Аллаһын ганунлары бизә фајда ҝәтирир

“Шәриәтини нә гәдәр севирәм!” (МӘЗМУР 119:97).

1. Үмумијјәтлә инсанлар Аллаһын ганунларына табе олмаға неҹә јанашырлар?

АЛЛАҺЫН ганунларына табе олмаг бу ҝүн дәбдә дејил. Чохлары елә һесаб едирләр ки, ҝөзә ҝөрүнмәз али һакимијјәтә табе олмаг мә’насыздыр. Биз, дүзҝүнлүклә әјрилик арасында ајдын сәрһәд олмајан, әхлагын нисбилик вә гејри-мүәјјәнлик дөврүндә јашајырыг (Сүлејманын мәсәлләри 17:15; Ишаја 5:20). Бу јахынларда апарылан сорғу, динин бөјүк рол ојнамадығы бир чох өлкәләрдә јајылмыш нөгтеји-нәзәри әкс етдирәрәк ҝөстәрди ки, “америкалыларын әксәријјәти нәјин јахшы, дүзҝүн вә ваҹиб олдуғуну өзләри гәрара алмаг истәјирләр”. Онлар “тәләбкар Аллаһын, ҹидди гајда-ганунларын, мөһкәм әхлаги вә ја һәр һансы башга е’тигадлара малик олан ҹидди рәисләрин әлејһинәдирләр”. Бир сосиолог гејд етмишдир ки, бу ҝүн “инсанлар нәјин доғру вә исмәтли олдуғуну өзләри мүәјјән етмәлидирләр”. О, һәмчинин әлавә етмишдир: “Һәр бир али һакимијјәт өз ганунларыны инсанларын реал тәләбатларына ујғунлашдырмалыдыр”.

2. Мүгәддәс Китабда ганун һаггындакы илк хатырлатма Аллаһын хејир-дуасы вә лүтфү илә неҹә бағлыдыр?

² Јеһованын ганунларынын дәјәрли олдуғуна чох инсанларын шүбһә етдикләри үчүн биз, Аллаһын нормаларынын фајдалы олдуғуна гаршы әминлијимизи мөһкәмләтмәлијик. Мүгәддәс Китабда ганун һаггында илк хатырлатмаја нәзәр салмаға дәјәр. Јарадылыш 26:5 (МКШ) ајәсиндә Аллаһын сөзләрини охујуруг: “Ибраһим... Мәним һөкмүмә, әмрләримә, гајдаларыма вә ганунларыма әмәл етди”. Јеһова бу сөзләри, Ибраһимин нәслинә тәфсилаты илә ганунлар күллијјаты вермәздән бир әср әввәл демишдир. Аллаһ Ибраһими итаәткарлығына, о ҹүмләдән Онун ганунларына табе олдуғуна ҝөрә неҹә мүкафатландырды? Јеһова Аллаһ она вә’д етди: “Дүнјанын бүтүн милләтләри сәнин нәслинин васитәсилә хејир-дуа алаҹаглар” (Јарадылыш 22:18, МКШ). Беләликлә, Аллаһын хејир-дуасына вә лүтфүнә малик олмаг үчүн, Онун ганунларына табе олмаг ҝәрәкдир.

3. а) Мәзмурчу Јеһованын ганунларына гаршы һансы һисси ифадә етди? б) Һансы суаллар диггәтә лајигдир?

³ Мәзмурчулардан бири — ола билсин ки, тахтын вариси вә Јәһуданын ҝәләҹәк падшаһы — ганунла һеч бир әлагәси олмајан һисси ифадә етди. О, Аллаһа мүраҹиәтиндә уҹадан деди: “Шәриәтини нә гәдәр севирәм!” (Мәзмур 119:97). Мәзмурчуну һәрәкәтә ҝәтирән јалныз емосијалар дејил, Аллаһын ганунларында ифадә олунан ирадәсинә гаршы онун мәһәббәти иди. Аллаһын камил Оғлу Иса Мәсиһ дә бу ҹүр һиссләри кечирирди. Онун һаггында пејғәмбәрҹәсинә дејилмишдир: “Сәнин ирадәни јеринә јетирмәкдән зөвг алырам, еј Аллаһым; вә шәриәтин үрәјимин ичиндәдир” (Мәзмур 40:8; Ибраниләрә 10:9). Бәс бизим һаггымызда нә демәк олар? Аллаһын ирадәсини јеринә јетирмәкдән мәмнунлуг дујуругму? Јеһованын ганунларынын әлверишли вә фајдалы олдуғуна әминикми? Аллаһын ганунларына табе олмаг хидмәтимиздә, ҝүндәлик һәјатымызда, гәрар гәбул етдикдә вә башгалары илә мүнасибәтләримиздә һансы јери тутур? Аллаһын ганунларыны севмәк үчүн, ганунлары тә’сис етмәјә вә онларын һәјата кечирилмәсинә нәзарәт етмәјә Аллаһын нә үчүн һаггы олдуғуну анламаг јахшы оларды.

