Аллаһа һәср едиләнләрә лајиг тәрздәми јашајырсыныз?
“Һәр нә етсәниз, инсанлар үчүн јох, Рәбб үчүн едир кими, ҹанла-башла един” (КОЛОСЛУЛАРА 3:23).
1. Идманчылар, өзләрини сечдикләри идман нөвүнә һәср етдикләрини неҹә ҝөстәрирләр?
ИДМАНЧЫЛАР ән јахшы наилијјәтләрә неҹә наил олурлар? Теннисдә, футболда, баскетболда, бејсболда, јүнҝүл атлетикада, голфда вә идманын диҝәр нөвләриндә, ән јахшылар өзләрини ахыра гәдәр бәдәнин вә ағылын мәшгинә һәср едир, сечдикләри идман нөвүнүн тәләбләринә ујғун габилијјәтләрини максимал дәрәҹәдә инкишаф етдирмәјә чалышараг шөһрәт зирвәсинә чатырлар. Мөһкәмлик вә психоложи һазырлыг онлар үчүн һәр шејдән ваҹибдир. Мүгәддәс Китабын анламына ҝөрә, Аллаһа һәср едилмәк, өз ишинә јалныз буна бәнзәр сәдагәтлијими нәзәрдә тутур?
2. “Һәср едилмәк” сөзү алтында Мүгәддәс Китабда нә нәзәрдә тутулур? Нүмунә әсасында ҝөстәрин.
2 Мүгәддәс Китабда, бир кимсәјә вә ја нәјә исә сәдагәт ҝөстәрмәк вә ја һәср едилмәк сөзү алтында нә нәзәрдә тутулур? “Һәср етмәк” кими тәрҹүмә олунан гәдим ибрани фе’ли “ајры тутмаг, ајрылмыш, сечилмәк” мә’насыны верирa. Гәдим Исраилдә баш каһин Һарунун баш сарығына, “һәср едилмәнин мүгәддәс ишарәси” олан вә үзәриндә ибрани дилиндә “мүгәддәслик Јеговаја мәхсусдур” сөзләри јазылан гызыл лөвһә тахылырды. Бу, баш каһинин јадына салырды ки, о, мүгәддәси мурдар едән һәрәкәтләрдән узаг дурмалыдыр, “чүнки мүгәддәслик ишарәси, Аллаһынын мәсһ јағы онун үзәриндәдир” (Чыхыш 29:6, ЈД; 39:30, ЈД; Левилиләр 21:12, ЈД).
3. Аллаһа һәср едилмәмиз, давранышымыза неҹә тә’сир етмәлидир?
3 Бу ајәләрдән ҝөрүндүјү кими, өзүнү Аллаһа һәср етмәк ҹидди аддымдыр. Бу о демәкдир ки, инсан шәхси арзусу илә Аллаһын хидмәтчиси олур вә о өзүнү чох әхлаглы апармалыдыр. Буну нәзәрә алараг, Петерин, Јегованын нөвбәти сөзләринә истинад етмәсинин сәбәбләри мә’лум олур: “Мүгәддәс олун, чүнки Мән мүгәддәсәм” (1 Петер 1:15, 16). Аллаһа һәср едилмиш биз мәсиһчиләрин үзәринә, һәср едилмәмизә ујғун олараг јашамаг вә сәдагәтимизи ахыра гәдәр горумаг кими ҹидди мәс’улијјәт дүшүр. Мәсиһчиләрин Аллаһа һәср едилмәләри өзүнә нә дахил едир? (Левилиләр 19:2; Матта 24:13).
4. Өзүмүзү Аллаһа һәср етмәк үчүн һансы аддымы атырыг вә буну нәјә бәнзәтмәк олар?
4 Јегова Аллаһ вә Онун нијјәтләри һаггында, һәмчинин Иса Мәсиһ вә Јегованын нијјәтләриндә онун ролу һаггында дәгиг биликләр әлдә етдикдән сонра, Аллаһа бүтүн үрәјимизлә, ҹанымызла, дүшүнҹәмизлә вә гүввәтимизлә хидмәт етмәји өзүмүз гәрарлашдырмышыг (Марк 8:34; 12:30; Јәһја 17:3). Буну һәтта әһди-пејман, Аллаһа шәртсиз һәср едилмәк һесаб етмәк олар. Биз Аллаһа һиссләрин тә’сири алтында һәср едилмәмишик. Бу аддымы атмаздан әввәл, ағлымызы ишләдәрәк, һәр шеји дәриндән вә дуа едәрәк ҝөтүр-гој етмишик. Јә’ни биз өзүмүзү Аллаһа һансыса бир мүддәт үчүн һәср етмәмишик. Биз, саһәни шумламаға башлајыб јары јолда дајанан, бу иши баҹармајаҹағына, јахуд бичин вахтына һәлә чох галдығына вә үмумијјәтлә бичинин олуб-олмјаҹағына шүбһә едән инсана бәнзәмәмәлијик. Теократик вәзифәләри иҹра етмәк үчүн “әлини котан үстүнә гојуб”, һеч бир чәтинлик гаршысында ҝери чәкилмәјән инсанларын нүмунәсинә бахаг (Лука 9:62; Ромалылара 12:1, 2).
