ФӘСИЛ 28

Нијә гызларын мәндән хошу ҝәлмир?

Јүз фаиз әминәм, мәндән хошу ҝәлир. Өзүм һагда һәр шеји она данышдым: нәләрим олдуғуну, һаралары ҝәздијими, кимләри таныдығымы. Јәгин, мәнимлә ҝөрүшә чыхмаг үчүн үрәји ҝедир!

Лап боғаза јығылдым! Ахы ондан хошум ҝәлмәдијини нијә баша дүшмүр? Кобудлуг етмәдән ондан ҹанымы неҹә гуртарым?

ЈӘГИН, артыг гызла ҝөрүшән вахтындыр. Ола билсин, өз дининдән олан ҝөзәл бир гызла таныш олмаг истәјирсән (1 Коринфлиләрә 7:39). Бәлкә дә, һәр дәфә киминләсә мүнасибәт гурмаг ҹәһдин боша чыхдығындан уғурсуз бир адам олдуғуну дүшүнүрсән. Ҝөрәсән, проблем нәдәдир? Гызлар јалныз јарашыглы оғланларымы бәјәнир? Лиза дејир: «Оғлан бир аз голу гүввәтли, бәдәнли олса пис олмаз». Анҹаг әксәр гызларын диггәтини ҹәлб едән тәкҹә хариҹи ҝөрүнүш дејил. Ҝөр 18 јашлы Шәбнәм нә дејир: «Оғланын јарашыглы олмасы һеч дә онун ҝөзәл кејфијјәтләрә малик олдуғуну ҝөстәрмир».

«Ҝөзәл кејфијјәтләрә» нә дахилдир? Әҝәр бир гызы јахындан танымаг истәјирсәнсә, нәләрә фикир вермәлисән? Мүгәддәс Китабын һансы принсипләрини јадда сахламалысан?

Илк нөвбәдә, нә етмәлисән?

Гызла мүнасибәт гурмаздан өнҹә, бәзи ваҹиб шејләри өјрәнмәлисән. Бу, сәнә һәјатда башга достлар да газанмаға көмәк едәҹәк. Ҝәл ашағыдакылара нәзәр салаг.

● Әдәб-әркан гајдаларыны өјрән. Мүгәддәс Китабда дејилир ки, мәһәббәт «налајиг давранмыр» (1 Коринфлиләрә 13:5). Әдәб-әркан гајдаларына риајәт етмәклә сән башгаларына һөрмәтлә јанашдығыны, Аллаһын јеткин хидмәтчиси олдуғуну вә Иса пејғәмбәри тәглид етдијини ҝөстәрмиш олурсан. Анҹаг әдәб-әркан сәнин үчүн пенҹәк дејил ки, башгаларында тәәссүрат ојатмаг үчүн ҝејинәсән, евә ҝәләндә исә чыхарасан. Өзүндән соруш: «Мән евдәкиләрлә нәзакәтлә давраныраммы?» Әҝәр белә дејилсә, евдән кәнарда башгаларына гаршы нәзакәтли олмаға чалышанда онлар бунун сүни олдуғуну сезәҹәкләр. Унутма ки, дүшүнҹәли гыз әслиндә сәнин неҹә инсан олдуғуну аилә үзвләринлә рәфтарындан биләҹәк (Ефеслиләрә 6:1, 2).

Гызлар дејир: «Хырда вә бөјүк мәсәләләрдә әдәб-әрканла давранан оғланлардан хошум ҝәлир. Оғланын мәнә гапы ачмасы, һәм мәнимлә, һәм дә аилә үзвләримлә нәзакәтлә рәфтар етмәси мәнә хош тәәссүрат бағышлајыр» (Тина).

«Тәзәҹә таныш олдуғум оғлан: “Киминләсә ҝөрүшүрсән?” вә ја “Һансы мәгсәдләрин вар?” кими шәхси суаллар верәндә өзүмү нараһат һисс едирәм. Мәнҹә, бу, һөрмәтсизлик вә јерсиз һәрәкәтдир» (Ҝүләр).

