Камил һәјат јалныз арзу дејил!
Мүкәммәл дүнја... Сизҹә бу нә демәкдир? Ҹинајәткарлыг, наркоманија, аҹлыг, јохсуллуг вә әдаләтсизлик олмајан инсан ҹәмијјәтини тәсәввүр един. Һамы чох ҝөзәл емосионал вә физики сағламлыгдан һәзз алыр. Орада нә кәдәр, нә дә бәдбәхтчилик вар, чүнки өлүм белә арадан галдырылыбдыр. Белә бир һәјаты арзуламаг реалдырмы?
ЕЛМИН вә техниканын инкишафына бахмајараг, инсанларын чоху, бәшәријјәтин өз билији вә тәфәккүрү сајәсиндә һамынын сүлһ вә хошбәхтлик ичиндә јашамасы үчүн мүкәммәл дүнја гура биләҹәјинә әслиндә инанмырлар. Диҝәр тәрәфдән, инсанлар јахшылыға ҹәһд етмәјә вә сәһвләрини дүзәлтмәјә мејиллидирләр. Әлбәттә, гејри-реал арзулар евсизләрә вә јохсуллара көмәк етмәјәҹәкдир, узун мүддәт әзаблардан азад олмаға үмид едән хәстә вә шикәстләрә шәфа вермәјәҹәкдир. Инсанлар, јалныз јарадыҹылыг габилијјәтләриндән истифадә етмәклә, һеч вахт мүкәммәл дүнјаја наил ола билмәјәҹәкләр. Лакин бу ҝүн мөвҹуд олан пислик вә әдаләтсизликләрә бахмајараг, тезликлә дүнјада камиллијин һөкм сүрәҹәјинә инанмаг үчүн мөһкәм әсасымыз вар.
Камил һәјат һаггында дүшүнәндә, јәгин ки, јадымыза Иса Мәсиһин һәјаты дүшүр. Иса јер үзүндә јашамыш јеҝанә камил инсан олмамышдыр. Аллаһын сурәтиндә јарадылан Адәмлә Һәвва, ҹәннәтдә камил һәјатдан һәзз алырдылар. Анҹаг сәмави Аталарына гаршы үсјан галдырдыгларына ҝөрә, онлар бу ҝөзәл шәраити итирдиләр (Тәквин 3:1—6). Лакин Јарадан инсанларын үрәјинә әбәди јашамаг арзусуну гојмушдур. Ваиз 3:11 ајәсиндә бу һагда шәһадәтлик едилир: “О, [Аллаһ] һәр шеји вахтында ҝөзәл етди; онларын үрәјинә дә әбәдијјәти гојду, фәгәт белә ки, инсан Аллаһын етдији иши башдан сона гәдәр тапыб чыхара билмәз».
Гејри-камиллик вә ҝүнаһ, бәшәријјәтин “чүрүклүјә» көлә вә “вурнухмаја табе» едилмәсинә сәбәб олду, амма һәвари Павелин тәсәлливериҹи сөзләринә диггәт јетирин: “Хилгәт Аллаһын оғулларынын зүһуруну бөјүк һәсрәтлә ҝөзләјир. Она ҝөрә ки, хилгәт өз ирадәси илә дејил, табе етдирәнин ирадәси илә вурнухмаја табе етдирилди. Бу үмидлә ки, хилгәт өзү дә чүрүклүјә олан көләлијиндән азад олунуб Аллаһын өвладларынын иззәтли азадлығына говушаҹагдыр» (Ромалылара 8:19—21). Мүгәддәс Китабда ајдын шәкилдә дејилир ки, Аллаһ, инсанларын јенидән камиллик әлдә етмәкләри үчүн, Иса Мәсиһин васитәси илә гајғы ҝөстәрмишдир (Јәһја 3:16; 17:3).
Лакин биз ҝөзәл ҝәләҹәјә јалныз үмид етмирик, һәмчинин артыг индидән руһән инкишаф етмәк вә јахшы сәмәрәләр вермәк имканымыз да вар.
