Шәхси өјрәнмә јахшы мүәллимләр олмағымыза көмәк едир
“Бу ишләрә фикир вер [“бу шејләрин үзәриндә дәриндән дүшүн”, ЈД] вә онларла мәшғул ол ки, сәнин тәрәггин һамыја ашкар олсун. Өзүнә вә вердијин тә’лимата диггәт јетир” (1 ТИМОТЕЈӘ 4:15, 16).
1. Вахт вә шәхси өјрәнмә һаггында нә демәк олар?
МҮГӘДДӘС КЫТАБЫН Ваиз 3:1 ајәсиндә дејилир: “Һәр шејин...вахты вар”. Сөзсүз ки, бу шәхси өјрәнмәјә дә аиддир. Чохларына әлверишсиз вахтда вә ја јердә руһани шејләр үзәриндә дүшүнмәк чәтиндир. Мәсәлән, ағыр иш ҝүнүндән вә тутумлу шам јемәјиндән сонра, һәлә үстәлик севдијин јумшаг креслода телевизор гаршысында отурсајдын, шәхси өјрәнмә илә мәшғул олмаг истәјәрдәнми? Чәтин. Бәс онда нә етмәк олар? Ајдындыр ки, шәхси өјрәнмәмиз даһа сәмәрәли олсун дејә, диггәтимизи аз јајындыраҹаг мүнасиб јер вә вахт сечмәк лазымдыр.
2. Шәхси өјрәнмә үчүн адәтән ән мүнасиб вахт һансыдыр?
2 Чохлары өјрәнмә илә сәһәр тездән, тәмиз башла мәшғул олмағы үстүн тутурлар. Башгалары буна наһар заманы бир аз вахт ајырырлар. Нөвбәти нүмунәләрдә, бә’зиләринин ваҹиб руһани ишләрә һансы вахты ајырдыгларына диггәт јетирәк. Гәдим Исраилин падшаһы Давуд јазмышды: “Сәһәр инајәтини мәнә ешитдир; чүнки мән сәнә ҝүвәнирәм; ҝедәҹәјим јолу мәнә билдир; чүнки ҹанымы сәнә јүксәлдирәм” (Мәзмур 143:8). Ишаја пејғәмбәр дә бу ҹүр әһвал-руһијјә тәзаһүр етдирирди: “Јорғун адама сөзлә дәстәк ола билим дејә, Рәбб Јеһова мәнә шаҝирдләрин дилини верди; һәр сабаһ ојандырыр, шаҝирдләр кими ешитсин дејә гулағымы ојандырыр”. Бунун мәғзи ондадыр ки, ҝүнүн һансы саатында олурса-олсун, өјрәнәркән вә Јеһова илә үнсијјәтдә оларкән зеһнимиз ајдын олмалыдыр (Ишаја 50:4, 5; Мәзмур 5:3; 88:13).
3. Сәмәрәли өјрәнмә үчүн неҹә шәраит јахшыдыр?
3 Бундан башга, өјрәнмәнин сәмәрәли олмасы үчүн, евдә раһат креслода, јахуд јумшаг диванда әјләшмәјә дәјмәз. Бу, диггәти топламаға мане олур. Өјрәндијимиз заман бејнимиз ишләмәлидир, чох раһат јердә отурмаг исә бунун әксинә ола биләр. Һәмчинин, өјрәнмә вә дәриндән дүшүнмәк үчүн, нисбәтән сакит вә диггәти јајындыраҹаг шејләрдән узаг бир јер мүнасибдир. Радио, телевизор вә ушагларын олдуғу шәраитдә өјрәнмә илә мәшғул олмаға чалышмаг јахшы нәтиҹәләр вермәјәҹәкдир. Иса дәриндән дүшүнмәк истәјәндә, ону һеч кимин нараһат етмәјәҹәји јерә чәкилирди. О, һәмчинин дуа үчүн тәнһа јер сечмәјин јахшы олдуғуну дејирди (Матта 6:6; 14:13; Марк 6:30-32).