«Башгаларынын һиссләри илә ојнамаг алчаглыгдыр! Оғланлар гызларын һиссләрини һеч веҹләринә алмырлар. Онлара елә ҝәлир ки, биз әрә ҝетмәкдән өтрү өлүрүк. Санки, онларын диггәтинә мөһтаҹыг» (Ајтаҹ).

● Шәхси ҝиҝијенаја риајәт ет. Белә етмәклә сән јалныз башгаларына јох, һәм дә өзүнә һөрмәт етдијини ҝөстәрирсән (Матта 7:12). Әҝәр өзүнә һөрмәт етсән, башгалары да сәнә һөрмәт гојаҹаг. Анҹаг јадда сахла ки, шәхси ҝиҝијенаја риајәт етмәсән, гызын үрәјини газанмаг үчүн чәкдијин зәһмәт өзүнә галаҹаг.

Гызлар дејир: «Мәндән хошу ҝәлән бир оғлан варды, ағзындан чох пис иј ҝәлирди. Бу, дөзүлмәз иди» (Келли).

● Үнсијјәт етмәји өјрән. Сағлам вә узунөмүрлү мүнасибәтләрин әсасыны јахшы үнсијјәт тәшкил едир. Сөһбәтиниз јалныз сәни марагландыран мөвзулар әтрафында дөвр етмәмәлидир, гаршындакы инсанын марагларыны да нәзәрә алмалысан (Филипилиләрә 2:3, 4). Она диггәтлә гулаг асмаг вә фикирләрини гијмәтләндирмәк олдугҹа ваҹибдир.

“Гызлар дејир: «Оғланда хошума ҝәлән ҹәһәт онун сәрбәст сөһбәт етмәји, данышдығым шејләри јадда сахламағы вә сөһбәти ҹанлы етмәк үчүн суаллар вермәји баҹармасыдыр» (Кристина).

«Мәнҹә, оғланлара ҝөрдүкләри, гызлара исә ешитдикләри шејләр даһа чох тәсир бағышлајыр» (Лаура).

«Оғланын һәдијјә вермәси јахшыдыр. Бунунла бәрабәр, әҝәр о, хош үнсијјәт етмәји, тәсәлливериҹи вә руһландырыҹы сөзләр демәји баҹарырса... Белә оғлана сөз ола билмәз!» (Еми).

«Нәзакәтли вә һәр шејдә јерини билән бир оғланла танышам. Биз онунла ҹидди вә мәналы сөһбәтләр едирик. О, һеч вахт мәнә: “Әтринин ији супердир!” вә ја “Бу ҝүн ефир ҝөрүнүрсән!” кими сөзләр демир. О, инсана гулаг асмағы баҹарыр. Мәнҹә, бунунла һәр бир гызын рәғбәтини газанмаг олар» (Туранә).

«Мән јумор һисси олан, ејни заманда ҹидди мәсәләләр барәдә дә данышмағы баҹаран вә сөзүн әсил мәнасында сәмими оғланла таныш олмаг истәјәрдим» (Келли).

● Мәсулијјәтли ол. Мүгәддәс Китабда дејилир: «Һәр кәс өз мәсулијјәт јүкүнү дашыјаҹаг» (Галатијалылара 6:5). Гызларын ишләмәк истәмәјән, фикри-зикри анҹаг әјләнмәкдә олан тәнбәл оғланлардан хошлары ҝәлмир.

Гызлар дејир: «Истәрдим ки, оғланлар даһа чох мәсулијјәтли олсунлар. Әкс тәгдирдә, онлар өзләрини ҝөздән салырлар» (Шәбнәм).

«Бәзи оғланларын һәјатда һеч бир мәгсәдләри јохдур. Онлар хошлары ҝәлән гыздан һансы мәгсәдләри олдуғуну сорушур, сонра да: “Ај да, елә мәним дә мәгсәдим будур!” — дејирләр. Анҹаг һәрәкәтләри бунун там әксини ҝөстәрир» (Туранә).

Мәсулијјәтли олмағы өјрәнмәклә јахшы достлуг мүнасибәтләри гурмағы баҹараҹагсан. Бәс әҝәр бир гызла ҹидди мүнасибәт гурмаға һазыр олдуғуну дүшүнүрсәнсә, нә етмәлисән?

