“Горхмајын вә дәһшәтә ҝәлмәјин”

“Горхмајын вә дәһшәтә ҝәлмәјин... чүнки Рәбб сизинлә бәрабәрдир” (2 ТАРИХЛӘР 20:17).

1. Терроризм инсанлара һансы тә’сири ҝөстәрир вә онларын кечирдији нараһатчылыг һиссини нәјә ҝөрә баша дүшмәк олар?

ТЕРРОРИЗМ! Артыг бу сөзүн өзү үрәкдә шүбһә вә аҹизлик доғурараг горху јарадыр. Дәһшәт, кәдәр вә гәзәб кими гарышыг һиссләр ојадыр. Һәм дә бу сөз, бир чох инсанларын еһтијат етдикләри кими, ҝәләҹәкдә бәшәријјәт үчүн тәһлүкә јарадаҹаг һалы тәсвир едир. Бә’зи өлкәләрин узун илләр терроризмин мүхтәлиф формалары илә мүбаризә апармасы, лакин ону көкүндән бирдәфәлик гопара билмәмәси факты ҝөстәрир ки, инсанлар әбәс јерә нараһат олмурлар.

2. Јеһованын Шаһидләри терроризм проблеминә неҹә јанашырлар вә бунунла әлагәдар һансы суаллар јараныр?

² Бунунла јанашы үмид үчүн там әсасымыз вар. 234 өлкәдә вә әразидә фәал тәблиғ хидмәти апаран Јеһованын Шаһидләри гејри-ади никбинлијә маликдирләр. Онлар терроризмин даима мөвҹуд олаҹағындан горхмурлар; онлар әминдирләр ки, терроризмә чох тезликлә сон гојулаҹаг. Шаһидләрин никбинлијинә шәрик олмаг реалдырмы? Дүнјаны терроризмдән ким вә неҹә хилас едә биләр? Бизим һамымыз бу вә ја диҝәр дәрәҹәдә зоракылыға мә’руз галдығымыз үчүн, Шаһидләрин никбинлијинин нәјә әсасландығыны нәзәрдән кечирмәјимиз мүнасиб оларды.

3. Горху үчүн һансы сәбәбләр вардыр вә бизим ҝүнләримиз барәдә габагҹадан нә дејилмишдир?

³ Бу ҝүн инсанлар мүхтәлиф сәбәбләр уҹбатындан горху вә һәјәҹан һисси кечирирләр. Өзүнә гајғы ҝөстәрә билмәјән чохсајлы јашлы инсанлар, сағалмаз хәстәликләр уҹбатындан гүввәсини итирән кәсләр, ҝүҹ-бәла илә доланмаг үчүн мүбаризә апаран аиләләр барәсиндә дүшүнүн! Һәјатын дәјишкәнлији барәдә дүшүнүн! Бизә ән әзиз олан кәсләри әлимиздән алмаға һазыр олан бәдбәхт һадисәләр вә гәзалар уҹбатындан баш верән гәфил өлүм, санки һәр аддымда башымызын үстүндәдир. Бу ҹүр тәһлүкәләр вә нараһатчылыглар, һәмчинин шәхси тоггушмалар вә пешманчылыглар уҹбатындан, бизим ҝүнләримиз һәвари Павелин етдији тәсвирә тамамилә мүвафиг ҝәлир: “Буну бил ки, ахыр ҝүнләрдә чәтин анлар ҝәләҹәкдир. Чүнки инсанлар худбин... шәфгәтсиз, барышмаз, бөһтанчы, нәфсини сахламајан, азғын, рәһмсиз, јахшылығын дүшмәни” олаҹаглар (2 Тимотејә 3:1-3).

4. 2 Тимотејә 3:1-3 ајәләриндә тутгун бир мәнзәрә тәсвир едилсә дә, һәмин ајәләрдә никбинлик үчүн һансы сәбәбләр тапырыг?