Суаллара ҹаваб вермәјә көмәк едән шәхси өјрәнмә
4, 5. “Аллаһ биздән нә тәләб едир?” брошүрасы һансы саһәләрдә фајдалыдыр?
4 Шәхси өјрәнмә, хүсусилә дә сәмими гәлбли инсанын суалларына ҹаваб тапмаг мәгсәди илә, һансыса бир мөвзуну даһа дәриндән өјрәнмәк үчүн, мүхтәлиф вәсаитләрдән истифадә едәркән бөјүк мәмнунлуг ҝәтирир (1 Тимотејә 1:4; 2 Тимотејә 2:23). Әввәлҹә, марагланан инсанларын чоху, һазырда 261 дилдә чыхан “Аллаһ биздән нә тәләб едир?”a брошүрасыны өјрәнирләр. Бу брошүра тамамилә Мүгәддәс Китаба әсасланыр вә садә дилдә јазылмышдыр, лакин орадакы мә’лумат конкретлији илә сечилир. О, охуҹулара, һәгиги ибадәтлә бағлы Аллаһын тәләбләринин нәдән ибарәт олдуғуну тез анламагда көмәк едир. Лакин онун һәҹми һәр бир мөвзуну ҝениш әһатә етмәјә јол вермир. Әҝәр өјрәнән адам бу вә ја диҝәр мөвзуја даир дәрин суаллар верирсә, онун бу суалларына ҹаваб верәҹәк Мүгәддәс Китаба әсасланан мә’луматлары неҹә тапмаг олар?
5 Кимин доғма дилиндә компакт-диск үзәриндә јазылмыш “Ҝөзәтчи Гүлләсинин китабханасы” варса, компүтерин көмәји илә мә’лумат топламаг үчүн ҝениш имканы вар. Бәс әҝәр бу кими имканлар јохдурса, неҹә? Ҝәлин, өз анлајышымызы неҹә ҝенишләндирә биләҹәјимизи вә марагланан инсанларын суалларына, хүсусән дә Аллаһын вә Исанын әслиндә ким олдуғуну сорушдугда неҹә әтрафлы ҹаваб верә биләҹәјимизи ҝөрмәк үчүн “Аллаһ биздән нә тәләб едир?” брошүрасындан ики мөвзуну нәзәрдән кечирәк (Чыхыш 5:2; Лука 9:18-20; 1 Петер 3:15).
Аллаһ кимдир?
6, 7. а) Аллаһла бағлы һансы суал јараныр? б) Бир кешиш өз мә’рузәсиндә һансы ҹидди нөгсана јол вермишди?
6 “Аллаһ тәләб едир” брошүранын 2-ҹи дәрси чох ваҹиб олан “Аллаһ кимдир?” суалына ҹаваб верир. Бу мүһүм суаллардан биридир, чүнки инсан Аллаһы танымырса вә ја Онун мөвҹудлуғуна шүбһә едирсә, һәгиги Аллаһа ибадәт едә билмәз (Ромалылара 1:19, 20; Ибраниләрә 11:6). Лакин бүтүн дүнјада инсанлар Аллаһ һаггында јүзләрлә мүхтәлиф тәсәввүрләрә маликдирләр (1 Коринфлиләрә 8:4-6). Һәр бир дини фәлсәфә Аллаһын кимлијинә даир суала өз билдији кими ҹаваб верир. Христиан дүнјасына мәнсуб олан динләрин әксәријјәти Аллаһы Үч үгнум кими тәсәввүр едир. АБШ-да танынмыш бир кешиш “Аллаһы таныјырсанмы?” адлы мә’рузә илә чыхыш етди. Ибраниҹә Мүгәддәс Јазылардан бир нечә дәфә ситат ҝәтирмәсинә бахмајараг, өз чыхышында бир дәфә дә олсун Аллаһын адыны чәкмәди. Әлбәттә, о, ҝөзләнилдији кими, Јеһова вә ја Јәһва адынын әвәзинә, ајдын олмајан вә үмуми мә’на дашыјан “Рәбб” сөзүнүн јазылдығы Мүгәддәс Китаб тәрҹүмәсиндән истифадә едирди.