Нөвбәти аддым

● Тәшәббүс ҝөстәр. Әҝәр бәјәндијин бир гызын сәнә јахшы һәјат јолдашы олаҹағыны дүшүнүрсәнсә, ондан хошун ҝәлдијини һисс етдир. Һиссләрини чәкинмәдән ачыгҹа дилә ҝәтир. Әлбәттә, «јох» ҹавабы алаҹағындан горхараг нараһатчылыг кечирә биләрсән. Буна бахмајараг, сәнин тәшәббүс ҝөстәрмәјә һазыр олмағын јеткинлијинин әламәтидир. Анҹаг бир шејдә диггәтли ол: бу, евләнмә тәклифи дејил. Бу сәбәбдән, вәзијјәтә ујғун сөзләр сечмәјә чалыш. Һәддән артыг ҹидди олмағын вә ја һәддән артыг һиссләрини бүрузә вермәјин гызы үркүдә биләр.

Гызлар дејир: «Мән фикирләри охуја билмирәм. Буна ҝөрә дә, әҝәр кимсә мәнимлә јахындан таныш олмаг истәјирсә, гој дүрүст олсун вә мәнимлә ачыг данышсын» (Нина).

«Бир мүддәт достлуг етдикдән сонра мүнасибәтләрин башга мәрһәләјә кечмәси асан олмаја биләр. Амма оғлан ачыг шәкилдә садәҹә дост олмаг јох, мәни даһа јахындан танымаг истәдијини дејәрсә, она һөрмәтлә јанашарам» (Һелен).

● Гызларын гәрарларына һөрмәт ет. Бәс әҝәр гыз сәнинлә ҹидди мүнасибәт гурмаг истәмәдијини дејәрсә, онда неҹә? Сән гызын «јох» ҹавабыны, һәгигәтән дә, «јох» кими гәбул едәрәк онун өз һиссләринә әмин олдуғуна инандығыны вә гәрарына һөрмәт етдијини ҝөстәр. Амма әл чәкмәјиб бездирсән, өзүнү јеткин олмајан бир инсан кими әлә верәҹәксән. Гызын рәдд ҹавабыны гулагардына вурсан, һәтта әсәбиләшсән, кимин мәнфәәтини дүшүнмүш олаҹагсан: гызын, јохса өзүнүн? (1 Коринфлиләрә 13:11).

Гызлар дејир: «Гәти шәкилдә “јох” дедијим һалда, оғлан әл чәкмәјәндә лап әсәбиләширәм» (Камилә).

«Мән бир оғлана ајдын баша салдым ки, о, мәни марагландырмыр, о исә тәкидлә телефон нөмрәми истәјирди. Кобудлуг етмәмәјә чалышырдым, ахы јахынлашыб мәнә һиссләрини билдирмәк онун үчүн һеч дә асан олмајыб. Анҹаг сонда мәҹбур олуб онунла даһа сәрт шәкилдә данышдым» (Сара).

Нәји етмәмәлисән?

Бәзи оғланларын фикринҹә, гызларын үрәјини фәтһ етмәк су ичмәк кими бир шејдир. Һәтта онлар өз араларында кимә даһа чох гызын ашиг олаҹағына даир мәрҹә дә ҝирирләр. Анҹаг бу, инсафсызлыгдыр, белә етмәклә сән өз адыны писә чыхарырсан (Сүлејманын мәсәлләри 20:11). Ашағыда ҝәтириләнләри јадда сахлајараг бундан гачынмаг олар.

● Флирт етмә. Ешгбазлыг едән оғланлар ширин дилә басыб һәрәкәтләри илә гызлары јолдан чыхарырлар. Онларын һеч вахт ҹидди романтик мүнасибәтләр гурмаг фикирләри олмур. Анҹаг бу, Мүгәддәс Китабын «ҝәнҹ гадынларла баҹын кими тәмиз нијјәтлә давран» мәсләһәтинә зиддир (1 Тимотејә 5:2). Ешгбазлыг етмәк мөһкәм достлуға вә хошбәхт евлилијә әнҝәл ола биләр. Ағыллы гызлар буну јахшы билир.

Гызлар дејир: «Бу ҝүн мәнә дедикләрини бир ај бундан габаг башгасына дедијини билмәк адамы дәли едир» (Һелен).

