ФӘСИЛ 27

Нијә оғланларын мәндән хошу ҝәлмир?

Инди о билир ки, һамы мәним дәрдимдән өлүр, чүнки она мәндән өтрү үрәкләри ҝедән оғланлардан данышдым. Бәзи рәфигәләримин ахмаг һәрәкәтләриндән данышанда ҝүлүрдү. Амма о билир ки, мән ағыллыјам, чүнки бир нечә дәфә сөзүнә дүзәлиш етдим. Баша дүшә билмирәм, нијә индијә кими мәнә ҝөрүшмәји тәклиф етмәјиб.

Гәшәнҝ гыздыр, амма өзүнү чох јүнҝүл апарыр. Аман вермәди ки, ағзымы ачым. Имкан тапыб бир сөз дејән кими дә сәһв тутур. Һеч билмирәм, онун әлиндән ҹанымы неҹә гуртарым.

ҜӘНҸ оғланлар сәнинлә марагланмыр дејә нараһат олурсан? Бир чох гызлар, һәтта ҝөзәл гызлар белә бу проблемлә үзләширләр. Мисал үчүн, ҝөтүрәк Наиләни. О, ағыллыдыр, ҝөзәлдир, јахшы данышыг габилијјәтинә маликдир. Бунунла белә, о етираф едир: «Чох вахт мәнә елә ҝәлир ки, оғланларын мәндән хошу ҝәлмир. Бәјәндијим оғланлардан бәзиләри бир мүддәт мәнимлә марагланыр, сонра исә үнсијјәти кәсирләр».

Оғланлар һансы гызлары бәјәнир, һансылардан хошлары ҝәлмир? Бәс јарашыглы оғланын диггәтини неҹә ҹәлб етмәк олар?

Нә етмәлисән?

● Өз үрәјини вә дүшүнҹәләрини јохла. Јәгин, јенијетмәлик дөврүндә сәндә оғланлара гаршы мараг јараныб. Бу дөврдә бир нечә оғландан хошун ҝәлә биләр. Бу тәбиидир. Лакин хошуна ҝәлән илк оғлана үрәјини вермәјин сәнә емосионал вә руһани ҹәһәтдән зәрәр верә биләр. Илк нөвбәдә, сән јахшы кејфијјәтләрә јијәләнмәли, «ағлыны јениләшдир[мәли]», јәни Аллаһын нөгтеји-нәзәрини мәнимсәмәли вә гаршына гојдуғун мәгсәдләрә наил олмалысан (Ромалылара 12:2; 1 Коринфлиләрә 7:36; Колослулара 3:9, 10).

Дүздүр, оғланларын әксәријјәтинин һәлә характери формалашмамыш, мөһкәм әгидәси олмајан саф гызлардан хошу ҝәлир. Белә оғланлары гызларын јалныз бәдәни марагландырыр. Амма дүшүнҹәли оғлан ҝөзәл шәхсијјәти олан елә бир гыз ахтараҹаг ки, онлар бир-бирләрини тамамлаја билсинләр (Матта 19:6).

Оғланлар дејир: «Мәним шәхси фикирләри олан, мөһкәм ирадәли гызлардан хошум ҝәлир» (Ҹејмс).

«Мәни өз фикирләрини ајдын вә һөрмәтҹил тәрздә ифадә етмәји баҹаран гызлар ҹәлб едир. Гыз нә гәдәр ҝөзәл олурса-олсун, јалныз мәним ешитмәк истәдијими дејәндә өзүмү онун јанында нараһат һисс едирәм» (Ниҹат).

Оғланларын дедикләри бу фикирләр барәдә нә дүшүнүрсән?

․․․․․

● Һөрмәт ҝөстәр. Гызлар севилмәк, оғланлар исә һөрмәт ҝөрмәк истәјир. Мүгәддәс Китабда әбәс јерә дејилмир ки, әрләр арвадларыны севмәли, арвадлар исә әрләринә «дәрин һөрмәт» бәсләмәлидирләр (Ефеслиләрә 5:33). Апарылан бир сорғуја әсасән, јүзләрлә ҝәнҹ оғланларын 60 фаизи мәһәббәтдән чох һөрмәтә үстүнлүк вердикләрини демишләр. Сорғуда иштирак едән орта јашлы кишиләрин 70 фаизиндән чоху да ејни фикирдәдир.