Јеһова — Али Ганунвериҹидир

4. Јеһова нәјә ҝөрә һаглы олараг Каинатын Али Ганунвериҹисидир?

⁴ Јарадан олдуғу үчүн, Јеһова һаглы олараг Каинатын Али Ганунвериҹисидир (Вәһј 4:11). Ишаја пејғәмбәр јазмышдыр: “Ганунумузу гојан Рәбдир” (Ишаја 33:22). Аллаһ, ҹанлы вә ҹансыз тәбиәти идарә едән физики ганунлар тә’сис едиб (Ејуб 38:4-38; 39:1-12; Мәзмур 104:5-19). Инсан Јеһованын јаратдығы мәхлуг олдуғуна ҝөрә, Онун физики ганунларындан асылыдыр. Инсанлар ирадә азадлығына вә шүура малик олсалар да, јалныз Аллаһын әхлаг вә руһани ганунларына табе олдуглары заман хошбәхтлик әлдә едирләр (Ромалылара 12:1; 1 Коринфлиләрә 2:14-16).

5. Галатијалылара 6:7 ајәсиндәки принсип Аллаһын ганунлары илә бағлы һәгигәти неҹә доғрулдур?

⁵ Билдијимиз кими, Јеһованын физики ганунлары дәјишмәздир (Јеремја 33:20, 21). Әҝәр инсан бу ганунлара, мәсәлән, ҹазибә гүввәси ганунуна зидд ҝедирсә, онун һәрәкәтләри һөкмән пис нәтиҹәләнәҹәк. Аллаһын әхлаг нормалары да дәјишмәздир, онлары позуб ҹәзасыз галмаг вә ја нәзәрә алмамаг олмаз. Әхлаг нормаларынын позулмасы дәрһал аҹы нәтиҹәләрә ҝәтириб чыхармаса да, тәбиәтин ганунлары кими, онлар да ејни гүввәјә маликдир. “Аллаһа истеһза едилмәз. Чүнки инсан нәји әкәрсә, ону да бичәҹәкдир” (Галатијалылара 6:7; 1 Тимотејә 5:24).

Јеһованын ганунларынын һәртәрәфли олмасы

6. Аллаһын ганунлары нә дәрәҹәдә һәртәрәфлидир?

⁶ Мусаја верилән ганун Аллаһын ганунунун ҝөркәмли изһары иди (Ромалылара 7:12). Вахтилә Јеһова һәмин гануну “Мәсиһин Гануну” илә әвәз етдиa (Галатијалылара 6:2; 1 Коринфлиләрә 9:21). Биз мәсиһчиләр “камил гануна, азадлыг ганунуна” малик олараг, Аллаһын вердији ҝөстәришләрин јалныз дини еһкам вә мәрасимләрдән ибарәт олмадығыны ҝөрүрүк. Онун нормалары һәјатын бүтүн саһәләрини, о ҹүмләдән аилә һәјатыны, ишҝүзар мәсәләләри, әкс ҹинслә рәфтар етмәји, һәмиманлыларла мүнасибәти вә һәгиги ибадәтдә иштиракы әһатә едир (Јагуб 1:25, 27).

7. Аллаһын ваҹиб олан ганунларыны нүмунә ҝәтирин.

