Инсанлара Јеһованын ҝөзү илә бахмаға чалышын
“Рәбб инсанын ҝөрдүјү кими ҝөрмәз” (1 САМУЕЛ 16:7).
1, 2. Јеһова илә Самуелин Елиаб һаггындакы нөгтеји-нәзәрләри нәдә фәргләнирди вә бундан нә өјрәнә биләрик?
ЕРАМЫЗДАН әввәл XI әсрдә Јеһова пејғәмбәр Самуелә ҝизли бир тапшырыг верди. Аллаһ она Јессе адлы адамын евинә ҝедиб, онун оғулларындан бирини Исраилин ҝәләҹәк падшаһы кими мәсһ етмәсини бујурду. Самуел Јессенин илкин оғлу Елиабы ҝөрдүкдә мәһз Аллаһын сечдији адамы тапдығына әмин иди. Лакин Јеһова деди: “Онун ҝөрүнүшүнә вә бојунун узунлуғуна бахма; чүнки ону рәдд етдим; чүнки Рәбб инсанын ҝөрдүјү кими ҝөрмәз; чүнки инсан үзә бахар, фәгәт Рәбб үрәјә бахар” (1 Самуел 16:6, 7). Ҝөрүнүр, Самуел Елиаба Јеһованын ҝөзү илә бахмырдыa.
2 Башгалары һаггында мүлаһизәләримиздә неҹә дә асанлыгла јаныла биләрик. Бир тәрәфдән, заһирән ҝөзәл, лакин әхлаг дәјәрләриндән узаг инсана алданмаг олар. Диҝәр тәрәфдән исә, характери хошумуза ҝәлмәјән сәмими инсанлара гаршы сәрт вә гәти даврана биләрик.
3, 4. а) Әҝәр ики мәсиһчи арасында ихтилаф јаранырса, онларын һәр бири нәјә ҹан атмалыдыр? б) Һәмиманлымызла арамызда ҹидди ихтилаф јаранарса, өзүмүзә һансы суаллары вермәлијик?
3 Әҝәр биз башгаларыны, һәтта узун илләр таныдығымыз кәсләри белә мүһакимә етмәјә мејллијиксә, бу, чәтинликләрә ҝәтириб чыхара биләр. Ола билсин, әввәлләр јахын дост олдуғун һәмиманлынла сәнин аранда ҹидди ихтилаф јараныб. Әввәлки мүнасибәтләри бәрпа етмәк истәрдинми? Бу ишдә сәнә нә көмәк едә биләр?
4 Мәсиһчи баҹына вә ја гардашына бир даһа диггәтлә вә мүсбәт нөгтеји-нәзәрдән бах. Буну Исанын сөзләрини нәзәриндә тутараг ет: “Әҝәр Мәни ҝөндәрән Атам ҹәлб етмирсә, һеч ким Мәним јаныма ҝәлә билмәз” (Јәһја 6:44). Сонра өзүндән соруш: Јеһова бу инсаны Оғлуна нә үчүн ҹәлб едиб? О, һансы мүсбәт кејфијјәтләрә маликдир? Бәлкә, бу кејфијјәтләри мән ҝөрмүрәм, јахуд лазымынҹа гијмәтләндирмирәм? Әввәлләр биз онунла нә үчүн дост олмушдуг? Мәни она ҹәлб едән нә иди? Артыг бир нечә вахтдыр ки, инҹиклик һиссләри сәни үзүрсә, ола билсин, әввәлҹә инсанын мүсбәт кејфијјәтләри барәдә дүшүнмәк чәтин олсун. Лакин бу ваҹиб аддым мүнасибәтинизи бәрпа етмәк үчүн олдугҹа зәруридир. Буну неҹә етмәјин мүмкүн олдуғуну нүмунәдә ҝөрмәк үчүн, бә’зи һалларда јалныз гүсурлары нәзәрә чарпан ики адамын јахшы ҹәһәтләрини нәзәрдән кечирәк. Бу, пејғәмбәр Јунус вә һәвари Петердир.
