Јығынҹагдакы сүлһү вә тәмизлији горујун

ҺӘР ил минләрлә инсан Јеһованын евинә, пак ибадәтә ахышыр вә бунунла Мүгәддәс Китабдакы пејғәмбәрлик јеринә јетир (Мик. 4:1, 2). Биз бу инсанлары Аллаһын јығынҹағында ҝөрмәјә чох шадыг! (Һәв. 20:28). Онлар бизимлә чијин-чијинә Јеһова Аллаһа хидмәт етмәк шәрәфини гијмәтләндирир, руһани ҹәннәтдәки сүлһ вә тәмизликдән зөвг алырлар. Аллаһын мүгәддәс руһу вә Мүгәддәс Китабдакы һикмәтли мәсләһәтләр бизә јығынҹагдакы сүлһү вә тәмизлији горумаға көмәк едир (Зәб. 119:105; Зәк. 4:6).

² Мүгәддәс Китабдакы принсипләрә әмәл етмәклә биз «јени шәхсијјәти» ҝејинирик (Кол. 3:10). Биз арамызда јаранан хырда анлашылмазлыглары шиширтмирик. Һәр шејә Јеһованын ҝөзү илә бахырыг, јол вермирик ки, бизим дә арамызда дүнјадакы кими парчаланма олсун. Әксинә, биз бејнәлхалг гардашлыг кими бирлик ичиндә чалышырыг (Һәв. 10:34, 35).

³ Бунунла белә, вахташыры олараг јығынҹагдакы сүлһә вә бирлијә тәсир едән проблемләр јараныр. Буна нә сәбәб олур? Әксәр һалларда, Мүгәддәс Китабдакы мәсләһәтләрә әмәл етмәмәк. Биз даим ҝүнаһлы тәбиәтимизлә мүбаризә апарырыг. Һеч биримиз ҝүнаһсыз дејилик (1 Јәһ. 1:10). Киминсә сәһв һәрәкәти јығынҹағын әхлаги вә руһани тәмизлијини тәһлүкә алтына атыр. Һәрдән биз дүшүнүлмәмиш сөзләримизлә вә һәрәкәтимизлә киминсә хәтринә дәјирик, јахуд киминсә сөзләри вә һәрәкәтләри бизи бүдрәдир (Ром. 3:23). Белә вәзијјәт јарананда мәсәләни дүзәлтмәк үчүн нә етмәлијик?

⁴ Јеһова бүтүн бу шејләри нәзәрә алыр. Онун Кәламында бу ҹүр мәсәләләрлә бағлы мәсләһәтләр вар. Еләҹә дә гајғыкеш ағсаггаллар һәр биримизә көмәк етмәјә һазырдырлар. Онларын Мүгәддәс Китаба әсасланан мәсләһәтинә ујғун даврансаг, башгалары илә мүнасибәтләримизи јахшылашдыраҹаг вә нәтиҹәдә, Јеһова биздән разы галаҹаг. Бизә һансыса сәһвимизә ҝөрә ҹидди мәсләһәт вериләндә вә ја төһмәт аланда, әмин ола биләрик ки, бу јолла сәмави Атамыз бизә Өз мәһәббәтини ҝөстәрир (Мәс. 3:11, 12; Ибр. 12:6).

ХЫРДА ПРОБЛЕМЛӘРИН ҺӘЛЛИ

⁵ Һәрдән јығынҹагдакылар арасында хырда анлашылмазлыг вә ја фикирајрылығы јараныр. Бу кими проблемләри јубанмадан вә мәһәббәтлә һәлл етмәк лазымдыр (Ефес. 4:26; Филип. 2:2—4; Кол. 3:12—14). Сиз ҝөрәҹәксиниз ки, баҹы-гардашларла аранызда јаранан проблемләри Бутрусун мәсләһәтинә әмәл етмәклә арадан галдырмаг мүмкүндүр. О мәсләһәт ҝөрүрдү: «Бир-биринизи һәрарәтлә севин, чүнки мәһәббәт чохлу ҝүнаһын үстүнү өртүр» (1 Бут. 4:8). Мүгәддәс Китабда дејилир: «Һәр биримиз дәфәләрлә сәһв едирик» (Јаг. 3:2). Әҝәр «гызыл гануна» әмәл етсәк, јәни инсанларын бизимлә неҹә рәфтар етмәсини истәјириксә, биз дә онларла елә рәфтар етсәк, хырда сәһвләри бағышлајыб унуда биләҹәјик (Мәт. 6:14, 15; 7:12).