⁴ Бу ајәләр тутгун бир мәнзәрәни тәсвир етсә дә, үмид үчүн дә әсас верир. Диггәт јетирин ки, чәтин анлар Шејтана мәхсус олан пис системин “ахыр ҝүнләри”ни характеризә едир. Бу о демәкдир ки, тезликлә һәр шеј дәјишиләҹәк, бу пис дүнја системини, Исанын шаҝирдләринә һаггында дуа етмәји өјрәтдији Аллаһын мүкәммәл Падшаһлығы әвәз едәҹәк (Матта 6:9, 10). Бу Падшаһлыг — Аллаһын сәмави һөкумәти, — Даниел пејғәмбәрин дедији кими “әбәдијјән дағылмајаҹаг”, лакин “[бәшәри] падшаһлыгларын һамысыны... парчалајаҹаг вә мәһв едәҹәк, өзү исә әбәдијјән дураҹаг” (Даниел 2:44).

Терроризм вә мәсиһчи битәрәфлији

5. Бу јахынларда бир чох дөвләтләр терроризм тәһлүкәсинә неҹә реаксија ҝөстәрдиләр?

⁵ Өтән онилликләр әрзиндә терроризм минләрлә инсанын өлүмүнә баис олмушдур. 2001-ҹи ил сентјабрын 11-дә Нју-Јоркда вә Вашингтонда баш верән террор актындан сонра, дүнја тәһлүкәнин нә дәрәҹәдә ҹидди олдуғуну даһа ајдын сурәтдә анламаға башлады. Терроризмин бөјүдүјүнү вә глобаллашдығыны ҝөрәрәк, бир чох дөвләтләр она гаршы мүбаризә апармаг үчүн бирләшдиләр. Мәсәлән, 2001-ҹи ил декабрын 4-дә, мә’лумат мәркәзинин хәбәр вердији кими, “Авропанын, Шимали Американын вә Орта Асијанын 55 өлкәсинин хариҹи ишләр назирләри, јекдилликлә” онларын фәалијјәтләрини низамлајан “план гәбул етдиләр”. АБШ-дан олан јүксәк вәзифәли бир мә’мур һәмин тәдбирләр барәдә разылығыны билдирмиш вә бу тәдбирләрин терроризмә гаршы “јени гүввә” илә мүбаризә апармаға имкан вердијини вурғуламышдыр. Ҝөзләнилмәдән јүз милјонларла инсанлар өзләрини, бир журналын “тарихи мүбаризәнин башланғыҹы” адландырдығы вәзијјәтә дүчар етмиш олдулар (“The New York Times Magazine”). Антитеррор тәдбирләрин нә дәрәҹәдә мүвәффәгијјәтли олаҹағыны заман ҝөстәрәҹәкдир. Һәр неҹә олса да, терроризмә гаршы апарылан мүһарибә чохларында һәјәҹан вә горху һисси ојадыр, амма бу һал, Јеһоваја ҝүвәнәнләрә аид дејил.

6. а) Нәјә ҝөрә бә’зән кимләрә исә Јеһованын Шаһидләринин тутдуглары мәсиһчи битәрәфлији илә разылашмаг чәтин олур? б) Сијасәтә мүнасибәтдә Иса давамчыларына һансы нүмунәни верди?

⁶ Јахшы мә’лумдур ки, Јеһованын Шаһидләри сијаси битәрәфлик мөвгеји тутурлар. Инсанларын чоху бу ҹүр мөвге илә разыдырлар, амма јалныз сүлһ вахты; фөвгәл’адә вәзијјәтләр јарананда исә инсанлар дөзүмсүз олурлар. Чох вахт мүһарибә нәтиҹәсиндә јаранан горху вә инамсызлыг, инсанларда ҝүҹлү вәтәнпәрвәрлик һисси ојадыр. Бунунла әлагәдар, кимләрин исә күтләви һәрәкатлары дәстәкләмәк истәмәмәси бә’зиләрини тәәҹҹүбләндирә биләр. Буна бахмајараг, мәсиһчиләр билирләр ки, онлар Исанын “дүнјадан дејилсиниз” тапшырығына риајәт етмәлидирләр (Јәһја 15:19; 17:14-16; 18:36; Јагуб 4:4). Бунун үчүн сијаси вә иҹтимаи мәсәләләрдә битәрәфлији горујуб сахламаг тәләб олунур. Бу саһәдә Иса өзү ҝөзәл нүмунәдир. Камил мүдриклијә вә ҝөзәл габилијјәтә малик олан Иса јашадығы дөврүн ҹәмијјәтинин вәзијјәтини әһәмијјәтли дәрәҹәдә јахшылашдыра биләрди. Лакин о, сијасәтә гошулмады. Хидмәтинин әввәлиндә Шејтанын она тәклиф етдији дүнја падшаһлыглары үзәриндә һөкмранлыг етмәкдән гәти сурәтдә имтина етди. Сонрадан халгын ону сијаси вәзифәјә тә’јин етмәк ҹәһдини гәтијјәтлә рәдд етди (Матта 4:8-10; Јәһја 6:14, 15).

