Охуҹуларын суаллары

Јеһоваја «руһән» ибадәт етмәк нә демәкдир?

Иса Мәсиһ Сухар шәһәринин јахынлығындакы Јагубун гујусундан су чәкмәјә ҝәлән самаријалы гадына тәблиғ едәркән деди: «Аллаһ руһдур вә Она ибадәт едәнләрин руһән вә һәгигәтән ибадәт етмәләри ҝәрәкдир» (Јәһ. 4:24). Аллаһа «һәгигәтән» ибадәт етмәк, онун Јеһова Аллаһын Өзү вә нијјәтләри һагда Мүгәддәс Китабда ачыгладығы билијә ујғун олмасы демәкдир. Һәмчинин бизи Аллаһа шөвглә, сәјлә хидмәт етмәјә мәһәббәт вә иман долу үрәјимиз тәшвиг етмәлидир (Тит. 2:14). Анҹаг бу ајәнин контексти ҝөстәрир ки, ‘Аллаһа руһән ибадәт етмәк’ Јеһоваја һансы әһвал-руһијјә илә ибадәт етмәјимиздән даһа бөјүк мәна дашыјыр.

Иса гујунун јанында гадын илә сөһбәт едәркән ибадәтдә сәјин ваҹиблији һагда данышмырды. Һәтта јалан ибадәт дә сәјлә вә сәдагәтлә иҹра олуна биләр. Атаја нә Самаријадакы дағда, нә дә Јерусәлимдәки мәбәддә, башга сөзлә, конкрет бир јердә ибадәт етмәк лазым олмадығыны дедикдән сонра Иса ҝөстәрди ки, инди Аллаһа Онун әсл шәхсијјәти һагда дәгиг билијә әсасланараг хидмәт етмәк ҝәрәкдир (Јәһ. 4:21). Иса деди: «Аллаһ руһдур» (Јәһ. 4:24). Һәгиги Аллаһ ҹисмани дејил, Ону ҝөрмәк вә Она тохунмаг гејри-мүмкүндүр. Аллаһа ибадәт һәр һансы бир мәбәд вә ја дағ илә бағлы дејил. Бу сәбәбдән Иса диггәти ибадәтин руһани тәрәфинә јөнәлтди.

Ибадәт Аллаһа мәгбул олсун дејә ону јалныз «һәгигәтән» дејил, һәмчинин мүгәддәс руһун, јәни Аллаһын ҝөзлә ҝөрүнмәјән фәал гүввәсинин бәләдчилији илә иҹра етмәк лазымдыр. Һәвари Павел јазмышды: «[Мүгәддәс] руһ һәр шеји, Аллаһын дәрин дүшүнҹәләрини белә арашдырыр». О әлавә етмишди: «Биз бу дүнјанын руһуну дејил, Аллаһдан ҝәлән Руһу гәбул етдик ки, Аллаһын бизә вердији әнамлары дәрк едә биләк» (1 Кор. 2:18-20). Аллаһа мәгбул тәрздә ибадәт етмәк үчүн Онун руһуна малик олмалы вә бу руһун бизә бәләдчилик етмәсинә јол вермәлијик. Бундан башга, Мүгәддәс Китабдакы мәсләһәтләри өјрәнәрәк вә тәтбиг едәрәк бизим руһумузун, јәни дүшүнҹә тәрзимизин даһа чох Аллаһын дүшүнҹә тәрзинә мүвафиг олмасы ваҹибдир.