Идеал рәһбәр неҹә олмалыдыр?

“ҺӘР бир евин бәннасы вардыр, һәр шејин бәннасы исә Аллаһдыр” (Ибраниләрә 3:4; Вәһј 4:11). Бизи һәгиги Аллаһ Јеһова јаратдығы үчүн, О, бизим “јарадылышымызы билир”, јә’ни имканларымызын мәһдудлуғундан вә тәләбатларымыздан хәбәрдардыр (Мәзмур 103:14). О, севән Аллаһ олдуғундан, бу тәләбатларымызы тә’мин етмәк истәјир (Мәзмур 145:16; 1 Јәһја 4:8). Јахшы рәһбәрләрә олан тәләбатымыз да истисна дејил.

Јеһова, Ишаја пејғәмбәрин васитәсилә бәјан етди: “Будур, мән ону шаһид олараг милләтләрә, рәис [“рәһбәр”, ЈД] вә әмир олараг милләтләрә вердим” (Ишаја 55:4). Буҝүнкү рәһбәрлик бөһранынын өһдәсиндән ҝәлмәк үчүн, Күлли-Ихтијар тәрәфиндән тә’јин едилән һәмин рәһбәрин ким олдуғуну мүәјјән етмәк вә онун рәһбәрлијинә риајәт етмәк лазымдыр. Бәс габагҹадан хәбәр верилән “рәһбәр вә әмир” кимдир? Онун рәһбәр олдуғуна даир һансы сүбутлар мөвҹуддур? О бизи һара ҝәтириб чыхараҹаг? Онун рәһбәрлијинин фајда ҝәтирмәси үчүн биз нә етмәлијик?

Вә’д едилән рәһбәр ҝәлир

Тәхминән 2 500 ил бундан әввәл Ҹәбрајыл мәләк Даниелә ҝөрүнүб деди: “Билиб анла ки, Јерусәлими әввәлки һалына гојмаг вә бина етмәк үчүн әмрин чыхмасындан мәсһ олунан һөкмдара [“Һөкмдар Мәсиһә”, ЈД] гәдәр једди һәфтә вә алтмыш ики һәфтә олаҹаг; јенә күчәләр вә хәндәкләр тикиләҹәк, бу да сыхынты вахтларында олаҹаг” (Даниел 9:25).

Ајдындыр ки, мәләк Даниелә Јеһова тәрәфиндән сечилән Рәһбәрин ҝәләҹәји дәгиг вахт һаггында мә’лумат вермишди. “Һөкмдар Мәсиһ”, јә’ни Рәһбәр б. е. ә. 455-ҹи илдә Јерусәлимин бәрпа олунмасы һаггында әмрин чыхмасындан 483 ил сонра - 69-ҹу һәфтәнин сонунда ҝәлмәли идиa (Неһемја 2:1-8). Бу дөврүн сонунда нә баш верди? Мүждәчи Лука јазыр: “Гејсәр Тибериусун һакимијјәтинин он бешинҹи илиндә, Понти Пилат Јәһудеја валиси, Һирод Галилеја тетрархы... олдуглары заман [б. е. 29-ҹу илиндә], сәһрада Зәкәријјәнин оғлу Јәһјаја Аллаһын кәламы ҝәлди. Вә о, Иордан әтрафындакы бүтүн өлкәни долашараг ҝүнаһларын бағышланмасы үчүн төвбә едиб вәфтиз олсунлар дејә инсанлары тәблиғ едирди”. О заман “халгын ҝөзү” Һөкмдар Мәсиһин, јә’ни Рәһбәрин јолунда иди (Лука 3:1-3, 15). Халг Јәһјанын јанына ҝәлсә дә, һаггында бәһс олунан Рәһбәр о дејилди.