7, 8. а) Јеһованын Шаһидләринин сијасәтә мүнасибәтдә битәрәф мөвгеләри һансы мә’наны дашымыр вә нәјә ҝөрә? б) Ромалылара 13:1, 2 ајәләри зоракылыг тәтбиг етмәклә дөвләтә гаршы фәалијјәтдә иштирак етмәјин әлејһинә неҹә чыхыр?

⁷ Белә јанлыш нәтиҹә чыхармаг лазым дејил ки, ҝуја тутдуглары битәрәф мөвгеләри илә Јеһованын Шаһидләри зоракылығы дәстәкләјир вә ја она ҝөз јумурлар. Әҝәр бу белә олсајды, онда онлар “мәһәббәт вә сүлһ гајнағы олан Аллаһын” хидмәтчиләри олдугларыны неҹә тәсдиг едә биләрдиләр? (2 Коринфлиләрә 13:11). Онлар Јеһованын зоракылыға олан мүнасибәтини өјрәнмишләр. Мәзмурчу јазырды: “Рәбб салеһи сынајыр, фәгәт писдән вә зоракылығы севәндән ҹаны диксинир” (Мәзмур 11:5). Онлар һәмчинин Исанын һәвари Петерә дедији сөзләри дә хатырлајырлар: “Гылынҹыны јеринә гој, чүнки гылынҹ тутанларын һамысы гылынҹдан һәлак олаҹагдыр” (Матта 26:52).

⁸ Тарих јаланчы мәсиһчиләрин тез-тез ‘гылынҹ тутдугларына’ ачыг-ајдын шаһидлик етсә дә, буну Јеһованын Шаһидләри һаггында демәк олмаз. Онлар бу ҹүр фәалијјәтин һәр бир нөвүндән гачынырлар. Шаһидләр, Ромалылара 13:1, 2 ајәләриндә јазылан ҝөстәришә сәдагәтлә риајәт едирләр: “Һәр адам өз үзәриндә олан һакимләрә табе олсун; чүнки Аллаһ тәрәфиндән олмајан һаким јохдур, мөвҹуд олан һакимләр дә Аллаһ тәрәфиндән тә’јин олунмушдур. Буна ҝөрә, һакимә мүгавимәт ҝөстәрән Аллаһын гурдуғуна гаршы дурур; вә гаршы дуранлар өз-өзләрини мәһкумијјәтә дүчар едирләр”.

9. Јеһованын Шаһидләри терроризмлә һансы ики үсулла мүбаризә апарырлар?

⁹ Мадам ки, терроризм бу гәдәр зәрәр ҝәтирир, Јеһованын Шаһидләри онунла мүбаризәдә көмәк етмәли дејилләрми? Бәли, етмәлидирләр вә онлар буну едирләр дә. Биринҹиси, онлар өзләри һеч бир вәҹһлә терроризмдә иштирак етмирләр. Икинҹиси, онлар инсанлара, өзүндән зоракылығын бүтүн нөвләрини хариҹ едән мәсиһчи принсипләрини өјрәдирләрa. Өтән ил Јеһованын Шаһидләри инсанлара бу ҹүр мәсиһчи һәјат тәрзини өјрәнмәјә көмәк едәрәк хидмәтдә 1 202 381 302 саат вахт кечирмишләр. Бу вахт әбәс јерә итирилмәмишдир, белә ки, нәтиҹәдә 265 469 адам зоракылыгдан гәти сурәтдә имтина етдијини ачыг шәкилдә ҝөстәрәрәк, Јеһованын Шаһидләри кими вәфтиз олунмушдур.

10. Буҝүнкү дүнјада зоракылыға сон гојулаҹағына шанс нә гәдәрдир?