⁶ Әҝәр кимсә хәтринизә дәјибсә, сүлһ наминә јубанмадан илк аддымы сиз атын. Унутмајын ки, бундан Јеһова илә мүнасибәтләриниз асылыдыр. Иса шаҝирдләринә белә бир мәсләһәт вермишди: «Әҝәр бәхшишини гурбанҝаһа ҝәтирәндә јадына дүшсә ки, кимсә сәндән инҹијиб, бәхшиши орада, гурбанҝаһын гаршысында гој. Әввәлҹә ҝет онунла барыш, сонра ҝәл бәхшишини тәгдим ет» (Мәт. 5:23, 24). Ола билсин, киминләсә аранызда анлашылмазлыг олуб. Белә олан һалда ачыг сөһбәт един. Јығынҹагдакылар арасында јахшы үнсијјәт оланда һамы бир-бирини баша дүшүр вә гејри-камиллијә ҝөрә јаранан проблемләри һәлл етмәк асан олур.

МӘСЛӘҺӘТ ВЕРМӘК ЛАЗЫМ ҜӘЛӘНДӘ

⁷ Бәзән киминсә дүшүнҹә тәрзинә дүзәлиш етмәк үчүн мәсләһәт вермәк лазым ҝәлә биләр. Әслиндә, бу елә дә асан иш дејил. Һәвари Булус Галатијадакы мәсиһиләрә јазмышды: «Гардашлар, кимсә билмәдән сәһв бир иш ҝөрсә дә, сиз јеткин мәсиһиләр ону мүлајимҹәсинә дүзәлтмәјә чалышын» (Гал. 6:1).

⁸ Гајғыкеш нәзарәтчиләр јығынҹағы бир чох руһани тәһлүкәләрдән горујур вә ҹидди проблемләрин гаршысыны алырлар. Ағсаггаллар чалышырлар ки, Јеһованын Әшија пејғәмбәр васитәсилә дедији вәдә ујғун даврансынлар: «Һәр бири күләкдән далдаланаҹаг, лејсандан сығынаҹаг, сусуз дијарда ахар чајлар, истидән говрулан дијарда нәһәнҝ гаја көлҝәси кими олаҹаг» (Әшј. 32:2).

НИЗАМ-ИНТИЗАМЫ ПОЗАНЛАРЫ НӘЗӘРДӘ САХЛАЈЫН

⁹ Һәвари Булус јығынҹаға мәнфи тәсир ҝөстәрән инсанларла бағлы нөвбәти хәбәрдарлығы вермишди: «Сизә... әмр едирик ки, низам-интизамы позан вә биздән алдығыныз ҝөстәришләрә әсасән давранмајан гардашлардан узаг ҝәзәсиниз». Сонра о, бу сөзләринә ајдынлыг ҝәтирмишди: «Кимсә бу мәктубда дедикләримизә итаәт етмирсә, ону нәзәрдә сахлајын вә онунла јолдашлыг етмәјин. Гој о, һәрәкәтинә ҝөрә хәҹаләт чәксин. Бунунла белә, ону дүшмән јох, гардаш сајыб өјүд-нәсиһәт верин» (2 Салон. 3:6, 14, 15).

¹⁰ Ола билсин, кимсә јығынҹагдан кәнар едиләҹәк дәрәҹәдә ағыр ҝүнаһ ишләтмир, амма Аллаһын мәсиһиләрә вердији нормалара бөјүк һөрмәтсизлик едир. Мәсәлән, һәддән артыг тәнбәлдир, һәр шејә тәнгиди јанашыр вә чох пинтидир, ја да «[она] аид олмајан ишләрә гарышыр» (2 Салон. 3:11). Јахуд пул газанмаг мәгсәдилә кимдәнсә истифадә едир вә ја гәтијјән мәсиһиләрә јарашмајан тәрздә әјләнир. Налајиг давраныша гаршы ҹидди тәдбир ҝөрмәк лазымдыр, чүнки бу ҹүр давраныш јығынҹаға мәнфи тәсир ҝөстәрә вә бүтүн мәсиһиләрә сирајәт едә биләр.