Онлар Аллаһа һәср едилдикләрини инкар етмәдиләр
5. Јеремја һансы тәрздә, Аллаһа бүтүнлүклә һәср едилмиш инсанын диггәтә лајиг нүмунәси олду?
5 Јеремја, 40 илдән артыг (б. е. ә. 647-ҹи илдән 607-ҹи илә гәдәр) Јерусәлимдә пејғәмбәр кими хидмәт етди, бу исә һеч дә асан дејилди. Јеремја билирди ки, һәр шеји баҹармыр (Јеремја 1:2—6). О, һәр ҝүн Јәһуда әһалисинин тәрслији илә гаршылашырды, буна ҝөрә дә, онун ҹәсарәтли вә сарсылмаз олмаға еһтијаҹы варды (Јеремја 18:18; 38:4—6). Лакин Јеремја өзүнү, Аллаһа һәср едилмиш хидмәтчијә лајиг тәрздә апармаг үчүн, она гүввәт верән Јегова Аллаһа ҝүвәнирди (Јеремја 1:18, 19).
6. Һәвари Јәһја бизә һансы нүмунәни верди?
6 Јахуд гоҹа јашларында, “Аллаһын кәламы вә Иса Мәсиһин шәһадәти үчүн”, гонагсевмәз Патмос адасына сүрҝүн едилән садиг һәвари Јәһјанын нүмунәсинә бахаг (Вәһј 1:9). О, 60 илә јахын мүддәтдә сарсылмазлығыны горујуб сахлады вә өзүнү Аллаһа һәср етмиш мәсиһчи мөвгејинә садиг галды. О, Јерусәлимин Рома гошунлары тәрәфиндән дағыдылмасындан сонра да јашајырды. Јәһја, Инҹили, Аллаһдан илһам алмыш үч китабы вә Һар-Меҝидон мүһарибәсинин вагеәси тәсвир едилән Вәһј китабыны јазмаг шәрәфинә лајиг ҝөрүлмүшдү. Јәһја, Һар-Меҝидонун онун сағлығында олмајаҹағыны билиб, Аллаһа хидмәтини дајандырдымы? О, е’тинасызлыға гапылдымы? Хејр, “вахт јахын” олса да, Јәһја она верилән вәһјин бир гәдәр сонра һәјата кечәҹәјини биләрәк, ахыра гәдәр садиг галды (Вәһј 1:3; Даниел 12:4).
Аллаһа һәср едилмиш хидмәтчиләрин мүасир нүмунәләри
7. Бир гардаш мәсиһчи сәдагәтинә даир неҹә ҝөзәл нүмунә верди?
7 Бизим зәманәмиздә минләрлә садиг мәсиһчиләр Һар-Меҝидона кими јашамасалар да, Аллаһа олан сәдагәтләрини горујуб сахламаг үчүн бүтүн гүввәләрини сәрф едирдиләр. Белә мәсиһчиләрдән бири, Инҝилтәрәдән олан Ернест Бивор олмушдур. О, 1939-ҹу илдә, Икинҹи дүнја мүһарибәсинин әввәлиндә Јегованын Шаһиди олду вә таммүддәтли хидмәтдә иштирак етмәк үчүн, фотомүхбирликлә әлагәдар ҝәлирли ишиндән имтина етди. Мәсиһчи битәрәфлији мөвгејинә ҝөрә ики ил һәбсханада галды. Ернестә, онун аилә үзвләри көмәк едирдиләр. 1950-ҹи илдә онун үч оғлу Нју-Јоркда, Ҝөзәтчи Гүлләсинин Мүгәддәс Китаб мәктәби Ҝилеадда миссионер хидмәти үчүн һазырлыг курсуну битирди. Тәблиғдәки сә’јинә ҝөрә достлары Бивор гардашы Ерни-Һар-Меҝидон адландырырдылар. Бивор сонсуз сәдагәтлә, Аллаһа һәср едиләнләрә лајиг тәрздә јашады вә өмрүнүн ахырына гәдәр Аллаһын ҝәләҹәк Һар-Меҝидон мүһарибәси һаггында тәблиғ етди. Бивор гардаш 1986-ҹы илдә вәфат етди. О, Аллаһа һәср едилмәсини гыса мүддәтә бағланмыш мүгавилә һесаб етмирдиb (1 Коринфлиләрә 15:58).