Ерамызын 29-ҹу илиндә, тәхминән октјабр ајында Назаретли Иса Јәһјанын јанына вәфтиз олунмаға ҝәлир. Јәһја буна шаһидлик едир: “Руһун ҝөјдән ҝөјәрчин кими ендијини вә Онун үзәринә гондуғуну ҝөрдүм. Мән Ону танымаздым, амма су илә вәфтиз етмәк үчүн мәни Ҝөндәрән мәнә деди: “Кимин үзәринә Руһун ениб галдығыны ҝөрсән, Мүгәддәс Руһла вәфтиз едән Одур”. Мән дә ҝөрүб: “Аллаһын Оғлу Будур”,- дејә шәһадәт етдим” (Јәһја 1:32-34). Иса вәфтиз заманы мәсһ едилмиш Рәһбәр - Хиласкар, јә’ни Мәсиһ олду.

Бәли, пејғәмбәрликдә вә’д едилән “рәһбәр вә әмир” Иса Мәсиһ олду. Әҝәр онун кејфијјәтләринә нәзәр јетирсәк, бир рәһбәр кими онун мүасир идеал һөкмдар һаггында олан бүтүн тәсәввүрләрдән үстүн олдуғуну дәрһал ҝөрәҹәјик.

Мәсиһ - идеал Рәһбәрдир

Идеал рәһбәр давамчыларына ајдын ҝөстәришләр верир, чәтинликләрин өһдәсиндән ҝәлә билмәләри үчүн исә ҝүҹ вә гәтијјәтә малик олмаларына көмәк едир. “XXI әсрин рәһбәрләри: 100 ҝөркәмли рәһбәрлә диалог” адлы китабда дејилир: “Бу, XXI әсрин рәһбәрләринин мүвәффәгијјәтли фәалијјәти үчүн зәрури шәртдир” (“21st Century Leadership: Dialogues With 100 Top Leaders”). Инсанларын һәјатда гаршылашдыглары чәтинликләрин өһдәсиндән ҝәлмәләринә көмәк етмәк үчүн, Иса неҹә дә јахшы һазырланмышдыр! Ҝәлин, Онун мәшһур Дағүстү тәблиғинә нәзәр салаг. Маттанын Мүждәсинин 5-7-ҹи фәсилләриндә чохлу практики мәсләһәтләр тапмаг олар.

Мәсәлән, фикир ајрылығыны неҹә һәлл етмәјә даир Исанын мәсләһәтини нәзәрдән кечирәк. Иса өјрәдирди: “Беләликлә, әҝәр өз гурбаныны гурбанҝаһ гаршысына ҝәтирдијин заман орада јадына дүшсә ки, гардашынын сәнә гаршы бир шикајәти вар, гурбаныны орада гурбанҝаһын гаршысында гој, ҝет әввәлҹә гардашын илә барыш вә ондан сонра ҝәл, гурбаныны тәгдим ет” (Матта 5:23, 24). Башгалары илә сүлһ мүнасибәти јаратмагда тәшәббүс ҝөстәрмәк, һәтта дини вәзифәләри иҹра етмәкдән, мәсәлән, Мусанын ганунуна ҝөрә Јерусәлим мә’бәдиндә гурбанҝаһа тәгдимәләр ҝәтирмәкдән дә үстүндүр. Әкс тәгдирдә хидмәтимиз Аллаһа мәгбул олмајаҹаг. Исанын мәсләһәти јүз илләр әввәл олдуғу кими, бу ҝүн дә актуалдыр.

Иса, һәмчинин динләјиҹиләринә әхлагсызлығын тәләсинә дүшмәмәјә дә көмәк едирди. О, онлары тәшвиг едирди: “Гәдим заманларын адамларына: “Зина етмә”,- дејилдијини ешитмисиниз. Амма Мән сизә дејирәм: Бир гадына шәһвәтлә бахан һәр адам, артыг үрәјиндә онунла зина етмиш олур” (Матта 5:27, 28). Неҹә дә мүнасиб хәбәрдарлыгдыр! Нәјә ҝөрә зина һаггында фикирләри инкишаф етдирәрәк, она доғру апаран јола гәдәм гојасан? Исанын дедији кими, әхлагсызлыг вә зина үрәкдән башлајыр (Матта 15:18, 19). Үрәјимизи горумаг неҹә дә мүдрикликдир! (Сүлејманын мәсәлләри 4:23).