¹¹ Ағсаггаллар низам-интизамы позан адама әввәлҹә Мүгәддәс Китабдан мәсләһәт верәрәк көмәк етмәјә чалышмалыдырлар. Амма һәмин адам дөнә-дөнә хәбәрдарлыг алса да, Мүгәддәс Китаб принсипләрини позмаға давам едирсә, ағсаггаллар гәрара ҝәлә биләр ки, јығынҹағы хәбәрдар етмәк үчүн мәрузә сөјләсинләр. Ағсаггаллар әввәлҹә јахшы-јахшы ҝөтүр-гој етмәлидирләр, вәзијјәтин нә дәрәҹәдә ҹидди олдуғуну вә бунунла бағлы јығынҹагда мәрузә сөјләмәјә еһтијаҹ олуб-олмадығыны мүәјјән етмәлидирләр. Мәрузә илә чыхыш едән натиг ад чәкмәдән налајиг давранышла бағлы лазыми мәсләһәтләр вермәлидир. Нәтиҹәдә, вәзијјәтдән хәбәрдар оланлар һәмин инсанла үнсијјәти азалдаҹаг, амма онунла руһани үнсијјәти кәсмәјәҹәк, ону гардаш сајыб өјүд-нәсиһәт верәҹәкләр.

¹² Үмидварыг ки, мәсиһиләрин гәтијјәти сајәсиндә низам-интизамы позан адам һәрәкәтинә ҝөрә утанаҹаг вә өзүнү дүзәлдәҹәк. Ајдын оланда ки, һәмин адам налајиг һәрәкәтиндән әл чәкиб, ону нәзәрдә сахламаға еһтијаҹ јохдур.

БӘЗИ ҸИДДИ ТӘГСИРЛӘРИН ҺӘЛЛИ

¹³ Киминсә сәһвинин үстүндән кечмәк вә бағышламаг о демәк дејил ки, биз ҝүнаһа ҝөз јумуруг, јахуд нормал јанашырыг. Бүтүн ҝүнаһлары гејри-камиллијин ајағына јазмаг олмаз, елә сәһвләр вар ки, онлары хырда сәһв адландырыб үстүндән кечмәк дүзҝүн дејил (Лав. 19:17; Зәб. 141:5). Муса пејғәмбәрә верилән ганунда бәзи ҝүнаһлар диҝәрләриндән ағыр һесаб олунурду, ејни шеј мәсиһи јығынҹағына да аиддир (1 Јәһ. 5:16, 17).

¹⁴ Иса мәсиһиләр арасында јаранан ҹидди проблемләри һәлл етмәк үчүн конкрет гајда гојуб. Ҝәлин ҝөрәк һансы аддымлары атмалыјыг: «Әҝәр кимсә сәнә гаршы бир ҝүнаһ иш тутса, [1] ҝет онунла тәкликдә даныш, ҝүнаһыны үзүнә де. Әҝәр сәнә гулаг асса, ону газандын. Ишдир, гулаг асмаса, [2] өзүнлә бир вә ја ики нәфәр ҝөтүр ки, мәсәлә ики вә ја үч шаһидин дили илә тәсдиг олунсун. Әҝәр онлара гулаг асмаса, [3] мәсәләни јығынҹаға даныш. Әҝәр јығынҹаға да гулаг асмаса, гој о адам сәнин үчүн бир бүтпәрәст вә ја верҝијыған кими олсун» (Мәт. 18:15—17).

¹⁵ Исанын Мәтта 18:23—35 ајәләриндә јазылан мәсәлиндән ҝөрүнүр ки, Мәтта 18:15—17 ајәләриндә садаланан ҝүнаһлара пул вә әмлак мәсәләләри аиддир, мәсәлән, кимсә киминсә борҹуну гајтармаг истәмир вә ја фырылдаг ишләдиб. Бу ҝүнаһлара кимәсә шәр атыб адыны бәднам етмәји дә аид етмәк олар.

¹⁶ Әҝәр әминсинизсә ки, кимсә сизә гаршы бу ҹидди ҝүнаһлардан бирини ишләдиб, һаггынызы мүдафиә етмәләри үчүн дәрһал ағсаггалларын јанына гачмајын. Исанын мәсләһәт ҝөрдүјү кими, әввәлҹә сизә гаршы ҝүнаһ иш тутан инсанла данышын. Мәсәләјә һеч кими гарышдырмајын, өз аранызда һәлл етмәјә чалышын. Нәзәрә алын ки, Иса демәди «бир дәфә ҝет вә ҝүнаһыны үзүнә де». Әҝәр инсан ҝүнаһыны бојнуна алмырса вә үзр истәмирсә, јахшы олар ки, онунла бир дә данышасыныз. Мәсәлә һәлл олунарса, тәгсиркар ҝүнаһыны башгаларына ачмадығыныз вә ону јығынҹагда бәднам етмәдијиниз үчүн сизә миннәтдар олаҹаг. Беләҹә, сиз гардашынызы газанмыш олаҹагсыныз.