¹⁰ Бундан әлавә Јеһованын Шаһидләри дәрк едирләр ки, өз гүввәләри илә дүнјаны писликдән һеч заман азад едә билмәјәҹәкләр. Бу сәбәбдән онлар бүтүн үмидләрини буну баҹаран Шәхсә — Јеһова Аллаһа бағлајырлар (Мәзмур 83:18). Ҝөстәрдикләри сәмими сә’јләрә бахмајараг, инсанлар зоракылыға сон гоја билмирләр. Мүгәддәс Китабда Аллаһын илһамы алтында бизим дөвр — “ахыр ҝүнләр” һаггында белә хәбәрдарлыг јазылмышдыр: “Пис адамлар вә сахтакарлар исә, алдадыб алданараг, ҝетдикҹә даһа бетәр олаҹаглар” (2 Тимотејә 3:1, 13). Бу нөгтеји-нәзәрдән бахсаг, инсанларын пислик үзәриндә гәләбә чалмасына шанслары аздыр. Диҝәр тәрәфдән исә Јеһованын зоракылығы бүтүнлүклә вә әбәди олараг арадан галдыраҹағына үмид етмәјә әсасымыз вар (Мәзмур 37:1, 2, 9-11; Сүлејманын мәсәлләри 24:19, 20; Ишаја 60:18).

Јахынлашан һүҹум гаршысында горхмаз галмаг

11. Зоракылығы көкүндән гопармаг үчүн Јеһова артыг һансы аддымлары атмышдыр?

¹¹ Сүлһ Аллаһы зоракылыға нифрәт етдији үчүн, Онун бу пислијин әсас мәнбәји олан Шејтан Иблиси мәһв етмәк үчүн ҝөрдүјү тәдбирләрин сәбәбини баша дүшмәк олар. Аллаһын ирадәсинә мүвафиг олараг, баш мәләк олан Микајыл — Аллаһын тахта уҹалдылмыш Падшаһы Иса Мәсиһ Шејтаны алчалдыҹы мәғлубијјәтә уғратмышдыр. Мүгәддәс Китабда бу һадисә белә тәсвир олунур: “Ҝөјдә мүһарибә олду. Микајыл вә онун мәләкләри әждаһа илә вурушдулар. Әждаһа вә онун мәләкләри онлара гаршы дөјүшдүләр. Амма ҝүҹләри чатмады. Вә ҝөјдә онлара артыг јер тапылмады. Иблис вә шејтан адланан бөјүк әждаһа, бүтүн дүнјаны алдадан гәдим илан јер үзүнә атылды, мәләкләри дә онунла бирликдә атылдылар” (Вәһј 12:7-9).

12, 13. а) 1914-ҹү ил һансы һадисә илә әламәтдардыр? б) Аллаһын Падшаһлығыны дәстәкләјәнләрә даир Һезекиелин пејғәмбәрлији габагҹадан нә дејир?

¹² Дүнја һадисәләри илә үст-үстә дүшән Мүгәддәс Китаб хронолоҝијасы 1914-ҹү или ҝөјдә мүһарибәнин баш вердији ил кими мүәјјән едир. Һәмин илдән дүнјадакы шәраит ҝетдикҹә писләшир. Вәһј 12:12 ајәси сәбәби изаһ едир: “Еј ҝөјләр вә ораларда јашајанлар, севинин! Јерә вә дәнизә вај олсун! Чүнки иблис, вахтынын аз олдуғуну биләрәк, бөјүк гәзәблә јаныныза енди”.

¹³ Ајдындыр ки, Иблисин гәзәбинә илк нөвбәдә Аллаһын мәсһ едилмиш хидмәтчиләри вә онларын јолдашлары олан “башга гојунлар” туш ҝәлирләр (Јәһја 10:16; Вәһј 12:17). Иблис, Аллаһа бел бағлајан вә Онун гурулмуш Падшаһлығына дәстәк верән инсанлара ҝүҹлү һүҹум едән заман, бу гаршыдурма тезликлә өзүнүн јүксәк нөгтәсинә чатаҹагдыр. Бу һәлледиҹи һүҹум барәдә “Һезекиел” китабынын 38-ҹи фәслиндә “Магог дијарындан олан... Гог”ун һүҹуму кими данышылыр.

14. Вахтилә Јеһованын Шаһидләри һансы јардымы алырдылар вә бу вәзијјәт һәмишә давам едәҹәкми?

