Теократик гурулуша табе олмағын фајдасы

ЈЕҺОВАНЫН ирадәсини мүтәшәккил шәкилдә јеринә јетирмәк үчүн Аллаһа, Каинатын Һөкмдарына табе олмаг ваҹибдир. Биз Онун Оғлунун мәсиһи јығынҹағынын башы олдуғуну гәбул едир вә һәјатын диҝәр саһәләриндә дә башчылыг принсипинә табе олуруг. Бу гурулуша табе олан һәр кәс фајда әлдә едир.

² Һакимијјәтә табе олмаг принсипи илә инсанлар илк дәфә Әдән бағында таныш олуб. Бу принсип Аллаһын Јарадылыш 1:28 вә 2:16, 17 ајәләриндә јазылмыш әмрләриндә ифадә олунуб. Бу әмрә әсасән, һејванлар инсанлара, Адәмлә Һәвва исә Аллаһын ирадәсинә вә һакимијјәтинә табе олмалы иди. Аллаһын тәсис етдији бу гурулуша табе олмағын сајәсиндә дүнјада әмин-аманлыг вә низам-интизам олаҹагды. Сонралар башчылыг принсипини һәвари Булус 1 Коринфлиләрә 11:3 ајәсиндә бу ҹүр вурғуламышды: «Буну да билмәјинизи истәјирәм ки, һәр кишинин башы Мәсиһ, гадынын башы киши, Мәсиһин башы исә Аллаһдыр». Бу сөзләрдән ҝөрүнүр ки, Јеһовадан башга, һәр кәс кимәсә табедир.

³ Бу ҝүн инсанларын чоху башчылыг принсипини нә гәбул едир, нә дә табе олур. Проблем Әдән бағында, улу валидејнләримиз билә-билә Аллаһын Али һөкмранлығыны рәдд едиб мүстәгил олмаг истәјәндә башлады (Јар. 3:4, 5). Лакин онлар арзуладыглары азадлыға говушмадылар. Әксинә, онлар шәр руһани варлығын, Шејтан Иблисин һакимијјәти алтына дүшдүләр. Бу илк үсјан бәшәријјәти Аллаһдан узаг салды (Кол. 1:21). Бунун нәтиҹәсиндә, бу ҝүн бәшәријјәтин әксәр һиссәси Шәририн һакимијјәти алтындадыр (1 Јәһ. 5:19).

⁴ Биз Аллаһын Кәламындакы һәгигәти өјрәнмәклә вә бу һәгигәтә ујғун јашамагла Шејтанын тәсири алтындан чыхмышыг. Һәјатымызы Јеһоваја һәср едиб вәфтиз олмушуг вә Јеһованы Али Һөкмдарымыз кими гәбул етдијимизи ҝөстәрмишик. Биз Давуд падшаһын Јеһова һаггында дедији нөвбәти сөзләрә шәрикик: «Сән һәр кәсдән уҹасан» (1 Салн. 29:11). Биз Аллаһын јанында нә гәдәр аҹиз олдуғумузу етираф едиб дејирик: «Бил ки, Јеһовадыр Аллаһ, бизи О јарадыб, биз Она мәхсусуг, биз Онун халгыјыг, отлағынын сүрүсүјүк» (Зәб. 100:3). Биз гәбул едирик ки, Јеһова һамыдан уҹадыр вә һәр кәс Она табе олмалыдыр, чүнки һәр шејин јараданы Одур (Вәһј 4:11). Һәгиги Аллаһа хидмәт едән бизләр Аллаһа табечиликдә ҝөзәл нүмунә олан Иса Мәсиһин изләри илә ҝедирик.

⁵ Јердә оланда чәкдији әзаблар Исаја нә өјрәтди? Бу суала Ибраниләрә 5:8 ајәси ҹаваб верир: «О, Аллаһын Оғлу олса да, чәкдији әзаблар сајәсиндә итаәтли олмағы өјрәнди». Бәли, Иса ән ағыр сынаглар гаршысында белә, сәмави Атасына табе олурду. О, өзбашына һеч нә етмирди, һеч нәји өзүндән данышмырды, өзүнә ад-сан ахтармырды (Јәһ. 5:19, 30; 6:38; 7:16—18). Хидмәт едән заман тәгибләрлә үзләшмәсинә бахмајараг, о, Атасынын ирадәсини севә-севә јеринә јетирирди (Јәһ. 15:20). Иса һәмишә Аллаһа табе олурду. О, тәвазөкар инсан иди, өзүнү о дәрәҹәдә ашағы тутурду ки, һәтта ишҝәнҹә дирәји үзәриндә өлмәјә һазыр иди. Онун Јеһоваја һәр шејдә итаәт етмәси чохлу ҝөзәл бәһрәләр ҝәтирди: бәшәријјәт үчүн әбәди хиласа јол ачылды, Иса өзү уҹалды вә Атасынын ады шәрәфләнди (Филип. 2:5—11; Ибр. 5:9).