7 Јеремја 31:33, 34 ајәләрини ситат ҝәтирәрәк, бу мә’рузәчи динләјиҹиләринә ваҹиб бир фикри чатдырмады: “Артыг һәр кәс өз гоншусуна вә һәр кәс өз гардашына: Рәбби таныјын [гәдим ибрани мәтниндә — “Јеһованы таныјын”], дејә өјрәтмәјәҹәкләр; чүнки кичијиндән бөјүјүнә гәдәр онларын һамысы мәни таныјаҹаглар, Рәбб [гәдим ибрани мәтниндә — “Јеһова”] дејир”. Бу тәрҹүмәдә Аллаһын хүсуси ады — Јеһова ҝөтүрүлмүшдүр (Ишаја 42:8).
8. Аллаһын адыны истифадә етмәјин ваҹиблији һансы нүмунәдән ҝөрүнүр?
8 Мәзмур 8:9 ајәси Јеһованын адыны истифадә етмәјин ваҹиблијини ҝөстәрир: “Ја Рәббимиз Јеһова, бүтүн јер үзүндә исмин нә әзәмәтлидир!” Башга дилләрдә олан тәрҹүмәләрдә исә бу ајә белә сәсләнир: “Ја Рәббимиз Аллаһ, бүтүн јер үзүндә исмин нә әзәмәтлидир!” Лакин, әввәлки мәгаләдә гејд олундуғу кими, Онун Кәламынын бизи ишыгландырмасына јол веририксә, “Аллаһ билијини” әлдә едә биләрик. Мүгәддәс Китабы өјрәнмәк үчүн һансы вәсаитдә Аллаһын адынын әһәмијјәти һаггындакы суаллара тез ҹаваб тапмаг олар? (Сүлејманын мәсәлләри 2:1-6).
9. а) Аллаһын адыны истифадә етмәјин ваҹиб олдуғуну изаһ етмәкдә бизә һансы нәшр көмәк едә биләр? б) Бир чох тәрҹүмәчиләр Аллаһын адына неҹә һөрмәтсизлик ҝөстәрмишләр?
9 Һазырда 154 дилә тәрҹүмә едилмиш “Әбәди һәјата апаран билик”b китабына да мүраҹиәт едә биләрик. “Һәгиги Аллаһ кимдир?” адлы фәсилдә “Һәгиги Аллаһын ады вар” башлығы алтында (сәһ. 24), ајдын шәкилдә ҝөстәрилир ки, ибрани тетраграмматонуна (јунан дилиндән “дөрд һәрф” мә’насыны верир) гәдим ибрани мәтнләриндә, демәк олар ки, 7 000 дәфә раст олунур. Лакин иудаизмин вә христиан дүнјасынын руһани синифләри, һәмчинин тәрҹүмәчиләри өз Мүгәддәс Китаб тәрҹүмәләриндән һәмин ады биләрәкдән ҝөтүрмүшдүләрc. Онлар, Аллаһы ады илә чағырмадыглары һалда Ону таныдыгларыны вә Онунла мәгбул мүнасибәтдә олдугларыны неҹә иддиа едә биләрләр? Аллаһын һәгиги ады Онун нијјәтләрини вә кимлијини анламаға имкан јарадыр. Бундан әлавә, әҝәр Аллаһын ады истифадә едилмирсә, Исанын нүмунәви дуасындакы: “Еј ҝөјләрдә олан Атамыз, Адын мүгәддәс тутулсун” сөзләри мә’насыны итирмирми? (Матта 6:9; Јәһја 5:43; 17:6).
Иса Мәсиһ кимдир?
