәшр мәшғул адамларын Мүгәддәс Китабын мүһүм суаллара вердији ајдын ҹаваблары тәдгиг етмәси үчүн әвәзолунмаздыр. Икинҹиси исә пулсуз Мүгәддәс Китаб дәрсләридир. Мүгәддәс Китабы тәдрис едән Јеһованын Шаһидләри сизинлә, евиниздә вә ја истәдијиниз јердә һәр һәфтә тамамилә тәмәннасыз Аллаһын Кәламыны гысаҹа арашдыра биләрләр. Бүтүн дүнјада милјонларла адам Мүгәддәс Китаб дәрсләриндән фајдаланмышдыр. Онлардан чоху белә гәнаәтә ҝәлмишләр ки, әсил һәгигәти тапыблар.

Дүнјада бундан гијмәтли сәрвәт ола билмәз. Мүгәддәс Китаб һәгигәти бизи мөвһуматдан, тәлаш вә горхудан азад едир. О, бизә үмид вә севинҹ бәхш едир, һәјатымызы мәна илә долдурур. Иса демишди: «Сиз һәгигәти дәрк едәҹәксиниз вә һәгигәт сизи азад едәҹәк» (Јәһја 8:32).