Һәср олунмамыза мүвафиг јашамаг
1 Бу јахынларда вә ја онилликләр габаг вәфтиз олунсаг да, һәјатымызда ваҹиб олан бу аддымы, јәгин ки, хатырлајырыг. Вәфтиз — сон дејил, Аллаһа әбәдијјәт боју давам едәҹәк сәдагәтли хидмәтин башланғыҹыдыр (1 Јәһ. 2:17). Һәср олунмамыза мүвафиг јашамаг нә демәкдир?
2 Мәсиһин нүмунәсини тәглид едирик. Иса вәфтиз олунан кими, “Аллаһын Падшаһлығынын мүждәсини диҝәр шәһәрләрә дә” тәблиғ едәрәк “өз хидмәтинә башлады” (Лука 3:23; 4:43, И–93). Јеһоваја һәср олунмамызы вәфтизлә символлашдырараг, биз дә хош хәбәрин тә’јин олунмуш тәблиғчиләри олуруг. Еһтимал ки, вахтымызын вә гүввәмизин чохуну тәләбатларымызы тә’мин етмәјә сәрф етсәк дә, әсас фәалијјәтимиз мәсиһчи хидмәтидир (Мат. 6:33). Вар-дөвләт јығмаг вә ад-сан газанмаг уғрунда чалышмаг әвәзинә, өзләрини Аллаһа һәср етмиш мәсиһчиләр, һәвари Павел кими, хидмәтләрини иззәтләндирирләр (Ром. 11:13). Сән мәсиһчи хидмәтини гијмәтләндирир вә ону иззәтләндирирсәнми?
3 Иса кими, биз дә ‘Иблисә гаршы дурмалыјыг’ (Јаг. 4:7). Иса вәфтиз олундугдан дәрһал сонра Иблис ону имтаһан етмәјә башлады. Иблис Јеһованын садиг хидмәтчиләрини өзүнүн һүҹум објектинә чевирәрәк, бу ҝүн дә белә давраныр (Лука 4:1-13). Шејтан дүнјасында јашадығымызы нәзәрә алараг, биз өзүнә һаким олмаг кејфијјәтини тәзаһүр етдирмәли, ағлымызы чиркләндирән вә ја үрәјимизи корлајан һәр бир шејдән гачынмалыјыг (Сүл. мәс. 4:23; Мат. 5:29, 30). Мүгәддәс Китаб хатырладыр ки, мәсиһчиләр “һәм Рәббин, һәм дә ҹинләрин сүфрәсинә ортаг ола” билмәзләр (1 Кор. 10:21). Бу исә о демәкдир ки, биз зәрәрли әјләнҹәләрдән, пис достлуглардан, һәмчинин Интернетдә мөвҹуд олан тәһлүкәләрдән горунмалыјыг. Бунлара дөнүкләрин тәгдим етдикләри материаллар да дахилдир. Шејтанын бу вә диҝәр тактикаларына гаршы сајыглыг ҝөстәрмәклә, һәср олунмамыза мүвафиг јашадығымызы ҝөстәририк.
4 Аллаһын тәгдим етдикләриндән истифадә едирик. Јеһова өз Кәламынын вә мәсиһчи јығынҹағынын васитәсилә, һәср олунмамыза мүвафиг јашамагда бизә көмәк едир. Гој Мүгәддәс Китабын охунмасы вә Јеһоваја етдијин дуалар бундан сонра да ҝүндәлик графикинин бир һиссәси олсун (Јешу 1:8; 1 Салон. 5:17). Јығынҹаг ҝөрүшләринә ҝетмәкдән ләззәт ал (Мәз. 122:1). Јеһовадан горхан вә Онун ҝөстәришләринә гулаг асан кәсләрлә үнсијјәтдә ол (Мәз. 119:63).
5 Јеһованын көмәји илә, һәср олунмамыза мүвафиг јашаја вә Она әбәдијјән севинҹлә хидмәт едә биләрик (Мәз. 22:26, 27; Филип. 4:13).