¹⁷ Әҝәр тәгсиркар ҝүнаһыны бојнуна алыб үзр истәјирсә вә сәһвини дүзәлдирсә, нөвбәти аддымлары атмаға еһтијаҹ јохдур. Ҝүнаһ ҹидди олса да, бу кими мәсәләләр тәрәфләр арасында һәлл олуна биләр.

¹⁸ Әҝәр тәкликдә данышыб мәсәләни һәлл етмәк алынмајыбса, Исанын дедији кими, нөвбәти аддымы атын: өзүнүзлә бир вә ја ики нәфәр ҝөтүрүн вә гардашынызла бир дә данышын. Өзүнүзлә ҝөтүрдүјүнүз адамларын да мәгсәди һәмин гардашы газанмаг олмалыдыр. Мәсләһәтдир ки, өзүнүзлә баш верәнләрин шаһиди олмуш инсанлары апарасыныз, әҝәр шаһид јохдурса, онда өзүнүзлә бир вә ја ики нәфәр апарын ки, сизин сөһбәтин шаһиди олсун. Јахшы оларды ки, онларын бу кими мәсәләләрдә тәҹрүбәси олсун вә баш верәнләрин, доғрудан да, ҝүнаһ олуб-олмадығыны мүәјјән едә билсинләр. Шаһид гисминдә сечилән ағсаггаллар јығынҹағы тәмсил етмирләр, чүнки онлары ағсаггаллар шурасы бу ишә тәјин етмәјиб.

¹⁹ Дәфәләрлә ҹәһд ҝөстәрмәјинизә, тәгсиркарла тәкликдә вә шаһидләрин иштиракы илә данышмағыныза бахмајараг, мәсәлә һәлл олунмајыбса вә сиз мәсәләни белә гоја билмирсинизсә, онда проблем һагда јығынҹағын нәзарәтчиләринә хәбәр верин. Јадда сахлајын ки, онларын мәгсәди јығынҹагдакы сүлһү вә тәмизлији горумагдыр. Ағсаггаллара мүраҹиәт етмәклә сиз мәсәләни онлара вә Јеһоваја етибар етмиш олурсунуз. Һеч заман јол вермәјин ки, киминсә һәрәкәти сизи бүдрәтсин вә Јеһоваја ибадәтдән дујдуғунуз севинҹи әлиниздән алсын (Зәб. 119:165).

²⁰ Јығынҹағын нәзарәтчиләри мәсәләни һәртәрәфли арашдыраҹаг. Ајдын олса ки, һәмин шәхс, һәгигәтән дә, сизә гаршы ҝүнаһ ишләдиб, амма төвбә етмирсә, вурдуғу зәрәри, баҹардығы гәдәр дә олса, өдәмәк истәмирсә, нәзарәтчиләрдән ибарәт комитә, лазым ҝәлсә, ҝүнаһкары јығынҹагдан кәнар едәҹәк. Бунунла онлар јығынҹағы мүдафиә едәҹәк вә тәмизлијини горујаҹаглар (Мәт. 18:17).

ҸИДДИ ҜҮНАҺЛАРЫН ҺӘЛЛИ

²¹ Ҹинси әхлагсызлыг, зина, һомосексуализм, күфр, дөнүклүк, бүтпәрәстлик вә бу кими ағыр ҝүнаһлары зәрәрчәкмиш тәрәфин бағышламасы кифајәт дејил (1 Кор. 6:9, 10; Гал. 5:19—21). Јығынҹағын руһани вә әхлаги тәмизлији тәһлүкә алтында олдуғундан белә ҹидди ҝүнаһлар һаггында ағсаггаллара хәбәр верилмәлидир вә онлар лазыми тәдбирләр ҝөрмәлидирләр (1 Кор. 5:6; Јаг. 5:14, 15). Ола биләр ки, кимсә ағсаггаллара јахынлашыб ја өз ҝүнаһыны етираф етсин, ја да башларынын ҝүнаһы барәдә хәбәр версин (Лав. 5:1; Јаг. 5:16). Ағсаггалларын вәфтиз олунмуш мәсиһинин ҹидди ҝүнаһы һагда неҹә хәбәр тутмаларындан асылы олмајараг, мәсәләни әввәлҹә ики ағсаггал арашдырмалыдыр. Мәлумат өз тәсдигини тапса вә ҹидди ҝүнаһ төрәдилдијинә сүбутлар олса, мәсәләнин һәлл едилмәси үчүн ағсаггаллар шурасы, ән азы, үч нәзарәтчидән ибарәт интизам комитәси тәјин едәҹәк.