Јунуса олан гәрәзсиз бахыш
5. Јунуса һансы тапшырыг верилмишди вә о һәмин тапшырыға неҹә јанашды?
5 Јунус, Јоашын оғлу II Јеробоамын ҝүнләриндә Исраилин шимал падшаһлығында пејғәмбәрлик едирди (2 Краллар 14:23-25). Бир дәфә Јеһова Јунуса Исраилдән чыхыб гүдрәтли Ассурија империјасынын пајтахты олан Ниневија шәһәринә јола дүшмәји бујурду. Онун тапшырығы нәдән ибарәт иди? О, оранын сакинләринә хәбәрдарлыг етмәли иди ки, онларын бөјүк шәһәри мәһв олаҹаг (Јунус 1:1, 2). Лакин Јунус Аллаһын ҝөстәришләринә әмәл етмәк әвәзинә, гачды! О, Ниневијанын там әкс тәрәфиндә јерләшән Таршишә јолланан ҝәмијә минди (Јунус 1:3).
6. Ниневијаја ҝөндәрмәк үчүн, Јеһова нәјә ҝөрә Јунусу сечмишди?
6 Јунус һаггында дүшүндүкдә ағлына илк нөвбәдә нә ҝәлир? Онун итаәтсиз пејғәмбәр олдуғуму? Әҝәр сәтһи бахсаг, мәһз бу ҹүр гәнаәтә ҝәлмәк олар. Бәс Аллаһ Јунусу онун итаәтсизлијинә ҝөрәми пејғәмбәр тә’јин етмишди? Әлбәттә ки, јох! Јәгин Јунусун мүсбәт кејфијјәтләри дә варды. Ҝәлин, онун бир пејғәмбәр кими һәјатыны нәзәрдән кечирәк.
7. Јунус Исраилдә һансы шәраитдә хидмәт едирди вә бу, онун һаггындакы рә’јинизә неҹә тә’сир едир?
7 Әввәлләр Јунус Аллаһын хәбәрини гәтијјән динләмәјән исраиллиләрә сәдагәтлә вә сә’јлә тәблиғ едирди. Тәхминән Јунусун ҝүнләриндә јашајан пејғәмбәр Амос о вахты јашајан исраиллиләри вар-дөвләтә ҹан атан вә зөвг далынҹа гачан инсанлар кими тәсвир етмишдиb. Өлкәни писликләр баш алыб ҝедирди, лакин исраиллиләр буна лагејд јанашырдылар (Амос 3:13-15; 4:4; 6:4-6). Бүтүн бунлара бахмајараг, Јунус она верилән тапшырығы сәдагәтлә јеринә јетирәрәк ҝүндән-ҝүнә тәблиғ едирди. Әҝәр сән хош хәбәрин тәблиғчисисәнсә, өзүндән разы вә е’тинасыз инсанларла данышмағын нә гәдәр чәтин олдуғуну билирсән. Буна ҝөрә дә, Јунусун чатышмазлыгларына ҝөз јуммадан, онун имансыз исраиллиләрә тәблиғ едәркән ҝөстәрдији сәдагәт вә сарсылмазлыг кими кејфијјәтләрини унутмајаг.
8. Исраил пејғәмбәрини Ниневијада һансы чәтинликләр ҝөзләјирди?
8 Ниневијаја ҝетмәк тапшырығы даһа чәтин иди. Бу шәһәрә чатмаг үчүн Јунус пијада 800 км јол гәт етмәли иди, бу исә бир аја јахын давам едәҹәк үзүҹү сәјаһәт демәк иди. Орада пејғәмбәр өз гәддарлыглары илә танынмыш ассуријалылара тәблиғ етмәли иди. Мүһарибәләр апарараг бу халг чох вахт дөзүлмәз ишҝәнҹәләрә әл атырды. Ассуријалылар өз вәһшиликләри илә һәтта өјүнүрдүләр. Доғрудан да, Ниневијанын “ганлы шәһәр” адланмасы тәәҹҹүблү дејил! (Наһум 3:1, 7).