8, 9. а) Франко режими дөврүндә Испанијада јашамыш ҝәнҹләрин чоху һансы нүмунәни вердиләр? б) Өзүмүзә һансы суаллары вермәк мүнасиб оларды?
8 Сөнмәз сә’јдә Испанијалы гардашларымыз да ҝөзәл нүмунә ҝөстәрмишләр. Франко режими дөврүндә (1939—1975) өзүнү Аллаһа һәср едән јүзләрлә ҝәнҹ Шаһидләр ҹәсарәтлә мәсиһчи битәрәфлији мөвгејини тутмушлар. Онлардан чоху он ил вә ја даһа артыг һәбсханада кечирмишләр. Хесус Мартин адлы бир Шаһид үмуми һесабла өмрүнүн 22 илини һәбсханада кечирмишди. Шимали Африканын һәрби һәбсханасында ону гәддарҹасына дөјүрдүләр. Бүтүн бунлара дөзмәк асан дејилди, лакин гардаш һеч бир ҝүзәштә ҝетмәди.
9 Чох вахт бу ҝәнҹләр нә заман азад едиләҹәкләрини вә ја үмумијјәтлә азад едилиб едилмәјәҹәкләрини билмирдиләр: онлара бир-биринин ардынҹа һөкм кәсилирди. Анҹаг һәбсдә оларкән дә нөгсансызлыгларыны горујуб сахламаға чалышыр вә хидмәтдә сә’јли галырдылар. 1973-ҹү илдә вәзијјәт јахшылашмаға башлајанда, јашлары 30-у һагламыш бу Шаһидләрдән чохуну азад етдиләр, бундан сонра онлар дәрһал таммүддәтли хидмәтә башладылар. Онлардан бә’зиләри хүсуси пионер вә сәјјаһ нәзарәтчи олдулар. Онлар дустагханада, Аллаһа һәср едиләнләрә лајиг тәрздә јашајырдылар, онлардан әксәријјәти азад олундугдан сонра да белә јашамаға давам етдиләрc. Бәс бизим һаггымызда нә демәк олар? Һәдсиз тәрздә сәдагәтли олан гардашлар кими, биз дә һәср едилмәмизә садиг галырыгмы? (Ибраниләрә 10:32—34; 13:3).
Аллаһа һәср едилмәјә дүзҝүн мүнасибәт
10. а) Аллаһа һәср едилмәмизә неҹә мүнасибәт бәсләмәлијик? б) Јегова бизим хидмәтимизә неҹә мүнасибәт ҝөстәрир?
10 Ирадәсини јеринә јетирмәк үчүн, Аллаһа һәср едилмәмизә мүнасибәтимиз неҹәдир? Бу бизим һәјатымызда башлыҹа јери тутурму? Ҝәнҹ вә ја јашлы, аиләли вә ја субај, сағламлығымызын неҹә олмасындан асылы олмајараг, имканларымыз дахилиндә, өзүнү Аллаһа һәср едәнләрә лајиг тәрздә јашамаға сә’ј ҝөстәрмәлијик. Вәзијјәт кимә исә пионер, Ҝөзәтчи Гүлләси Ҹәмијјәтинин филиалында көнүллү, миссионер вә ја сәјјаһ нәзарәтчи кими таммүддәтли хидмәт етмәјә имкан верир. Дејәк ки, валидејнләрин вахтынын вә гүввәсинин чоху исә аиләнин физики вә руһани тәләбатларыны өдәмәјә сәрф олунур. Онларын һәр ај хидмәтә сәрф етдикләри нисбәтән чох олмајан вахтларынын, Јегованын ҝөзүндә таммүддәтли хидмәтчинин сәрф етдији чох вахтдан аз гијмәтли олдуғуну иддиа етмәк олармы? Хејр. Аллаһ биздән, малик олмадығымыз шејләри ҝөзләмир. Бу принсипи һәвари Павел сөјләмишди: “Әҝәр шөвг варса, инсанда олмајан мала ҝөрә дејил, олан мала ҝөрә мәгбулдур” (2 Коринфлиләрә 8:12).
