Охуҹуларын суаллары

Мүгәддәс Китабын ган һаггында олан әмрләри бахымындан, Јегованын Шаһидләри, хәстәнин өз ганындан истифадә олундуғу тибби проседуралара неҹә јанашырлар?

Гәрар гәбул едәркән, һәр бир мәсиһчи јалныз шәхсән үстүн тутдуғу үсуллара вә ја һәкимләрин мәсләһәтләринә әсасланмамалыдыр, о, Мүгәддәс Китабын бу барәдә дедикләрини ҹидди олараг ҝөздән кечирмәлидир. Бу мәсәлә, онун Јегова илә гаршылыглы мүнасибәтләринә тохунур.

Һәјатымыз үчүн борҹлу олдуғумуз Јегова, инсанлара, организмләринә ган гәбул етмәмәји бујурмушдур (Тәквин 9:3, 4). Ган һәјаты тәмсил етдији үчүн, Аллаһын гәдим Исраилә вердији Ганун ондан истифадә етмәји мәһдудлашдырырды. Аллаһ бәјан етди: “Әтин ҹаны [вә ја һәјаты] гандадыр; вә мән ону гурбанҝаһ үзәриндә ҹанларыныза кәффарә етмәк үчүн сизә вердим”. Бәс инсан һејваны гидаланмаг үчүн өлдүрүрсә, онда неҹә? Аллаһ деди: “Онун ганыны ахыдаҹаг вә ону торпагла өртәҹәкдир”a (Левилиләр 17:11, 13). Јегова бу әмри дәфәләрлә тәкрарлајырды (Тәснијә 12:16, 24; 15:23). Јәһудиләрә мәхсус бир мәнбәдә гејд олунур: “Ганы сахламаг олмаз, ону јерә төкмәк, бунунла да истифадә етмәк үчүн јарарсыз олдуғуну ҝөстәрмәк лазымдыр” (“Soncino Chumash”). Һеч бир исраилли, һәјаты Аллаһа мәхсус олан башга варлығын ганыны јығмалы, сахламалы вә истифадә етмәли дејилди.

Мусанын ганунуна риајәт етмәјин ваҹиблији, Мәсиһин өлүмүндән сонра арадан галхды. Анҹаг јенә дә, Аллаһ ганы мүгәддәс сајыр. Һәвариләр, мүгәддәс руһла һәрәкәтә ҝәтириләрәк, мәсиһчиләрә “гандан чәкинмәк” ҝөстәришини вердиләр. Бу ҝөстәришә лагејд јанашмаг олмаз. Гандан чәкинмәк, әхлаг бахымындан ҹинси әхлагсызлыг вә бүтпәрәстликдән чәкинмәк гәдәр ваҹибдир (Һәвариләрин ишләри 15:28, 29; 21:25). ХХ әсрдә донорлуг вә ганкөчүрмә ади һала чеврилән заман, Јегованын Шаһидләри анладылар ки, бу үсул Аллаһын Кәламына зиддирb.

Бә’зән һәкимләр, әмәлијјатдан бир нечә һәфтә габаг хәстәни өз ганыны вермәјә (әмәлијјатгабағы ган һазырлығы, ӘГҺ) тәшвиг едирләр ки, лазым ҝәлдикдә хәстәјә, һазырланмыш шәхси ганыны көчүртмәк мүмкүн олсун. Лакин ганын јығылмасы, сахланылмасы вә көчүрүлмәси, Левилиләр вә Тәснијә китабларында дејиләнләрә тамамилә зиддир. Ганы сахламаг олмаз, ону ахытмаг вә ја башга сөзләрлә десәк, Аллаһа гајтармаг лазымдыр. Әлбәттә, бу ҝүн Мусанын гануну гүввәдә дејил. Буна бахмајараг, Јегованын Шаһидләри бу ганунда олан принсипләрә һөрмәт едир вә “гандан чәкинмәјә” гәти гәрарлыдырлар. Буна ҝөрә дә, биз донор кими ган вермирик вә “төкүлмәси” лазым олан ганымызы, көчүрмәк үчүн тәдарүк етмирик. Бу ҹүр һазырлыг вә ганын көчүрүлмәси, Аллаһын ганунунуна зиддир.

Башга проседураларын кечирилмәсиндә вә хәстәнин өз ганындан истифадә олунмасы илә әлагәдар анализ ҝөтүрүлмәсиндә, Аллаһын принсипләринә гаршы ачыг зидијјәт јохдур. Мәсәлән, бир чох мәсиһчиләр, анализ үчүн ганларынын ҝөтүрүлмәсинә, анализдән сонра исә ганын атылмасына јол верирләр. Һәмчинин, һәкимләр хәстәнин өз ганындан истифадә олунмасы илә әлагәдар, даһа чәтин проседуралар мәсләһәт едә биләрләр.