¹⁴ Шејтанын ҝөјдән говулдуғу вахтдан, Вәһј 12:15, 16 ајәләриндә символик диллә дејилдији кими, мүхтәлиф сијаси структурларын сајәсиндә Аллаһын халгы бә’зән онун һүҹумларындан мүдафиә олунурду. Шејтанын сон һүҹуму заманы исә, Мүгәддәс Китабын ҝөстәрдији кими, Јеһоваја бел бағлајан кәсләрә һеч бир инсан гүввәләри тәрәфиндән јардым едилмәјәҹәк. Буна ҝөрә мәсиһчиләр горхмалы вә ја дәһшәтә ҝәлмәлидирләрми? Әсла јох!

15, 16. а) Јеһошафатын ҝүнләриндә Јеһованын өз халгына дедији руһландырыҹы сөзләр мүасир мәсиһчиләрә һансы никбинлији верир? б) Јеһошафат вә онун халгы, Аллаһын мүасир хидмәтчиләри үчүн һансы мә’нада нүмунә кими хидмәт едир?

¹⁵ Аллаһ өз халгыны, ејнилә Јеһошафат падшаһын ҝүнләриндә олдуғу кими дәстәкләјәҹәкдир. Биз охујуруг: “Бүтүн Јәһуда вә Јерусәлимдә отуранлар вә сән падшаһ Јеһошафат, јахшы динләјин; Рәбб сизә белә дејир: Бу бөјүк гәләбәликдән горхмајын вә дәһшәтә ҝәлмәјин; чүнки ҹәнҝ сизин дејил, анҹаг Аллаһындыр. [...] Бу сәфәр ҹәнҝ едәҹәк сиз дејилсиниз; еј Јәһуда вә Јерусәлим, сыраја дүзүлүб дурун, сизинлә бәрабәр олан Рәббин гуртулушуну ҝөрүн; горхмајын вә дәһшәтә ҝәлмәјин; сабаһ онлара гаршы чыхын; чүнки Рәбб сизинлә бәрабәрдир” (2 Тарихләр 20:15-17).

¹⁶ Јәһуда халгына дејилди ки, онлар дөјүшмәли олмајаҹаглар. Буна бәнзәр тәрздә Гог дијарындан олан Магог Аллаһын хидмәтчиләринә һүҹум едәндә, онлар әлләриндә силаһ өзләрини мүдафиә етмәли олмајаҹаглар. Онлар ‘дурмалы вә Рәббин гуртулушуна бахмалыдырлар’. Еһтимал ки, дурмаг — үмумијјәтлә һеч нә етмәмәк мә’насыны дашымыр, ахы Јеһошафатын ҝүнләриндә дә Аллаһын халгы бүтүнлүклә фәалијјәтсиз бир вәзијјәтдә дурмамышды. Биз охујуруг: “Вә Јеһошафат үзү үстә јерә гапанды вә бүтүн Јәһуда вә Јерусәлимдә отуранлар, Рәббә сәҹдә етмәк үчүн Рәббин өнүндә јерә гапандылар. [...] Вә халгла мәсләһәтләшдикдән сонра, Рәббә маһны охујанлары гојду, белә ки, ордунун өнүндә чыхдыглары заман зинәтлә һәмд едиб: Рәббә шүкр един, чүнки инајәти әбәдидир, десинләр” (2 Тарихләр 20:18-21). Ҝөрдүјүмүз кими, һәтта дүшмәнин һүҹуму гаршысында белә, халг јорулмадан Јеһоваја иззәт верирди. Бу һадисә, Јеһованын Шаһидләринә гаршы Гог өз һүҹумуна башлајаркән, онларын тәглид едәҹәкләри нүмунәдир.

17, 18. а) Јеһованын Шаһидләри Гогун һүҹумуна мүнасибәтдә мүсбәт әһвал-руһијјәни неҹә тәзаһүр етдирирләр? б) Бу јахынларда ҝәнҹ мәсиһчиләрә һансы хатырлатма верилмишди?