10. Исанын һәјаты вә хидмәти һаггында там тәсәввүрү неҹә әлдә едә биләрик?
10 “Аллаһ биздән нә тәләб едир?” брошүрасынын үчүнҹү дәрси “Иса Мәсиһ кимдир?” адланыр. Ҹәми алты абзасда Исанын кимлији, мәншәји вә јер үзүнә ҝәлишинин мәгсәди һаггында там гыса шәкилдә мә’лумат верилир. Амма Исанын һәјаты һаггында даһа долғун билијә саһиб олмаг истәјирсинизсә, Инҹилдән савајы, 111 дилдә дәрҹ едилмиш “Дүнјада јашамыш ән бөјүк инсан” китабы (түрк.) ән јахшы вәсаитдир. Бу китабда, дөрд Мүждәјә әсасланараг, Мәсиһин һәјаты вә вердији тә’лимләр тарихи ардыҹыллыгла гәләмә алынмышдыр. Исанын һәјатында вә хидмәти әрзиндә баш вермиш һадисәләр 133 фәсилдә нәгл едилир. Буна охшар башга мә’лумат үчүн “Мүгәддәс Јазыларын дәрк едилмәси” енсиклопедијасынын II ҹилдиндә, “Иса Мәсиһ” адлы мәгаләсинә баха биләрсиниз.
11. а) Јеһованын Шаһидләринин Иса Мәсиһ һаггындакы тә’лимләри башга тә’лимләрдән неҹә фәргләнир? б) Һансы Мүгәддәс Китаб ајәләри Үч угнум тә’лимини тәкзиб едир вә бу саһәдә һансы вәсаит фајдалыдыр?
11 Христиан дүнјасында Иса илә бағлы мүбаһисә, онун “Аллаһын Оғлу” вә “Оғул Аллаһ” олуб-олмамасы үстүндә ҝедир. Башга сөзләрлә десәк, бу мүбаһисә, Католик килсәсинин Катехизисиндә “христиан е’тигадынын башлыҹа сирри” адланан, јә’ни Үч угнум тә’лиминин үстүндәдир. Христиан дүнјасынын динләриндән фәргли олараг, Јеһованын Шаһидләри Иса Мәсиһин Аллаһ тәрәфиндән јарадылдылғына инаныр, амма ону Аллаһ һесаб етмирләр. Бу мөвзу, “Ҝөзәтчи Гүлләси”нин 2002-ҹи ил 1 август сајында чох ҝөзәл ачыгланыр. Үч угнум тә’лимини тәкзиб етмәк үчүн Мүгәддәс Китабдан Марк 13:32 вә 1 Коринфлиләрә 15:24, 28 ајәләр истифадә олунур.
12. Даһа һансы суал диггәтимизә лајигдир?
12 Аллаһла вә Иса Мәсиһлә бағлы мөвзуларын јухарыдакы мүзакирәси, Мүгәддәс Китаб һәгигәтини билмәјәнләрә дәгиг билик алмагда көмәк етмәк мәгсәди илә, шәхси тәдгигат апармағын үсулуну ҝөстәрир (Јәһја 17:3). Бәс узун илләр мәсиһчи јығынҹағынын үзвү оланлар һаггында нә демәк олар? Артыг Мүгәддәс Китабдан ҝениш билик әлдә етдикләринә бахмајараг, Аллаһын Кәламыны шәхсән өјрәнмәләринә диггәт јетирмәләри лазымдырмы?
Нә үчүн “диггәт јетирмәк” ҝәрәкдир?
13. Бә’зиләри шәхси өјрәнмәјә даир һансы јанлыш нөгтеји-нәзәрә саһиб ола биләрләр?