9. Дәнизчиләр ҝүҹлү фыртынаја дүшдүкдә Јунус һансы кејфијјәтләри тәзаһүр етдирди?
9 Јунус Јеһованын әмринә табе олмаг истәмәдијиндән, ҝетмәли олдуғу јери гојуб әкс тәрәфә үзән ҝәмијә минди. Лакин Јеһова өз пејғәмбәриндән үз дөндәриб, ону башгасы илә әвәз етмәди. Бунун әвәзинә О, Јунуса, верилән тапшырығын нә дәрәҹәдә ҹидди олдуғуну анлатмаға чалышды. Һәмин вахт Аллаһ дәниздә ҝүҹлү фыртына гопарды. Пејғәмбәрин үздүјү ҝәмини далғалар дөјмәјә башлады. Онун уҹбатындан ҝүнаһсыз инсанларын һәјаты тәһлүкә алтында иди! (Јунус 1:4). Јунус нә етди? Онун уҹбатындан ҝәмидәкиләрин дә мәһв олмасыны истәмәдијинә ҝөрә, о деди: “Мәни ҝөтүрүб дәнизә атын, онда дәниз гаршынызда сакитләшәр” (Јунус 1:12, МКШ). Дәнизчиләр ону суја атаҹаглары заман Јеһованын ону хилас едәҹәјинә Јунусун әсасы јох иди (Јунус 1:15). Лакин о, ҝәмидәки инсанларын хилас олмасы үчүн, ҹаныны вермәјә һазыр иди. Бу һадисәдә онун ҹәсарәт, тәвазөкарлыг вә мәһәббәт әкс етдирдијини ҝөрмүрүкмү?
10. Јеһова Јунуса пејғәмбәрлик етмәји бир даһа һәвалә етдикдә нә баш верди?
10 Јеһова нәһајәт Јунусу хилас етди. Ким исә дүшүнә биләр ки, Јунус етдији һәрәкәт уҹбатындан артыг Јеһованын тәмсилчиси кими хидмәт етмәјә лајиг дејилди. Лакин Јеһова она ниневијалылара тәблиғ етмәји бир даһа һәвалә едәрәк шәфгәт вә мәһәббәт ҝөстәрди. Ниневијаја чатдыгда Јунус шәһәрин сакинләринә, онларын пис әмәлләринин Аллаһын диггәт мәркәзиндә олдуғуну вә 40 ҝүндән сонра шәһәрин мәһв едиләҹәјини ҹәсарәтлә бәјан етмәјә башлады (Јунус 1:2; 3:4). Ниневијалылар бу хәбәри ешитдикдә төвбә етдиләр, Јеһова исә онларын шәһәринә рәһм етди.
11. Јунусун ваҹиб дәрси мәнимсәмәси нәдән ҝөрүнүр?
11 Лакин Јунус һәлә дә дүзҝүн нөгтеји-нәзәрә саһиб дејилди. Јеһова Јунуса әјани нүмунәнин көмәји илә, бир Аллаһ кими инсанлардан даһа чох ҝөрдүјүнү сәбрлә өјрәтди. Јеһова үрәкләри сынајыр (Јунус 4:5-11). Јунусун бу ваҹиб дәрси мәнимсәмәси онун өзүнүн јаздығы ачыг һекајәдән ҝөрүнүр. Утандырыҹы тәфсилатлары да дахил етмәклә гүсурларыны гәләмә алмасы, онун тәвазөкарлығына шәһадәт едир. Бундан әлавә инсанын өз сәһвини е’тираф етмәси үчүн ҹәсарәт тәләб олунур!