Һөрмәт етмәк — өз фикирләриндән вә фикир сөјләмәк һүгугундан тамамилә имтина етмәк демәк дејил (Јарадылыш 21:10—12). Лакин сән фикрини ифадә етмәк тәрзинлә оғланы ја ҹәлб едә, ја да өзүндән узаглашдыра биләрсән. Әҝәр һәмишә она гаршы чыхсан вә ја һәр дәфә сөзләринә дүзәлиш етсән, о, сәнин она һөрмәт етмәдијини дүшүнә биләр. Анҹаг онун фикирләринә һөрмәт етдијини ҝөстәрсән вә сөјләдији фикирләрин тәрифәлајиг олдуғуну дилә ҝәтирсән, о да сәнин фикирләрини гәбул едиб гијмәтләндирәҹәк. Әлбәттә, ағыллы оғлан сәнин аилә үзвләринлә вә башгалары илә неҹә рәфтар етдијинә дә диггәт јетирәҹәк.

Оғланлар дејир: «Мәним фикримҹә, мүнасибәтләрин башланғыҹында ән ваҹиби һөрмәтдир. Мәһәббәт сонрадан да јарана биләр» (Адриан).

«Әҝәр гыз мәнә һөрмәт едә биләрсә, демәли, севә дә биләр» (Марк).

Оғланларын дедикләри бу фикирләр барәдә нә дүшүнүрсән?

․․․․․

● Әдәбли ҝејин, өзүнә фикир вер. Ҝејимин вә сач дүзүмүн сәнин һаггында чох шеј — дүшүнҹә тәрзини, неҹә инсан олдуғуну дејир. Һеч ағзыны ачмамыш, гаршындакы оғлана сәнин һаггында, демәк олар ки, һәр шеј ајдын олур. Әҝәр ҝејимин сәлигәли вә әдәблидирсә, бу, гаршындакы инсанда мүсбәт фикир ојадаҹаг (1 Тимотејә 2:9). Јох, әҝәр ачыг вә јөндәмсиздирсә, өзүн һагда әдәбсиз бири кими мәнфи фикир јарадаҹагсан.

Оғланлар дејир: «Гызын ҝејим тәрзи онун һәјата бахышларына даир чох шеј дејир. Ачыг-сачыг вә ја сәлигәсиз ҝејинирсә, бу, онун чарәсиз һалда өзүнә диггәт ҹәлб етмәјә чалышдығыны ҝөстәрир» (Адриан).

«Мәним сачларына гуллуг едән, ҝөзәл әтирли вә мүлајим сәси олан гызлардан хошум ҝәлир. Бир гыз бәјәнмишдим. Ҝөзәл олмасына бахмајараг, һеч өзүнә фикир вермирди. Буна ҝөрә дә она олан марағым тез бир заманда өлдү» (Рамиз).

«Әҝәр гыз ачыг-сачыг ҝејинирсә, о, бир мүддәт өзүнә диггәт ҹәлб едә биләр. Анҹаг мән белә бир гызла һеч вахт ҹидди мүнасибәт гурмарам» (Николас).

Оғланларын дедикләри бу фикирләр барәдә нә дүшүнүрсән?

․․․․․

Нәји етмәмәлисән?

● Флирт етмә. Гадын бөјүк гүввәдир. О истәсә, бу гүввәдән һәм јахшы, һәм дә пис мәгсәдләр үчүн истифадә едә биләр (Јарадылыш 29:17, 18; Сүлејманын мәсәлләри 7:6—23). Әҝәр сән мәфтун етмәк баҹарығыны һәр оғланын үстүндә сынагдан кечирсән, онда флирт едән бири кими танынаҹаг вә пис ад газанаҹагсан.

Оғланлар дејир: «Ҹәлбедиҹи бир гызын јанында садәҹә отурмаг вә ја онун чијнинә әлини гојмаг белә инсаны һәјәҹанландыра биләр. Буна ҝөрә дә дүшүнүрәм ки, гыз сөһбәт едәркән тез-тез мәнә тохунурса, демәли, о флирт едир» (Николас).

«Јолдан өтән һәр оғлана ҝөз-гаш едән, данышаркән дәгигәбашы оғланын әлинә тохунан гызлардан аҹығым ҝәлир» (Хосе).

● Бездирмә. Мүгәддәс Китабда дејилдији кими, ики нәфәр евләнәндә «бир бәдән» олур (Јарадылыш 2:24). Бу заман әрлә арвад субај икән малик олдуглары сәрбәстликдән мүәјјән мәнада имтина едир, тамамилә бир-бириләринә аид олурлар (1 Коринфлиләрә 7:32—34). Анҹаг сиз тәзәҹә ҝөрүшүрсүнүзсә, һәр шејә ҝөрә бир-бириниздән һесабат тәләб етмәјә ихтијарыныз јохдурa. Әҝәр сән онун достлары илә вахт кечирмәсинә һөрмәтлә јанашсан, о, сәнә даһа чох мараг ҝөстәрәҹәк. Үстәлик, азадлығындан неҹә истифадә етмәси оғланын хүсусијјәтләри һагда сәнә чох шеј дејәҹәк (Сүлејманын мәсәлләри 20:11).