11. Хиласымыз нәдән асылыдыр?
11 Һәр неҹә олурса-олсун, хиласымыз ҝөрдүјүмүз ишләрдән дејил, Јегованын, Рәббимиз Мәсиһ Исанын васитәсилә ифадә олунан, лајиг олмадығымыз мәрһәмәтиндән асылыдыр. Павел ајдын тәрздә изаһ етди: “Һамы ҝүнаһ ишләтмиш вә Аллаһын иззәтиндән мәһрум галмышлар. Онлар, Онун лүтфү илә Иса Мәсиһин фидијәси нәтиҹәсиндә салеһлији мүфтә алдылар” (Ромалылара 3:23, 24; Јагуб 2:17, 18, 24).
12. Нәјә ҝөрә өзүмүзү башгалары илә мүгајисә етмәк лазым дејил?
12 Аллаһа хидмәтә нә гәдәр вахт ајырмаг, нә гәдәр әдәбијјат пајламаг вә ја нә гәдәр Мүгәддәс Китаб өјрәнмәси кечирмәк планында өзүмүзү башгалары илә мүгајисә етмәјә еһтијаҹ јохдур (Галатијалылара 6:3, 4). Мәсиһчи хидмәтиндә нә гәдәр иш ҝөрсәк дә, Исанын тәвазөкарлыға чағыран сөзләрини һеч биримиз унутмалы дејилик: “Инди сиз дә, сизә әмр олунан һәр шеји јеринә јетирдикдән сонра дејин: “Биз һеч бир гијмәти олмајан гулларыг, чүнки иҹра етмәли олдуғумузу етдик”” (Лука 17:10). Биз “иҹра етмәли олдуғумузу” нә дәрәҹәдә јеринә јетиририк? Буну нәзәрә алараг белә бир суал јараныр: Аллаһа хидмәтимизин кејфијјәти неҹә олмалыдыр? (2 Коринфлиләрә 10:17, 18).
Әбәс јашанылмајан ҝүнләр
13. Аллаһа һәср едилмәмиз биздә һансы дүшүнҹә тәрзинин олмасыны тәләб едир?
13 Павел арвадлара, әрләрә, ушаглара, валидејнләрә вә гуллара нәсиһәт верәрәк, јазды: “Һәр нә етсәниз, инсанлар үчүн јох, Рәбб үчүн едир кими, ҹанла-башла един. Билин ки, мүкафат олараг, Рәббдән мирас алаҹагсыныз. Чүнки сиз Рәбб Мәсиһә хидмәт едирсиниз” (Колослулара 3:23, 24). Јеговаја хидмәтдә һәјата кечирдикләримизлә инсанлара тә’сир бағышламаға чалышмырыг. Биз Аллаһа, Иса Мәсиһин нүмунәсинә риајәт едәрәк хидмәт етмәјә сә’ј ҝөстәририк. О, өзүнүн гысамүддәтли хидмәтини, вахтын ҝөзләмәдијини биләрәк јеринә јетирирди (1 Петер 2:21).
14. Петер ахыр ҝүнләрлә әлагәдар нә барәдә хәбәрдарлыг едирди?
14 Һәр шејдән ҝөрүнүр ки, һәвари Петер дә вахтын ҝөзләмәдијини дәрк едирди. О, икинҹи мәктубунда хәбәрдарлыг едирди ки, ахыр ҝүнләрдә “өз еһтирасларына” ҝөрә һәрәкәт едән ришхәндчиләр, дөнүкләр вә шүбһә едәнләр ҝәләҹәк вә Мәсиһин иштиракыны шүбһә алтына салаҹаглар. Лакин Петер хәбәрдарлыг едир: “Рәбб бә’зиләринин зәнн етдији кими Өз вә’дини јеринә јетирмәкдә ҝеҹикмир. Әксинә, О бизә сәбр едир вә истәјир ки, һамы төвбәјә ҝәлсин вә кимсә һәлак олмасын. Рәббин Ҝүнү исә, ҝеҹә ҝәлән оғру кими ҝәләҹәкдир”. Һәр һалда Јегованын ҝүнү мүтләг ҝәләҹәкдир. Буна ҝөрә дә биз, Јегованын вә’динә олан үмидимизин мөһкәмлијинә һәр ҝүн диггәт јетирмәлијик (2 Петер 3:3, 4, 9, 10).