Дағүстү тәблиғдә дүшмәнләри севмәјин, сәхавәтли олмағын, мадди вә руһани шејләрә дүзҝүн јанашмағын зәрурилији барәдә, һәмчинин һәјатын диҝәр саһәләринә даир ҝөзәл мәсләһәтләр вар (Матта 5:43-47; 6:1-4, 19-21, 24-34). Иса динләјиҹиләринә дуа васитәсилә Аллаһдан көмәк ахтармағы да өјрәтди (Матта 6:9-13). “Һөкмдар Мәсиһ”, бүтүн бәшәријјәтин јашадығы чәтинликләрин өһдәсиндән ҝәлә билсинләр дејә, давамчыларыны мөһкәмләдир вә һазырлајыр.

Иса, Дағүстү тәблиғиндә динләјиҹиләринә алты дәфә “сиз ешитмисиниз ки... дејилмишди...” вә ја “јенә... дејилдијини ешитмисиниз” сөзләри илә мүраҹиәт едир вә сонра “Мән исә дејирәм...” сөзләрилә онлара нә исә бир јенилик чатдырыр (Матта 5:21, 22, 27, 28, 31-34, 38, 39, 43, 44). Бу ону ҝөстәрир ки, онун динләјиҹиләри фәрисејләрин шифаһи ән’әнәләринә мүвафиг давранмаға өјрәнмишдиләр. Лакин Иса онлара Мусанын ганунларынын һәгиги руһуну әкс етдирән башга бир јолу ҝөстәрди. Буна ҝөрә дә Иса давамчыларына һансы саһәләрдә дәјишилмәк лазым ҝәлдијини ҝөстәрирди, амма буну елә едирди ки, онлар буну асанлыгла гәбул едә билсинләр. Бәли, Иса инсанлары руһани вә әхлаги ҹәһәтдән көкүндән дәјишикликләр етмәјә тәшвиг едирди. Бу ҹүр баҹарыг, һәгиги рәһбәрин фәргләндириҹи әламәтидир.

Менеҹмент саһәси үзрә олан дәрсликдә гејд олунур ки, башгаларыны өзләриндә бу ҹүр дәјишикликләр етмәјә һәвәсләндирмәк чох чәтиндир. Орада дејилир: “Дәјишилмәјә тәшвиг едән [рәһбәрә] иҹтимаи хидмәт саһәсиндә чалышан ишчинин һәссаслығы, психологун узагҝөрәнлији, марафончунун мәтанәтлилији, булдогун дөзүмлүлүјү, заһидин өзүнә инамы вә мүгәддәсин сәбри тәләб олунур. Лакин бүтүн бу кејфијјәтләрин олмасы мүвәффәгијјәтә зәманәт вермир”.

“Рәһбәрлик. Сәҹијјәви ҹизҝиләр ваҹибдирми?” адлы мәгаләдә гејд едилир: “Рәһбәрләр өзләри, давамчылары үчүн ирәли сүрдүкләри тәләбләрә ујғун олараг һәрәкәт етмәлидирләр” (“Leadership: Do Traits Matter?”). Ахы јахшы рәһбәр өз тәблиғинә мүвафиг јашајыр. Иса Мәсиһ мәһз бу ҹүр јашајырды! О, тәвазөкарлыға өјрәтмәклә јанашы, һәвариләринин ајагларыны јумагла, өзү бу кејфијјәти тәзаһүр етдирди (Јәһја 13:5-15). Аллаһын Падшаһлығы һаггындакы хош хәбәри тәблиғ етмәјә јалныз шаҝирдләрини ҝөндәрмирди, өзү дә бүтүн гүввәсини бу ишә сәрф едирирди (Матта 4:18-25; Лука 8:1-3; 9:1-6; 10:1-24; Јәһја 10:40-42). Иса, һакимијјәтләрә итаәт етмәкдә дә нүмунә гојду. О өзү барәдә дејирди: “Оғул, Атанын етдијини ҝөрдүјү шејләрдән башга Өзүндән бир шеј едә билмәз” (Јәһја 5:19).