12. а) Һарадан билирик ки, Иса Јеһованын инсанлара олан нөгтеји-нәзәринә саһибдир? б) Хош хәбәри тәблиғ етдијимиз инсанлара һансы нөгтеји-нәзәрдән бахмалыјыг? (12-ҹи сәһифәдәки чәрчивәјә бахын.)
12 Јүзилликләр сонра, Иса Мәсиһ Јунусун һәјатындан бир һадисәни мүсбәт нөгтеји-нәзәрдән данышды. О деди: “Јунис [Јунус] үч ҝүн, үч ҝеҹә нәһәнҝ балығын гарнында неҹә галмышдыса, Инсан Оғлу да үч ҝүн, үч ҝеҹә јерин бағрында елә галаҹагдыр” (Матта 12:40). Јунус дирилән заман биләҹәк ки, Иса өзүнүн гәбирдә олдуғу вахты онун һәјатынын бу гаранлыг аны илә мүгајисә етмишдир. Мәҝәр хидмәтчиләри сәһвә јол верәндә онлардан үз дөндәрмәјән Аллаһа хидмәт етмәјә шад дејиликми? Мәзмурчу јазырды: “Ата ушагларына неҹә аҹыјырса, Рәбб ондан горханлара о ҹүр аҹыјыр. Чүнки јарадылышымызы билир; хатырлајыр ки, биз торпағыг” (Мәзмур 103:13, 14). Бу “торпаг” — о ҹүмләдән бу ҝүн јашајан гејри-камил инсанлар — Аллаһын мүгәддәс руһунун көмәји илә бөјүк ишләр ҝөрмәјә гадирдир!
Петерә олан таразлы бахыш
13. Петерин һансы ҹәһәтләри дәрһал ағлымыза ҝәлә биләр, амма Иса ону нәјә ҝөрә өз һәвариси сечмишди?
13 Инди исә ҝәлин икинҹи нүмунәни, һәвари Петерин нүмунәсини гыса нәзәрдән кечирәк. Әҝәр сәндән Петери тәсвир етмәји хаһиш етсәјдиләр, дәрһал онун еһтијатсыз, гејри-иради һәрәкәт едән вә һәтта өзүндән разы олдуғу һаггындамы дүшүнәрдин? Сөз јох ки, бә’зән Петер өзүнү мәһз бу ҹүр апарырды. Әҝәр о һәгигәтән дә, еһтијатсыз, дүшүнмәдән һәрәкәт едән вә өзүндән разы олсајды, Иса ону 12 һәварисиндән бири сечәрдими? (Лука 6:12-14). Әлбәттә ки, јох! Иса диггәтини Петерин чатышмазлыгларына ҹәмләшдирмирди, о, онун мүсбәт кејфијјәтләрини ҝөрүрдү.
14. а) Петерин һамыдан биринҹи данышмасыны нә илә изаһ етмәк олар? б) Петерин дөнә-дөнә суаллар вердијинә ҝөрә нә үчүн миннәтдар олмалыјыг?
14 Ким исә бу һадисәдә онун тәвазөкарлыг ҝөстәрмәдијини дүшүнә биләр. Бәс бу доғруданмы беләдир? Һесаб олундуғу кими, Петер јашҹа диҝәр һәвариләрдән, һәтта, ола билсин, Исадан да бөјүк иди. Әҝәр бу беләдирсә, Петерин нәјә ҝөрә чох вахт биринҹи данышмасы ајдындыр (Матта 16:22). Башга бир амили дә нәзәрә алмаг лазымдыр. Петер руһани шејләрә дәрин марағы олан инсан иди. Билик әлдә етмәк арзусу ону суаллар вермәјә тәшвиг едирди. Бундан биз дә фајда әлдә едирик. Иса Петерин суалларына ҹаваб верәрәк бир чох дәјәрли фикирләр сөјләмиш вә сонрадан һәмин фикирләр Мүгәддәс Китабда гәләмә алынмышдыр. Мәсәлән, мәһз Петерин суалына ҹаваб олараг Иса “садиг вә ағыллы нөкәрбашы” һаггында данышды (Лука 12:41-44). Петерин нөвбәти суалынын да үзәриндә дүшүнмәјә дәјәр: “Будур, биз һәр шеји атыб Сәнин ардынҹа ҝәлдик; елә исә, бизим нәјимиз олаҹаг?” Бу суала ҹавабында Иса инсана гүввәтләндириҹи вә’д верди: “Һәр ким Мәним адым наминә евләрини, гардашларыны, баҹыларыны, атасыны, анасыны, арвадыны, ушагларыны вә јахуд тарлаларыны атмышса, јүз дәфә артыг алаҹаг вә әбәди һәјаты мирас ҝөтүрәҹәкдир” (Матта 15:15; 18:21, 22; 19:27-29).