²² Ағсаггаллар јығынҹағын гајғысына галараг она руһани ҹәһәтдән зәрәр верә биләҹәк һәр бир шејдән горујурлар. Һәмчинин онлар Аллаһын Кәламындан мәһарәтлә истифадә едәрәк сәһв иш тутанлара ҝүнаһыны баша дүшмәјә вә руһани сағламлығыны бәрпа етмәјә көмәк едирләр (Јһд. 21—23). Онлар һәвари Булусун Тимутијә вердији ҝөстәришләрә ујғун давранырлар: «Сәни Аллаһын өнүндә вә өлүләрлә дириләри мүһакимә едәҹәк Мәсиһ Исанын өнүндә... анд верирәм: ...бүтүн сәбрини топлајараг, мүәллимлик габилијјәтини ишә салараг тәнбеһ ет, мәзәммәт ет, үрәкләндир» (2 Тим. 4:1, 2). Дүздүр, бу иш чохлу вахт тәләб едир, амма бу, ағсаггалларын бојнуна дүшән ағыр мәсулијјәтин бир һиссәсидир. Јығынҹаг онларын әмәјини гијмәтләндирир вә онлара икигат һөрмәт ҝөстәрир (1 Тим. 5:17).

²³ Ағсаггаллар мүәјјән едәндә ки, ҝүнаһ, доғрудан да, төрәдилиб, онларын әсас мәгсәди ҝүнаһкара руһани ҹәһәтдән көмәк етмәк олмалыдыр. Һәмин инсан, һәгигәтән дә, төвбә едәндән вә ағсаггалларын көмәјини гәбул едәндән сонра, она тәкликдә вә ја динләмәјә дәвәт олунан шаһидләрин гаршысында верилән төһмәт онун үчүн дәрс олаҹаг, диҝәрләриндә исә сағлам горху һасил едәҹәк (2 Ишм. 12:13; 1 Тим. 5:20). Төһмәт гәрары чыхарылан бүтүн һалларда мәһдудијјәтләр гојулур. Бунун сајәсиндә ҝүнаһкара јолларыны дүзәлтмәк үчүн көмәк ҝөстәрилир (Ибр. 12:13). Ајдын оланда ки, о, руһани ҹәһәтдән дүзәлиб, мәһдудијјәтләри ҝөтүрмәк олар.

ТӨҺМӘТ ҺАГГЫНДА ЕЛАН

²⁴ Интизам комитәси ҝөрәндә ки, инсан төвбә едиб, амма онун ҝүнаһындан јығынҹаг вә ја јашадығы әразидәки инсанлар хәбәр тута биләр, јахуд да јығынҹағы горумаг мәгсәдилә Мәсиһи һәјаты вә ибадәти ҝөрүшүндә гыса елан едилмәлидир: «[Ады вә сојады] төһмәт алыб».

ЈЫҒЫНҸАГДАН КӘНАР ЕТМӘК ГӘРАРЫ ЧЫХАРЫЛАНДА

²⁵ Бәзән, ола билсин, ҝүнаһ инсанын үрәјиндә дәрин көк салсын вә она ҝөстәрилән һеч бир көмәјә һај вермәсин. Елә ола биләр ки, интизам комитәсинин динләмәләри заманы һәмин адамын «төвбәни ҝөстәрән ишләри» кифајәт гәдәр олмасын (Һәв. 26:20). Бәс онда нә етмәк лазымдыр? Белә олан һалда ҝүнаһкары јығынҹагдан кәнар етмәк лазымдыр ки, Јеһованын пак јығынҹағы илә үнсијјәтдә олмасын. Бунун сајәсиндә ҝүнаһкар јығынҹаға пис тәсир ҝөстәрә билмәјәҹәк; нәтиҹәдә, јығынҹаг әхлаги вә руһани ҹәһәтдән тәмиз галаҹаг вә адына ләкә ҝәлмәјәҹәк (Ган. 21:20, 21; 22:23, 24). Һәвари Булус Коринф јығынҹағында бир нәфәрин налајиг давранышындан хәбәр тутанда ағсаггаллара ҝөстәриш вермишди: «Һәмин адамы Шејтана тәслим един ки,.. јығынҹағын руһу горунуб сахланылсын» (1 Кор. 5:5, 11—13). Булусун мәктубларындан ајдын ҝөрүнүр ки, биринҹи әсрдә һәгигәтә гаршы үсјан галдыран башга инсанлар да јығынҹагдан кәнар едилмишди (1 Тим. 1:20).