⁷ Мәсәлән, Мүгәддәс Китабда дејилир: “Нә әхлагсызлар, нә бүтпәрәстләр, нә зинакарлар, нә кишибазлар, нә ушагбазлар, нә оғрулар, нә тамаһкарлар, нә сәрхошлар, нә аҹыдилләр, нә дә гәсбкарлар Аллаһын Падшаһлығыны мирас алмајаҹаглар” (1 Коринфлиләрә 6:9, 10, И-93). Ҝөрдүјүмүз кими, зина вә әхлагсызлыг садәҹә “мәһәббәт маҹәрасы” дејил. Һомосексуализми исә, “гејри-ән’әнәви һәјат тәрзи” адландырмаг олмаз. Бүтүн бунлар Јеһованын ганунларыны позур. Ганунун позулмасына оғурлуг, јалан вә бөһтан да дахилдир (Мәзмур 101:5; Колослулара 3:9; 1 Петер 4:15). Јагуб ловғалығы мүһакимә едирди, Павел исә бошбоғазлыг вә кобуд зарафатдан гачынмағы төвсијә едирди (Ефеслиләрә 5:4; Јагуб 4:16). Мәсиһчиләр үчүн бүтүн бу давраныш нормалары Аллаһын камил ганунларынын бир һиссәсидир (Мәзмур 19:7).

8. а) Јеһованын гануну неҹәдир? б) “Ганун” кими тәрҹүмә едилән јәһуди сөзүнүн әсас мә’насы нәдир?

⁸ Јеһованын Кәламында јазылан бу кими әсас гајдалар шәһадәт едир ки, Онун ганунлары нәјә исә јол верән вә ја гадаға гојан садәҹә гуру ганунлар күллијјаты дејил. Аллаһын ганунларына риајәт етмәк таразлы вә сәмәрәли һәјат сүрмәјә көмәк едир вә һәр саһәдә фајда ҝәтирир. Аллаһын ганунлары инкишаф етдирән, әхлаги вә ибрәтвериҹидир (Мәзмур 119:72). Мәзмурчунун истифадә етдији “ганун” сөзү, тора јәһуди сөзүнүн тәрҹүмәсидир. Мүгәддәс Китаб үзрә бир алим јазмышдыр: “Бу сөз, истигамәт вермәк, апармаг, нишана алмаг, ҝүлләләмәк мә’насыны верән фе’лдән әмәлә ҝәлир. Онун... мә’насы — давраныш нормасыдыр”. Мәзмурчу гануну Аллаһдан ҝәлән бәхшиш кими гәбул едирди. Мәҝәр гануну биз дә бу ҹүр гијмәтләндириб, һәјатымызы формалашдырмасына јол вермәли дејиликми?

9, 10. а) Биз, нә үчүн е’тибарлы рәһбәрлијә еһтијаҹ дујуруг? б) Јалныз һансы һалда хошбәхт вә мүвәффәгијјәтли һәјат сүрә биләрик?

⁹ Бүтүн хилгәт е’тибарлы рәһбәрлијә еһтијаҹ дујур. Инсанларла мүгајисәдә јүксәк мөвгејә малик олмаларына бахмајараг, Иса вә мәләкләр дә истисна дејилләр (Мәзмур 8:5; Јәһја 5:30; 6:38; Ибраниләрә 2:7; Вәһј 22:8, 9). Әҝәр бу камил мәхлуглара Аллаһын рәһбәрлији фајда ҝәтирирсә, онда гејри-камил инсанлар һаггында нә демәк олар?! Бәшәр тарихи вә шәхси тәҹрүбәмиз бизи бир даһа әмин едир ки, Јеремја пејғәмбәрин сөзләри һәгигәтдир: “Ја Рәбб, билирәм ки, инсанын јолу өз әлиндә дејилдир; аддымларыны доғрултмаг јеријән инсанын әлиндә дејилдир” (Јеремја 10:23).

¹⁰ Әҝәр хошбәхт вә мүвәффәгијјәтли һәјат јашамаг истәјириксә, рәһбәрлик үчүн Аллаһа мүраҹиәт етмәлијик. Сүлејман падшаһ, Аллаһын рәһбәрлијиндән асылы олмадан шәхси нормалар әсасында јашамағын тәһлүкәли олдуғуну дәрк едирди. О јазырды: “Јол вар ки, адамын өнүндә доғру ҝөрүнүр; фәгәт онун сону өлүм јолларыдыр” (Сүлејманын мәсәлләри 14:12).

Јеһованын ганунларыны гијмәтләндирмәјимизин сәбәбләри

11. Биз, Аллаһын ганунларыны анламаг истәјини нә үчүн инкишаф етдирмәлијик?