15. Нәјә ҝөрә демәк олар ки, Петер әсл сәдагәт ҝөстәрмишди?
15 Петер даһа бир сәҹијјәви кејфијјәти илә фәргләнирди. О, сәдагәтли инсан иди. Исанын бир чох шаҝирдләри онун тә’лимләриндән бирини анламајыб ондан ајрыланда, мәһз Петер 12 һәваринин һамысынын јеринә тәрәддүд етмәдән деди: “Ја Рәбб, биз кимин јанына ҝедә биләрик? Әбәди һәјатын сөзләри Сәндәдир” (Јәһја 6:66-68). Олсун ки, бу сөзләр Исаны нә гәдәр севиндирмишди! Сонрадан Исаны тутмаг үчүн издиһам ҝәләндә һәвариләрин әксәријјәти гачмышды. Лакин бир аз аралыда Петер издиһамын далынҹа дүшмүш вә бирбаша баш каһинин һәјәтинә дахил олмушду. Ораја ҝетмәјә ону горхаглыг дејил, ҹәсарәт тәшвиг етмишди. Исаны суал-ҹаваб етдикләри мүддәтдә Петер парлаг оҹағын әтрафында исинән бир груп јәһудијә гошулду. Баш каһинин гулларындан бири ону таныды вә онун Иса илә бәрабәр олдуғуну иддиа етмәјә башлады. Бәли, бу ҹүр чәтин вәзијјәтә дүшән Петер Рәббини инкар етди, лакин унутмајаг ки, о, бу вәзијјәтә сәдагәтли вә Иса үчүн ниҝаран олдуғундан дүшмүшдү. Һәвариләрин исә әксәријјәти Исанын далынҹа ҝетмәјә ҹүр’әт етмәмишдиләр (Јәһја 18:15-27).
16. Јунусла Петерин мүсбәт кејфијјәтләрини һансы практики мәгсәдлә нәзәрдән кечирдик?
16 Петерин мүсбәт кејфијјәтләри онун чатышмазлыгларына үстүн ҝәлирди. Һәмин шеји Јунус һаггында да демәк олар. Биз Јунус вә Петердә, ола билсин, адәтән ҝөрмәјә алышдығымыз хүсусијјәтләрдән бир балаҹа артыг јахшы шејләр ҝөрмәјә чалышдыг. Ејнилә руһани баҹы-гардашларымызда јахшыны ҝөрмәјә өзүмүзү өјрәтмәлијик. О заман бизим онларла мүнасибәтләримиз јахшылашаҹаг. Бу, нәјә ҝөрә бу гәдәр ваҹибдир?
Бу ҝүнүмүз үчүн ибрәт дәрси
17, 18. а) Нәјә ҝөрә мәсиһчиләр арасында зиддијјәтләр јарана биләр? б) Мүгәддәс Китабын һансы принсипләри һәмиманлыларымызла арамызда јаранан чәтинликләри һәлл етмәјә көмәк едә биләр?