15. Һәјатымызын һәр ҝүнүнү неҹә истифадә етмәлијик?
15 Әҝәр һәгигәтән дә Аллаһа һәср едиләнләрә лајиг тәрздә јашамаг истәјириксә, һәр ҝүн әмәлләримизлә Јеговаја иззәт ҝәтирмәлијик. Јашадығымыз һәр бир ҝүнә бојланараг дејә биләрикми ки, бу ҝүн бу вә ја башга үсулла Аллаһын адынын иззәтләнмәсинә вә Падшаһлыг һаггындакы хәбәрин тәблиғ олунмасына көмәк етмишик? Буна, јүксәк әхлаглы давранышымызла, руһландырыҹы сөһбәтләримизлә вә ја доғмаларымыза вә достларымыза һәссас гајғы ҝөстәрмәклә наил олмаг олар. Мәсиһчи үмидимизи башгалары илә бөлүшмәк имканыны әлдән бурахмамышыг ки? Кимә исә Аллаһын вә’дләри үзәриндә дәриндән дүшүнмәјә көмәк етмишикми? Ҝәлин һәр ҝүн руһани мә’нада нә исә әлдә едәк ки, тәшбеһләрлә десәк, руһани мә’нада адымыза ачылан һесабымызда Аллаһы иззәтләндирән ишләрин мәбләғи артсын (Матта 6:20; 1 Петер 2:12; 3:15; Јагуб 3:13).
Анлајышынызы ајдын сахлајын
16. Аллаһа һәср едиләнләрә лајиг тәрздә јашамағымыза мане олмаг үчүн Шејтан нә едир?
16 Биз, мәсиһчиләрин ҝет-ҝедә даһа чох чәтинликләрлә гаршылашдығы бир вахтда јашајырыг. Шејтан вә онун хидмәтчиләри хејир вә шәр, паклыг вә мурдарлыг, әхлаг вә әхлагсызлыг арасындакы сәрһәдләри дағытмаг истәјирләр (Ромалылара 1:24—28; 16:17—19). Иблис елә етмишдир ки, биз мәсафәдән идарә етмә пултунун вә компүтер клавиатурасынын васитәсилә зеһнимизи вә үрәјимизи асанлыгла мурдарлаја биләрик. Руһани анлајышымыз ләкәләнә биләр, бунунла да Шејтанын һијләләрини ајырд етмәјә биләрик. Әҝәр руһани дәјәрләримиздән әл чәкириксә, Аллаһа һәср едиләнләрә лајиг тәрздә јашамаг сә’јимиз - “котан”дан јапышан әлимизин зәифләдији кими зәифләјә биләр (Лука 9:62; Филипилиләрә 4:8).
17. Павелин нәсиһәти Аллаһла мүнасибәтләримизи горумаға неҹә көмәк едир?
17 Буна ҝөрә дә, Павелин Салоникдәки мәсиһчиләрә үнванладығы мәктуб чох мүасирдир: “Аллаһын ирадәси будур ки, мүгәддәс оласыныз, ҹинси әхлагсызлыгдан имтина едәсиниз, һәр бириниз өз бәдәнинә гүдсијјәт вә һөрмәтлә һаким олсун. Аллаһы танымајан халглар кими шәһвәт еһтирасы илә һәрәкәт етмәмәлисиниз” (1 Салониклиләрә 4:3—5). Аллаһа һәср едиләнләрә е’тинасыз јанашан бә’зиләрини, әхлагсыз давранышларына ҝөрә мәсиһчи јығынҹағындан кәнар етмишләр. Онлар Аллаһла олан мүнасибәтләринин зәифләмәсинә јол вермишләр вә артыг Аллаһ онларын һәјатларында ваҹиб јер тутмурду. Павел исә деди: “Аллаһ бизи мурдарлыға дејил, мүгәддәслијә чағырмышдыр. Буна ҝөрә дә, бу чағырышы рәдд едән, инсаны дејил, сизә Өз Мүгәддәс Руһуну бәхш едән Аллаһы рәдд едир” (1 Салониклиләрә 4:7, 8).
Нәји етмәјә гәрарлысыныз?
18. Нәјә гәрарлы олмалыјыг?