²⁶ Интизам комитәси төвбә етмәјән ҝүнаһкары јығынҹагдан кәнар етмәк гәрарына ҝәләндә бу гәрары һәмин инсанын өзүнә билдирмәли вә бунун сәбәбини Мүгәддәс Китабдан она ајдын ҝөстәрмәлидир. Сонра интизам комитәсиндә олан гардашлар нөвбәти мәгамы она изаһ едәҹәк: әҝәр о, интизам комитәсинин гәрарында ҹидди сәһв олдуғуну дүшүнүрсә вә гардашларын гәрарындан шикајәт етмәк истәјирсә, сәбәби ајдын ҝөстәрмәклә мәктуб шәклиндә апелјасија шикајәти верә биләр. О, буну комитәнин гәрарыны ешидәндән сонра једди ҝүн әрзиндә едә биләр. Әҝәр ағсаггаллар шурасы апелјасија шикајәти алыбса, онлар рајон нәзарәтчиси илә әлагә сахламалы вә о, ишә јенидән бахылмасы үчүн тәҹрүбәли ағсаггаллардан ибарәт апелјасија комитәси тәшкил етмәлидир. Онлар чалышмалыдырлар ки, мәктуб аландан сонра бир һәфтәнин ичиндә апелјасија динләмәси кечирсинләр. Әҝәр апелјасија шикајәти верилибсә, јығынҹагдан кәнаредилмә һаггында елан сонраја сахланылмалыдыр. Бу мүддәтдә ҝүнаһ ишләтмиш адам јығынҹагда шәрһ вермәмәли, јығынҹағын адындан дуа етмәмәли вә диҝәр мәсулијјәтләрдән азад олунмалыдыр.

²⁷ Апелјасија шикајәти вермәк имканы ҝүнаһ ишләтмиш адама гаршы хејирхаһлығын әламәтидир, бунунла она бир даһа өз фикрини билдирмәк имканы верилир. Буна ҝөрә дә о, гәсдән апелјасија динләмәсинә ҝәлмирсә, ағсаггаллар онунла әлагә јаратмаг үчүн әлләриндән ҝәләни етдикдән сонра онун јығынҹагдан кәнар едилдијини елан едәҹәк.

²⁸ Әҝәр тәгсиркар апелјасија шикајәти вермәк истәмирсә, интизам комитәси она төвбә етмәјин ваҹиблијини, еләҹә дә мүмкүн гәдәр тез бәрпа олунмаг үчүн нә етмәли олдуғуну изаһ етмәлидир. Беләҹә, ағсаггаллар ҝүнаһ ишләтмиш адамын әмәлиндән төвбә едәҹәјинә вә тез бир заманда Јеһованын тәшкилатына гајыдаҹағына үмид едәрәк она өз көмәкликләрини вә хејирхаһлыгларыны ҝөстәрәҹәкләр (2 Кор. 2:6, 7).

ЈЫҒЫНҸАГДАН КӘНАРЕДИЛМӘ БАРӘДӘ ЕЛАН

²⁹ Ҝүнаһындан төвбә етмәјән шәхсин јығынҹагдан кәнар едилмәси барәдә гысаҹа елан едилмәлидир: «[Ады вә сојады] артыг Јеһованын Шаһиди дејил». Јығынҹагдакы садиг мәсиһиләр онунла үнсијјәти тамамилә кәсмәлидирләр (1 Кор. 5:11).