17 Бүтүн милләтләрдән вә һәр тәбәгәдән олан кишиләр, гадынлар вә ушаглар Јеһоваја бирликдә хидмәт едирләр (Вәһј 7:9, 10). Мәсиһчи јығынҹағында нә гәдәр мүхтәлиф характерләр ҝөрүрүк! Биз Аллаһа хидмәт едәрәк сых әмәкдашлыг етдијимизә ҝөрә зиддијјәтләр вахташыры олаҹагдыр (Ромалылара 12:10; Филипилиләрә 2:3).
18 Биз баҹы-гардашларымызын сәһвләрини ҝөрсәк дә, диггәтимизи анҹаг онларын үзәринә ҹәмләшдирмирик. Мәзмурчунун һаггында охудуғу Аллаһы тәглид етмәјә чалышырыг: “Әҝәр нөгсанлары һесаба алсан, еј Јеһова, ја Рәбб, ким дура биләр?” (Мәзмур 130:3). Бизи гардашлардан ајыра биләҹәк ҹәһәтләрин үзәриндә дүшүнмәкдәнсә, “сүлһ ҝәтирән вә бир-биримизи руһән инкишаф етдирән шејләрә” ҹан атырыг (Ромалылара 14:19). Инсанлары Јеһованын ҝөрдүјү кими ҝөрмәјә чалышырыг. Бу, чатышмазлыглара бөјүк әһәмијјәт вермәдән, јахшы ҹәһәтләрә диггәт јетирмәк демәкдир. Бу ҹүр давранырыгса, ‘бир-биримизә тәһәммүл етмәк’ асан олур (Колослулара 3:13).
19. Ҹидди анлашылмазлыглары һәлл етмәк үчүн мәсиһчинин ата биләҹәји практики аддымлары тәсвир един.
19 Әҝәр һәмиманлынла сәнин аранда анлашылмазлыг јараныбса вә бу сәнә раһатлыг вермирсә, неҹә? (Мәзмур 4:4). Нәјә ҝөрә проблеми һәлл етмәјә чалышмајасан? (Тәквин 32:13-15). Әввәлҹә Јеһовадан рәһбәрлик диләјәрәк дуада Она мүраҹиәт ет. Сонра һәмиманлынын мүсбәт ҹәһәтләрини јадда сахлајараг, “һикмәтдән ҝәлән һәлимликлә” она јахынлаш (Јагуб 3:13). Она араныздакы мүнасибәтләри бәрпа етмәк истәдијини сөјлә. Аллаһ тәрәфиндән илһамланмыш мәсләһәти унутма: “Гој һәр бир адам ешитмәкдә ити, сөз сөјләмәкдә тәмкинли вә гәзәбдә тәмкинли олсун” (Јагуб 1:19). ‘Гәзәбдә тәмкинли олмаг’ мәсләһәти ону ҝөстәрир ки, башга адам сәни гәзәбләндирәҹәк нә исә едә вә ја дејә биләр. Әҝәр бу беләдирсә, Јеһовадан дилә ки, сәнә өзүнә һаким олмаг кејфијјәтини горумагда көмәк етсин (Галатијалылара 5:22, 23). Гардашына изн вер ки, шикајәтини сөјләсин вә ону диггәтлә динлә. Дедији сөзләрин һәр бири илә разы олмасан да, сөзүнү кәсмә. Онун фикри дүз олмаја биләр, анҹаг јенә дә бу онун фикридир. Вәзијјәти онун нөгтеји-нәзәриндән ҝөрмәјә чалыш. Бунун үчүн, јәгин ки, өзүнә гардашынын ҝөзү илә бахмаг лазым ҝәләҹәк (Сүлејманын мәсәлләри 18:17).
20. Анлашылмазлыглары һәлл едәркән, нә исә демәмишдән өнҹә башгасыны диггәтлә динләмәк нәјә ҝөрә ваҹибдир?
