Сыхынты вахтында Јеһова бизим галамыздыр
“Салеһләрин гуртулушу Рәбдәндир; сыхынты вахтында онларын галасыдыр” (МӘЗМУР 37:39).
1, 2. а) Иса өз шаҝирдләри үчүн неҹә дуа едирди? б) Аллаһын Өз халгына даир ирадәси нәдән ибарәтдир?
ЈЕҺОВА гадир Аллаһдыр. О, Она садиг олан инсанлары истәдији һәр бир үсулла мүдафиә етмәк игтидарындадыр. О, һәтта Өз халгыны бу дүнјанын галан инсанларындан һәгиги мә’нада ајырыб, тәһлүкәсиз вә сүлһүн һөкм сүрдүјү мүһитдә јерләшдирә биләрди. Лакин Иса сәмави Атасына шаҝирдләри барәсиндә дуа едирди: “Мән хаһиш етмирәм ки, Сән онлары дүнјадан ҝөтүрәсән. Хаһиш едирәм ки, онлары шәрдән горујасан” (Јәһја 17:15).
2 Јеһованын ирадәси бизи ‘дүнјадан ҝөтүрмәк’ дејил, ади инсанларын дүнјасында јашамаға вә онлара үмид вә тәсәлли хәбәрини чатдырмаға изн вермәкдир (Ромалылара 10:13-15). Лакин Исанын дуасындан ҝөрүнүр ки, биз бу дүнјада јашајаркән, “шәрин” һүҹумларына мә’руз гала биләрик. Итаәтсиз бәшәријјәт вә пис руһлар чохлу әзијјәт вә изтираблар верирләр, буна ҝөрә дә бә’зән мәсиһчиләрин дә сыхынтылары олур (1 Петер 5:9).
3. Һәтта Јеһованын садиг хидмәтчиләри белә нә илә гаршылашмалы олурлар, лакин Онун Кәламы бизә неҹә тәсәлли верир?
3 Бу ҹүр сынагларла гаршылашаркән заман-заман өзүнү зәиф һисс етмәк, руһдан дүшмәк тәбии һалдыр (Сүлејманын мәсәлләри 24:10). Мүгәддәс Китабда сыхынтыларла гаршылашан садиг киши вә гадынларын нүмунәси чохдур. Мәзмурчу дејир: “Салеһләр чох бәлаја дүчар олар, лакин Рәбб онларын һәр бириндән гуртарыр” (Мәзмур 34:19, МКШ). Бәли, е’тираф етмәк лазымдыр ки, һәтта “салеһләр” дә әзаба дүчар олурлар. Бә’зән мәзмурчуја бәнзәр тәрздә бизим дә ‘тагәтимиз кәсилир вә чох әзилмиш’ олуруг (Мәзмур 38:8). Бизә тәсәлли верән одур ки, “Рәбб гәлбисыныглара јахындыр... руһән әзилмишләри гуртарыр” (Мәзмур 34:18, МКШ; 94:19).
4, 5. а) Сүлејманын мәсәлләри 18:10 ајәсинә әсасән, Аллаһын мүдафиәсини тапмаг үчүн биз нә етмәлијик? б) Һансы аддымлары атмағын сајәсиндә биз Аллаһдан јардым ала биләрик?
4 Исанын дуасы илә әлагәдар Јеһова бизи һәгигәтән дә горујур. О ‘сыхынты вахтында бизим галамыздыр’ (Мәзмур 37:39). “Сүлејманын мәсәлләри” китабында буна бәнзәр ифадә ишләнилир: “Рәббин ады гүввәтли бир галадыр, салеһ гачыб она пәнаһ апарыр” (Сүлејманын мәсәлләри 18:10, МКШ). Бу ајәдән Јеһованын Өз јаратдыгларына неҹә зәриф гајғы ҝөстәрдији ҝөрүнүр. Аллаһ хүсусилә дә, санки мөһкәм галаја гачырлармыш кими, хиласы фәал сурәтдә Онда ахтаран салеһ инсанлара мүдафиә тәгдим едир.