Мүлајим олмаға чалышын
Иса Мәсиһ камиллик мәсәләсини ваҹиб һесаб едирди, она ҝөрә дә бөјүк издиһама мүраҹиәт едәрәк, деди: “Сәмави Атаныз камил олдуғу кими, сиз дә камил олун” (Матта 5:48). Иса, бизим бу әшјалар системиндә камил олмағымызымы нәзәрдә тутурду? Хејр. Тез-тез сәһв ишләтмәјимизә бахмајараг, мүтләг өзүмүздә әлиачыглыг, хејирхаһлыг вә гоншуларымыза гаршы мәһәббәт инкишаф етдирмәјә чалышмалыјыг. Һәтта Исанын һәвариләриндән бири гејд етмишдир: “Әҝәр биз, ҝүнаһларымызы е’тираф едириксә, садиг вә адил олан Аллаһ ҝүнаһларымызы бағышлајыб, бизи һәр јаманлыгдан тәмизләјәҹәкдир. Әҝәр дејириксә ки, ҝүнаһ ишләтмәдик, Ону јаланчы имиш кими гәбул едирик вә биздә Онун сөзү олмаз” (1 Јәһја 1:9, 10).
Бунунла белә, биз ифратчылыға гапылмамаг үчүн өзүмүзә вә башгаларына олан мүнасибәтимизи дәјишдирмәлијик. Әҝәр биз таразлыг вә мүлајимлик хүсусијјәтини инкишаф етдирмәк истәјириксә, бунун үчүн ән јахшы мәсләһәти Аллаһын Кәламы олан Мүгәддәс Китаб верә биләр. Өзүмүздә мәмнунлуг вә тәмкинлик кими хүсусијјәтләри инкишаф етдирмәк, иш јолдашларымызла, һәјат јолдашымызла, валидејнләримизлә вә ушагларымызла даһа јахшы мүнасибәт әлдә етмәкдә бизә көмәк едәҹәк. Һәвари Павел мәсиһчиләрә хатырладырды: “Рәббә аид олдуғунуз үчүн һәмишә севинин; вә бирдә дејирәм: севинин. Гој сизин мүлајимлијиниз бүтүн инсанлара мә’лум олсун” (Филипилиләрә 4:4, 5).
Мүлајим олмағын фајдасы
Өзүнә вә башгаларына гаршы һәддиндән артыг тәләбкар олмајан мүлајим инсан виҹдан әзабы чәкмир. Белә әһвал-руһијјә һәм онун өзүнә, һәм дә әтрафындакылара фајда ҝәтирир. Әҝәр биз өз имканларымызы дүзҝүн гијмәтләндиририксә, онда һәр шејә ҝерчәкликлә бахаҹағыг вә гаршымыза һәјата кечирилә билән мәгсәдләр гојаҹағыг. Унутмајаг ки, Аллаһ инсанлары јер үзүндә јашајыб, һәм өзләринә һәм дә башгаларына фајда ҝәтирән әһәмијјәтли әмәкдән һәзз алмаглары үчүн јаратмышдыр (Тәквин 2:7—9).
Әҝәр сиз өзүнүзә гаршы һәддиндән артыг тәләбкарсынызса, нәјә ҝөрә бу проблемин өһдәсиндән ҝәлә билмәк үчүн дуада Јеговадан көмәк истәмәјәсиниз? Аллаһын мәрһәмәтини һисс етдијиниз заман, тәсәлли тапаҹагсыныз. Јегова зәиф вә гејри-камил олдуғумузу билир, буна ҝөрә дә бизим хаһишләримизә гаршы һәддиндән артыг тәләбкар вә ја сәрт дејил. Мәзмурчу бизи әмин едир: “Ата өвладларына неҹә мәрһәмәт едирсә, РӘБ ондан горханлара елә мәрһәмәт едир. Чүнки јарадылышымызы билир; хатырлајыр ки, биз торпағыг” (Мәзмур 103:13, 14). Биз, инсанлара ҝөстәрдији мәрһәмәтә ҝөрә, Аллаһа неҹә дә миннәтдарыг! Нөгсанларымыза бахмајараг, О, бизи гијмәтләндирир вә ата өз өвладларыны севдији кими бизи севир.
Максималист олмаг әвәзинә, өзүмүздә сечә билмәк габилијјәтини вә таразлығы инкишаф етдирмәк даһа фајдалыдыр. Бундан әлавә, әмин ола биләрик ки, Өзүнүн ҝөјләр Падшаһлығынын васитәсилә бәшәријјәти камиллијә чатдырмаг нијјәтини һәјата кечирмәкдә Јеговаја һеч ким мане ола билмәјәҹәкдир. Бәс камил инсан олмаг нә демәкдир?