ЈЫҒЫНҸАГДАН ИМТИНАЕТМӘ

³⁰ «Јығынҹагдан имтинаетмә» термини өз һәрәкәти илә мәсиһи мөвгејиндән имтина етдијини ҝөстәрән вә ја артыг Јеһованын Шаһиди олмаг истәмәдијини билдирән вәфтиз олунмуш мәсиһијә тәтбиг олунур. Јахуд, ола билсин, инсан өз давранышы илә, мәсәлән, мәгсәдләри Мүгәддәс Китаба зидд ҝедән вә буна ҝөрә дә Јеһова Аллаһ тәрәфиндән мүһакимә олунан тәшкилата гошулараг мәсиһи јығынҹағындан имтина едир (Әшј. 2:4; Вәһј 19:17—21).

³¹ Һәвари Јәһја онун ҝүнләриндә мәсиһи иманындан имтина едән инсанлар һаггында јазмышды: «Онлар арамыздан чыхыблар, лакин бизим кими дејилдиләр; әҝәр бизим кими олсајдылар, бизимлә галардылар» (1 Јәһ. 2:19).

³² Јеһованын ҝөзүндә јығынҹагдан имтина едән инсанын вәзијјәти тәблиғ фәалијјәтиндә иштирак етмәјән гејри-фәал инсанын вәзијјәтиндән фәрглидир. Ола билсин, инсан Мүгәддәс Китабы арашдырмадығы үчүн гејри-фәал олуб, јахуд да шәхси проблемләри вә тәгибләр уҹбатындан руһани ҹәһәтдән зәифләјиб. Ағсаггаллар вә јығынҹагдакылар гејри-фәаллара көмәк етмәк үчүн әлләриндән ҝәләни етмәлидирләр (Ром. 15:1; 1 Салон. 5:14; Ибр. 12:12).

³³ Јығынҹагдан имтина едән мәсиһи һаггында исә јығынҹагда гысаҹа елан едилир: «[Ады вә сојады] артыг Јеһованын Шаһиди дејил». Онунла да јығынҹагдан кәнар едилмиш адам кими рәфтар етмәк лазымдыр.

БӘРПАЕДИЛМӘ

³⁴ Јығынҹагдан кәнар едилмиш вә ја јығынҹагдан имтина етмиш шәхсин төвбә етдији вә мүәјјән вахт әрзиндә ҝүнаһлы јолундан дөндүјү ајдын ҝөрүнүрсә, ону бәрпа етмәк олар. О, бунунла ҝөстәрир ки, Јеһова илә мүнасибәтләрини бәрпа етмәк истәјир. Ағсаггаллар һәмин инсана кифајәт гәдәр вахт вермәлидирләр ки, һәгигәтән дә, төвбә етдијини сүбута јетирсин; вәзијјәтдән асылы олараг, бу вахт бир ил, бир илдән аз вә ја чох ола биләр. Ағсаггаллар шурасы бәрпа олунмаг үчүн мүраҹиәт едән адамдан мәктуб аланда бәрпа комитәси онунла ҝөрүшүб данышаҹаг. Комитә һәмин адамын «төвбәни ҝөстәрән ишләр» ҝөрүб-ҝөрмәдијини вә һал-һазырда ону бәрпа етмәјин мүнасиб олуб-олмадығыны мүәјјән едәҹәк (Һәв. 26:20).

³⁵ Бәрпа олмаг үчүн мүраҹиәт едән инсан башга јығынҹагда јығынҹагдан кәнар едилибсә, һазыркы јығынҹагдакы бәрпа комитәси онунла ҝөрүшүб мүраҹиәтини мүзакирә едәҹәк. Әҝәр комитә үзвләри јығынҹагдан кәнар едилмиш адамын бәрпа едилмәли олдуғуна әминдирсә, төвсијәләрини әввәлки јығынҹағынын ағсаггаллар шурасына ҝөндәрәҹәк. Һәр ики комитә бир-бирилә әмәкдашлыг етмәлидир ки, әдаләтли гәрар чыхармаг үчүн әлләриндә кифајәт гәдәр фактларын олдуғуна әмин олсун. Амма бәрпа етмәк гәрары мәсәләјә бахмыш әввәлки јығынҹағын бәрпа комитәси тәрәфиндән верилир.

БӘРПАЕТМӘ ҺАГДА ЕЛАН

³⁶ Бәрпа комитәси ҝөрәндә ки, јығынҹагдан кәнар олунан вә ја јығынҹагдан имтина едән инсан төвбә едиб вә ону бәрпа етмәк олар, бу һагда онун кәнар олундуғу јығынҹагда елан едилмәлидир. Әҝәр һәмин адам башга јығынҹаға кечибсә, бу еланы һәмин јығынҹагда да етмәк лазымдыр. Елан белә сәсләнмәлидир: «[Ады вә сојады] Јеһованын Шаһиди кими бәрпа едилиб».