18 Әҝәр Јегова Аллаһа һәср едилмәмизин бүтүн ваҹиблијини дәрк едириксә, о заман нәји етмәјә гәти гәрарлы олмалыјыг? Һәм давранышымызда, һәм дә хидмәтимиздә тәмиз виҹдан әлдә етмәјә гәрарлы олмалыјыг. Петер нәсиһәт верирди: “Виҹданынызы тәмиз тутун ки, Мәсиһә аид олараг сүрдүјүнүз мүсбәт һәјат тәрзини тәһгир едәнләр пислик едәнләрмишсиниз кими сизә атдыглары бөһтандан утансынлар” (1 Петер 3:16). Мәсиһчи давранышымыза ҝөрә изтираб чәкиб, тәһгир олуна биләрик, лакин ејни шејләр, иманына вә Аллаһа һәдсиз сәдагәтинә ҝөрә изтираблара вә тәһгирләрә таб ҝәтирән Мәсиһлә дә баш верирди. Петер дејир: “Беләликлә, Мәсиһ бизим үчүн ҹисмән әзаб чәкдијиндән, сиз дә ејни фикирлә силаһланын; чүнки ҹисмән әзаб чәкән, ҝүнаһкарлыгдан ваз кечмишдир” (1 Петер 4:1).
19. Өзүмүз һаггында нә ешитмәк истәјирик?
19 Бәли, Аллаһа һәср едиләнләрә лајиг тәрздә јашамаг үчүн гәти гәрарымыз бизи руһани, әхлаги вә физики ҹәһәтдән хәстә олан Шејтан дүнјасынын торларындан горујаҹагдыр. Лакин бундан әлавә, Аллаһын бизи бәјәндијинә әмин олаҹағыг, бу исә Шејтан вә онун хидмәтчиләринин тәклиф етдикләриндән гат-гат јахшыдыр. Ҝәлин, бизим һаггымызда, һәгигәти илк дәфә билән заман малик олдуғумуз мәһәббәти итирдијимизи сөјләмәләринә сәбәб вермәјәк. Гој бизим һаггымызда, биринҹи әсрин тиатир јығынҹағы һаггында дејилән сөзләри десинләр: “Сәнин әмәлләриндән, мәһәббәтиндән, хидмәтиндән, иманындан вә тәһәммүлүндән хәбәрдарам вә билирәм ки, сон ишләрин биринҹиләрдән чохдур” (Вәһј 2:4, 18, 19). Ҝәлин Аллаһа һәср едилмәмизлә әлагәдар “илыг” олмајаг. Әксинә, ҝәлин “руһән һәрарәтли” олаг вә сә’јимизи дә сона гәдәр горујуб сахлајаг - сон исә јахындыр! (Ромалылара 12:11; Вәһј 3:15, 16).
[Һашијәләр]
a “Ҝөзәтчи Гүлләси”нин 1987-ҹи ил, 15 сентјабр нөмрәсинә (рус.) 23-ҹү сәһифәјә бахын.
b Ернест Биворун һәјаты һаггында әтрафлы мә’луматы “Ҝөзәтчи Гүлләси”нин 1980-ҹи ил, 15 март нөмрәсиндә (инҝ.), 8—11-ҹи сәһифәләрдә охумаг олар.
c Ҝөзәтчи Гүлләси Ҹәмијјәти тәрәфиндән 1978-ҹи ил үчүн дәрҹ олунан, “Јегованын Шаһидләринин салнамәси”нә (инҝ.), 156—158, 201—218-ҹи сәһифәләрә бахын.
Сиз хатырлајырсынызмы?
• Аллаһа һәср едилмәк өзүнә нәји дахил едир?
• Аллаһын гәдим вә мүасир садиг хидмәтчиләриндән кимләр тәглид етмәмизә лајигдирләр?
• Аллаһа хидмәтимизә неҹә мүнасибәт бәсләмәлијик?
• Аллаһа садиг галмаг истәјириксә, нәјә гәти гәрарлы олмалыјыг?
[24-ҹү сәһифәдәки шәкил]
Гәддарҹасына давранышлара бахмајараг, Јеремја садиглијини горуду.
[25-ҹи сәһифәдәки шәкил]
Јүзләрлә ҝәнҹ Шаһидләр Испанија һәбсханаларында нөгсансызлыгларыны горујуб сахладылар.
[26-ҹы сәһифәдәки шәкилләр]
Ҝәлин һәр ҝүн руһани мә’нада нә исә әлдә едәк.
[27-ҹи сәһифәдәки шәкил]
Ернест Бивор өз ушагларына мәсиһчи сә’јинин нүмунәсини верди.