¹⁷ Гогун һүҹума башлајаҹағы вахтадәк вә ондан сонра да, Јеһованын Шаһидләри Аллаһын Падшаһлығыны дәстәкләмәјә давам едәҹәкләр. Онлар, бүтүн дүнја үзрә 94 600-дән артыг јығынҹагларда гүввә әлдә етмәјә вә сығынаҹаг тапмаға давам едәҹәкләр (Ишаја 26:20). Инди Јеһоваја мәрдликлә иззәт вермәк үчүн ән мүнасиб вахтдыр! Гогун јахынлашан һүҹумуну ҝөзләјәрәк Јеһованын Шаһидләри горху ичиндә ҝеријә чәкилмирләр. Әксинә, онлар имканлары јол вердији гәдәр даһа артыг дәрәҹәдә һәмд гурбаны ҝәтирмәјә тәшвиг олунурлар (Мәзмур 146:2).

¹⁸ Бу ҹүр мүсбәт әһвал-руһијјә, бүтүн дүнја үзрә таммүддәтли хидмәтә башлајан минләрлә ҝәнҹ оғлан вә гызларын нүмунәсиндә јахшы ҝөрүнүр. Һәтта 2002-ҹи илин вилајәт конгресләриндә бу ҹүр һәјат тәрзинин нә гәдәр үстүн олдуғуну вурғулајан “Ҝәнҹләр, һәјатынызы нәјә һәср едәҹәксиниз?” адлы трактатын бурахылышы һаггында е’лан едилмишдир. Һәм ҝәнҹләр, һәм дә јеткин мәсиһчиләр вахтында верилән бу ҹүр “шәһадәтләр [“хатырлатмалар”, ЈД]” үчүн миннәтдарлыг дујурлар (Мәзмур 119:14, 24, 99, 119, 129, 146).

19, 20. а) Мәсиһчиләр нәјә ҝөрә горхмамалы вә дәһшәтә ҝәлмәмәлидирләр? б) Өјрәнмәк үчүн олан нөвбәти мәгалә бизә нәдә көмәк едәҹәк?

¹⁹ Дүнјада баш верән вәзијјәтин неҹә олмасындан асылы олмајараг, мәсиһчиләрин горхмаға вә ја дәһшәтә ҝәлмәјә әсаслары јохдур. Онлар билирләр ки, тезликлә Аллаһын Падшаһлығы зоракылығын бүтүн формаларыны бирдәфәлик арадан галдыраҹаг. Онлара һәм дә тәсәлли верән одур ки, зоракылыг уҹбатындан өлән чох инсанлар дирилмә сајәсиндә һәјата гајтарылаҹаглар. Бу, дириләнләрдән бә’зиләринә Јеһова һаггында илк дәфә өјрәнмәјә имкан верәҹәји һалда, диҝәрләринә Она етдикләри сәдагәтли хидмәтләрини давам етдирмәк имканы верәҹәк (Һәвариләрин ишләри 24:15).

²⁰ Биз мәсиһчиләр, мәсиһчи битәрәфлијини горујуб-сахламағын нә гәдәр ваҹиб олдуғуну баша дүшүрүк вә буну етмәјә гәти гәрарлыјыг. Биз, ‘дуруб... Рәббин гуртулушуну ҝөрәҹәјимиз’ мө’ҹүзәли ҝүнә кими јашамаг истәјирик. Нөвбәти мәгалә буҝүнкү һадисәләрин Мүгәддәс Китаб пејғәмбәрликләринин маһијјәтини ҝетдикҹә даһа дәриндән анламаға имкан вердијини ҝөстәрмәклә, иманымызы мөһкәмләндирәҹәк.

[Һашијә]

Изаһ едә биләрсинизми?

• Бу ҝүн инсанларын әксәријјәти нәјә ҝөрә бәдбин әһвал-руһијјәјә маликдир?

• Нәјә ҝөрә Јеһованын Шаһидләри ҝәләҹәјә никбинликлә бахырлар?

• Бүтүн зоракылыгларын мәнбәји илә әлагәдар Јеһова артыг һансы аддымлар атмағы гәрарлашдырыб?

• Нәјә ҝөрә Гогун һүҹумундан горхмалы дејилик?

[21-ҹи сәһифәдәки шәкил]

Иса, мәсиһчи битәрәфлијини горујуб сахламагда нүмунәдир.

[23-ҹү сәһифәдәки шәкилләр]

Минләрлә ҝәнҹ Шаһидләр таммүддәтли хидмәтә севинҹлә башламышлар.

[Иҹазә илә]

UN PHOTO 186226/M. Grafman