ВӘФТИЗ ОЛУНМУШ АЗЈАШЛЫ УШАГЛАР ҜҮНАҺ ИШЛӘДӘНДӘ

³⁷ Јығынҹагда вәфтиз олунмуш азјашлы мәсиһиләр ҹидди ҝүнаһ ишләдәндә ағсаггаллара хәбәр вермәк лазымдыр. Ағсаггаллар ҝүнаһ ишләтмиш ушағын ишинә баханда јахшы оларды ки, вәфтиз олунмуш валидејнләри дә јанларында олсун. Валидејнләр интизам комитәсилә әмәкдашлыг етмәли вә ушагларыны лазыми интизам тәдбирләриндән горумаға чалышмамалыдырлар. Интизам комитәси, бөјүкләрлә олдуғу кими, ҝүнаһ ишләтмиш ушағы да тәнбеһ етмәли вә дүзҝүн јола чәкмәјә чалышмалыдыр. Амма төвбә етмирсә, јығынҹагдан кәнар етмәлидир.

ВӘФТИЗ ОЛУНМАМЫШ ТӘБЛИҒЧИ ҜҮНАҺ ИШЛӘДӘНДӘ

³⁸ Бәс вәфтиз олунмамыш тәблиғчиләр ҝүнаһ ишләдәндә нә етмәк лазымдыр? Онлар вәфтиз олунмуш Јеһованын Шаһиди олмадығы үчүн јығынҹагдан кәнар едилә билмәзләр. Ола билсин, онлар Мүгәддәс Китаб принсипләрини ахыра кими баша дүшмүрләр, јахшы мәсләһәт онлара дүз јолда јеримәјә көмәк едә биләр (Ибр. 12:13).

³⁹ Әҝәр ики ағсаггал вәфтиз олмамыш тәблиғчи илә ҝөрүшүб көмәк етмәјә чалышандан сонра да о, төвбә етмирсә, бу һагда јығынҹаға мәлумат вермәк лазымдыр. Гысаҹа елан олунмалыдыр: «[Ады вә сојады] даһа вәфтиз олунмамыш тәблиғчи дејил». Һәмин адам јығынҹагдакылар үчүн дүнјадакы инсанлардан бири кими олмалыдыр. Дүздүр, о, јығынҹагдан кәнар едилмәјиб, амма јығынҹагдакылар онунла үнсијјәтдә еһтијатлы олмалыдырлар (1 Кор. 15:33). Онун тәблиғ һесабаты гәбул олунмур.

⁴⁰ Әввәлләр вәфтиз олунмамыш тәблиғчи олан инсан јенидән тәблиғчи олмаг истәјә биләр. Белә олан һалда ики ағсаггал онунла ҝөрүшүб онун руһани инкишафынын һансы јердә олдуғуну мүәјјән едәҹәк. Әҝәр о, тәләбләрә ҹаваб верирсә, јығынҹагда гыса елан едилир: «[Ады вә сојады] јенидән вәфтиз олунмамыш тәблиғчидир».

ЈЕҺОВА ПАК ИБАДӘТИ ГӘБУЛ ЕДИР

⁴¹ Аллаһын мүасир јығынҹағы илә сых үнсијјәтдә оланларын һамысы Јеһованын халгына бәхш етдији руһани немәтләрдән севинҹ дујурлар. Шүкүр Јеһоваја, руһани гидамыз ашыб-дашыр, һәгигәт чешмәси ҝур чағлајыр! Јеһова һәмчинин башында Мәсиһин дурдуғу теократик гурулуш васитәсилә бизи мүдафиә едир (Зәб. 23; Әшј. 32:1, 2). Бу кешмәкешли ахырзаманда руһани ҹәннәтдә өзүмүзү тәһлүкәсизликдә һисс едирик.

⁴² Ҝәлин јығынҹагда сүлһү вә тәмизлији горумагла бундан сонра да Падшаһлыг һаггында һәгигәтин ҝур парламасына сәбәб олаг (Мәт. 5:16; Јаг. 3:18). Јеһованын хејир-дуасы илә даһа чох инсанын Аллаһы таныдығыны, бизимлә бәрабәр Онун ирадәсини јеринә јетирдијини ҝөрәндә үрәјимиз даға дөнүр!