20 Данышмаг нөвбәси сәнә чатдыгда нәвазишлә даныш (Колослулара 4:6). Гардашына онда хошун ҝәлән ҹәһәтләри де. Анлашылмазлығын јаранмасына сәбәб олан нә исә етдијинә ҝөрә үзр истә. Әҝәр тәвазөкарлыгла ҝөрдүјүн сә’јләр барышыға ҝәтириб чыхардарса, Јеһоваја миннәтдарлығыны билдир. Јох, әҝәр һәлә дә анлашылмазлыг давам едирсә, Јеһовадан рәһбәрлик диләмәјә давам ет вә мүнасибәтләринизи бәрпа етмәк үчүн башга имканлар ахтар (Ромалылара 12:18).
21. Бу мүзакирә башгаларына Јеһованын ҝөзү илә бахмаға сизә неҹә көмәк етди?
21 Јеһова бүтүн хидмәтчиләрини севир. Гејри-камиллијимизә бахмајараг, О һамымызы хидмәтдә истифадә етмәјә шаддыр. Онун инсанлара неҹә бахдығына даир даһа чох өјрәндикҹә, баҹы-гардашларымыза олан мәһәббәтимиз дә артаҹаг. Әҝәр һәмиманлыларымыза гаршы мәһәббәтимиз сөнүбсә, ону јенидән алышдырмаг олар. Инсанларда јахшы ҹәһәтләри ҝөрмәјә сә’ј ҝөстәрир вә онлара Јеһованын ҝөзү илә бахмаға чалышырыгса, биз бөјүк хејир-дуалар әлдә едәҹәјик!
[Һашијәләр]
a Сонрадан ашкар олду ки, заһирән ҝөзәл Елиабын Исраилин падшаһы олмаг үчүн лазыми кејфијјәтләри јох иди. Мәсәлән, филистимли пәһләван Голјат исраиллиләри даваја чағыранда, Елиаб диҝәр Исраил әсҝәрләри илә бәрабәр горхуја дүшдү (1 Самуел 17:11, 28-30).
b Ири мәһәлли зәбтләрин, әввәлки сәрһәдләрин бәрпа олунмасынын вә ола билсин, бунун нәтиҹәсиндә II Јеробоам тәрәфиндән јығылан верҝиләрин сајәсиндә, еһтимал олундуғу кими, шимал падшаһлығынын зәнҝинлијини әһәмијјәтли дәрәҹәдә артырды (2 Самуел 8:6; 2 Краллар 14:23-28; 2 Тарихләр 8:3, 4; Амос 6:2).
Сиз неҹә ҹаваб верәрдиниз?
• Јеһова сәдагәтли хидмәтчиләринин чатышмазлыгларына неҹә бахыр?
• Јунусла Петерин һансы јахшы ҹәһәтләрини садалаја биләрсиниз?
• Мәсиһчи гардашларымыза һәмишә һансы нөгтеји-нәзәрдән бахмаг истәјирик?
[12-ҹи сәһифәдәки чәрчивә]
Аллаһын инсанлара неҹә бахдығы үзәриндә дүшүн
Мүгәддәс Китабда Јунус һаггында јазылмыш һадисәнин үзәриндә дүшүндүкдә, мүнтәзәм олараг тәблиғ етдијин инсанлара башга ҹүр бахмағын ҝәрәклијини ҝөрүрсәнми? Бу инсанлар һәмин исраиллиләр кими өзүндән разы вә е’тинасыз ҝөрүнә биләр вә ја Аллаһын хәбәринә гаршы дура биләрләр. Бәс Јеһова онлара неҹә бахыр? Јунусун тәблиғини ешидиб төвбә едән Ниневијанын падшаһы кими, бу системдә јүксәк вәзифәләрдә чалышан кәсләр белә, бир заман Јеһоваја тәрәф дөнә биләрләр (Јунус 3:6, 7).
[8-ҹи сәһифәдәки шәкил]
Башгаларына Јеһованын ҝөзү иләми бахырсан?
[10 вә 11-ҹи сәһифәләрдәки шәкил]
Иса, Јунусла баш верән һадисәјә мүсбәт нөгтеји-нәзәрдән бахырды.