ҺАНСЫ САҺӘЛӘРДӘ ТЕОКРАТИК ГУРУЛУША ТАБЕ ОЛМАЛЫЈЫГ?

⁶ Биз Аллаһа табе олуб ирадәсини јеринә јетирәндә Јараданын һөкмранлығыны инкар едән инсанларын чәкдији бир чох әзаблардан вә емосионал јаралардан гуртулуруг. Дүшмәнимиз Иблис дурмадан имкан ахтарыр ки, бизи мәһв етсин. Онун гаршысында мөһкәм дурсаг вә тәвазөкарлыг ҝөстәриб Јеһованын ирадәсинә табе олсаг, бу мәнфур дүшмәнә галиб ҝәлә биләҹәјик (Мәт. 6:10, 13; 1 Бут. 5:6—9).

⁷ Биз мәсиһиләр Мәсиһин башчылығыны гәбул едир вә онун сәлаһијјәт вердији садиг вә ағыллы нөкәрә табе олуруг. Бу, бизим бир-биримизлә рәфтарымыза вә мүнасибәтимизә тәсир едир. Јығынҹагда теократик гурулуша табе олмаг о демәкдир ки, ибадәтимизә аид олан һәр шејдә Аллаһын Кәламына бојун әјирик. Бура хидмәтимиз, ибадәт ҝөрүшләриндә иштирак етмәјимиз, ағсаггалларла мүнасибәтимиз вә тәшкилатдан ҝәлән ҝөстәришләрә табе олмағымыз дахилдир (Мәт. 24:45—47; 28:19, 20; Ибр. 10:24, 25; 13:7, 17).

⁸ Аллаһа итаәт етмәјин сајәсиндә мәсиһи јығынҹағында сүлһ, тәһлүкәсизлик вә низам-интизам һөкм сүрүр. Јеһоваја табе олан инсанлар Онун ҝөзәл хүсусијјәтләрини әкс етдирирләр (1 Кор. 14:33, 40). Јеһованын тәшкилатынын ичиндә олдуғумуз үчүн Давуд падшаһын кечирдији һиссләрә шәрикик. О, Јеһованын хидмәтчиләри илә шәр инсанларын арасындакы кәскин фәрги ҝөрәндән сонра демишди: «Аллаһы Јеһова олан халг нә бәхтијардыр!» (Зәб. 144:15).

⁹ Никаһда вә аилә гурулушунда гадынын башы кишидир. Кишинин башы Мәсиһ, Мәсиһин башы исә Аллаһдыр (1 Кор. 11:3). Гадын әринә табе олмалыдыр, ушаглар исә валидејнләринә (Ефес. 5:22—24; 6:1). Аиләнин бүтүн үзвләри башчылыг принсипинә әмәл едәндә аилә меһрибан олур.

¹⁰ Әрләр Мәсиһдән нүмунә ҝөтүрәрәк мәһәббәтлә башчылыг едирләр (Ефес. 5:25—29). Әр өз башчылығындан суи-истифадә етмәјәндә вә бу мәсулијјәтә лагејд јанашмајанда гадына вә ушаглара она табе олмаг хош олур. Аллаһ гадыны әри тамамлајан көмәкчи кими јарадыб (Јар. 2:18). Әринә сәбирлә дәстәк олмагла вә онун һөрмәтини сахламагла гадын әринин мәһәббәтини газаныр вә Аллаһын адыны уҹалдыр (1 Бут. 3:1—4). Әрлә арвад Мүгәддәс Китабын башчылыгла бағлы вердији мәсләһәтә әмәл едәндә ушагларына Аллаһа итаәт мәсәләсиндә ҝөзәл нүмунә гојурлар.

¹¹ Буҝүнкү һөкумәтләр Аллаһын онлара ајырдығы јери тутурлар. Бизим Аллаһа табе олмағымыз онлара мүнасибәтимизә дә тәсир едир (Ром. 13:1—7). Мәсиһиләр гануна табе олан вәтәндашлардыр, онлар верҝиләри өдәмәклә «падшаһа мәхсус шејләри падшаһа, Аллаһа мәхсус шејләри Аллаһа» верирләр (Мәт. 22:21). Үстәлик, тәблиғ саһәсинин ишләнмә гајдасы дөвләтин мәлуматларын горунмасына даир ганунвериҹилијинә ујғун олмалыдыр. Биз Аллаһын ганунларыны позмамаг шәртилә, һөкумәтин бүтүн ганунларына табе олуруг. Бу бизә ҝүҹүмүзү тәблиғ ишинә сәрф етмәјә имкан верир (Марк 13:10; Һәв. 5:29).

¹² Теократик гурулуша табе олмағымыз һәјатымызын бүтүн саһәләринә тәсир едир. Биз бүтүн бәшәријјәтин Јеһова Аллаһа табе олаҹағы дөврү иман ҝөзләри илә ҝөрүрүк (1 Кор. 15:27, 28). Јеһованын Али һөкмранлығыны гәбул едәнләр вә әбәдијјән Она табе оланлар нә хошбәхтдирләр!