Максимализм - камиллијә апаран јол дејил
Камил инсан олмаг, максималист олмаг демәк дејил. Шүбһәсиз ки, Аллаһын Падшаһлығы алтында, јерүзү Ҹәннәтдә јашајан инсанлар һәддиндән артыг тәләбкар вә мәғрур олмајаҹаглар. Бөјүк мәшәггәтдән сағ чыхмаг үчүн, фидијә гурбанлығына ҝөрә сәмими гәлбдән миннәтдар олмаг лазымдыр. Һәвари Јәһја, бүтүн милләтләрдән олан бөјүк издиһамын һиссини тәсвир едирди: “Хиласымыз үчүн тахтда отуран Аллаһымыза вә Гузуја борҹлујуг” (Вәһј 7:9, 10, 14, ЈД). Јахынлашан бөјүк мәшәггәтдән сағ галанларын һамысы, Мәсиһә миннәтдар олаҹаглар ки, о өз һәјатыны көнүллү олараг, һәм онлара һәм дә она иман едәнләрин һамысына ҝөрә гурбан вермишдир. Мәһәббәтә шәһадәт едән бу гурбанлыға әсасән, инсанлар гејри-камилликдән вә чатышмамазлыглардан азад едиләҹәкләр (Јәһја 3:16; Ромалылара 8:21, 22).
Камил инсанларын һәјаты неҹә олаҹаг? Рәгабәт вә худбинлик һејсијјәтинин әвәзинә, мәһәббәт вә меһрибанчылыг инсан һәјатыны даһа гијмәтли едәҹәкдир, нараһатчылыг вә өзүнү ләјагәтсиз санмаг һисси арадан галдырылаҹаг. Лакин камил инсанларын һәјаты дарыхдырыҹы вә јоруҹу олмајаҹаг. Аллаһын Кәламы Ҹәннәти бүтүн тәфсилаты илә тәсвир етмир, анҹаг орадакы һәјат барәдә бизә мүәјјән мә’лумат верир: “Евләр тикәҹәкләр вә јашајаҹаглар, бағлар салаҹаглар вә мејвәсини јејәҹәкләр. Онлар тикиб... башгасы јашамајаҹаг, онлар әкиб... башгасы јемәјәҹәк; чүнки халгымын ҝүнләри ағаҹын ҝүнләри кими олаҹаг вә сечдикләрим өз әлләринин ишиндән истифадә едәҹәкләр. Бош јерә әмәк чәкмәјәҹәкләр вә фәлакәт үчүн доғмајаҹаглар” (Јешаја 65:21—23).
Аллаһын Падшаһлығынын рәһбәрлији дөврүндә әјләнҹәләрин, мағазаларын, техниканын вә нәглијјатын нә ҹүр олаҹағы һагда фәрзијјәләр гурмаг әвәзинә, өзүнүзү, бу сөзләрин һәјата кечәҹәји јени дүнјада тәсәввүр етмәниз даһа јахшы оларды: “Гурдла гузу бирликдә отлајаҹаглар вә аслан өкүз кими саман јејәҹәк; илан исә, онун јејәҹәји торпаг олаҹаг. Бүтүн мүгәддәс дағымда зәрәр вермәјәҹәкләр вә һәлак етмәјәҹәкләр, РӘБ дејир” (Јешаја 65:25). Камил һәјат, буҝүнкү һәјатдан неҹә дә фәргли олаҹаг! Әҝәр сиз һәмин вахтда јашамаға лајиг ҝөрүлсәниз, севән сәмави Атамызын сизин вә әзизләринизин гајғысына неҹә галаҹағыны ҝөрәҹәксиниз. “РӘБДӘН ләззәт ал; О да сәнә үрәјинин диләкләрини верәҹәкдир” (Мәзмур 37:4).
Камил һәјат јалныз арзу дејил. Јегованын инсанлара аид мәһәббәтлә долу нијјәти мүтләг һәјата кечәҹәкдир. Сиз вә аиләниз, камиллијә наил олуб, Аллаһын јени дүнјасында јашајаҹаг инсанларын арасында ола биләрсиниз. Мүгәддәс Китабда габагҹадан дејилир: “Салеһләр јери мирас алаҹаг вә орада әбәдијјән јашајаҹаглар” (Мәзмур 37:29).
[6-ҹы сәһифәдәки шәкил]
Биз ифратчылыг вә јерсиз ирад тутмагдан узаг олмаг үчүн өзүмүзә вә әтрафымызда оланлара мүнасибәтимизи дәјишә биләрик
[7-ҹи сәһифәдәки шәкил]
Өзүнү нәјә ҝөрә сүлһ вә салеһлик һөкм сүрән Ҹәннәтдә тәсәввүр етмәјәсән?