Јухарыда дејиләнләрдән ҝөрүндүјү кими, Исанын сөзләри вә әмәлләри ҝөстәрир ки, о, идеал Рәһбәрдир. Онун рәһбәрлији инсанларын јахшы рәһбәрә үмид етдикләриндән дә артыгдыр. Иса камилдир. Өлүб дирилдикдән сонра о, өлмәзлији алды (1 Петер 3:18; Вәһј 1:13-18). Һансы инсан рәһбәри онунла мүгајисә олуна биләр?

Биз нә етмәлијик?

Аллаһын Падшаһлығынын падшаһы кими, “Һөкмдар Мәсиһ”, јә’ни Рәһбәр итаәткар бәшәријјәтә хејир-дуалар јағдыраҹаг. Мүгәддәс Јазыларда вә’д едилир: “Сулар дәнизи неҹә долдурурса, дүнја да Рәбб билҝиси илә долу олаҹаг” (Ишаја 11:9). “Һәлимләр дүнјаны мирас алаҹаглар вә сүлһ боллуғунда ләззәт тапаҹаглар” (Мәзмур 37:11). “Һәр кәс өз асмасы алтында вә өз әнҹир ағаҹы алтында отураҹаг; вә онлары горхудан олмајаҹаг” (Мика 4:4). “Аллаһын Өзү онларла олаҹагдыр. Аллаһ онларын ҝөзләриндән бүтүн јашлары силәҹәкдир. Артыг өлүм мөвҹуд олмајаҹаг; артыг нә кәдәр, нә фәрјад, нә дә ағры олаҹагдыр, чүнки әввәлки шејләр кечиб ҝетди” (Вәһј 21:3, 4).

Дүнја бу ҝүн рәһбәрлик бөһраныны јашајыр. Лакин Иса Мәсиһ салеһ инсанлара, Јеһова Аллаһа бирликдә хидмәт едәҹәкләри вә камиллијә доғру ҝедәҹәкләри јени сүлһ дүнјасына апаран јолу ҝөстәрир. Һәгиги Аллаһ вә Онун тә’јин етдији Рәһбәр һаггында билик әлдә етмәк вә һәмин биликләрә әсасән давранмаг бизим үчүн неҹә дә ваҹибдир! (Јәһја 17:3).

Кимә исә бәсләдијимиз еһтирамы тәзаһүр етдирмәјин ән ҝөзәл үсулу, ону тәглид етмәкдир. Мәҝәр бәшәр тарихиндә ән бөјүк Рәһбәр олан Иса Мәсиһи тәглид етмәјимизә дәјмәзми? Буну неҹә едә биләрик? Онун рәһбәрлијинә риајәт етмәк һәјатымыза неҹә тә’сир ҝөстәрәҹәк? Бу вә диҝәр суаллар нөвбәти ики мәгаләдә мүзакирә олунаҹагдыр.

[Һашијә]

[4-ҹү сәһифәдәки шәкил]

Аллаһ тәрәфиндән сечилән Рәһбәрин ҝәләҹәјини, Даниел габагҹадан хәбәр вермишдир.

[7-ҹи сәһифәдәки шәкилләр]

Иса Мәсиһин тә’лимләри, инсанлары һәјатда гаршылашдыглары чәтинликләрин өһдәсиндән ҝәлмәјә һазырлајырды.

[7-ҹи сәһифәдәки шәкил]

Иса Мәсиһ итаәткар бәшәријјәти јени сүлһ дүнјасына ҝәтириб чыхараҹаг.