5 Бәс сыхынты анларында мүдафиәни Јеһовада неҹә ахтармаг олар? Ҝәлин, Јеһовадан јардым алмағымыза көмәк едәҹәк үч ваҹиб аддыма диггәт јетирәк. Биринҹиси, биз сәмави Атамыза дуада мүраҹиәт етмәлијик. Икинҹиси, Онун мүгәддәс руһуна мүвафиг олараг һәрәкәт етмәк лазымдыр. Үчүнҹүсү исә, сыхынтыларымызы јүнҝүлләшдирмәјә гадир олан һәмиманлыларымызла үнсијјәт едәрәк, Јеһованын тапшырығына табе олмалыјыг.
Дуанын ҝүҹү
6. Мәсиһин һәгиги давамчылары дуаја һансы нөгтеји-нәзәрлә јанашырлар?
6 Тибб саһәси үзрә бә’зи мүтәхәссисләр, депрессијадан вә стрессдән мүалиҹә үсулу кими дуа етмәји мәсләһәт ҝөрүрләр. Дуаја бәнзәр раһат дүшүнҹә дәгигәләри сајәсиндә стрессин чыхарылмасы һәгигәтән мүмкүн олса да, чох вахт тәбиәтдән ҝәлән сәсләр вә ја һәтта күрәјин масаж едилмәси дә бу ҹүр тә’сир ҝөстәрир. Мәсиһин һәгиги давамчылары дуанын ролуну кичилтмирләр вә ону јалныз әһвал-руһијјәни галдырмаг үсулу сајмырлар. Дуа бизим үчүн Јараданла еһтирамлы үнсијјәт үсулудур. Дуа өзүнә бизим Аллаһа садиглијимизи вә е’тибарымызы дахил едир. Бәли, дуа мүгәддәс ибадәтимизин бир һиссәсидир.
7. Ҹәсарәтлә дуа етмәк нә демәкдир вә сыхынтыларымыза таб ҝәтирмәкдә бу ҹүр дуалар бизә неҹә көмәк едир?
7 Дуа едәркән биз Јеһоваја е’тибар етмәли, әминлик һисси дујмалыјыг. Һәвари Јәһја јазырды: “Аллаһын гаршысында малик олдуғумуз ҹәсарәт исә бундан ибарәтдир ки, әҝәр биз Онун ирадәсинә ујғун шәкилдә бир шеј диләјириксә, О бизи ешидир” (1 Јәһја 5:14). Али Һөкмдар, јеҝанә һәгиги Күлл-Ихтијар Аллаһ олан Јеһова, һәгигәтән дә Өз хидмәтчиләринин сәмими дуаларына хүсусилә диггәтлидир. Севән Аллаһымызын нараһатчылыг вә чәтинликләримизи Онунла бөлүшәркән бизи динләдијини билмәјин өзү артыг тәсәлли ҝәтирир (Филипилиләрә 4:6).
8. Садиг мәсиһчиләр нәјә ҝөрә һеч заман Јеһоваја дуа етмәкдән горхмалы вә ја буна лајиг олмадыгларыны дүшүнмәли дејилләр?
8 Садиг мәсиһчиләр һеч заман дуада Јеһоваја мүраҹиәт етмәкдән горхмалы дејилләр. Онлар буну етмәјә лајиг олмадыгларыны һисс етмәмәли вә јахуд әминсизлик тәзаһүр етдирмәли дејилләр. Е’тираф етмәк лазымдыр ки, әҝәр биз өзүмүзә үмидимизи итирмишиксә вә ја проблемләр уҹбатындан мә’јуслуға гапылмышыгса, Јеһоваја дуа етмәк арзумуз итә биләр. Белә һалларда јадда сахламалыјыг ки, Јеһова ‘халгыны тәсәлли едир вә кәдәрли оланлара аҹыјыр’ (Ишаја 49:13; 2 Коринфлиләрә 7:6). Гәлбимиздә һәјәҹан вә дәрин сыхынты һисси оланда, сәмави Атамызын галамыз олдуғуну һисс едәрәк, Она хүсуси ҹәсарәтлә мүраҹиәт етмәјимиз ваҹибдир.