¹¹ Јеһованын ганунларыны анламаг үчүн, мәзмурчунун малик олдуғу истәји өзүмүздә инкишаф етдирмәк јахшы оларды. О јазырды: “Ҝөзләрими ач да шәриәтиндән валеһедиҹи шејләр ҝөрүм” (Мәзмур 119:18). Аллаһы вә Онун јолларыны нә гәдәр јахшы танысаг, Ишајанын сөзләринин доғру олдуғуна әминлијимиз бир о гәдәр дә артаҹаг: “Фајдалы оланы сәнә өјрәдән, јеријәҹәјин јолда сәни ҝүдән, Аллаһын Рәбб мәнәм. Каш ки, әмрләрими јахшы динләјәјдин!” (Ишаја 48:17, 18). Јеһова чох истәјир ки, халгы Онун ганунларына диггәт јетириб, хошбәхт вә фираван јашасын. Ҝәлин, Аллаһын ганунларыны нәјә ҝөрә гијмәтләндирмәли олдуғумузун әсас сәбәбләрини нәзәрдән кечирәк.

12. Бизи јахшы танымасынын сајәсиндә Јеһова нәјә ҝөрә ән јахшы Ганунвериҹидир?

¹² Аллаһын ганунлары бизи ән јахшы таныјан Шәхс тәрәфиндән верилиб. Јеһова Јараданымыз олдуғу үчүн, Онун инсанлары јахшы таныдығыны дүшүнмәк мәнтигә ујғундур (Мәзмур 139:1, 2; Һәвариләрин ишләри 17:24-28). Јахын достларымыз, гоһумларымыз вә һәтта валидејнләримиз белә, бизи Јеһова гәдәр јахшы таныја билмәзләр. Мараглыдыр ки, Аллаһ бизи, һәтта өзүмүздән дә јахшы таныјыр! Јараданымыз бизим руһани, емосионал, әгли вә физики тәләбатларымызы һамыдан јахшы билир. Онун бизә гаршы мүнасибәти шәһадәт едир ки, О, бизим гурулушумузу, истәјимизи вә нәјә сә’ј ҝөстәрдијимизи дәгиглији илә билир. Јеһова имканларымызын мәһдудијјәтини анламагла бәрабәр, јахшылыг етмәјә габил олдуғумузу да билир. Мәзмурчу охујурду: “Јарадылышымызы билир; хатырлајыр ки, биз торпағыг” (Мәзмур 103:14). Беләликлә, Јеһованын гануну әсасында јашамаға вә Онун рәһбәрлијинә көнүллү сурәтдә табе олмаға ҹан атараг, руһани тәһлүкәсизлији дуја биләрик (Сүлејманын мәсәлләри 3:19-26).

13. Нә үчүн әмин ола биләрик ки, Јеһова бизим фираванлығымызын гејдинә галыр?

¹³ Аллаһын ганунлары бизи севән Шәхс тәрәфиндән верилиб. Бизим әбәди рифаһымыз Јеһованы чох нараһат едир. Она баһа баша ҝәлсә дә, мәҝәр О өз Оғлуну “бир чохлары үчүн... фидијә олараг” гурбан вермәдими? (Матта 20:28). Мәҝәр Јеһова ҝүҹүмүздән артыг имтаһан олунмајаҹағымыза даир сөз вермәдими? (1 Коринфлиләрә 10:13). Мүгәддәс Китаб Онун гајғымыза галдығына бизи әмин етмирми? (1 Петер 5:7). Јеһованын бизә нә гәдәр фајдалы ҝөстәришләр вердијини ҝөрәрәк, бизи һәддиндән артыг чох севдијини анлајырыг. О, бизә нәјин хошбәхтлик, нәјин исә фәлакәт ҝәтирәҹәјини билир. Гејри-камил олмағымыза вә сәһвләрә јол вермәјимизә бахмајараг, бир шејә әмин ола биләрик: әҝәр салеһлијә ҹан атырыгса, Јеһова бизә өз мәһәббәтини тәзаһүр етдирәҹәк, бу исә бизә һәјат вә хејир-дуалар ҝәтирәҹәкдир (Һезекиел 33:11).

14. Аллаһын ганунлары илә инсан нөгтеји-нәзәрләри арасындакы әһәмијјәтли фәрг нәдәдир?