13 Узун илләр әрзиндә Јеһованын Шаһидләринин јығынҹағына мәнсуб олан кәсләрдә, мәсиһчи јолунун илк илләриндә әлдә етдикләри Мүгәддәс Китаб биликләри илә кифајәтләнмәјә адәт јарана биләр. Асанлыгла белә дүшүнмәк олар: “Өјрәнмәдә нәјә ҝөрә сә’ј ҝөстәрим? Мәҝәр мән јенијәм? Мүгәддәс Китабы артыг дәфәләрлә охумушам, она әсасланан нәшрләри исә илләрдир ки, охујурам”. Белә фикир буну демәјә бәрабәрдир: “Неҹә гидаландығыма диггәт јетирмәк нәјә лазым? Онсуз да индијә гәдәр артыг чох јемишәм”. Билирик ки, сағламлыг вә һәјат фәалијјәти үчүн организмә даима кејфијјәтли вә дүзҝүн гајдада һазырланмыш гида лазымдыр. Руһани сағламлығымыз вә мөһкәмлијимиз үчүн исә јахшы руһани гида даһа чох тәләб олунур! (Ибраниләрә 5:12-14).
14. Нәјә ҝөрә һәмишә өзүмүзә диггәт јетирмәлијик?
14 Буна ҝөрә дә һәр биримиз, Мүгәддәс Китабы чохдан вә ја јени өјрәнмәјимиздән асылы олмајараг, һәвари Павелин һәмин вахт артыг јеткин вә мәс’ул нәзарәтчи олан Тимотејә вердији мәсләһәтинә диггәт јетирмәлијик: “Өзүнә вә вердијин тә’лимата диггәт јетир вә бу ишләри давам етдир. Чүнки буну етмәклә сән һәм өзүнү, һәм дә сәнә гулаг асанлары хилас едәрсән” (1 Тимотејә 4:15, 16). Павелин мәсләһәтинә нәјә ҝөрә диггәт јетирмәлијик? Хатырлајаг ки, Павел диггәтимизи һәмчинин “Иблисин һијләләринә” вә “бу гаранлыг дүнјанын һөкмранларына, јә’ни сәмави аләмдә олан пис руһи гүввәләрә” гаршы мүбаризәјә јөнәлдир. Һәвари Петер исә, Иблисин “ашырмаг үчүн кимисә” ахтардығы һаггында хәбәрдарлыг етди вә бизләрдән һәр биримиз онун гурбаны ола биләр. Өзүмүзә чох архајын олмағымыз, мәһз онун ахтардығы фүрсәт ола биләр (Ефеслиләрә 6:11, 12; 1 Петер 5:8).
15. Һансы руһани мүдафиәјә саһибик вә онлары неҹә лазыми гајдада сахлаја биләрик?
15 Бәс белә олдугда өзүмүзү неҹә горуја биләрик? Һәвари Павел бизә хатырладыр: “Буна ҝөрә Аллаһын бүтүн зиреһләрини ҝөтүрүн ки, сиз пис ҝүндә мүгавимәт ҝөстәриб, әлиниздән ҝәлән һәр шеји етдикдән сонра јериниздә дура биләсиниз” (Ефеслиләрә 6:13). Бу руһани зиреһләрин мөһкәмлији, јалныз онларын башланғыҹда неҹә олмасындан дејил, даима лазыми вәзијјәтдә сахламағымыздан да асылыдыр. Демәли, бу јени тәҹһизата Аллаһын Кәламы һаггындакы јени биликләр дә дахил олмалыдыр. Бу ону ҝөстәрир ки, Јеһованын өз Кәламы вә садиг вә ағыллы гул синфи васитәсилә ачдығы һәгигәтин анлајышына диггәт јетирмәк олдугҹа ваҹибдир. Мүгәддәс Китабы вә она әсасланан нәшрләри мүнтәзәм олараг өјрәнмәк, руһани зиреһләримизи лазыми гајдада сахламаг үчүн олдугҹа ваҹибдир (Матта 24:45-47; Ефеслиләрә 6:14, 15).
16. “Иман галханы”мызын јахшы вәзијјәтдә олмасы үчүн нә едә биләрик?