9. Дуада Аллаһа мүраҹиәт едән инсан нәјә ҝөрә имана малик олмалыдыр?
9 Дуа ән’амы бизә там көмәк етсин дејә, әсл имана малик олмаг лазымдыр. Мүгәддәс Китабда дејилир: “Аллаһа јахынлашан иман етмәлидир ки, О вар вә Ону ахтаранлара мүкафат верир” (Ибраниләрә 11:6). Имана малик олмаг — Аллаһын мөвҹуд олдуғуна, Онун вар олдуғуна инанмагдан даһа чох мә’на дашыјыр. Һәгиги имана малик олмаг — Аллаһын бизим һәр шејдә она итаәткарлығымызы мүкафатландырмаг истәдијинә вә буну етмәјә гадир олдуғуна гәтијјәтлә әмин олмаг демәкдир. “Рәббин ҝөзләри салеһләрә, гулаглары онларын дуаларына тәрәф јөнәлмишдир” (1 Петер 3:12). Әҝәр Јеһованын зәрифликлә бизим гајғымыза галдығыны һәмишә јадда сахлајырыгса, дуаларымыз хүсуси мә’наја малик олаҹаг.
10. Јеһовадан руһани јардым алмаг үчүн, дуаларымыз неҹә олмалыдыр?
10 Биз үрәкдән дуа едәндә, Јеһова бизи ешидир. Мәзмурчу јазырды: “Ја Рәбб, ҹаваб вер! Бүтүн гәлбимлә Сәни сәсләјирәм” (Мәзмур 119:145, МКШ). Бир чох дин нүмајәндәләринин сөјләдикләри әзбәрләнмиш дуалардан фәргли олараг, бизим дуаларымыз јекнәсәг вә көнүлсүз дејил. Биз Јеһоваја бүтүн гәлбимизлә дуа едәндә, сөзләримиз мә’на илә долу олур. Бу ҹүр сәмими дуалардан сонра гајғыларымызы Јеһованын үзәринә гојдуғумуз үчүн јүнҝүллүк һисс едирик. Мүгәддәс Китабын вә’д вердији кими, Јеһова бизә дәстәк олаҹаг (Мәзмур 55:22; 1 Петер 5:6, 7).
Аллаһын руһу јардымчымыздыр
11. Биз Јеһовадан көмәк диләмәји давам етдирәндә, О һансы тәрздә ҹаваб верә биләр?
11 Јеһова дуаны ешитмәклә бәрабәр, она ҹаваб да верир (Мәзмур 65:2). Давуд јазмышдыр: “Сыхынтым ҝүнүндә сәни чағырарам; чүнки мәнә ҹаваб верәрсән” (Мәзмур 86:7). Иса өз шаҝирдләрини Јеһовадан көмәк диләмәји давам етдирмәјә тәшвиг едирди, чүнки ‘Сәмави Ата ондан диләјәнләрә Мүгәддәс Руһ верир’ (Лука 11:9-13). Бәли, Аллаһын фәал гүввәси Онун халгы үчүн јардымчы, јә’ни тәсәлливериҹи кими хидмәт едир (Јәһја 14:16).
12. Проблемләр дәфедилмәз ҝөрүнәндә, Аллаһын руһу неҹә көмәк едә биләр?