Мәсәлән, ҹәрраһијјә әмәлијјаты заманы, һемодилүсјон кечириләндә, ганын бир гисми бәдәндән кәнара чыха биләр. Хәстәнин организминдә галан ган дурулашдырылыр. Даһа сонра, әввәлҹәдән сү’ни дөвр етмә үчүн ајрылмыш ган дөвраны, хәстәнин организминә гајыдыр вә нәтиҹәдә ганда һемоглабинин сәвијјәси нормаллашыр. Башга бир һалда, јаранын үзәринә ахан ган, јығылыб сүзүлә биләр, беләликлә еритроситләр хәстәнин ганына гајыдыр. Буна ганын горунмасы дејилир. Башга проседура нөвү дә мөвҹуддур; бу заман ган, мүвәггәти олараг һәр һансы бир органын (мәсәлән, үрәјин, ҹијәрләрин вә ја бөјрәкләрин) функсијасыны иҹра едән хүсуси апаратдан кечирилир. Сонра ган апаратдан хәстәнин организминә гајыдыр. Башга бир һалда исә, ганын зәдәләнмиш вә ја кејфијјәтсиз һиссәләринин тәмизләнмәси үчүн, сепаратора (сентрифуга) өтүрүлүр. Вә ја һәкимләрин мәгсәди - ганын һәр һансы компонентини, организмин башга һиссәсиндә истифадә етмәк үчүн ајырмагдыр. Һәмчинин елә проседуралар да мөвҹуддур ки, маркаламаг вә ја дәрман әлавә етмәк үчүн, хәстәнин ганындан бир гәдәр ҝөтүрүлүр, бундан сонра ган хәстәнин организминә ҝери гајтарылыр.

Бу ҹүр проседуралар дәјишилә биләр вә шүбһәсиз ки, тәдриҹән јени диагностика вә мүалиҹә үсуллары һазырланаҹагдыр. Биз, бу проседуралары арашдырмагла, һәр һансы гәрарлар чыхармаға чалышмырыг. Мәсиһчи, ҹәрраһијјә әмәлијјаты, анализ ҝөтүрүлән вә ја мүалиҹә олунан заман, ганындан неҹә истифадә олунаҹағына өзү гәрар вермәлидир. О, ганындан неҹә истифадә олунаҹағыны, һәкимләрдән вә ја башга тибб ишчиләриндән габагҹадан өјрәнмәлидир. Сонра исә виҹданына ујғун олараг, гәрар гәбул етмәлидир. (Чәрчивәјә бахын.)

Мәсиһчиләр јадда сахламалыдырлар ки, онлар өзләрини Аллаһа һәср едибләр вә “Рәбби бүтүн үрәјинлә, бүтүн ҹанынла, бүтүн гүввәтинлә вә бүтүн дүшүнҹәнлә сев” әмрини јеринә јетирмәји өһдәләринә ҝөтүрүбләр (Лука 10:27). Дүнјадакы инсанларын әксәријјәтиндән фәргли олараг, Јегованын Шаһидләри Аллаһла гаршылыглы мүнасибәтләрини чох гијмәтләндирирләр. Бизә һәјат Верән, һамыны Исанын төкүлән ганына иман ҝәтирмәјә тәшвиг едир. Мүгәддәс Китабда дејилир: “Мәсиһдә, Мәсиһин ганы васитәсилә хиласа, ҝүнаһларымызын әфвинә маликик” (Ефеслиләрә 1:8).

[Һашијәләр]

[31-ҹи сәһифәдәки чәрчивә/шәкилләр]

Өзүнүзә верәҹәјиниз суаллар

Әҝәр ганымын бир һиссәси организмимдән ајрыларса вә һәтта ола билсин, ахыны мүәјјән бир мүддәтә дајандырыларса, виҹданым јол верәрми ки, мән о ганы бәдәнимин бир һиссәси кими гәбул едим вә онун “јерә төкүлмәсинин” ваҹиб олмадығыны дүшүнүм?

Әҝәр диагностик вә ја мүалиҹәви проседура заманы ганымын бир һиссәсини ҝөтүрәрләрсә, онун тәркибини дәјишдириб, сонра ҝери организмимә гајтарарларса, Мүгәддәс Китабын әсасында өјрәдилмиш виҹданым тәмиз олаҹагмы?