16 Павел зиреһләримизин чох мүһүм бир һиссәсини, јә’ни “иман галханыны” хүсусилә вурғулајыр. Онун көмәји илә, Шејтанын јалан иттиһам вә дөнүк тә’лимләр шәклиндә олан гызмар охларыны әјә вә сөндүрә биләрик (Ефеслиләрә 6:16). Бу сәбәбдән, иман галханымызын нә дәрәҹәдә мөһкәм олдуғуну јохламаг вә ону јахшы вәзијјәтдә сахлајыб мөһкәмләндирмәјә диггәт јетирмәк олдугҹа ваҹибдир. Өзүмүздән соруша биләрик: “Ҝөзәтчи Гүлләси” журналынын көмәји илә Мүгәддәс Китабын һәфтәлик өјрәнмәсинә неҹә һазырлашырам? Мәсиһчи ҝөрүшләриндә дүшүнүлмүш ҹаваблар верәрәк гардашлары “мәһәббәтә вә хејирли ишләрә” тәшвиг едә биләҹәк гәдәр јахшы һазырлашыраммы? Јазылан, анҹаг ситат ҝәтирилмәјән ајәләри Мүгәддәс Китабдан ачыб охујураммы? Ҝөрүшләрдә руһ јүксәклији илә иштирак едәрәк, башгаларыны руһландырыраммы? Биз гүввәтли руһани гидаја маликик вә даһа чох фајда ҝәтирмәси үчүн ону јахшы “һәзм” етмәлијик (Ибраниләрә 5:14; 10:24).
17. а) Руһанилијимизи сарсытмаға чалышараг Шејтан һансы зәһәрдән истифадә едир? б) Шејтанын зәһәринә гаршы һансы чарә вар?
17 Шејтана ҝүнаһлы инсанларын зәифликләри бәллидир вә онун фитнәләри чох мәкрлидир. Өзүнүн зәрәрли тә’сирини јајмаг јолларындан бири, порнографијанын телевизија верилишләри, Интернет, видеофилмләр вә нәшријјат васитәсилә асан әлчатан олмасыдыр. Бә’зи мәсиһчиләр јол вермишләр ки, бу зәһәр онларын мүдафиәсини зәифләтсин, бу исә јығынҹагда малик олдуглары мәс’улијјәти итирмәләринә, һәтта даһа ҹидди нәтиҹәләрә ҝәтириб чыхармышды (Ефеслиләрә 4:17-19). Шејтанын руһани зәһәринә гаршы чарә нәдир? Биз, Мүгәддәс Китабы мүнтәзәм олараг шәхси өјрәнмәјә, мәсиһчи ҝөрүшләринә, һәмчинин Аллаһын вердији руһани зиреһләрин һеч биринә е’тинасыз јанашмалы дејилик. Бүтүн бунлар бизә јахшыны писдән ајырмаға вә Аллаһын нифрәт етдији шејләрә нифрәт етмәк габилијјәти верир (Мәзмур 97:10; Ромалылара 12:9).
18. Руһани мүбаризәмиздә “руһун гылынҹы” бизә неҹә көмәк едир?