12 Һәтта сынаглар заманы белә, Аллаһын руһу бизә “үстүн гүдрәт” верә биләр (2 Коринфлиләрә 4:7). Чох чәтинликләр јашамыш һәвари Павел әминликлә демишди: “Мәни Мөһкәмләндирән васитәсилә һәр шеји етмәјә гадирәм” (Филипилиләрә 4:13, И–93). Бу ҝүн чох мәсиһчиләр Аллаһа хаһишләрлә мүраҹиәт едәркән, буна бәнзәр ҝүҹ алдыгларыны һисс едирләр. Чох вахт елә олур ки, Аллаһын руһунун көмәји сајәсиндә, бизи сыхышдыран проблемләр артыг о гәдәр дә дәфедилмәз ҝөрүнмүр. Аллаһдан бу ҹүр гүввә алараг, биз һәваринин сөзләрини тәкрарлаја биләрик: “Һәр тәрәфдән сыхышдырылырыг, лакин әзилмирик; чашгынлыг ичиндәјик, лакин чарәсиз дејилик; тә’гиб едилирик, амма тәрк едилмәмишик; јыхылырыг, амма јох едилмирик” (2 Коринфлиләрә 4:8, 9).
13, 14. а) Сыхынты анларымызда Јеһова Өз Кәламы васитәсилә дәфәләрлә бизим үчүн галаја неҹә чеврилмишдир? б) Мүгәддәс Китаб принсипләрини тәтбиг етмәк шәхсән сәнә неҹә көмәк едир?
13 Мүгәддәс руһ Аллаһын Кәламынын бизим фајдамыз үчүн јазылмасында вә горунуб сахланылмасында да рол ојнамышдыр. Сыхынтылы анларымызда Јеһова Өз Кәламы васитәсилә бизим үчүн дәфәләрлә галаја неҹә чеврилмишдир? Мәсәлән, бизә сағлам шүур вә дәрракә вермәклә (Сүлејманын мәсәлләри 3:21-24). Мүгәддәс Китаб бизим әгли габилијјәтләримизи инкишаф етдирир вә дүшүнҹәмизи јахшылашдырыр (Ромалылара 12:1). Аллаһын Кәламыны мүнтәзәм охумағын вә өјрәнмәјин, һәмчинин ону һәјатда тәтбиг етмәјин сајәсиндә ‘һиссләри хејирлә шәри ајырд етмәјә’ алышдырмаг олар (Ибраниләрә 5:14). Еһтимал ки, сән өзүн, Мүгәддәс Китаб принсипләринин чәтин анларда мүдрик гәрарлар гәбул етмәјә көмәк етдијинә әмин олмусан. Мүгәддәс Китаб бизи нараһат едән проблемләрин һәллиндә бизә үзагҝөрән олмагда көмәк едир вә практики мәсләһәтләр верир (Сүлејманын мәсәлләри 1:4).
14 Аллаһын Кәламы бизә даһа бир гүввә мәнбәји — хилас олмаға үмид тәгдим едир (Ромалылара 15:4). Мүгәддәс Китабда дејилир ки, бәдбәхтчиликләр даима баш вермәјәҹәк. Һәр бир изтирабларымыз мүвәггәтидир (2 Коринфлиләрә 4:16-18). Биз, ‘јалан данышмајан Аллаһын заман башламаздан габаг вә’д етдији’ “әбәди һәјат үмидинә” маликик (Титуса 1:2). Әҝәр биз Аллаһ тәрәфиндән вә’д едилмиш ҝөзәл ҝәләҹәк һаггында һәмишә хатырлајараг бу үмидә севинириксә, бәдбәхтликләрә таб ҝәтирә биләҹәјик (Ромалылара 12:12; 1 Салониклиләрә 1:3).
Јығынҹаг Аллаһын мәһәббәтинин тәзаһүрүдүр
15. Мәсиһчиләр бир-бирләринә неҹә көмәк едә биләрләр?
15 Сыхынты анларымызда Јеһова бизә һәм дә мәсиһчи јығынҹағындакы баҹы-гардашларымызла достлуг үнсијјәтләри васитәсилә көмәк едир. Мүгәддәс Китаб изаһ едир: “Дост һәр вахт севәр; вә сыхынты үчүн гардаш доғулмушдур” (Сүлејманын мәсәлләри 17:17). Аллаһын Кәламы јығынҹағын бүтүн үзвләрини һөрмәтдә бир-бирини габагламаға вә бир-бирләрини севмәјә тәшвиг едир (Ромалылара 12:10). Һәвари Павел јазырды: “Һәр кәс өзүнүн мәнфәәтини дејил, башгасынынкыны ахтарсын” (1 Коринфлиләрә 10:24). Бу ҹүр әһвал-руһијјә бизи, өз чәтинликләримиздән чох башгаларынын тәләбатлары барәсиндә дүшүнмәјә тәшвиг едир. Биз башгаларына көмәк едәндә, өзүмүз дә мүәјјән дәрәҹәдә хошбәхтлик вә мәмнунлуг һисс едирик вә өз јүкүмүз јүнҝүлләшир (Һәвариләрин ишләри 20:35).