¹⁴ Аллаһын гануну е’тибарлы вә дәјишмәздир. Јашадығымыз нараһат зәманәдә, әзәлдән әбәдијјәтә гәдәр гаја олан Јеһова Аллаһымыз вар (Мәзмур 90:2). Јеһова өзү һаггында демишдир: “Мән, Рәбб, мән дәјишмәрәм” (Малаки 3:6). Аллаһын Мүгәддәс Китабда гәләмә алынмыш нормалары тамамилә дәјишмәздир, ејни шеји, даима дәјишән инсан нормалары һаггында демәк олмаз (Јагуб 1:17). Мисал үчүн, узун илләр әрзиндә психологлар, ушаглары һеч нәдә мәһдудлашдырмадан тәрбијә етмәјә тәшвиг етмишләр, инди исә һәмин мүтәхәссисләрдән бә’зиләри өз нөгтеји-нәзәрләрини дәјишиб, вердикләри мәсләһәтләрдә јанылдыгларыны е’тираф едирләр. Бу мәсәләјә тохунан дүнјәви нормалар вә гајдалар чох тез-тез дәјишдирилир. Лакин Јеһованын Кәламы дәјишмәздир. Јүзилликләр боју Мүгәддәс Китаб ушағы мәһәббәтлә тәрбијә етмәјин јолуну ҝөстәрмишдир. Һәвари Павел јазырды: “Еј аталар, сиз дә ушагларынызы гәзәбләндирмәјин, анҹаг онлары Рәббин тәрбијә вә нәсиһәти илә бөјүдүн” (Ефеслиләрә 6:4). Јеһованын нормаларына е’тибар едә билдијимизи билмәк неҹә дә тәсәлливериҹидир; ахы онлар дәјишмәздир!

Аллаһын ганунларына табе олмаг хејир-дуалар ҝәтирир

15, 16. а) Јеһованын нормаларыны тәтбиг едәриксә, һәјатымыз неҹә олаҹаг? б) Аллаһын ганунлары никаһ үчүн нәјә ҝөрә јахшы рәһбәрликдир?

¹⁵ Аллаһ Ишаја пејғәмбәрин васитәсилә деди: “Ағзымдан чыхан сөзүм дә... ҝөндәрдијим иши баҹараҹаг” (Ишаја 55:11). Әҝәр вар гүввәмизлә Аллаһын Кәламындакы нормалара мүвафиг јашамаға ҹан атсаг, биз дә ишләримиздә наилијјәтләр газанаҹаг вә хошбәхтлијә наил олаҹағыг.

¹⁶ Никаһда хошбәхт олмаг үчүн Аллаһын ганунларынын бизә јахшы рәһбәрлик олдуғуна диггәт јетирин. Павел јазырды: “Гој һәр кәс никаһа һөрмәт етсин вә кәбин јатағы ләкәсиз олсун; чүнки Аллаһ, әхлагсызлары вә зинакарлары мәһкум едәҹәкдир” (Ибраниләрә 13:4). Әр вә арвад бир-бирләрини севмәли вә һөрмәт етмәлидирләр: “Гој һәр кәс өз арвадыны өзү кими севсин, арвад исә әринә еһтирам етсин” (Ефеслиләрә 5:33). Аиләјә, 1 Коринфлиләрә 13:4-8 ајәләриндә тәсвир олунан мәһәббәт лазымдыр: “Мәһәббәт сәбирли, хејирхаһдыр. Мәһәббәт пахыллыг етмәз. Мәһәббәт ловғаланмаз, гүррәләнмәз, кобуд давранмаз, өз мәнфәәтини ахтармаз, һирсләнмәз, она едилән писликләрин һесабыны тутмаз, һагсызлыға севинмәз, һәгигәтә исә шадланар; һәр шејә гатлашар, һәр шејә инанар, һәр шејә үмид бәсләјәр, һәр шејә таб ҝәтирәр. Мәһәббәт әсла түкәнмәз”. Бу ҹүр мәһәббәтлә фәргләнән никаһ мүвәффәгијјәтли олаҹаг.

17. Спиртли ичкиләрдән истифадәјә даир Јеһованын ганунларына риајәт етмәк нә үчүн фајдалыдыр?