«Групумузда јарашыглы бир оғлан вар иди, о, мәнимлә флирт етмәјә башлады. Бүтүн ҝүнү өзүндән данышараг өзүнү ҝөзә сохмаға чалышырды. Група тәзә гыз ҝәләндә онунла да елә давранды. Сонра даһа бир гыз ҝәлди, јенә ејни һал тәкрарланды. Неҹә дә ијрәнҹ һәрәкәтдир!» (Тина).

● Гызларын һиссләри илә ојнама. Гызларла достлуг оғланларла достлуг етмәјә бәнзәмир. Нәјә ҝөрә? Бир өзүн фикирләш: әҝәр достуна јени пенҹәјинин она чох јарашдығыны дејирсәнсә вә ја етибар едиб тез-тез онунла сирләрини бөлүшүрсәнсә, чәтин ки, сәнин она гаршы романтик һиссләрин олдуғуну дүшүнсүн. Анҹаг әҝәр гыза бу кими комплимент етсән вә ја онунла тез-тез дәрдләшсән, чох ҝүман ки, ондан хошун ҝәлдијини дүшүнәҹәк.   

Гызлар дејир: «Мәнҹә, оғланлар баша дүшмүрләр ки, гызларла оғлан достлары кими рәфтар едә билмәзләр» (Шерил).

«Оғлан телефон нөмрәми алыр, сонра да месаж јазыр. Нә истәдијини баша дүшә билмирәм. Бәзән бу ҹүр јазышмаг бағлылыг јарадыр. Мәҝәр месажлашмагла инсаны јахындан танымаг олар?» (Ниҝар).

«Оғланлар гызларын нә дәрәҹәдә тез бағландыгларыны баша дүшмүрләр, хүсусилә әҝәр оғлан диггәтҹил вә үнсијјәтҹилдирсә. Амма бу о демәк дејил ки, гызлар киминлә ҝәлди ҝөрүшмәјә һазырдыр. Садәҹә гызларын әксәријјәти севиб-севилмәк истәјир вә өз ағ атлы шаһзадәсини ҝөзләјир» (Алиса).

ӘЛАВӘ МӘЛУМАТЫ 2-ҸИ ҸИЛДИН 3-ҸҮ ФӘСЛИНДӘН ОХУ

АЧАР АЈӘ

“Аллаһын ирадәси илә һәгиги салеһлик вә сәдагәт ичиндә јарадылмыш јени шәхсијјәтә бүрүнмәлисиниз” Ефеслиләрә 4:24

МӘСЛӘҺӘТ

Јеткин инсанлардан соруш ҝөр, бир ҝәнҹ, илк нөвбәдә, һансы хүсусијјәтләрә јијәләнмәлидир. Сонра һәмин саһәнин үзәриндә ишләмәли олуб-олмадығыны мүәјјән ет.

БИЛИРСӘН... ?

Дахили аләмин хариҹи ҝөрүнүшүндән даһа ваҹибдир.

ҺӘРӘКӘТ ПЛАНЫ!

Әдәб-әркан гајдалары илә бағлы даһа чох ишләмәли олдуғум саһә: ․․․․․

Данышыг габилијјәтими јахшылашдырмаг үчүн мән: ․․․․․

Бу мөвзу илә бағлы валидејнләримә вермәк истәдијим суаллар: ․․․․․

НЕҸӘ ДҮШҮНҮРСӘН?

● Өзүнә һөрмәт етдијини неҹә ҝөстәрә биләрсән?

● Гызларын фикирләринә вә һиссләринә һөрмәт етдијини неҹә ҝөстәрә биләрсән?

[198–ҹи сәһифәдәки јазы]

“Оғланлар дүшүнүрләр ки, хариҹи ҝөрүнүшләрилә вә ја ҝејиниб-кеҹинмәклә гызлары ҹәлб едә биләрләр. Мүәјјән мәнада белә олса да, мәнҹә, гызлар даһа чох оғланларын кејфијјәтләринә фикир верирләр” Сәбинә

[197–ҹи сәһифәдәки шәкил]

Әдәб-әркан пенҹәк дејил ки, башгаларында тәәссүрат ојатмаг үчүн ҝејинәсән, евә ҝәләндә исә чыхарасан