16. Һәр бир мәсиһчи башгалары үчүн руһландырма мәнбәји неҹә ола биләр?
16 Руһән јеткин киши вә гадынлар башгаларыны гүввәтләндирмәкдә ваҹиб рол ојнајырлар. Бунун үчүн онлар садә вә һәссас олмаға чалышырлар (2 Коринфлиләрә 6:11-13). Һамы ҝәнҹләри тә’рифләмәјә, тәзәләри дәстәкләмәјә вә кәдәрли оланлары руһландырмаға вахт тапанда, јығынҹаг бөјүк хејир-дуа әлдә едир (Ромалылара 15:7). Гардашсевәрлик һәм дә бизә башгасы һаггында шүбһәјә дүшмәмәјә көмәк едир. Биз тәләсик олараг белә гәрара ҝәлмәјәҹәјик ки, киминсә чәкдији чәтинликләр онун руһани зәифлијинин әламәтидир. Павел мәсиһчиләрә тә’кидлә мәсләһәт едир ки, онлар “ҹәсарәтсизләри”, јә’ни кәдәрли оланлары руһландырсынлар (1 Салониклиләрә 5:14). Мүгәддәс Китаб ҝөстәрир ки, һәтта садиг мәсиһчиләрин дә чәтин вахтлары олур (Һәвариләрин ишләри 14:15).
17. Мәсиһчи гардашлығынын бағларыны мөһкәмләтмәк үчүн һансы имканларымыз вар?
17 Мәсиһчи ҝөрүшләриндә бизә ҝөзәл имкан верилир ки, бир-биримизә тәсәлли верәк вә бир-биримизи руһландыраг (Ибраниләрә 10:24, 25). Лакин гаршылыглы руһландырма јалныз јығынҹаг ҝөрүшләриндә баш вермир. Аллаһын халгы гејри-рәсми шәраитдә дә фајдалы үнсијјәтдә олмаг үчүн имканлар ахтарыр. Ким исә чәтин вәзијјәтләрә дүшүрсә, биз көмәк етмәјә һазыр олаҹағыг, чүнки арамызда артыг сых достлуг әлагәләри јараныб. Һәвари Павел јазырды: “Бәдәндә ајрылыг олмасын, әксинә бүтүн үзвләр бир-биринин гајғысына галсын. Буна ҝөрә, әҝәр бир үзв әзаб чәкирсә, диҝәрләри дә онунла бәрабәр әзаб чәкир; үзвләрдән бири иззәт газанырса, диҝәрләри дә онунла бәрабәр севинир” (1 Коринфлиләрә 12:25, 26).
18. Руһдан дүшәркән һансы мејлдән гачынмаг лазымдыр?
18 Бә’зән руһдан дүшәрәк дүшүнә биләрик ки, мәсиһчи гардашларымызла үнсијјәт үчүн ҝүҹүмүз галмајыб. Бу ҹүр фикирләри өзүмүздән говмалыјыг ки, өзүмүзү һәмиманлыларын верә биләҹәкләри тәсәлли вә јардымдан мәһрум етмәјәк. Мүгәддәс Китаб бизә хәбәрдарлыг едир: “Тәнһалығы севән нијјәтинин ардынҹа дүшүр, сағлам шүура зидд ҝедир” (Сүлејманын мәсәлләри 18:1, МКШ). Баҹы вә гардашларымыз, Аллаһын бизә олан гајғысыны тәзаһүр етдирирләр. Әҝәр биз Аллаһын севҝи долу јардымыны гәбул етсәк, сыхынты анында бизим үчүн асан олаҹаг.