¹⁷ Јеһованын нормаларына риајәт етмәјин фајдалы олдуғуну ҝөстәрән диҝәр сәбәб, Онун сәрхошлуғу мүһакимә етмәсидир. Онун “шәраб дүшкүнү” оланлардан да хошу ҝәлмир (1 Тимотејә 3:3, 8; Ромалылара 13:13). Аллаһын бу саһәјә аид нормаларыны инкар едәнләрин әксәријјәти, спиртли ичкиләрдән суи-истифадә етмәк нәтиҹәсиндә јаранан вә ја шиддәтләнән хәстәликләрдән әзаб чәкирләр. Мүгәддәс Китабын тәмкинли олмаға даир мәсләһәтинә әһәмијјәт вермәјәрәк, бә’зиләриндә “истираһәт” мәгсәдилә ички ичмәк адәтә чеврилиб. Спиртли ичкиләрдән суи-истифадә аҹынаҹаглы нәтиҹәләрә, о ҹүмләдән һөрмәтин итирилмәсинә, аиләдә ҝәрҝин вәзијјәтин јаранмасына вә ја никаһын позулмасына, касыбчылыға вә иш јеринин итирилмәсинә ҝәтириб чыхарыр (Сүлејманын мәсәлләри 23:19-21, 29-35). Мәҝәр ајдын дејилми ки, Јеһованын спиртли ичкиләрдән истифадә етмәјә даир нормалары бизи мүдафиә едир?

18. Аллаһын нормалары малијјә мәсәләләриндә фајдалыдырмы? Изаһ един.

¹⁸ Аллаһын нормалары малијјә мәсәләләриндә дә фајдалыдыр. Мүгәддәс Китаб мәсиһчиләри дүзҝүн вә чалышган олмаға тәшвиг едир (Лука 16:10; Ефеслиләрә 4:28; Колослулара 3:23). Бу мәсләһәти тәтбиг етмәк сајәсиндә бир чох мәсиһчиләр иш јерләриндә ирәлиләјишләр етмиш вә ја башгаларыны ишдән азад едән заман, онлары сахламышлар. Мүгәддәс Китаба зидд олан, мәсәлән, гумар ојунлары, сигарет чәкмәк вә наркотик маддәләрдән истифадә етмәк кими мејл вә вәрдишләрдән гачынмагла да малијјә вәзијјәтини јахшылашдырмаг олар. Јәгин ки, сиз, Аллаһын нормаларынын малијјә саһәсиндә фајдалы олдуғуна даир башга нүмунәләр дә билирсиниз.

19, 20. Аллаһын нормаларыны өјрәнмәк вә онлара риајәт етмәк нәјә ҝөрә мүдрик давранышдыр?

¹⁹ Гејри-камил инсанлар Аллаһын ганун вә нормаларындан асанлыгла кәнара чыха биләрләр. Гәдим исраиллиләри хатырлајын. Сина дағынын јанында оларкән, Аллаһ онлара деди: “Әҝәр ҝерчәкдән сөзүмү динләјәҹәк вә әһдими тутаҹагсынызса, мәнә бүтүн халглардан хүсуси халг олаҹагсыныз”. Онлар ҹаваб вердиләр: “Рәббин бүтүн сөјләдикләрини јеринә јетирәҹәјик”. Лакин онларын сөзләри илә әмәлләри неҹә дә фәргләнирди! (Чыхыш 19:5, 8; Мәзмур 106:12-43). Ҝәлин онлар кими давранмајаг. Ҝәлин, Аллаһын нормаларыны гәбул етмәклә бәрабәр, һәмчинин һәјатымызда да тәтбиг едәк.

²⁰ Јеһованын рәһбәрлик үчүн вердији мүгајисәолунмаз ганунлара риајәт етмәк мүдрик давранышдыр вә бу, бизә хошбәхтлик ҝәтирир (Мәзмур 19:7-11). Бу саһәдә мүвәффәгијјәтли олмаг үчүн, Аллаһын принсипләрини анламалы вә гијмәтләндирмәлијик. Бу һагда нөвбәти мәгаләдә сөһбәт ачылаҹаг.

[Һашијә]

Хатырлајырсынызмы?

• Аллаһын ганунларынын бизә фајда ҝәтирдијинә нә үчүн әмин ола биләрик?

• Јеһованын ганунларыны гијмәтләндирмәк үчүн һансы сәбәбләримиз вар?

• Аллаһын ганунлары һансы саһәләрдә фајдалыдыр?

[7-ҹи сәһифәдәки шәкил]

Јеһованын ганунларына итаәт етдији үчүн, Ибраһимә бол-бол хејир-дуалар верилди.

[9-ҹу сәһифәдәки шәкилләр]

Һәјатын чохсајлы гајғылары бир чохларыны Аллаһын ганунларындан јајындырыр.

[11-ҹи сәһифәдәки шәкил]

Гаја үзәриндә тикилмиш мајак кими, Аллаһын ганунлары е’тибарлы вә дәјишмәздир.