Оғланлар дејир: «Гыз һәр аддымымы билмәк истәјәндә, иҹтимаи һәјаты вә ја мәндән башга һеч бир мараг даирәси олмајанда мәни лап боғаза јығыр» (Ниҹат).

«Тәзә таныш олдуғум гызын ики дәгигәдән бир СМС јазыб һарада олдуғуму, киминлә олдуғуму, хүсусилә дә јанымдакы гызларын адыны билмәк истәмәси мәним үчүн бир хәбәрдарлыгдыр» (Рамиз).

«Ҝөрүшдүјүм гызын гырсаггыз кими јапышыб достларымла бирликдә вахт кечирмәјә аман вермәмәси, ону һәр јерә өзүмлә апармајанда әсәбиләшмәси мәни гыҹыгландырыр» (Адриан).

Оғланларын дедикләри бу фикирләр барәдә нә дүшүнүрсән?

․․․․․

Өзүнә дәјәр вер

Јәгин, сән оғланларын диггәтини ҹәлб етмәк вә өзләрини бәјәндирмәк үчүн дәридән-габыгдан чыхан гызлар таныјырсан. Еләләри дә вар ки, оғланла ҝөрүшмәк вә ја әрә ҝетмәк үчүн һәтта өз принсипләринә ҝүзәштә ҝетмәјә белә һазырдыр. Амма унутма ки, «инсан нә әкәрсә, ону да бичәҹәк» (Галатијалылара 6:7—9). Әҝәр сән өзүнә вә јашадығын принсипләрә гијмәт вермирсәнсә, онда гаршына чыхан оғланлар да нә сәнә, нә дә сәнин принсипләринә һөрмәт гојмаҹаглар.

Бир шеји дә баша дүшмәлисән ки, бүтүн оғланларын хошуна ҝәлә билмәзсән вә бунун мүсбәт ҹәһәтләри чохдур. Әҝәр сән һәм заһири, һәм дә дахили ҝөзәллијинин гејдинә галсан, Аллаһын ҝөзүндә чох гијмәтли олаҹагсан (1 Петер 3:4). Онда лајигли оғланларын да диггәтини ҹәлб едәҹәксән.

[Һашијә]

АЧАР АЈӘ

“Гадынын мәлаһәти алдадыҹы, ҝөзәллији фанидир, јалныз Рәбдән горхан гадын тәрифә лајигдир” Сүлејманын мәсәлләри 31:30

МӘСЛӘҺӘТ

Косметикадан һәддән артыг истифадә етмә. Бу, сәнин һагда өзүндәнразы вә ја чарәсиз һалда башгаларынын диггәтини ҹәлб етмәјә чалышан бири кими јанлыш тәәссүрат ојадаҹаг.

БИЛИРСӘН... ?

Ҝөрүшдүјүн оғландан даима сәнә диггәт ҝөстәрмәсини тәләб етсән, бу, сизин мүнасибәтләринизи сарсыда биләр.

ҺӘРӘКӘТ ПЛАНЫ!

Чалышаҹағам нөвбәти саһәләрин үзәриндә ишләјим: ․․․․․

Бу мөвзу илә бағлы валидејнләримә вермәк истәдијим суаллар: ․․․․․

НЕҸӘ ДҮШҮНҮРСӘН?

● Оғланын һиссләринә вә фикирләринә һөрмәт етдијини неҹә ҝөстәрә биләрсән?

● Өзүнә дәјәр вердијини неҹә ҝөстәрә биләрсән?

[190–ҹы сәһифәдәки јазы]

“Дүзүнү десәм, мән ҝөзәл гызлара диггәт јетирирәм. Амма ҝөрәндә ки, гызын конкрет вә дәјәрли мәгсәдләри јохдур, тез бир вахтда марағым өлүр. Јох, әҝәр гыз һәјатдан нә истәдијини билирсә, хүсусилә дә артыг мүәјјән мәгсәдләринә наил олубса, ҝөзүмдә онун дәјәри артыр” Кәнан

[191–ҹи сәһифәдәки шәкил]

Мәһәббәт вә һөрмәт велосипедин ики тәкәри кимидир — һәр икиси дә мүтләгдир