Аллаһын јер үчүн нијјәти нәдир?

АЛЛАҺ Јер күрәсини инсанларын јашамасы үчүн мүкәммәл шәкилдә јарадыб. Онун Кәламында дејилир: «Ҝөјләр Јеһованындыр, јери исә бәшәр оғулларына вериб» (Зәбур 115:16).

Илк инсан Адәми јаратмаздан өнҹә, Аллаһ јер үзүнүн кичик бир һиссәсиндә ҝөзәл бир бағ јаратды вә адыны Әдән гојду. Мүгәддәс Китабда дејилир ки, Фәрат вә Дәҹлә чајларынын мәнбәләри Әдән бағындан башлајырдыa. Еһтимала ҝөрә Әдән бағы вахтилә индики Түркијәнин шәргиндә јерләширди. Әдән бағынын мөвҹудлуғуна һеч бир шүбһә ола билмәз!

Аллаһ Адәми јаратды вә «Әдән бағында мәскунлашдырды ки, бағы беҹәрсин вә она гуллуг етсин» (Јарадылыш 2:15). Сонра Аллаһ Адәм үчүн Һәвваны јаратды. Аллаһ онлара әмр едиб деди: «Төрәјиб чохалын, бүтүн јер үзүнү долдурун вә она саһиб олун» (Јарадылыш 1:28). Ајдындыр ки, Јеһова дүнјаны «бош јерә дејил, јашајыш үчүн» јарадыб (Әшија 45:18).

Адәмлә Һәвва биләрәкдән Аллаһын әмрини позмагла Она гаршы үсјан етдиләр. Буна ҝөрә Аллаһ онлары Әдән бағындан говду. Беләҹә, Ҹәннәт итирилди. Адәмин ҝүнаһынын нәтиҹәси онун нәслиндән јан кечмәди. Мүгәддәс Китабда дејилир: «Беләликлә, ҝүнаһ бир адам васитәсилә, өлүм дә ҝүнаһ васитәсилә дүнјаја ҝирди. Беләҹә, өлүм бүтүн адамлара кечди, чүнки һамы ҝүнаһ ишләјиб» (Ромалылара 5:12).

Аллаһ истәјирди ки, инсанлар јер үзү ҹәннәтдә хошбәхт јашасынлар. Бәс Аллаһ бу илк нијјәтиндән дашынды? Әлбәттә, јох! Аллаһ дејир: «Ағзымдан чыхан сөз... јаныма әлибош гајытмајаҹаг, Әксинә, истәјими һөкмән һәјата кечирәҹәк, Ону ҝөндәрдијим мәгсәдә мүтләг наил олаҹаг» (Әшија 55:11). Тәсәввүр едирсиниз, Ҹәннәт јер үзүндә бәрпа олунаҹаг!

Ҹәннәтдә һәјат неҹә олаҹаг? Нөвбәти ики сәһифәдә буна даир Мүгәддәс Китабдан ајәләр ҝәтирилир. Ҝәлин онлары нәзәрдән кечирәк.