18 Мүгәддәс Китабы мүнтәзәм вә лазыми шәкилдә өјрәнәрәк, Аллаһын Кәламындан олан дәгиг биликләрин хидмәт етдији мөһкәм мүдафиәјә саһиб олмагла бәрабәр, “руһун гылынҹы, јә’ни Аллаһын сөзү” илә мүвәффәгијјәтлә һәрәкәт етмәји дә өјрәнирик. Чүнки Аллаһын Кәламы “ҹанлы вә тә’сирли, һәр ҹүр икиағызлы гылынҹдан итидир; о, ҹанла руһу, ојнагларла илији бир-бириндән ајыраҹаг гәдәр дәлиб кечир вә үрәјин дүшүнҹә вә нијјәтләрини ајырд едир” (Ефеслиләрә 6:17; Ибраниләрә 4:12). Әҝәр бу “гылынҹдан” усталыгла истифадә етмәји өјрәнсәк, илк бахышдан зәрәрсиз, һәтта ҹәлбедиҹи ҝөрүнән, әслиндә исә Шәрин әлиндә мәһведиҹи тәлә олан сынагларла гаршылашан заман, биз онун гаршысыны ала биләҹәјик. Мүгәддәс Китаб биликләри хәзинәмизин вә анлајышымызын сајәсиндә, писи рәдд едиб јахшыны иҹра етмәји баҹараҹағыг. Буна ҝөрә дә һәр биримиз өзүндән сорушмалыдыр: “Руһани гылынҹым итидир, јохса пас атыб? Һүҹумлара гаршы дура билмәјимә көмәк едән Мүгәддәс Китаб ајәләрини хатырламаг мәнә чәтиндирми?” Ҝәлин бундан сонра да, Мүгәддәс Китабы мүнтәзәм вә лазыми шәкилдә өјрәнмәјә давам едәк вә бунунла да Иблисә гаршы дураг (Ефеслиләрә 4:22-24).
19. Чалышганлыгла апардығымыз шәхси өјрәнмә һансы фајданы ҝәтирир?
19 Павел јазырды: “Һәр Мүгәддәс Јазы Аллаһдан илһам алмыш вә тә’лим, тәкзиб, ислаһ, салеһлик тәрбијәси үчүн фајдалыдыр ки, Аллаһ бәндәси камил олуб, һәр ҹүр хејирли иш үчүн тәҹһиз едилсин”. Павелин Тимотејә үнванладығы сөзләрә диггәт етсәк, руһән мөһкәмләнә, хидмәтимизи исә даһа сәмәрәли едә биләрик. Руһани ағсаггаллар вә хидмәти көмәкчиләр јығынҹаға даһа чох фајда ҝәтирә биләрләр вә һәр биримиз иманда мөһкәм гала биләрик (2 Тимотејә 3:16, 17; Матта 7:24-27).
[Һашијәләр]
a Бир гајда олараг, јени марагланан адам “Аллаһ биздән нә тәләб едир?” брошүрасыны өјрәндикдән сонра, “Әбәди һәјата апаран билик” китабыны өјрәнмәјә башлајыр. Һәм брошүра, һәм дә китаб Јеһованын Шаһидләри тәрәфиндән нәшр едилиб. Бурада верилән мәсләһәтләр руһани инкишафа мане олан амилләри арадан галдырмаға көмәк едәҹәкдир.
b Јеһованын Шаһидләри тәрәфиндән дәрҹ едилмишдир. Билдијиниз дилдә “Мүгәддәс Јазыларын дәрк едилмәси” енсиклопедијасы варса, II ҹилддә, “Јеһова” адлы мәгаләјә мүраҹиәт едә биләрсиниз.
c Бир сыра испан вә каталон тәрҹүмәләриндә гәдим ибрани тетраграмматонун Јавé, Јаһвеһ, Jahvè, вә Jehová кими верилмәси диггәтә лајигдир.
Хатырлајырсынызмы?
• Сәмәрәли шәхси өјрәнмә үчүн неҹә шәраит тәләб олунур?
• Аллаһын ады илә бағлы Мүгәддәс Китабын бир чох тәрҹүмәләриндә һансы сәһвә јол верилир?
• Үч угнум тә’лимини тәкзиб етмәк үчүн һансы Мүгәддәс Китаб ајәләрини истифадә едәрдиниз?
• Илләр узуну мәсиһчи олсаг да, Шејтанын тәләләриндән горунмаг үчүн биз нә етмәлијик?
[25-ҹи сәһифәдәки шәкилләр]
Шәхси өјрәнмәнин сәмәрәли олмасы үчүн диггәтимизи аз јајындыраҹаг мүнасиб шәраит сечмәк лазымдыр.
[26-ҹы сәһифәдәки шәкилләр]
Руһани “гылынҹын” итидир, јохса пас атыб?