Мүсбәт әһвал-руһијјәни гору
19, 20. Мүгәддәс Китаб бизә мәнфи фикирләрлә мүбаризә апармаға неҹә көмәк едир?
19 Руһдан дүшән вә гәмли олан заман, асанлыгла мәнфи фикирләрә гәрг ола биләрик. Мәсәлән, бә’зиләри бәдбәхтчиликлә гаршылашан заман өз руһани вәзијјәтләринә шүбһә етмәјә башлајыр вә дүшүнүрләр ки, онларын чәтинликләри — Аллаһын наразылығынын әламәтидир. Лакин јадда сахламаг лазымдыр ки, Јеһова һеч кими “писликлә имтаһан етмир” (Јагуб 1:13). Мүгәддәс Китабда дејилир ки, Аллаһ “истәјәрәк ҹәфа етмәз вә инсан оғулларыны кәдәрләндирмәз” (Јеремјанын мәрсијәләри 3:33). Әксинә, хидмәтчиләри изтираб чәкәндә Јеһова дәриндән кәдәрләнир (Ишаја 63:8, 9; Зәкарја 2:8).
20 Јеһова — “мәрһәмәтли Ата вә һәр ҹүр тәсәлли верән Аллаһдыр” (2 Коринфлиләрә 1:3). О бизим гајғымыза галыр вә бизи Өз вахтында уҹалдаҹаг (1 Петер 5:6, 7). Һәмишә јадда сахламаг лазымдыр ки, Аллаһ бизә зәриф һиссләр бәсләјир, бу исә бизә мүсбәт әһвал-руһијјәни горумаға вә һәтта севинмәјә көмәк едәҹәк. Јагуб јазырды: “Гардашларым, мүхтәлиф имтаһанлара дүшәндә, буну бөјүк бир севинҹлә гәбул един” (Јагуб 1:2). Нәјә ҝөрә? О, ҹаваб верир: ‘Чүнки сынагдан уғурла чыхаркән, Рәббин Ону севәнләрә вә’д етдији һәјат таҹыны алаҹагсыныз’ (Јагуб 1:12).
21. Гаршылашдыглары һәр бир чәтинликләрдә Аллаһ Она садиг инсанлара һансы зәманәти верир?
21 Исанын хәбәрдар етдији кими, дүнјада кәдәримиз олаҹагдыр (Јәһја 16:33). Лакин Мүгәддәс Китаб вә’д едир ки, нә гәм-гүссә, нә сыхынты, нә тә’гибләр, нә аҹлыг, нә үрјанлыг, нә тәһлүкә бизи Јеһованын вә Оғлунун мәһәббәтиндән мәһрум едә билмәз (Ромалылара 8:35, 39). Һәр бир сыхынтымызын мүвәггәти олдуғуну билмәк неҹә дә тәсәлливериҹидир! Бәшәр изтирабларынын сонуну ҝөзләдијимиз бир вахтда севән Атамыз Јеһова бизи горујур. Әҝәр биз Онун мүдафиәсиндән истифадә едириксә, О ‘мәзлумларын пәнаһҝаһы, сыхынты анларында мүдафиә галасы’ олаҹагдыр (Мәзмур 9:9, МКШ).
Биз нә өјрәндик?
• Бу пис дүнјада јашајаркән мәсиһчиләр нәји ҝөзләмәлидирләр?
• Сынаглар заманы ҹошғун дуалар неҹә мөһкәмләндирир?
• Аллаһын руһу неҹә көмәк едир?
• Биз бир-биримизә неҹә көмәк едә биләрик?
[14-ҹү сәһифәдәки шәкил]
Мөһкәм галаја гачырыгмыш кими биз хиласы Јеһовада ахтармалыјыг.
[16-ҹы сәһифәдәки шәкилләр]
Руһән јеткин мәсиһчиләр һәр бир шәраитдә башгаларыны тә’рифләјир вә руһландырырлар.